Mataupu 38

38 I La’u Lava Taimi ma La’u Auala

alii e toalua i se vaafaila laitiiti

I le amataga o le 1889, sa tauivi lava Iosefa Dean e saili tagata e aoao i Samoa. I le faatoa taunuu lava o ia ma lona faletua o Florence i le motu o Aunu’u i le taumafanafana i luma atu, sa vave ona agai i luma le galuega, ma sa vave ona lava tagata i le motu e faatu ai se paranesi e i ai le Aoga Sa ma le Aualofa. Sa auina atu foi faifeautalai fou mai le Aai o Sate Leki e fesoasoani i le au Dean ma le Au Paia Samoa.

Ae o Samoa sa i le ogatotonu o se taua faalelotoifale, ma sa oso ae taua eseese i le atumotu atoa a o tau vaega eseese mo le pule. O le mea na atili leaga ai, sa tetee le tupu i le Ekalesia. Sa salalau tala faapea sa ia faasaina le papatiso e avea o se tagata o le Au Paia o Aso e Gata Ai ma so o se isi e papatiso o le a lafo i le falepuipui. O lea la sa faasolo ina toaitiiti pea lava pea tagata sa talosaga e papatiso.¹

E ui i nei luitau, ae sa fausia se falelotu, sa ato luga i lau e fai i launiu ma ufiufi le fola i maa ma atigifigota papa’e. O Florence Dean ma Louisa Lee, o se isi tamaitai sa auauna i le misiona ma lana tane, sa faia fonotaga a le Aualofa i aso Faraile uma. I le taimi lena, sa faatau ai e faifeautalai se vaafaila laitiiti ina ia mafai ona latou talai atu le talalelei i isi motu o Samoa. Sa latou faaigoa le vaa fou o Faa‘aliga, le upu Samoa mo le upu “revelation.”²

I le faaiuga o le 1888, sa siitia Iosefa, Florence, ma le la atalii laitiiti, ma ni nai faifeautalai mai Aunu‘u i se motu tuaoi e tele atu, o Tutuila. Ae sa toaitiiti le faitau aofai o le motu, ma o le toatele o ona alii sa toesea e tau i le taua. E toaitiiti tagata sa fiafia i le talalelei, ma sa vave ona lagona e Iosefa e le o toe i ai se alualu i luma o i latou ma isi faifeautalai. Sa ia fuafua ai e agai i le motu o Upolu ma asiasi i Apia, o se taulaga o i le ogatotonu o le malo ma fefaatauaiga a Samoa.³

I Upolu, sa fuafua Iosefa e faafesootai le konesula a Amerika ma talanoaina tala taufaamata’u a le tupu faasaga i le Au Paia. Sa ia fia mauaina foi se tagata e suafa ia Ifopo, o le sa papatisoina e le faifeautalai Hawaii o Kimo Belio i se luasefululima tausaga muamua atu. Sa maea ona auina atu e Ifopo ni tusi ia Iosefa, ma sa naunau o ia e feiloai i faifeautalai ia e mafai ona fesoasoani e faatuina le Ekalesia i lona motu.⁴

I le po o Mati 11, sa folau atu ai loa Iosefa ma ana soa e toalua, o Edward Wood ma Adelbert Beesley, mo Upolu, i se faigamalaga e fitusefulu maila. Sa latou malamalama i le lamatia o ni seila e toatolu e leai se poto masani o loo faimalaga i se vaa laitiiti i luga o sami ono faigata. Peitai sa lagona e Iosefa sa finagalo le Alii ia i latou e faia lea faigamalaga.

I le mavae o se po o se faigamalaga faigata, sa latalata loa faifeautalai ia Upolu Ae ina ua latou latalata i le matafaga, sa faafuaseia ona taia i latou e ave malolosi o matagi. Na sa’e le vaa ma faatumulia loa lava i le vai. Sa taumafai alii e taofimau ia foe, o pusa, ma atopau ia ua opeopea i o latou tafatafa i galu. Ina ua latou iloa atu se isi vaa e tusa o se kuata maila le mamao, sa latou feei ma faili seia latou liliu mai.

O Samoa sa o mai e laveai faifeautalai sa ova atu i le itula o tau faasa’o lo latou vaa, sa feausi i lalo o galu e toe aumai i luga ona la ma le taula, ma fesoasoani i faifeautalai e faamaopoopo mai a latou meatotino. Sa faanoanoa Iosefa e le i i ai sana tupe e ave i ia alii mo la latou auaunaga, ae sa latou talia ma le agalelei lana faatalofa, ma sa ia tatalo i le Alii e faamanuia i latou.

I le taimi na taunuu ai Iosefa ma ana soa i le aai o Apia, sa latou matuā vaivai tele. Sa latou tuuina atu se tatalo o le faafetai i le Atua mo le puipuia o i latou i le latou faigamalaga. I aso na mulimuli mai, sa latou o atu e saili le konesula a Amerika ma saili mo Ifopo.⁵

---

I Iutā, sa maitaga Lorena Larsen e lusefulu iva tausaga i lana tama lona fa. O lana tane, o Bent, sa faatoa mae’a le tuliina o lona faasalaga i le falepuipui mo le ono masina mo le nonofo faatasi lēfaaletulafono. Talu ai o Lorena o se tasi o āvā toatele, o lona maitaga sa mafai ona faaaoga o se faamaoniga sa toe solia foi e Bent le tulafono. Ina ia saogalemu lona aiga, sa fuafua o ia e alu i se lafitaga.⁶

Sa muamua maua e Lorena se sulufaiga i le auauna ai i le malumalu o Manti. O le malumalu e onosefulu maila mai lona nuu o Monroe, Iutā, ma sa talosagaina lana uarota mo ni tagata faigaluega i le malumalu. Sa siitia Lorena i Manti ma auauna ai i le malumalu mo sina taimi, ae sa faigata ona toesea o ia mai lana fanau, o e sa tuua i le tausiga a Bent ma isi tagata o le aiga. Ina ua toetoe lava a fafano lana pepe, sa faamalolo faamamaluina ai Lorena e le peresitene o le malumalu, o Tanielu Wells.⁷

Na sosoo ai ona fuafua Lorena ma Bent e faia se fale mautotogi mo ia ma lana fanau i le taulaga o Redmond, e i le ogatotonu o le va o Monroe ma Manti. Talu ai sa i ai le aufaitala i nofoaga uma, sa tatau ai ia Lorena ona tausia ia faalilolilo lona tagata. O lea loa ua suia lona igoa ia Hana Thompson, sa ia ta’u i lana fanau, ma afai e sau lo latou tamā e asiasi mai o le a latou valaau o ia ia “Uncle Thompson.” Sa faamamafa pea lava pea e Lorena le taua o le le taua o o latou igoa sa’o.⁸

Ina ua taunuu le aiga i Redmond, sa aloese mai Lorena i nofoaga lautele ma faaalu le tele o lona taimi i le fale. Ae peitai, i se tasi aoauli, sa ia faatasi ai ma se vaega o ni uso faauo o le Aualofa, ma sa latou ta’u atu ia Lorena ina ua latou fesiligia lana tama teine lua tausaga poo ai lona igoa, sa ia tali mai, o “Uncle Thompson.”

Sa vave ona auauna atu le Au Paia agalelei i Redmond i le aiga o Lorena. I le aso Sa o le Eseta, sa ia maua se pakete o fuamoa felesi ma se pauna pata i lona faitotoa. Ae, sa misia pea e ia lona aiga i Monroe. Sa maitaga ma tuua toatasi, ma sa tauivi o ia i aso uma e tausia tamaiti e toatolu i se taulaga ese.⁹

Ona oo lea i se tasi po, sa faia se miti a Lorena. Sa vaai o ia i le mutia i lona lumāfale i Monroe ua ufitia i togavao ma vao sosolo. Sa tiga o ia i le vaai atu ua faaleagaina lona aiga, o lea sa alu ai loa ma galue e sua ese ia vao mai le fanua. A o amata ona tase’i e ia aa loloto, sa faafuaseia ona iloa e Lorena ua i ai o ia i tafatafa o se laau, o loo mamafa i fua sili ona manaia sa ia vaai i ai. Sa ia faalogoina se leo o faapea mai, “O le laau o loo lafi e aumaia foi fua sili ona lelei.”

I le miti, sa vave ona siomia Lorena e e pele ia te ia. O lana fanau, ia ua matutua, sa o mai ia te ia, ma aumai ipu, pesini, ma ato laiti. Faatasi, sa latou faatutumuina pesini i fua suamalie ma tufa atu i le toatele, o nisi o i latou sa iloa atu e Lorena o ona tuaa.

Sa olioli le loto o Lorena, ma sa ala ua tumu i le faafetai.¹⁰

---

Ina faatoa taunuu lava Iosefa Dean i Apia, sa feiloai o ia ma ana soa faatasi ma le sui konesula a Amerika i Samoa, o Viliamu Blacklock, ma fesili pe moni tala e uiga i le falepuipuia o le Au Paia o Aso e Gata Ai i Samoa. Sa faamautinoa atu ia i latou e le sui konesula, “E leai se mea ua na o se palafu.” O se maliliega i le va o vaega fetaua’i i atumotu o le faatagaina o tagata e tapuai e pei ona latou fiafia i ai. .¹¹

Peitai, sa faamalumalu mai pea le taufaamata’u o taua i luga o le atumotu. E fitu ni vaatau sa taula i le uafu i Apia—e tolu mai Siamani, tolu mai le Iunaite Setete, ma le tasi mai Peretania Tele. Sa finafinau atunuu taitasi e puipuia ana aia i le Pasefika.¹²

I le nauanau ia maua Ifopo, na sosoo le fuafua o faifeautalai e malaga i le vaa i lona nuu, o Saleaumua, i le itu i sasae o le motu.¹³ Ae sa vave ona palasi mai se afā i luga o Apia. O le agi malosi o matagi ma le fafati malosi o galu na taufetuli ai Iosefa ma ana soa mo se malutaga. Ina ua latou maua se malu i luga ae o se falemanu o se pule o se faleoloa o le lotoifale, sa lagona e faifeautalai le lulū o le fale toetoe a malepe i le agi malosi o matagi, ma sa latou popole e ono malepe le fale.

Sa faateteleina le matagi, ma sa tutū faifeautalai i se faamalama ma matamata atu ma le matata’u a o sasa e le matagi ia vaatau tetele i le uafu. Sa fafati galu matuā maoae le tetele i luga o le tasi vaa, ma tafi esea tagata i le sami. O nisi o seila i luga o se isi vaa sa taufetuli e fepeei i luga o la ma maea, ma taupe mau i maea faapei oni aupogaleveleve, a o tulioso isi i le sami sousou ma taumafai e feausi i le saogalemu. O vaa sa na o le selau iata mai le matafaga, ae sa leai se mea sa mafai ona fai e fesoasoani ai i na alii. Pau lava le mea sa mafai ona fai e Iosefa o le tatalo mo le alofa mutimutivale. ¹⁴

Ina ua mavae le afā, sa laina le matafaga i otaota ma totoga o vaatau, ma e tusa e luaselau tagata sa fano ai.¹⁵ Sa popole faifeautalai e uiga i le toe malaga atu i le sami. I le vaitau o afā, e mafai lava ona toe palasi mai se isi afā e aunoa ma se lapataiga.¹⁶ Peitai, sa tuuese e faifeautalai lo latou mata’u ae folau atu mo Salea‘aumua e saili Ifopo.

Ina ua taunuu i latou, sa folau mai se vaega o tagata Samoa e faafeiloai i latou, ma o le tasi o i latou sa faailoa mai o ia o Ifopo. Mo le luasefulu tausaga sa tumau faamaoni o ia i lana molimau o le talalelei toefuataiina, ma lona lē mautinoa lava pe faamata o le a toe i ai ni faifeautalai fou e o mai i lona motu. O lea la ua taunuu mai Iosefa ma ana soa, ua oo mai le taimi o se fiafia. Sa latou feiloai i le āvā a Ifopo, o Matalita, ma fiafia i se taumafataga o le puaa tao ma fualaau suamalie.¹⁷

I aso na sosoo ai, sa faamasani faifeautalai i uo ma tuaoi o Ifopo. I se tasi o fonotaga, e selau tagata sa faapotopoto e faalogo ia Iosefa o lauga, ma sa mamana le Agaga. Sa faamaoni tagata i a latou fesili, sa naunau e iloa atili e uiga i le talalelei.

I se tasi aoauli, sa savavali Ifopo ma faifeautalai e latalata i se vaitafe. E ui lava ua uma ona papatisoina Ifopo, ae ua tele tausaga ua mavae, ma sa ia talosaga e toe papatisoina o ia. Sa savavali atu Iosefa i le vai ma lana uo fou ma faatofu ia te ia. Ona tootuli ai lea o Ifopo i le autafa o le vai, ae faamauina o ia e faifeautalai o se tagata o le Ekalesia.

I ni nai aso mulimuliane sa suia le matagi, ma mafai ai e Iosefa ma ana soa ona amata le faigamalaga e toe foi i Tutuila. Sa malaga faatasi ma Ifopo i tua atu o le aau e faasino ia i latou le ala. Ina ua oo mai le taimi e faatofa ai, sa sogi lona isu i isu o faifeautalai taitoatasi, ma faatofa atu ia i latou i se sogi faaSamoa.¹⁸

---

I le tautotogo o le 1889, sa fuafua ai Bent, le tane a Lorena Larsen, e aloese mai taitai faaletulafono faalemalo i lona sola lea i le saogalemu o Colorado, o se setete tuaoi lea e le o aafia i le Tulafono o le Edmund-Tucker. O lana āvā muamua, o Julia, e mafai ona nofo i Monroe faatasi ma lona aiga. Ae sa manao o ia e nonofo Lorena ma lana fanau i Iutā faatasi ma lona tuagane seia lelei ona mautu o ia i Colorado ona ta’u atu lea mo i latou e o mai.¹⁹

Sa lē fiafia Lorena i lena tonu. Sa mativa lona tuagane, sa ia faamanatu atu ia Bent, ma o lona uso i le tulafono sa faatoa tauivi lata ai nei ma le fiva taifoi. Sa le i ai i laua i se tulaga e mafai ona fesoasoani ia Lorena ma lana fanau. Ma sa oo atu foi Lorena i toe masina o lona maitaga ma sa manao i lona toalua i ona tafatafa.

Sa malie i ai Bent, ma vave ae malaga loa Lorena ma lana fanau i Colorado faatasi ma ia. O le faigamalaga sa silia i le limaselau maila, e ui atu i toafa ma luga o mauga. O se atunuu vao, ma o tagata sa tele ina latou fetaui i ai i le ala sa foliga mai o ni tagata leaga. I se tasi vaega o le ala, na o le pau lava se vai na maua sa i totonu o se pu i le itu papa o le mauga. Sa saili e Bent se vai a o ave lemu atu e Lorena le taavale solofanua i le mako, ma fai lava ma tauvalaau lona igoa e faamautinoa e le i leiloa o ia i le pogisa.

Sa faafetai Lorena ina ua iu ina taunuu lona aiga i Sanford, Colorado, ma faatasi ma le tamai nuu o le Au Paia iina. Ina ua oo mai le taimi mo Lorena e ola ai, sa vaivai pea o ia mai le faigamalaga. Sa matua faigata tele lona faatigaaga sa popole nisi o le a maliu o ia. Sa iu ina fanau mai e Lorena lana tama tama o Enoka ia Aukuso 22, ma folafola mai e le faatosaga o le pepe sili ona lapoa lea sa ia faafanauina i le luasefuluono tausaga.²⁰

I le taimi lava lea, sa faaauau pea ona faapologaina aiga e pei o le au Larsen i faiga sa fuafuaina e faamanualia ai le Ekalesia. E oo lava i le Au Paia o e e le i faia ni faaipoipoga tele āvā sa aafia foi.

I Idaho, sa pasia e le au fai tulafono faateritori se tulafono e manaomia ai tagata palota e tauto faapea latou te le auai i se lotu e aoaoina pe faamalosia autaunonofo. E le i afaina pe sa auai tagata palota i lea faiga pe leai. O lea tulafono na faasaina ai uma lava le Au Paia i Idaho, po o le tasi vae fa o le faitau aofai, mai le palota po o le umia o tofi. Sa faapena foi ona faailogaina e sui o le malo ma faamasino ia le Au Paia o Aso e Gata Ai malaga mai i le Iunaite Setete ma teena le faatagaina o i latou e avea ma tagatanuu.

O mataupu faatu sa luiina ai le faaletulafono o nei faiga sa vave taliagofie i le faamasinoga a le I.S., ae o lagona faalauaitele e faasaga i le Ekalesia sa matua malolosi, ma o faaiuga e lagolago ai le Ekalesia sa itiiti lava. Peitai, sa finau loia a le Ekalesia i le tulaga faaletulafono o le Tulafono o le Edmunds-Tucker ina faatoa uma lava ona pasia e le Konekeresi, ma sa faamoemoe lava le Au Paia o le a faaleaogaina e le Faamasinoga Sili. Faatoa amata lava e le faamasinoga ona faia le faamasinoga o le mataupu, ae e le i tuuina atu lava lana faaiuga, ma tuua ai le Au Paia i se tulaga lē mautonu.²¹

E oo lava i se taulaga maotua e pei o Sanford, sa iloa e Lorena o lona aiga ma le Ekalesia o le a tumau ai i le faanoanoa ma le mata’u a o faaauau pea ona teena e le malo le faaaoga o aia tatau faalelotu a le Au Paia.²²

---

A o lalafi le au Larsen ma isi tagata o le Ekalesia ina ia puipuia ai o latou aiga ma ola i o latou faatuatuaga, sa saili le Au Peresitene Sili i auala fou e puipuia ai saolotoga faalelotu a le Au Paia. I le naunau ai o Uilifoti Uitilafi e manumalo i ni uo i Uosigitone, DC, ma iu ina ausia ai le faaseteteina o Iutā, sa amata ona ia faamalosiauina faatonu o nusipepa a le Au Paia o Aso e Gata Ai e taofi le osofaia o le malo i a latou tusitusiga. Sa ia uunaia taitai o le Ekalesia e taofi le tautalatala faalauaitele e uiga i faaipoipoga tele āvā ina nei o latou faaosoosoina le aufaitio o le Ekalesia i le malo. Ma sa ia talosaga i le peresitene o le malumalu i Logan e taofi le faatinoina o faaipoipoga tele āvā i le maota o le Alii.²³

I lalo o nei tulafono fou, sa faasolo ai lava ina laiti pea lava pea le Au Paia e ulufale atu i faaipoipoga tele āvā. Peitai sa faamoemoe pea isi o le Au Paia e mulimuli i le mataupu faavae e pei sa aoaoina ai muamua. Sa masani lava ona faamalosiauina i latou e o atu i Mekisiko po o Kanata, ia sa faatinoina filemu ai e taitai o le Ekalesia ia faaipoipoga i fafo atu o le aapa a le malo o le Iunaite Setete. Peitai, mai i lea taimi i lea taimi, sa faatinoina pea faaipoipoga tele āvā i le Teritori o Iutā.²⁴

Ia Setema 1889, a o asiasi atu Uilifoti Uitilafi ma Siaosi Q. Cannon i le Au Paia i matu o le Aai o Sate Leki, sa laua feiloai ai ma se peresitene o se siteki sa fesili pe mafai ona ia tuuina atu pepa faataga o le malumalu i le Au Paia o e na mananao e ulufale atu i faaipoipoga tele āvā.

Sa le i taliina e Uilifoti i le taimi lava lena le fesili a le peresitene o le siteki. Nai lo lena, sa ia faamanatu ia te ia sa i ai le taimi sa poloaiina ai le Au Paia e fausia se malumalu i Jackson County, Misuri, ae sa faamalosia i latou e tuuese a latou fuafuaga ina ua matuā matautia tele le itu tetee. E ui i lena sa taliaina e le Alii taulaga a le Au Paia, ma o ta’usalaga o le lē fausiaina o se malumalu sa pa’ū i luga o tagata sa taofia.

“O le mea foi lea i le taimi lenei i lenei atunuu,” sa saunoa atu ai Uilifoti, “ma o le taunuuga o lenei mea o le a pa’ū lava i luga o i latou o e o loo faia lenei faiga ina ia taofia ai lo tatou usitaia o lenei poloaiga.”

Ona ia talia sa’o ai lava lea o le fesili a le peresitene o le siteki. “Ou te lagona e le tatau ona faia nei ituaiga o faaipoipoga i lenei teritori i le taimi lenei,” na ia saunoa atu ai. Ona, faasino lea o lona aao ia Siaosi, ma faaopoopo atu, “O Peresitene Cannon lea. E mafai ona ia saunoa atu i sona finagalo e uiga i lenei mataupu.”

Sa lē mautonu Siaosi. Na te le i faafofoga lava o saunoa manino Uilifoti e uiga i le mataupu muamua—ma sa le iloa foi e ia pe na malie i ai faatasi ma ia. Pe tatau ea e le Ekalesia ona taofia le faia o faaipoipoga tele āvā i le Teritori o Iutā? E le i saunia ia lava e pei o Uilifoti e tali atu i lena fesili, o lea sa le tali ai o ia, ae see atu le talanoaga i isi mataupu.

Ae mulimuliane, sa faamaumauina e Siaosi le talanoaga i lana talafaamaumau, sa ia faaauau pea ona tauivi ma le saunoaga a Uilifoti. “Ia te a’u o se fesili matuā ogaoga lava,” sa ia tusia ai, “ma o se taimi muamua lava lea ua saunoa ai se tasi ua umia ki, i lo’u iloa, e uiga i se mea faapenei.”²⁵

---

I le lotolotoi o le tuputupu ae pea o fesili e uiga i le folauga i le lumanai a le Ekalesia, sa lomia e Susa Gates le uluai lomiga o le Young Woman’s Journal i a Oketopa 1889.

Sa amata ona faalauiloa e Susa le mekasini ina ua toe foi i laua ma Iakopo i Iuta i le amataga o lena tausaga. Ia Iuni, sa faamalosiauina e lona uso o Maria Dougall, o se fesoasoani i le au peresitene o le Asosi mo le Faaleleia Faatasi o Tamaitai Talavou, ia tamaitai talavou i le Siteki o Sate Leki e lagolago ma faisaofaga i le mekasini fou. I ni nai masina mulimuliane, sa lomia i ni nai nusipepa ni faasalalauga e uiga i lana uluai lomiga.²⁶

Sa valaauina foi e Susa ni tusitala o le Au Paia o Aso e Gata Ai e auina atu a latou solo ma tala i le mekasini. Mo le tele o tausaga, o nisi o le Au Paia e i ai taleni tusitala sa faama’ai o latou tomai tusitusi i nusipepa ma mekasini e lagolagoina e le Ekalesia e pei o le Woman’s Exponent, o le Juvenile Instructor, ma le Contributor. I Europa, sa saunia foi e le Au Paia tusitusiga mo le pepa a le misiona a Peretania o le Millennial Star, le pepa a le misiona a Scandinavia o le Skandinaviens Stjerne ma le Nordstjarnan, faapea le pepa a le misiona a Swiss-German o le Der Stern.²⁷

Sa ta’ua e le Au Paia i nisi taimi nei tusitusiga o “tusitusiga mo le aiga” o se faaupuga sa toe faamanatu maia le talitonuga o Polika Iaga e uiga i “alamanuia mo le aiga,” po o oloa gaosia i le lotoifale, e pei o le suka, uamea, ma le silika. I se lauga a Epikopo Orson Whitney i le 1888, sa ia faamalosiauina ai le autalavou a le Ekalesia e fatuina nisi tusitusiga mo le aiga e faalauiloa ai taleni tusitusi sili ona maoae a le Au Paia ma molimau ai e uiga i le talalelei toefuataiina a Iesu Keriso.

“Tusitusi mo nusipepa, tusitusi mo mekasini—aemaise lava a tatou lomiga mo le aiga,” sa ia uunaia ai i latou. “Faia e outou lava ni tusi, ia o le a le gata e avea ma faaaloaloga ia te oe ma le laufanua ma tagata na atinaeina oe ae faapena foi ona avea ma faamanuiaga mo tagata.”²⁸

I le uluai lomiga o le Young Woman’s Journal, sa lomia ai e Susa galuega o tusitusiga mo le aiga sa saunia e nisi o tusitala sili ona lauiloa i le Ekalesia, e aafia ai Josephine Spencer, Ruby Lamont, Lula Greene Richards, M. A. Y. Greenhalgh, ma le auso o Lu Dalton ma Ellen Jakeman. Sa aafia ai foi ma nisi o ana ia lava tusitusiga, o se tusi mai le auperesitene aoao o le A.F.F.T.T., ma se koluma faatatau i le soifua maloloina ma le tumamā na saunia e Romania Pratt.²⁹

I lana uluai tusi a le faatonu mo le mekasini, sa faailoa mai ai e Susa le faamoemoe o le a le pine ae avatua ai tusitusiga mai tamaitai talavou i le Ekalesia atoa. “Manatua, tamaitai, o la outou mekasini lenei,” sa ia tusi atu ai. “Ia matuā faalautele atu lana uunaiga mai Kanata i Mekisiko, mai Lonatona i Motu Sanuisi.”³⁰

---

Mulimuliane i lena tausaga, sa teena e se faamasino o le malo i Iutā le avea o nisi o tagata malaga mai Europa o ni tagatanuu o le I.S. ona o i latou o nisi o le Au Paia o Aso e Gata Ai ma o lona uiga, i le manatu o le faamasino, e le faamaoni i le Iunaite Setete. I le taimi o le faamasinoga, sa i ai ni tagata le fiafia o le Ekalesia o e sa tagi faapea sa faia e le Au Paia ni tautoga ita, tetee i le malo i totonu o o latou malumalu. Sa sii mai foi e loia sili ni lauga mai taimi ao lauga malosi taitai o le Ekalesia faasaga i sui leaga o le malo ma tagata o e na tuua le Ekalesia. O nei lauga, faapea foi ma isi aoaoga a le Ekalesia e faatatau i aso gataaga ma le malo o le Atua, sa faauigaina o ni faamaoniga faapea e le amanaia e le Au Paia le pule a le malo.³¹

Sa silafia e Uilifoti ma isi taitai o le ekalesia sa manaomia ona tatou tali atu i nei tuuaiga. Ae o le tali atu i faamatalaga e faatatau i le malumalu, ia na faia ai e le Au Paia folafolaga paia ia lē talanoaina, o le a faigata.³²

I le faaiuga o Novema, sa feiloai ai Uilifoti ma loia o e sa fautuaina taitai o le Ekalesia e tuuina atu i le faamasinoga nisi faamatalaga e uiga i le malumalu. Sa latou fautuaina foi ina ia ia faia se faasilasilaga aloaia o le a le toe faamauina ni faaipoipoga tele āvā e le Ekalesia. Sa lē mautinoa e Uilifoti pe faapefea ona tali atu i talosaga a loia. Pe matuā tatau ea ona faia ia tulaga, tau lava ina faamalieina ai ia fili o le Ekalesia? Sa ia manaomia se taimi e saili ai le finagalo o le Atua.³³

I le taimi na tuua ai e loia ia Uilifoti na o ia ua oo mai le po. Mo le tele o itula, sa ia mafaufau loloto ai ma tatalo mo se taitaiga i le mea e tatau ona fai.³⁴ Sa o mai o ia ma le Au Paia i le Vanu o Sate Leki i le 1847 e saili se isi avanoa e faavae ai Siona ma faapotopoto mai le fanau a le Atua i le filemu ma le saogalemu o ona tuaoi. O lenei la, ua sili atu nai lo le fasefulu tausaga mulimuliane, o loo talepeina e fili o le Ekalesia aiga, aveesea mai alii ma tamaitai a latou aia tatau e palota ai, faatupuina faalavelave mo tagata malaga mai ma le faapotopotoina, ma teena aia tatau a tagata e avea ai ma tagatanuu e ala i le avea ma tagata o le Ekalesia.

E le umi, ae ono sili atu foi mea e mafai ona aveesea mai le Au Paia—e aofia ai ma malumalu. O le a la le mea o le a tupu i le faaolataga ma le faaeaga o le fanau a le Atua i itu uma o le veli?

A o tatalo Uilifoti, sa tali mai le Alii ia te ia. “O A’u, o Iesu Keriso, o le Faaola o le lalolagi, o loo i totonu ia te outou,” na Ia fetalai ai. “O mea uma lava ua ou faaalia ma tautoina ma folafolaina atu e uiga i le tupulaga ua outou ola ai o le a faataunuuina lava, ma e leai se mana e taofia Lo’u lima.”

E le i tauina mai e le Faaola ia Uilifoti le mea tonu lava e fai, ae sa Ia folafola mai o le a lelei mea uma pe afai e mulmulii le Au Paia i le Agaga.

“Ia faatuatua i le Atua,” sa fetalai ai le Faaola. “O le a Ia le tuulafoai outou. O A’u, le Alii, o le a laveai la’u Au Paia mai le pulega a e amioleaga i la’u lava taimi ma la’u auala.”³⁵

1. Iosefa H. Dean ia Uilifoti Uitilafi, Siaosi Q. Cannon, ma Iosefa F. Samita, Fep. 10, 1889; Iosefa H. Dean ia Uilifoti Uitilafi, Siaosi Q. Cannon, Auk. 7, 1888; Iosefa H. Dean ia Uilifoti Uitilafi Oke. 30, 1888, First Presidency, Mission Administration Correspondence, CHL; tagai foi i le Gilson, Samoa, 393–94. Autu: Samoa; Amerika Samoa

2. Iosefa H. Dean ia Uilifoti Uitilafi, Siaosi Q. Cannon, Aug. 7, 1888; Iosefa H. Dean ia Uilifoti Uitilafi, Oke. 30, 1888; Iosefa H. Dean ia Uilifoti Uitilafi, Siaosi Q. Cannon, ma Iosefa F. Samita, Fep. 10, 1889, First Presidency, Mission Administration Correspondence, CHL; tagai foi i le, mo se faataitaiga, Florence Dean, Journal, Nov. 9 ma le 30, 1888; Tes. 7 ma le 14, 1888.

3. Iosefa H. Dean ia Uilifoti Uitilafi, Siaosi Q. Cannon, ma Iosefa F. Samita, Fep. 10, 1889, First Presidency, Mission Administration Correspondence, CHL; tagai foi i le Iosefa H. Dean, Talafaamaumau, Fep. 19 ma Mati 13–14, 1889.

4. Iosefa H. Dean, Talafaamaumau, Mati 12 ma le 14, 1889; Beesley, Talafaamaumau, Mati 12, 1889; “Elders from Zion Who Have Labored in the Samoan Mission,” i le Samoa Mission Manuscript History and Historical Reports, CHL; Wood, “Notable Incidents of Missionary Life,” 633.

5. Iosefa H. Dean, Talafaamaumau, Mati 11–12, 1889; Wood, Talafaamaumau, Mati 11–12, 1889; Beesley, Talafaamaumau, Mati 11–12, 1889; tagai foi i le Iosefa H. Dean, Talafaamaumau, Mati 14 ma le 21, 1889.

6. “Life Sketch of Lorena Eugenia Washburn Larsen,” 1, 108, 128, 139, 149, 146 [second numbering], 149 [second numbering]; “Liberated,” Deseret Evening News, Set. 18, 1888, [3]; “Local Briefs,” Salt Lake Daily Herald, Set. 19, 1888, 8.

7. “Life Sketch of Lorena Eugenia Washburn Larsen,” 151 [second numbering]–156.

8. “Life Sketch of Lorena Eugenia Washburn Larsen,” 158, 166.

9. “Life Sketch of Lorena Eugenia Washburn Larsen,” 139, 151, 161–62, 168.

10. “Life Sketch of Lorena Eugenia Washburn Larsen,” 164-65.

11. Iosefa H. Dean, Talafaamaumau, Mati 14, 1889; tagai foi i le “Dissatisfaction in Apia,” Deseret Evening News, Auk. 4, 1890, [3]. Ua faasa’oina le upusii mo le manino; “sa” i le uluai tusiga ua suia i le “ua.”

12. Iosefa H. Dean, Talafaamaumau, Mati 15, 1889; Wood, Talafaamaumau, Mati 13, 1889; tagai foi i le Britsch, “Founding of the Samoan Mission,” 21.

13. Iosefa H. Dean, Talafaamaumau, Mati 12, 14, ma le 21, 1889; Beesley, Talafaamaumau, Mati 12, 1889.

14. Iosefa H. Dean, Talafaamaumau, Mati 14–17, 1889; Wood, Talafaamaumau, Mati 15–17, 1889; Beesley, Talafaamaumau, Mati 15–16, 1889.

15. “President Edward James Wood,” Cardston News, Oke. 27, 1936, [5]; Iosefa H. Dean, Talafaamaumau, Mati 16, 1889; Beesley, Talafaamaumau, Mati 17, 1889; Wood, Talafaamaumau, Mati 18, 1889.

16. Wood, Talafaamaumau, Mati 16–17, 1889; Iosefa H. Dean, Talafaamaumau, Mati 17, 1889; Beesley, Talafaamaumau, Mati 17, 1889; Wood, “Notable Incidents of Missionary Life,” 633.

17. Wood, “Notable Incidents of Missionary Life,” 633; Joseph H. Dean, Journal, Mar. 21, 1889, ma le Jan. 3, 1890; Beesley, Journal, Mar. 21, 1889; Wood, Journal, Mar. 21, 1889.

18. Joseph H. Dean, Journal, Mar. 22–25, 1889; Wood, Journal, Mar. 23 and 25, 1889; Beesley, Journal, Mar. 23, 1889.

19. “Life Sketch of Lorena Eugenia Washburn Larsen,” 167; tagai foi i le Flower, “Mormon Colonization of the San Luis Valley,” 90–94.

20. “Life Sketch of Lorena Eugenia Washburn Larsen,” 167–201.

21. Firmage and Mangrum, Zion in the Courts, 231–33, 243–44, 257; Groberg, “Mormon Disfranchisements of 1882 to 1892,” 400–404; “The Church Suit,” Deseret Weekly, Ian. 26, 1889, 154–60; Wells, “Idaho Anti-Mormon Test Oath,” 235.

22. Tagai i le “Life Sketch of Lorena Eugenia Washburn Larsen,” 213–15.

23. Uilifoti Uitilafi, Siaosi Q. Cannon, ma Iosefa F. Samita ia Sale W. Penrose, Nov. 27, 1887, Au Peresitene Sili, Political Letterpress Copybook, CHL; Siaosi Q. Cannon, Talafaamaumau, Nov. 2 ma le 22, 1887; Ape. 9, 1888; Uitilafi, Talafaamaumau, Mati 13, 1889; Franklin D. Richards, Talafaamaumau, Mati 13, 1889; Clark, Messages of the First Presidency, 169; Alexander, Things in Heaven and Earth, 248, 254. Autu: Antipolygamy Legislation [Tulafono Tetee i le Autaunonofo]

24. Tagai i le “Plural Marriages and Families in Early Utah,” ma le “The Manifesto and the End of Plural Marriage,” Gospel Topics, topics.ChurchofJesusChrist.org.

25. Siaosi Q. Cannon, Talafaamaumau, Set. 9, 1889.

26. Young Woman’s Journal 1, no. 1 (Oke. 1889); “Y.L.M.I.A. Conference,” Deseret Weekly, Iuni 29, 1889, 22; “Local and Other Briefs,” Salt Lake Herald, Auk. 16, 1889, 8; “Prospectus of the Young Woman’s Journal,” Salt Lake Herald, Auk. 18, 1889, 5; “Prospectus of the ‘Young Woman’s Journal,’” Utah Enquirer, Auk. 30, 1889, [2]; “The Young Woman’s Journal,” Woman’s Exponent, Set. 1, 1889, 18:55. Autu: Susa Young Gates

27. Zina E. Crocheron ia Susa Young Gates, Iulai 10, 1889; Josephine Spencer ia Susa Young Gates, Auk. 19, 1889; M. A. Y. Greenhalgh to Susa Young Gates, Auk. 22, 1889, Faila Talafaamaumau Tamaitai Talavou, Susa Young Gates, Papers, CHL; Emily H. Woodmansee ia Susa Young Gates, Iulai 16, 1889; Sarah E. Russell ia Susa Young Gates, Auk. 16, 1889, General Correspondence, Susa Young Gates, Papers, CHL; “Woman’s Exponent,” Woman’s Exponent, Iuni 1, 1872, 1:[8]; “Salutatory,” 3; Wells, “Salutation,” 12. Autu: Church Periodicals [Mekasini a le Ekalesia]

28. Arrington, Great Basin Kingdom, 112–30, 254; “Home Literature,” 299–301. O le fuaiupu muamua o le upusii na suia ina ia faigofie ona faitauina; “o le a” i le uluai lomiga na suia i le “lea o le a.”

29. Talafaamaumau a le Tamaitai Talavou, Oke. 1889, 1:1, 9–12, 19, 22, 29–31.

30. [Gates], “Editor’s Department,” 32.

31. “Naturalization of ‘Mormons,’” Deseret Evening News, Nov. 30, 1889, [2]; “More Endowment Scare,” Semi-weekly Standard, Nov. 20, 1889, [3]; Flake, Politics of American Religious Identity, 82.

32. Siaosi Q. Cannon, Talafaamaumau, Nov. 21, 1889.

33. Uitilafi, Talafaamaumau, Nov. 24, 1889; Nuttall, Talafaamaumau, Nov. 23–24, 1889.

34. Uitilafi, Talafaamaumau, Nov. 24, 1889.

35. Siaosi Q. Cannon, Talafaamaumau, Nov. 25, 1889; Uitilafi, Talafaamaumau, Nov. 24, 1889.