Mataupu 16

Leai se Masalosalo po o se Faavaivai

vae ua ufitia i le kiona o loo tautau mai le taavale toso

A o faanatinati atu vaega laveai muamua i sasae, na tolauapi le vaega a Edward Martin latalata ia Jesse Haven ma le laina o taavale solofanua a Hodgetts i Fort Laramie, o se tolauapiga a le militeli i le afa o le va o Florence ma le Aai o Sate Leki. Na faaitiitia le sapalai o taumafa a le au malaga, ma na leai ni vaega laveai na iloa atu mai le vanu.

O le alii na vaaia le tolauapiga na tatalaina ana faleoloa i le Au Paia, ia na faatau atu a latou uati ma isi meatotino e faatau ai sina isi falaoamata, fasipuaa faaasu, ma araisa. Ae ui lava i lea na le lava a latou sapalai e faamalie ai o latou manaoga mo le lima selau maila o totoe o le malaga.¹

Na popole Jesse Haven mo le Au Paia o taavale toso. O se pauna falaoamata i le aso sa le lava mo se tagata e tosoina se taavale toso i luga o ala oneone ma mauga papa, ma o lena tufaaga o taumafa o le a vave ona faaitiitia. Na faapitoa lava le faigata faaletino mo le Au Paia matutua, o e na amata ona maliliu i ni numera maoae.

“O i latou moni lava o ni tagata matitiva ma puapuagatia,” na lipoti atu ai Jesse i se tusi ia Polika Iaga. “E nutimomoia lou loto mo i latou.”²

Na faaauau pea le aumalaga e ui i faigata. Na malaga le vaega o taavale solofanua a Jesse latalata i le vaega a Martin, ma tuuina atu le fesoasoani pe a latou mafaia. Na faasolo ina telegese le solo a le aumalaga i taavale toso. E lei umi ona tuua le tolauapiga, ae maua loa Aaron Jackson, le Peretania e galue i le silika, i se fiva. O le ma’i lea na faaitiitia ai lona malosi, ma na foliga mai ua leai se naunau e faaauau.

Na manao Aaron e taumafa ia sili atu i lana tufaaga, ae na le lava ni taumafa. Ina ua uma ona faia se suesuega o faleoloa o taumafa a le vaega, na faaitiitia loa e Kapeteni Martin le tufaaga faaleaso i lana vaega i le tolu-kuata o se pauna falaoamata a le tagata. Na taumafai aiga ma uo a Aaron ia faaauau pea o ia, ae o le taumafaiga lea na atili ai ona vaivai o ia.³

I le taeao o le aso 19 o Oketopa, na saofai ai Aaron i lalo e malolo i tafatafa o le auala a o agai i luma isi o le vaega i le Vaitafe o le North Platte. E oo atu i le aoauli, o loo ia lagonaina pea le vaivai tele e faaauau. Na pau maualalo lava le vevela i nai aso talu ai, ma na amata ona toulu le kiona. Afai e le tu i luga o ia ma faatasi vave atu i lana vaega, e ono oti o ia i le malulu.

I se taimi mulimuli ane, na maua ai Aaron e ni alii se toalua o le vaega, na tuu o ia i totonu o se taavale solofanua faatasi ma isi Au Paia mama’i, ma aumaia o ia i le North Platte. Na ia maua lona aiga i le pito o le vaitafe, o loo saunia e toso le latou taavale toso i le isi itu. Ona sa vaivai tele povi e toso la latou uta i le saogalemu i le vai, na oso ai i fafo Aaron e savali e sopoia le vaitafe.

Na ia laa atu ma le vaivai tele i totonu o le vai aisā a o nonofo lona toalua, o Elisapeta, ma lona tuafafine faa-le-tulafono o Maria ma tamaiti i le taavale toso. Na mafai ona ia savali i se vaega puupuu lava, ona ia laa lea i luga o se fagaoneone ma pau i lalo ma le vaivai. Na vave lava ona aau atu Maria ia te ia ma faatu o ia i luga a o tietie atu se alii i se solofanua, sii o ia i luga, ma ave atu o ia i le isi itu o le vaitafe.⁴

Na agi mai se savili mai matu i le vaega, ma na amata ona to faata’uta’u mai le timu. Na toe foi atu Maria i le taavale toso, ma na la tosoina ma Elisapeta i le isi itu o le vaitafe. A o tauivi atu isi aumalaga e kolosi le vai, na toe foi atu tamaitai ma alii i le vaitafe e laveai mai ni uo. Sa siiina e nisi isi o le Au Paia na matutua tele, laiti tele, pe na mamai tele e kolosi le vai e i latou lava. Na aau ma toe aau Sara Ane Haia e sefuluiva-tausaga le matua, i totonu o le vaitafe aisa, e fesoasoani i nai tagata e sopo’ia i le isi itu.

I le le mafai ai ona toe savali, o lea na tuuina ai Aaron Jackson i luga o se taavale toso ma aveina atu i le nofoaga o le tolauapiga o le afiafi, o ona vae na tautau ifo i tua o le taavale. Na mulimuli atu Elisapeta ma Maria i se taimi mulimuli ane, ua saunia e tausia o ia i le taimi lava e taunuu ai i le tolauapiga. O tua atu o i latou, na tautevateva mai ai le Au Paia i se aoauli ua fai atu, o o latou ofu masaesae ma aisa ua malo i o latou tino.⁵

---

O lena po, na fesoasoani ai Elisapeta i lona toalua i le moega ma na moe ai lava i ona tafatafa. Ina ua ala ae o ia i ni nai itula mulimuli ane, na ia faalogologo ai mo le manava a Aaron ae na te lei faalogoina se mea. I le faateia tele, na ia tuu ona lima i luga o ia ma iloaina ai na malulu ma malo lona tino.

Na tagi atu Elisapeta mo se fesoasoani, ae na leai se mea na mafai e se tasi ona fai. Na ia mafaufau e faamumu se afi ina ia mafai ona ia vaai atu ia Aaron, ae na leai se mea e mafai ona ia faaolaina ai.

A o taoto i tafatafa o le tino maliu o lona toalua, na le mafai ona moe Elisapeta. Na ia faatalitali ma tatalo, ma faavauvau a o ia vaavaai atu mo faailoga muamua o le malamalama o le taeao. Na faasolo lemu atu itula. Na ia iloaina na i ai pea lana fanau e tausi—ma na i ai pea lona uso o Maria e fesoasoani ia te ia. Ae e oo lava ia Maria na mai foi. Na pau lava le tagata e mafai ona faalagolago moni lava i ai Elisapeta o le Alii. O lena po na ia ole atu ai ia te Ia mo se fesoasoani, ma le talitonu o le a Ia faamafanafana ia te ia ma fesoasoani i lana fanau.

Ina ua oo mai le taeao, na lotovaivai le aumalaga i le vaaia o ni nai inisi o le kiona i luga o le eleele. Na sii ese atu e se vaega o alii ia Aaron ma le isi sefulutolu tagata na maliliu i lena po. Ona sa malo tele le eleele mo le eliina, na latou afifiina ai tagata oti i palanikeke ma tanu i latou i le kiona.⁶

Na faatonuina e Kapeteni Martin le vaega ia faaauau, e ui i le tau. Na tulei ma tosoina e le aumalaga a latou taavale toso i ni nai maila i le loloto o le aisa ma matagi maatiati. Na pipii le kiona susu i uili, ma na mamafatu ai taavale toso ma faigata ai ona toso.⁷

O le aso na sosoo ai, na savavali atu ai le vaega i le kiona o loo loloto pea.⁸ O le toatele sa le’i lelei seevae po o seevae maualuluga i tuli e puipui ai mai le malulu. Na mafoe uma pa’u o o latou vae ma tafetotoi mai le malulu o le aisa. Na taumafai le Au Paia ia faatumauina o latou agaga fiafia e ala i le usuina o viiga.⁹ Ae o le fa aso talu ona sopoia le North Platte, na itiiti lava so latou agai i luma.

Na vaivai tele ma paeee, ae na tauivi lava le aumalaga e faaauau pea. Ua toeitiiti lava uma le falaoamata i le taimi lea. Na mamate povi ma na paeee tele e maua ai ni meaai. O nisi tagata na le lava le malosi e faatutu ai o latou faleie, o lea na latou momoe ai i le kiona.¹⁰

I le aso 23 o Oketopa, na filifili ai Kapeteni Martin e faamalolo le vaega i se nofoaga na taua o le Red Buttes. Ao gasolo aso, na faasolo ina le lelei le tulaga o le tolauapiga. Na faasolo ina malulu tele, ma na vave lava ona silia ma le limasefulu le aofai o tagata maliliu. I le po, na fetolofi ane luko i le tolauapiga, eli i luga tuugamau, ma aai i tino maliu.¹¹

O aso uma lava, na valaau atu ai Kapeteni Martin i le Au Paia ia faapotopoto e tatalo mo le laveaiina ma ole atu mo se faamanuiaga i luga o e mamai ma puapuagatia i le tolauapiga. Na ia foliga lelava ma faanoanoa, ae na ia faamautinoa atu i le Au Paia o le a oo mai le fesoasoani.¹²

I le afiafi o le aso 27 o Oketopa, na saofai ai Elisapeta i luga o se maa ma fusi mau lana fanau. I le fia afe maila mai Egelani, i le leai o ni meaai ma ua taofia e le kiona i se atunuu o mauga papa, sa amata ona ia lotovaivai. Ua leai nei sana tane. Ua leai se tama o lana fanau. Ua leai se mea e puipuia i latou mai afa o le taumalulu sei vagana ai ni lavalava masaesae ma nai palanikeke.

I se taimi o le po, na moe ai o ia ma miti faapea na tu mai Aaron i ona tafatafa. “Ia fiafia, Elisapeta,” na ia fai mai ai, “ua latalata mai le laveaiga.”¹³

O le aso na sosoo ai, ina ua maea se aiga laitiiti lava o le taeao, na vaaia ai e le aumalaga ni tagata se toatolu o agai mai i lalo o se mauga e lata ane i solofanua. Ao lata mai tagata, na iloa atu e le Au Paia ia Iosefa Iaga, le atalii e luasefulu-lua tausaga o Polika Iaga lea na auauna atu o se faifeautalai i Egelani mo le tolu tausaga. Faatasi ai ma ia o Daniel Jones ma Abel Garr, o alii e toalua mai le Vanu o Sate Leki. Na latou tietie mai i totonu o le tolauapiga, valaau i tagata e potopoto mai, ma tufatufa atu taumafa ma sapalai na latou aumaia i a latou manu.

“O loo tele taumafa ma lavalava o le a oo mai mo outou,” na faailoa atu e Iosefa, “ae o le taeao a taeao e tatau ai ona outou faaauau ai mai iinei.” O isi laveai na fasefululima maila le mamao i taavale solofanua o tumu i taumafa, lavalava, ma palanikeke. Afai e taumafai i luma le aumalaga, o le a latou feiloai ma i latou i ni nai aso.¹⁴

Na feei fiafia le aumalaga, opo mai na alii, ma feasogi atu i o latou alafau. Na taliē aiga ma fusi atu e le tasi le isi ao maligi ifo loimata mai o latou mata. “Amene!” na latou feei atu ai.

Na usu e le vaega se viiga ma malolo loa i o latou faleie ina ua oo mai le po. O le a latou amata agai i sisifo i le taeao.¹⁵

---

I le tolu aso mulimuli ane, i le aso 31 o Oketopa, na feiloai ai le vaega a Martin ma isi tagata laveai i le ala. Na matua maofa lava George D. Grant, le taitai o le vaega itiiti lea i le mea na ia vaaia. E lima pe ono selau le Au Paia na tau tuleia pe tosoina a latou taavale toso i se laina piopio pe a ma le tolu pe fa maila le umī. Na mafai ona ia vaai atu i le vaivai o i latou i le tosoina o a latou taavale toso i le aso atoa i le kiona ma le palapala. O nisi tagata na taooto i totonu o taavale toso, ua mamai tele pe ua vaivai tele e toe minoi. Na fetagisi tamaiti, o nisi ao latou tautevateva i autafa o o latou matua i le kiona. Na foliga maalilili uma tagata, ma o vae o nisi tagata na tafetotoi mai le maluluina i le kiona.¹⁶

O nai isi aso na sosoo ai, na fesoasoani ai le au laveai i le vaega a Martin e faaauau i sisifo. Ma le faamoemoe e puipuia le aumalaga mai le tau, na mananao le au laveai ia siitia i latou i se ana e le mamao mai papa maualuluga e lua e taua o le Devil’s Gate. Ae ina ia oo atu iina, e tatau ona kolosi e le aumalaga le Vaitafe aisa o le Sweetwater. Ona o le matautia tele o lo latou kolosiina talu ai o le vaitafe lea na i ai pea i o latou mafaufau, o le toatele o le aumalaga na fefefe e kolosi. O nisi o i latou na mafai ona kolosi le vaitafe i taavale solofanua. O isi na savavali. O nisi o le au laveai ma ni nai aumalaga na siiina tagata i luga o le vai aisa. O le toalima o tagata laveai talavou—o David P. Kimball, George W. Grant, Allen Huntington, Stephen Taylor, ma Ira Nebeker—na i ai i totonu o le vai malulu i le tele o itula, ma fesoasoani ma le lototoa i le vaega ina ia mafai ona kolosiina.

O le taimi lava na mautu ai le aumalaga i le ana, lea na latou faaigoaina mulimuli ane o le Martin’s Cove, na amata ai ona toe toulu le kiona. Na amata ona tuga le malulu o le tolauapiga, ma na maliliu isi tagata. O se tasi o le aumalaga na faamatalaina le ana “o se tuugamau ua fe’oma’i.”¹⁷

E oo atu i le aso 9 o Novema, ua faatasi mai Jesse Haven ma isi Au Paia i vaega o taavale solofanua e lua na totoe i le vaega a Martin i le ana. Na lagilelei le tau, ma na filifili le au laveai e faaauau le malaga a le vaega i sisifo, e ui lava i le le lava o sapalai ma taumafa e tausia ai tagata malaga taitasi mo le 325 maila o totoe i le Aai o Sate Leki. Na tatia’i ese e le aumalaga le tele o a latou taavale toso ma toeitiiti lava o a latou meatotino uma, ae tuu na o mea e puipuia ai mai le malulu. Pe a ma le na o le tasi vae tolu o le Au Paia i le vaega a Martin na mafai ona savavali. Na tuuina e le au laveai isi i totonu o taavale solofanua.¹⁸

Na iloa e George D. Grant na sili atu le fesoasoani e manaomia e le aumalaga nai lo le mea e mafai e lana aulaveai ona ofo atu. “Tatou te faaauau ona faia mea uma tatou te mafaia, e leai se masalosalo po o se faavaivai.” na lipoti atu ai George i se tusi ia Polika. “Ou te lei vaai muamua lava i sea malosi ma le faatuatua i nei ‘tama,’ po o se agaga matuai lelei lava e pei ona i ai ia i latou na matou o mai.”

“Na matou tatalo e le aunoa,” na ia molimau ai, “ma na i ai faamanuiaga a le Atua ia i matou.”¹⁹

Na maua atu e Ephraim Hanks, Arza Hinckley, ma isi au laveai le vaega i sisifo o le Martin’s Cove ma tuuina atu isi taumafa ma sapalai mo le aumalaga. E sefulu isi taavale solofanua laveai na oo atu i le aumalaga i se nofoaga e taua o Rocky Ridge, o loo pe a ma le 250 maila mai le Aai o Sate Leki. O le taimi lea, e sili atu ma le 350 alii mai le vanu na asa atu i le kiona ua faateleina le loloto e fesoasoani. Na latou faatuina ni tolauapiga i le ala, faamama ese le kiona, faamumu afi, ma saunia nisi taavale solofanua ina ia leai se isi e toe savali. Na kuka foi e le au laveai meaai mo le aumalaga ma sisiva ma pepese e faagalo ai lo latou puapuaga.²⁰

Na tumau pea le leaga o le tau, ae na lagona e le Au Paia le lagolago a le Atua ia i latou. “E toeitiiti lava o aso uma e oso mai ai afa matautia e matuai taufaafefe lava, ma i le vaai atu i ai, e manatu ai se tasi o le a le mafai ona matou tatalia nei afa malolosi,” na tusi atu ai Joseph Simmons, o se tasi o le aulaveai, i se uo i le vanu. “Ana leai le fesoasoani mai le lagi, semanu ua leva ona poloka i matou e le aisa i na mauga.”²¹

---

Ao malamalama atili Polika e uiga i le Au Paia o loo i ai pea i le ala, na ia le mafai ona taulai atu i se isi lava mea e ese mai lo latou puapuaga. “O lou mafaufau o loo i ai iina i le kiona,” na ia tau atu ai i le faalapotopotoga i le aso 12 o Novema. “E le mafai ona ou alu atu pe sau i totonu ae i minute uma lava po o le lua minute e liliu atu ai lou mafaufau ia i latou.”²²

I le aso 30 o Novema, ao ia pule faamalumalu i se sauniga o le Sapati i le Aai o Sate Leki, na iloa ai e Polika o le a taunuu mai i se taimi o lena aso taavale solofanua laveai o loo aumai ai tagata o le vaega a Martin. Na ia vave lava ona tolopoina isi sauniga o le aso. “Pe a taunuu mai na tagata,” na ia tau atu ai, “ou te manao ia tufatufa atu i latou i le aai i aiga o loo i ai fale lelei ma mafanafana.”²³

Na taunuu mai le aumalaga i le aai i le aoauli. O le taimi lea, ua matuai vaivai lava i latou. Na silia ma le selau tagata o le vaega na maliliu. O le tele o e na sao mai na aisa lima ma vae, o nisi na manaomia ona tatipi ese. Ana le o mai le au laveai i le taimi na latou taunuu ai, semanu e sili atu le toatele e fano.

Na talia e le Au Paia o le teritori le aumalaga fou i o latou fale. Na see atu Elisapeta Jackson ma lana fanau i le fale o lona tuagane o Samuelu i Ogden, i matu o le Aai o Sate Leki, lea na latou malolo ai ma tausia ai ia malolosi mai le latou malaga matautia.²⁴

O Jesse Haven, lea na taunuu mai i le Aai o Sate Leki i le lua vaiaso talu ona o mai le vaega a Martin, na tagi ina ua ia vaai i le vanu mo le taimi muamua i le fa tausaga. Na ia alu sao atu i le fale e vaai i ana ava, o Martha ma Abigail, ma lona atalii, o Jesse, lea na fanau ao i ai o ia i Aferika i Saute. Ona ia asiasi atu lea ia Polika Iaga, ma le loto faafetai i le auina atu ai e le perofeta vaega laveai e faasaoina le Au Paia.

“O le a ou manatua pea le tautoulu o le 1856,” na ia tusia ai i lana api talaaga ina ua taunuu i le vanu. “Ua ou i ai i lenei Ekalesia mo le sefuluiva tausaga. Na ou vaai i puapuaga e sili atu i le tautoulu talu ai nai lo se isi lava taimi i le Au Paia.²⁵

O Patience Loader, o se sui o le vaega a Martin, na manatua mulimuli ane le ala na faamanuiaina ai o ia e le Alii i le malosi e onosaia ai le malaga. “E mafai ona ou faapea atu na matou tuu lo matou faatuatuaga i le Atua, na ia molimau ai. “Na Ia faafofoga ma tali mai a matou tatalo ma aumaia i matou mai na vanu.”²⁶

1. [John Jaques], “Some Reminiscences,” Salt Lake Daily Herald, Dec. 8, 1878, 1; Haven, Journal, Oct. 8–13, 1856; Kingsford, Autobiographical Sketch, 3.

2. Jesse Haven to Brigham Young, Oct. 9, 1856, Brigham Young Office Files, CHL; Archer, Reminiscences, 145–49; Kingsford, Autobiographical Sketch, 3; tagai foi Christy, “Weather, Disaster, and Responsibility,” 23–28.

3. Kingsford, Autobiographical Sketch, 3; Haven, Journal, Oct. 12–23, 1856; [John Jaques], “Some Reminiscences,” Salt Lake Daily Herald, Dec. 8, 1878, 1; Dec. 22, 1878, 1.

4. Kingsford, Autobiographical Sketch, 3; Josiah Rogerson, “Martin’s Handcart Company, 1856 [No. 5],” Salt Lake Herald, Nov. 10, 1907, 5; tagai foi Archer, Reminiscences, 158–59.

5. Kingsford, Autobiographical Sketch, 3; Carter, Heart Throbs of the West, 378; Archer, Reminiscences, 158–63; Binder, Reminiscences, Oct. 19, 1856; [John Jaques], “Some Reminiscences,” Salt Lake Daily Herald, Dec. 8, 1878, 1; Josiah Rogerson, “Martin’s Handcart Company, 1856 [No. 5],” Salt Lake Herald, Nov. 10, 1907, 3, 5.

6. Kingsford, Autobiographical Sketch, 4; Binder, Reminiscences, Oct. 20, 1856; Jones, Notes, Oct. 20, 1856; tagai foi Josiah Rogerson, “Martin’s Handcart Company, 1856 [No. 5],” Salt Lake Herald, Nov. 10, 1907, 5.

7. Kingsford, Autobiographical Sketch, 4; Edward Martin Company (1856) list, Pioneer Database, history.ChurchofJesusChrist.org/overlandtravel/companies; Haven, Journal, Oct. 20, 1856; Archer, Reminiscences, 163–64; Binder, Reminiscences, Oct. 20, 1856; Josiah Rogerson, “Martin’s Handcart Company, 1856 [No. 6],” Salt Lake Herald, Nov. 17, 1907, 14. Autu: Handcart Companies [Vaega Taavale Toso]

8. Durham, Journal, 15–16; Binder, Reminiscences, Oct. 20, 1856; Haven, Journal, Oct. 20–21, 1856.

9. Clark, “History of Louisa Mellor Clark,” 3–4; George D. Grant to Brigham Young, Nov. 2, 1856, Brigham Young Office Files, CHL; Openshaw, Diary, 9; [John Jaques], “Some Reminiscences,” Salt Lake Daily Herald, Dec. 15, 1878, 1; Bailey, Reminiscences and Journal, 6.

10. Kingsford, Autobiographical Sketch, 4–5; [John Jaques], “Some Reminiscences,” Salt Lake Daily Herald, Dec. 15, 1878, 1; Binder, Reminiscences, Oct. 20–29, 1856.

11. Binder, Reminiscences, Oct. 20–29, 1856; Bleak, Journal, Oct. 23–28, 1856; Bailey, Reminiscences and Journal, 6; Kingsford, Autobiographical Sketch, 5; John Hunt to Brigham Young, Oct. 11, 1856, Brigham Young Office Files, CHL; Olsen, Price We Paid, 327–29; Josiah Rogerson, “Martin’s Handcart Company, 1856 [No. 6],” Salt Lake Herald, Nov. 17, 1907, 14.

12. Bond, Handcarts West in ’56, 24.

13. Kingsford, Autobiographical Sketch, 6.

14. Archer, Reminiscences, 172–73; Olsen, Price We Paid, 339–46; Josiah Rogerson, “Martin’s Handcart Company, 1856 [No. 6],” Salt Lake Herald, Nov. 17, 1907, 14; Bond, Handcarts West in ’56, 27–28; Christy, “Weather, Disaster, and Responsibility,” 44. Upusii na suia mo le faafaigofie ona faitauina; o le uluai punaoa ua faapea mai “Ona ia tau atu lea ia kapeteni Edward Martin afai o i ai ni ana falaoamata ua lava e tuuina mai ia i matou uma le tasi le pauna o le falaoamata a le tagata ma faapea mai afai o i ai ni povi ia fasi ma tuu mai ia i matou taitoatasi le tasi le pauna povi a le tagata ma fai mai o loo tele taumafa ma lavalava e oo mai mo i matou i le ala ae o a taeao i le taeao e tatau ai ona matou faaauau mai iina.”

15. Bleak, Journal, Oct. 28, 1856; Clark, “History of Louisa Mellor Clark,” 3–4; Bond, Handcarts West in ’56, 25, 27–29; Josiah Rogerson, “Martin’s Handcart Company, 1856 [No. 6],” Salt Lake Herald, Nov. 17, 1907, 14; Archer, Reminiscences, 173–74; [John Jaques], “Some Reminiscences,” Salt Lake Daily Herald, Dec. 15, 1878, 1.

16. George D. Grant to Brigham Young, Nov. 2, 1856, Brigham Young Office Files, CHL; Olsen, Price We Paid, 347–48.

17. Olsen, Price We Paid, 358–62; Orton, “Martin Handcart Company at the Sweetwater,” 10–29; [John Jaques], “Some Reminiscences,” Salt Lake Daily Herald, Dec. 15, 1878, 1.

18. Haven, Journal, Oct. 31–Nov. 10, 1856; Clayton, Latter-day Saints’ Emigrants’ Guide, 14–15; George D. Grant to Brigham Young, Nov. 2, 1856, Brigham Young Office Files, CHL; Olsen, Price We Paid, 369–72.

19. George D. Grant to Brigham Young, Nov. 2, 1856, Brigham Young Office Files, CHL; tagai foi “Remarks,” Deseret News, Nov. 19, 1856, [4].

20. Olsen, Price We Paid, 381–87, 391–97; Rescue Companies (1856) list, Pioneer Database, history.ChurchofJesusChrist.org/overlandtravel/companies; Historian’s Office, History of the Church, volume 26, Nov. 13, 1856, 985.

21. Joseph Simmons to Horace Whitney, Nov. 24, 1856, Rachel W. Simmons Collection, CHL.

22. “Discourse,” Deseret News, Nov. 12, 1856, [2]; Woodruff, Journal, Oct. 31, 1856; tagai foi Historical Department, Office Journal, Oct. 31, 1856; ma le Archer, Reminiscences, 188.

23. “Remarks,” Deseret News, Dec. 10, 1856, [8]; tagai foi Historian’s Office, General Church Minutes, Nov. 30, 1856, ma le Apr. 7, 1852.

24. “Arrival,” Deseret News, Dec. 3, 1856, [5]; Kingsford, Autobiographical Sketch, 6; Bailey, Reminiscences and Journal, 7; Bleak, Journal, Nov. 30, 1856; Christy, “Weather, Disaster, and Responsibility,” 51; Olsen, Price We Paid, 369–71, 383–85, 393–94; [John Jaques], “Some Reminiscences,” Salt Lake Daily Herald, Dec. 22, 1878, 1.

25. Haven, Journal, Dec. 15, 1856.

26. Archer, Reminiscences, 185. Autu: Handcart Companies [Vaega Taavale Toso]