34 Leai Se Mea e Fefe Ai i E Amioleaga

“Leai Se Mea e Fefe Ai i E Amioleaga,” mataupu 34 o le Au Paia: O Le Tala o le Ekalesia a Iesu Keriso i Aso e Gata Ai, Voluma 2, Leai Se Lima Eleelea, 1846–1893 (2020)

Mataupu 34: “Leai Se Mea e Fefe Ai i E Amioleaga”

Mataupu 34

Leai Se Mea e Fefe Ai i E Amioleaga

Ata

Tamaitusi e faaulutalaina Aisea Tatou Te Faatino Ai Faaipoipoga Faaautaunonofo

I le aso 8 o Mati, i le 1885, sa ala ai Ida Udall i lona aso fanau lona luasefulu-fitu i se susulu matagofie o le la. Ae e pei ona ia faafeiloaia se aso mafanafana i le iuga o le tau malulu, sa ia iloa sa tatau ona ia faaeteete pe a laa atu i fafo. O le tele o aso sa tatau ona ia nofo i totonu seia goto le la—nei iloa o ia e se leoleo a le Iunaite Setete.¹

Ua valu masina talu ona sola mai Ida i lona fale i St. Johns, Arisona, e alu i “lalo,” o se faaupuga ua amata ona faaaoga e le Au Paia e faatusa ai le olaga lalafi mai le tulafono. I lena taimi, o lona toalua, o David, sa molia i le faaipoipoga faaautaunonofo ma sa alu i le faamasinoga faatasi ma isi Au Paia e toalima. Toeitiiti fasefulu tamaloloa na molimau i faamasinoga, ma o le toatele o i latou sa molimau sese e faasaga i le Au Paia. “E foliga mai e leai se tulafono po o se faaolataga mo Mamona i Arisona,” na tusi atu ai David ia Ida i lena taimi.²

Ina ua maea le faamasinoga, o le toalima o alii e toaono sa faasalaina i faaipoipoga faaautaunonofo. E toatolu alii na faasala i le tolu ma le afa tausaga i le falepuipui i Detroit, Michigan, e lua afe maila le mamao ese. Nao David na aloese mai le faasalaina, ae ona o lana mataupu sa tolopo mo le ono masina ao sue e le faamasinoga nisi molimau e faasaga ia te ia—e aofia ai Ida.³

Ina ua uma ona ia tuua Arisona, sa nofo Ida i le fale o le tama o David ma lona tina fai i Nifae, o se taulaga pe a ma le valusefulu maila i saute o le Aai o Sate Leki. Nao tagata vavalalata lava o le aiga o Ida ma ana uo sa iloa le mea na i ai o ia.

E lei faaaluina lava sona taimi faatasi ma lona aiga faatulafono, o lea la i le taimi muamua sa ia lagona ai e pei sa ia nofo faatasi ma tagata ese. Ae talu mai lena taimi ua faatupuina lona alofa ia te i latou ma faauo atu i ona tuaoi fou, e aofia ai ma isi ava faaautaunonofo o loo lalafi e puipuia o latou aiga. O le auai atu i fono faalelotu ma talanoa ai ua fesoasoani nei e faafiafiaina ona aso uumi, na o ia.⁴

I le aso fanau o Ida, sa faia e ana uo ma lona aiga i Nifae se pati mo ia. Ao i latou sa pele i lona loto—o ona matua, David, ma le toalua muamua o David, o Ella—sa faitau selau maila le mamao ese. Na te lei vaai lava ia David mo le toeitiiti ono masina. Ma o lona toesea sa lagona ai e ia le faigata aua o lea ua ia taulai atu i le mauaina o le la pepe muamua i ni nai vaiaso.⁵

I se taimi puupuu talu ona uma le pati o le aso fanau, sa maua ai e Ida se kopi o se nusipepa mai Arisona. Ina ua ia tatalaina le pepa, sa faateia o ia i le vaai atu i se ulutala o faasilasila mai ai le maliu o lona tina, o Lois Pratt Hunt. Sa nao le fasefulu-valu tausaga o Lois, ma sa lei saunia Ida e faamamulu atu o ia.

Sa aveeseina lemu mai e uo a Ida le nusipepa mai ona lima ma nonofo faatasi ma ia seia po. I ni nai itula mulimuli ane, sa ia faatiga ai ma fanauina ai se teine malosi, mata lanu moana na ia faaigoaina o Pauline.

O vaiaso na mulimuli ane sa vave ma faatumulia i le faanoanoa ma le olioli, ae sa faafetai Ida i le i ai o Pauline faatasi ma ia. “Sa faamanuiaina au i se afafine pele laitiiti mo au lava ia,” na ia tusi ai i lana api talaaga. “Sa ou faafetai i le Atua lea ua i ai se mea ou te ola ma ou galue agai i ai.”⁶

I lena tau totogo, i Iuta i Matu, o Sagwitch, ma lona faletua o Moyogah, ma isi Shoshone e sefuluono sa agai atu i se aega e agai atu i le malumalu i Logan.⁷ Sa faamaeaina ma faapaiaina le malumalu i le tausaga muamua atu, o se molimau o le faatuatua ma le galulue malosi o le Au Paia i Iuta i matu ma Idaho i saute. I le lotolotoi o i latou na galulue punouai e fausia le malumalu sa i ai Sagwitch ma isi Au Paia Shoshone.⁸

Na malaga mai le au Shoshone i se auala mamao ia oo atu i le malumalu. Ua atoa le sefululua tausaga talu ona auai Sagwitch ma le silia i le luaselau isi Shoshone i le Ekalesia. Na latou tapuai i lo latou lava uarota ma la latou lava gagana.⁹ Ua faamauina Sagwitch ma Moyogah i le Maota o Faaeega,¹⁰ ma o le atalii o Sagwitch o Frank Timbimboo Warner ua valaaulia o se faifeautalai i le lotolotoi o le au Shoshone.¹¹

Ae o le osofaiga a le Ami a le I.S. i le tolauapiga a le au Shoshone i le autafa o le Vaitafe o Bear na mafatia ai pea e na sao mai ai, ma sa faaauau ona toia i latou i isi faigata. Ina ua uma ona ia auai i le Ekalesia, sa maua e Sagwitch ma ona tagata se fanua i le itu i saute o Idaho e faamautu ai ma faia faatoaga. Ae i ni nai masina talu ona taunuu le au Shoshone, sa amata ona fefefe tagata i se taulaga lata ane sa le auai i le Ekalesia faapea ua faaoso e Au Paia papae Initia e osofaia i latou. Sa faafefe e tagata o le taulaga le au Shoshone ma faamalosia i latou e tuua a latou fanua ina ua faatoa amata la latou seleselega. Na toe foi atu le au Shoshone i le tausaga na sosoo ai, ae ua aina e se akerise ma manu taaloa a latou faatoaga ma mea toto.¹²

I lalo o le taitaiga a Peresitene Ioane Teila, sa lei leva ae maua e taitai o le Ekalesia se fanua mo le au Shoshone e faasolo atu i le tuaoi i le itu i matu o Iuta.¹³ O lea la o le latou tamai taulaga, o Washakie, sa i ai ni nai fale, o pa, o se fale tui uamea, o se faleoloa tuufaatasi, ma se faleaoga.¹⁴

O le faatulagaina o se olaga fou sa faigata, ae sa le taofia ai Sagwitch ma ona tagata mai le fesoasoani e fausia le malumalu. I le utiuti o lo latou taimi avanoa, na o mai ai alii o le nuu i taavale solofanua ma nofoaafi i Logan, e fesoasoani i le lauina o le maa. O isi taimi latou te saunia ai le sima e faapipii faatasi ai puipui o le malumalu pe palu foi le sima e ufiufi ai puipui i totonu. E oo atu i le taimi e faapaia ai le malumalu, ua foai atu e le au Shoshones le afe o itula e galulue ai e fausia le maota paia.¹⁵

Na galue foi Sagwitch ia, e ui ua matua o ia ma na maila lona lima mai le fasiga tele i le Bear River. E le mavae lava le fasiga tele mai mafaufau o tagata. O le tele o e na sao mai ua faatusaina o latou tausaga mai le tele o tausaga talu mai lena aafiaga matautia.¹⁶ E le mafai ona galo ia i latou matua, uso, tane, ava, fanau, ma fanau a fanau na maliliu.

I le aso o le fasiga tele, na le mafai e Sagwitch ona taofia fitafita mai le fasiotia o ona tagata. Ae i le tautotogo o le 1885, na latou faaalu ai le fa aso ma isi au Shoshones i le malumalu, e faia sauniga mo aiga na maliliu, e aofia ai le tele o e na fasiotia i Bear River.¹⁷

Ia Iuni 1885, na o mai ai Iosefa Samita lll ma lona uso o Alexander i le Teritori o Iuta i se isi misiona mo le Ekalesia Toefaatulagaina a Iesu Keriso o le Au Paia o Aso e Gata Ai. E pei ona taumafai i ai faifeautalai muamua mai le latou lotu, na mananao le au uso e faatalitonu le Au Paia i Iuta ma isi nofoaga e lei faatinoina e le perofeta o Iosefa Samita le faaipoipoga faaautaunonofo.¹⁸

O nisi o le Au Paia na matauina le la taunuu mai o Helen Whitney, le afafine e lima sefulu-ono-tausaga a Heber ma Vilate Kimball. Na masani Helen i le savali a le au uso. O le mea moni, na ia lolomiina i se taimi se tamaitusi, Faaipoipoga Faaautaunonofo e pei ona aoaoina e le Perofeta o Iosefa, e tali atu i manatu o Iosefa lll e uiga i lona tama. I le avea ai o ia lava ma ava faaautaunonofo a Iosefa Samita, na iloa e Helen ma le mautinoa na faatinoina e le perofeta le faaipoipoga faaautaunonofo.¹⁹

Sa sefulufa tausaga o Helen ina ua aoaoina o ia e lona tama i le mataupu faavae ma fesili atu ia te ia pe o le a faamauina o ia ia Iosefa. Na tetee ona lagona i le taimi muamua, ma na ia tali atu ma le ita tele i ana upu. Ae i le aluga o le aso, na ia mafaufau ai i le mea e fai, na ia iloa na alofa tele lona tama ia te ia ma e le aoaoina o ia i se mea e le tusa ai ma le finagalo o le Atua. Na ia malie i le faamauga, ma le talitonuga o le faatasiga o le a fesoasoani i le faaeaga o ia ma lona aiga ma fesootai atu ai ia Iosefa Samita i le faavavau.

O le faatulagaga na i ai e le o se mea ua masani ai i soo se ala lava. O Elena e laitiiti mo se faaipoipoga, e ui o ni isi o tamaitai e tutusa o latou tausaga sa faaipoipo i totonu o le Iunaite Setete i lena taimi. E faapei o isi ava a Iosefa, ua mae’a ona faamau atu o ia i le perofeta mo na’o le faavavau. E sea sea lava feiloai faaagafesootai o ia ma Iosefa, ma e na te lei faailoaina lava e faapea sa i ai se la fesootaiga faaletino. Sa faaauau ona nofo o ia i le fale o ona matua ma, faapei o isi taitoalua o autaunonofo i Navu, sa na o ia lava na iloa lana faamauga. A e sa i ai o ia i tausaga o le taimi o le amata ona faauo atu ni isi o tamaitai talavou, lea na faigata ai mo ia ona faamatala atu i ana uo pe aisea ua ia le toe faatasi atu ai i ni faatasiga faitele.²⁰

Ina ua mavae atu le maliu o le perofeta, na faaipoipo Helen ia Horace Whitney, le atalii o Newel ma Elizabeth Ann Whitney. Na sefulufitu tausaga o Helen ae luasefululua Horace i lea taimi, ma na alofa lava le tasi i le isi. I le aso o le faaipoipoga, na la folafola atu e pipii le tasi i le isi mo aso o totoe o o la olaga, ma afai e tusa ai, i le faavavau. Ae i le fatafaitaulaga i le malumalu o Navu, na la faaipoipo ai mo na o le olaga nei, ona ua uma ona faamau Helen ia Iosefa Samita mo le faavavau.²¹

Mulimuli ane, ina ua nonofo i Iuta, na malie ai Helen i faaipoipoga a Horace ia Lucy Bloxhan ma Mary Cravath. E lei umi ae maliu Lucy, ae na nonofo Mary ma Helen e tuaoi i le tasi ma na olioli i se sootaga manaia. Na fiafia lava le faaipoipoga a Helen ma Horace mo le tolusefulu-valu tausaga, na ia fanauina ni fanau se sefulutasi.²² Na maliu Horace i le aso 22 o Novema, 1884, ma ua faaalu e Helen nisi o ona taimi e tusi ai mo le Deseret News ma le Woman’s Exponent.²³

Sa le faigofie lava le faaipoipoga faaautaunonofo mo Helen, ae na ia puipuia lava ma le malosi. “Ana leai le mana o le molimau mai le Alii,” na ia tusia ai, “ou te le talitonu e mafai ona ou ioeina lava mo sina minute.”

I ni nai tausaga talu ona tusia le Faaipoipoga Faaautaunonofo e pei ona Aoaoina e le Perofeta o Iosefa, na lolomi ai e Helen se tamaitusi lona lua, Aisea Tatou te Faatino ai le Faaipoipoga Faaautaunonofo, lea na agai i faitioga masani i le faatinoga. “E leai lava se leaga,” na ia tau atu i ana tagata faitau, “i se mea e uunaia ai le tatalo, e tuliesea ai le manatu faapito mai le loto, ma faalautele ai le mafaia o lagona alofa faaletagata, ma taitai atu ai se tasi e faia ni mea lelei e sili atu o le agalelei i fafo atu o lona lava tamai lio.”²⁴

E ui lava o nisi taimi e lelava ai Helen e tusitusi, ae o le totogi na maua ai na totogi ai lana nusipepa ma isi faatau.²⁵ O ana faatonu na faitioina e na sauaina le Ekalesia mo le lagolagoina o le saolotoga i mea taulotu ae faaauauina le faasagatau i le Ekalesia. O ana upu na maua ai foi le faamalosiauga i ona uso a Au Paia.

“A fai e nei tagata le latou vaega, o le a faaalia mana o le Silisiliese mo i latou,” na ia faamautinoa ai ana tagata faitau ia Aokuso 1885. “E leai se mea tatou te fefefe ai i e amioleaga.”²⁶

Na faaalia e Helen taumafaiga a Iosefa lll e faataumamao lona tama mai le faaipoipoga faaautaunonofo o se osofaiga i le upumoni.²⁷ I se tasi aso, ao malaga i se nofoaafi i Iuta tutotonu,na ia matauina ai se alii na ulu mai i lana taavale ma nofo i ona luma. E lei foliga mai o ia o se tagta o le Ekalesia, ma na mafaufau Helen pe o ia o se sui o le malo iina e faamalosia tulafono e faasagatau i autaunonofo. Ina ua ulufafo le tagataese mai le nofoaafi, na iloa ai e Helen i lona tei tele o ia o Iosefa Samita lll.

“Ana ou iloaina o ia,” na ia tusi ai i lana api talaaga, “semanu e sili atu lou toa e faitioina ai ma faaosoosoina ai e faailoa atu au lava ia.”²⁸

E ui o le tele o le olaga o Helen na faaipoipo ai ia Horace, na ia iloaina na faamauina o ia i le perofeta o Iosefa Samita. E lei manino lava ia te ia le ala o le a galue ai ana lava sootaga i le faavavau. Ae na ia fuafua e maua uma faamanuiaga e faavavau na folafola mai e le Atua i lona aiga. Na faasaoina lava o ia i taimi uma e le Atua i ona taimi faigata, ma na ia faaauau ona talitonu o le a ia faasaoina mea uma i le iuga.

“Ua leva lava ona ou aoao e tuu atu mea uma ia te Ia, o le e sili atu le silafia nai lo tatou o mea o le a tatou fiafia ai,” na ia tusia ai.²⁹

I ni nai masina talu le fanauina o lana tamateine, na toe amata ai e Ida Udall ona malaga. Na malaga i lalo o se igoa fai, na ia nofo ai mo ni nai vaiaso i se taimi i ni uo eseese ma aiga i Iuta.³⁰ O le a tu David mo le faamasinoga ia Aokuso 1885. Ona e lei mafai e loia ona faatulaga se moliaga autu e faasaga ia te ia mo le autaunonofo, o lea na latou liliu atu ai i se moliaga pepelo a ona fili i St. Johns na tuuaia ai o ia i se taimi na muamua atu.³¹

Na vaai mulimuli Ida ia David ia Me, 1885, i le lua masina talu ona fanau Pauline. Talu mai lena taimi, na maua ai e Ida se tusi mai ia David na faaalia ai le faanoanoa i mea uma ua ia onosaia ona o ia.

“E sili atu, o ou lagona ia i nisi taimi, pe ana ou puapuaga i le falepuipui nai lo lou faaaogaina o se isi igoa ma sola solo ai ona o le fefe ina nei iloaina,” na ia tusi atu ai.³²

Ae na faamoemoe Ida o lana taulaga o le a aoga ai le taumafaiga, ae maise lava o le tele o tagata e talitonu o le a faasaolotoina David. Ao ia faatalitali i talafou o le faamasinoga i Arisona, na ia maua le faamafanafanaga i le tausia o Pauline. O le tausia o manaoga o le pepe o nisi taimi pau lea o le mea na aveese ai lona mafaufau mai le popole tele.³³

I le aso 17 o Aokuso, na taunuu mai ai le talafou ua faasalaina David i le moliaga o le pepelo ma nofosala i le falepuipui mo le tolu tausaga. Na faanoanoa Ida, ae na ia faamoemoe ia tau lava ia mafai ona ia toe foi atu i lona aiga i Arisona. Ae ui i lea, na fautuaina e le Aposetolo o George Teasdale ia aua nei alu ese mai le lafi pea. Afai e faasaoina David mai lea moliaga o le pepelo, o le a taumafai loa ona fili e toe faasala o ia i le faaautaunonofo.

Na mulimuli Ida i le fautuaga a le aposetolo ma e lei toe foi i Arisona.³⁴ Ae o aso uma lava, na faateteleina ai lona naunau e fiafaalogo ia David i le falepuipui. E na o le faatasi ona ia mafai ona tusi atu i lona aiga, o lea na ia faalagolago ai ia Ella e auina atu ia te ia kopi o ana tusi. E ui ina feagai foi Ella ma ona luitau, ae maise lava ina ua maliu lana tamaitiiti laitiiti lava o Mary, ia Oketopa 1885.

Mo le tolu masina, e lei maua lava e Ida ni tusi mai ia David. Ina ua taunuu mulimuli ane se afifi o ana tusi, na ia iloa ai na ia amata ona faaaoga se igoa faalilolilo mo ia. I le faaeteete nei iloaina o ia, na faaigoa ai e David o ia i le igoa o lona tina, o Lois Pratt.³⁵

I lena tautoulu, ao lafi mai leoleo o le Aai o Sate Leki i saute, na valaaulia ai e Peresitene Teila Jacob Gates i se isi misiona i Hawaii. Ua atoa le ono tausaga talu ona foi mai Jacob mai lana misiona muamua i atu motu. I lena taimi, na la faaipoipo ai ma Susie Young, lea ua igoa nei ia Susa. Na nonofo i Provo, ma tausia le la fanau e toatolu faatasi ma le tasi o loo faatalitali i ai. O Bailey, le atalii o Susa mai lana faaipoipoga muamua, na nonofo foi ma i latou. Ae ui i lea, o lana tama teine o Leah, na nofo pea ma le aiga o lona tama i Iuta i matu.

O le valaauga faamisiona faafuasei o Jacob na popole ai Susa ma tumu i fesili. Na tau atu e le tusi ia Jacob ia alu i Hawaii i totonu o le tolu vaiaso, ma na itiiti ai se taimi mo ia e faatulaga ai ana pisinisi. E lei taua mai foi pe mafai ona ia ave lona aiga, e pei ona faatagaina ai faifeautalai i nisi taimi.

Na manao Susa e o faatasi ma ia ma ave tamaiti, ae na leai sona faamoemoe. “Mai le leo o le tusi a Jacob, e le manatu o ia na manaomia ona ou alu,” na ia tusi atu ai i lona tina i le aso na sosoo ai. “E mafai la ona e vaai faalemafaufau i lou lumanai i le isi tolu tausaga.”³⁶

Na talia vave lava e Jacob le valaau, ae na ia fesili ia Peresitene Teila pe mafai ona latou o ma Susa ma tamaiti. “Ou te manao e o faatasi ma i latou,” na ia tusi atu ai. Na ia faamanatu i le perofeta na i ai muamua Susa i Hawaii ma e masani lelei i le eria.³⁷

E lei vave mai se tali, ma na saunia Susa e auina atu Jacob na o ia. Na ia iloaina o le isi tolu faifeautalai na maua le faatagaga e ave o latou aiga i Laie, lea na le lava ai fale, o lea na te lei faamoemoeina ai lea lava faamanuiaga. Ae, toe tasi le vaiaso tuua Iuta, na maua ai e Jacob se tusi e faataga ai o ia e ave lona aiga.³⁸

Na faavavevave lava ona saunia Susa ma Jacob. Mai isi foi mea, na la tusi atu ia Alema Dunford, le tane muamua a Susa, e fesili i ai pe mafai ona latou o ma Bailey e sefulu-tausaga i Hawaii. Nai lo le toe tusi atu, na faatalitali Alema seia tuua le aiga mo Hawaii. Ona ia faafetauia lea o i latou i le nofoaafi i le Aai o Sate Leki faatasi ma se leoleo ma le tusi mai le faamasinoga e tuuina atu ai lana aia tatau e tuu ai Bailey faatasi ma ia i Iuta.

E ui lava na nonofo i aso uma Bailey ma Susa, na leai sana mea e mafai e taofia ai Alema mai le aveina o ia ona o le poloaiga mai le faamasinoga. Ao faamavae atu Susa i lana tama, ma le lotomomomo, na tagi leotele le tamaitiiti ma taumafai e toe foi atu ia te ia.³⁹

Na malaga atu Susa ma Jacob i le vaa i Hawaii i se taimi vave lava mulimuli ane ma le isi la fanau. I le taimi o le malaga, na tumu Susa i le faavauvau ma na mai ai. Ina ua taunuu le vaa i le uafu i Honolulu, na faafeiloaia i latou e Iosefa F. Samita, lea na faaaunuua i le motu e aloese ai mai le falepuipui. O le taeao na sosoo ai na latou malaga atu ai i Laie, lea na faafeiloaia ai i latou e le vaega tele o le Au Paia i se taumafataga o le afiafi ma se faafiafiaga.⁴⁰

Na vave lava ona masani Susa ma Jacob i le olaga i Laie. Na fiafia Susa i le matagofie o le vaaiga na siomia ai o ia, ae na ia tauivi e faamasani i fale a faifeautalai, ia na tumu i manu ninii. “Afai ou te lagonaina le tuuatoatasi,” na ia tusi atu ai se tusi malie i le Woman’s Exponent, “O lea e tele lau vaega o iniseti, isumu, akarava, atualoa, mogamoga, utufiti, namu, pilimoo, ma le miliona o loi.”⁴¹

Ae o le mea sili lava, na maimanatu o ia mo Iuta.⁴² Ae i ni nai masina talu ona taunuu, na ia maua ai se tusi mai ia Bailey. “Ou te moomoo maimau pe ana e nofo iinei,” na ia tusi atu ai. “Ou te mafaufau ia oe i au tatalo.”⁴³

O le mea sili, i na tatalo, na maua ai e Susa le mafanafana.

Ina ua alu le lafiaga a Ioane Teila i le amataga o le 1885, na ia faatasi atu ma Siaosi Q. Kanona o le na muamua atu i ni nai vaiaso ia aua nei iloa. I le gasologa la, sa latou maua le malutia i totonu o aiga o nai Au Paia faamaoni i totonu ma le siosiomaga o le Aai o Sate Leki, na fai lava ma faasolo le siitia ese pe a amata ona masalomia gaoioiga a tagata o tuaoi, pe ua lagona e Ioane le le saogalemu. Ma e talu ai foi o loo saili lava i latou e leoleo, e latou te le mafai lava ona faatamala i lo latou puipuiga.⁴⁴

I le mafai ai ona faatasi atu i le Au Paia, na taumafai ai le Au Peresitene Sili e faatautaia pisinisi a le Ekalesia e ala atu i tusi. Afai e le mafai ona foia ni mataupu i lena ala, latou te feiloai faalilolilo ma isi taitai o le Ekalesia i le Aai o Sate Leki. O malaga taitasi i le aai na lamatia lava. E leai se taitai o le Ekalesia na faatinoina le faaipoipoga faaautaunonofo na saogalemu.⁴⁵

Ia Novema, na pue ai e leoleo o le malo le aposetolo o Lorenzo Snow, lea na fitusefulu-tasi tausaga ma na faaletonu lona soifua maloloina.⁴⁶ Ae lei pueina o ia, na filifili Lorenzo e nonofo ma se tasi o ona aiga ia aloese ai mai le moliaga i le nonofo faatasi faasolitulafono. Ae o se tasi o faamasino na auai i le faamasinoga na fai atu e tatau ona ia taofia le avea ma tane i ana ava uma lava. “E sili ai lou oti faaafe,” na tau atu ai Lorenzo, “nai lo le teena o au ava ma solia ai nei tulaga paia.”⁴⁷

Ia Ianuari 1886, na faasalaina ai e le faamasino Lorenisio i masina e sefuluvalu i le falepuipui mo tuuaiga faamaonia e tolu o le nonofo faatasi faasolitulafono. I le masina na mulimuli ane ai, na osofaia ai e le leoleo o Eleuini Aealani ma isi leoleo fesoasoani le faatoaga a Siaosi Q. Kanona ma tuuina atu tusi samania i tagata o aiga o loo nonofo ai iina. Ona faailoa lea e Aealani le taui e $500 mo le pueina mai o Siaosi.⁴⁸

Ina ua iloa e George le taui, na ia iloaina o le a sueina o ia e se vaega o “tagata faamaligi toto e pei o ni taifau”. E lei manao e tuuina le perofeta i se tulaga lamatia, na ia filifili ai e o eseese ma Ioane mo se taimi. Na ioe i ai Ioane ma fautuaina o ia e alu i Mekisiko. I ni nai aso mulimuli ane, na sele ai le soesa a George ma ulufale atu i se nofoaafi, ma le faamoemoe e sola ese atu mai Iuta.⁴⁹

E ui i lea, na oo atu le upu ua tuua e George le taulaga, ma na ulufale atu se leoleo i le nofoaafi ma pue mai o ia. Ona oo mai lea o le leoleo o Ireland e toe ave atu George i le Aai o Sate Leki.

Ao patapatatu atu le nofoaafi, na oo mai se tagata o le Ekalesia ma musumusu atu ia George faapea o se vaega o le Au Paia ua fuafuaina e laveai o ia ae lei taunuu le nofoaafi i le aai. Na tulai George ma agai atu i le tulaga i fafo o se tasi o taavale o le nofoaafi. E lei manao o ia ia pueina se tasi—pe fasiotia—ona o ia.

Na vaai atu i le laufanua o le taumalulu, ma na mafaufau George e oso ese mai le nofoaafi. E ui i lea, o le toafa i sisifo o se nofoaga tuufua. Afai e oso o ia i le taimi sese, e ono iu ifo o ia i le tele o maila e mamao ese ai mai le taulaga e sili ona lata ane. O le malaga i lenei laufanua valevalenoa e mafai ona oti ai, ae maise lava i se tasi ua toeitiiti onosefulu tausaga.

Na faafuasei lava ona oso le nofoaafi, ma na ato atu ai George i fafo. Na sasa lona ulu ma lona ituagavale i le eleele ao patapatatu ese atu le nofoaafi, ma leiloa atu i le malulu, ma le pogisa.

Na taoto i luga o le eleele aisa ua tau le malamalama, ma na lagona e George le tiga i lona ulu ma le tino atoa. Na pio le pou o lona isu i le isi itu, ua gau. Na tae luga o se tasi o ona mata ma na ati atu i lona atigipoo, ma na lavatoto ai ona foliga ma lavalava.

Na ia tu i luga, ma na amata e George ona savali lemu i luga o le ala. E lei umi ae ia vaaia se leoleo o agai mai ia te ia. Na iloa e le leoleo o Ireland ua leai o ia ma na faatonuina le nofoaafi e taofi. Na setusetu atu George i le leoleo, lea na taitaia o ia i se taulaga lata ane.

O iina na auina atu ai e George se uaealesi ia aua nei faalavelave le Au Paia i le pueina o ia. Ua i ai nei o ia i aao o le Alii.⁵⁰