Mataupu 30

O se Gaoioiga Tumau, ma Agai i Luma

Teine ma le tama o loo savavali agai i le fale lotu

Ina ua taunuu atu Uilifoti Uitilafi i le Aai o Sate Leki i le tolu aso talu ona maliu Polika Iaga, e faitau afe le au faanoanoa ua laina atu i le tapeneko, lea na taoto ai le tino maliu o Polika. Na faatauvaa lava le pusa maliu o le perofeta ma na i ai se tioata i lona tapuni, na mafai ai e le Au Paia ona vaai atu i ona foliga mo le taimi mulimuli.

Na talitonu le Au Paia i Iuta o le taitaiga a Polika na faataunuuina le valoaga a Isaia i le fua mai o le toafa e pei o se rosa. I lalo o le taitaiga a Polika, na eli ai alavai e le Au Paia i vanu o mauga, e fui ai faatoaga, togalaau teu fale, togalaau aina, ma laufanua e tausia le faitau selau o nuu o le Au Paia o Aso e Gata Ai. O le tele o nei nuu ua mautu, ma tausia o ni nuu o le Au Paia o e tauivi ia ola i mataupu faavae o le lototasi ma le galulue faatasi. O ni nai nuu, e pei o le Aai o Sate Leki, na vave lava ona avea ma taulaga autu o le gaosiga ma le fefaatauaiga o oloa.

Ae o le faamanuiaina o Polika o se tagata e fuafuaina ma o se paionia e lei sili atu lana auaunaga i le avea ai o se perofeta a le Atua. O le tele o tagata na faamamaluina Polika i lena taeao na faalogo o saunoa atu o ia pe na vaai foi ia te ia o faatasi ma le Au Paia i le teritori. O nisi na iloaina o ia o se faifeautalai i le Iunaite Setete i sasae po o Egelani. O isi na manatua le ala na ia taitaia ai le Ekalesia ma le saogalemu i le le mautonu na mulimuli mai i le maliu o Iosefa Samita. Ma o isi lava na sopoia Laufanua Valevalenoa Tele ma Mauga Papa i ona tafatafa. O le tele o tagata, e aofia ai le faitau sefulu afe o le Au Paia na potopoto i Iuta mai Europa ma isi vaega o le lalolagi, e lei iloa lava le Ekalesia e aunoa ma ia.

Ao tu Uitilafi i luga ae o le pusa maliu, na ia mafaufau o foliga masani lava ia o lana uo ua leva. Ua malolo le Leona a le Alii.¹

I le aso 2 o Setema, 1877, le aso na sosoo ma le maimoaina o le maliu, na faatumulia le tapeneko mo le maliu o Polika ao tutu le sili atu ma le faitau afe o isi i fafo. Na tautau mai le faaalo o le tapeneko laina o fatu o fugalaau, ma na ufitia le okeni i ie uli. E lei laei uli le Au Paia, e pei o le masani i maliu i le Iunaite Setete. Na talosaga atu Polika ia i latou e aua le faia.²

E lei lagolagoina lava e le Ekalesia se au Peresitene Sili fou i le mavae ai o le maliu o Polika, o lea na taitaia ai e Ioane Teila le sauniga o se peresitene o le Korama a le Toasefululua.³ Na faaalia le faaaloalo o ni nai aposetolo i le perofeta ua maliu. Na saunoa atu Uilifoti i le manao tele o Polika e fausia malumalu ma faaola e ua maliliu. “Na ia lagonaina le mamafatu o lenei tisipenisone ua pau atu i ona luga,” na saunoa ai Uilifoti. “Na fiafia o ia na soifua umi ina ia ulu atu i se tasi o malumalu ma auai i lona faapaiaga, ma amataina galuega o isi malumalu.”⁴

Na molimau Ioane o le a faaauau e le Atua le taitaiga o le Ekalesia i totonu o le vevesi o aso e gata ai. Ua amata lava, ona valoia e le Salt Lake Tribune faapea o le maliu o Polika o le a taitai atu i le vevesi i totonu o taitai o le Ekalesia ma le o ese ai o nisi o le Au Paia.⁵ O isi na faamoemoe o le a aumaia e falefaamasino le faaleagaina o le Ekalesia. O George Reynolds, lea na toe faamasinoina ma falepuipui mo le lua o toalua, lea ua toe talosagaina le toe iloiloina o lona moliaga i luma o le Faamasinoga Maualuga o le Iunaite Setete. Afai e lagolagoina e le faamasinoga lona nofosala, o le a mautinoa loa le leai o se malosiaga o le Au Paia e puipuia lo latou ala i le olaga.⁶

Ae e lei fefe Ioane i le lumanai. “O le galuega o loo tatou galulue ai e le o se galuega a le tagata. E lei amataina e Iosefa Samita; e faapena foi Polika Iaga,” na ia folafola atu ai. “Na sau mai le Atua. O Ia e ana le galuega.”

“Ma mo i tatou, le Au Paia o Aso e Gata Ai, ina ia faalautele lo latou valaauga,”na ia saunoa ai, “ma o suiga eseese ua tatou i ai o le a oo mai i atunuu uma— o au tetee sosoo ma isi au tetee—e mafai ona tatou faia se gaoioiga tumau, ma agai i luma, e taitaia e le Alii.”⁷

---

I le mavae ai o le maliu o lona tama, na tauivi Susie Young Dunford ia iloa le mea e fai i lana faaipoipoga ua le manuia. Ina ua malaga ese lona tolalua, o Alema, i se misiona, na ia faamoemoe o le a suia ai o ia. Ae na ia faaauau pea ona ita ma puipuia o ia lava i ana tusi na auina mai ia te ia.⁸

I le le manao ai ia faavavevave, na mafaufau Susie i ana filifiliga, ma tatalo pea e uiga i lona tulaga pagatia. Ina ua lata lava ona maliu lona tama, na ia faamanatu atu ia te ia matafaioi o le ava ma le tina na totonugalemu i lona manuia i le olaga. Na manao Susie e faataunuu na matafoioi i le amiotonu. Ae o lona uiga ea ia tumau ai o ia i se faaipoipoga saua?⁹

I se tasi po, na miti ai Susie faapea na la asiasi atu ma Alema i lona tama i le Maota o le Leona. Sa i ai se tofiga a Polika mo i laua, ae nai loo le avatu ia Alema, e pei ona ia masani ai ao ola o ia, na ia tuuina atu ia Susie. Ao ia alu ese atu e faataunuu le tofiga, sa fetaui ai Susie ia Eliza Snow i le potu tele. Aisea ua tuuina mai ai e lona tama ia te ia le tofiga, na fesili ai Susie, ae sa ia fai atu lava ia Alema i le taimi ua tuanai?

“Na te lei malamalama i lena taimi,” na fai mai ai Eliza i le miti. “Ae ua ia malamalama nei.”

Na mau pea ia te ia upu a Eliza ina ua ala o ia. Sa o se faamafanafanaga le iloa e ono i ai se isi vaaiga a lona tama i le lalolagi o agaga nai lo le mea na i ai i le olaga.

E lei leva lena ae faaulu le pepa e tatala ai le faaipoipoga a Susie, ma sa foi mai Alema mai Egelani ma amata ona faatalatalanoa loia. O taitai o le Ekalesia na masani ona taumafai e toe faaleleia ulugalii na mananao e tetea. Ae na talitonu foi taitai, soo se tamaitai lava na manao ia alu ese mai se faaipoipoga faanoanoa e tatau ona tatalaina.¹⁰ E le faaitiitia le moni o lenei mea mo tamaitai o faafaigata ona ola e tusa ma luitau o le autaunonofo. Ona sa lei aloaia i le faamasinoga i le lotoifale nei faaipoipoga, sa taulimaina e taitai o le Ekalesia mataupu tau ulugalii tetea e aafia ai ava faaautaunonofo.¹¹

Ae talu ai ua nao Susie le ava o Alema, o lana mataupu sa ese mai ai. I le avea ai ma se tamaitai i se faaipoipoga saua, sa mafai ona ia faamoemoe e tatala le faaipoipoga, ae sa tatau ona la o ma Alema i luma o se faamasinoga faalemalo. O faamasinoga i le Iunaite Setete ma Europa na tele lava ina au i tamaloloa i mataupu i faaipoipoga tatala i lea taimi. E ui ina fautuaina e taitai o le Ekalesia tane ia faatele le tausiga mo ava muamua ma a latou fanau, sa finau lava Alema ia maua tamaiti ma toeitiiti ave uma meatotino a le aiga.

O le tatalaina o le faaipoipoga a Susie ma Alema na alu ai le lua aso. I le iuga, na maua e Alema le tausiga atoa o le la afafine e fa tausaga o Leah. Talu ai o le la atalii o Bailey sa na o le lua tausaga, na tuuina e le faamasinoga o ia i lalo o le tausiga a Susie ae tuu ia Alema le pule e fai ai faaiuga mo ia.¹²

O le le mauaina o lana fanau sa nutimomoia ai le fatu o Susie, ma sa ia tuua le fale faamasino ma le faanoanoa tele i le faaiuga. Ae talu ai ua tuua o ia e le tatalaina o le faaipoipoga e aunoa ma se meatotino po o se alagatupe e ola ai, sa laiitiiti ai se taimi na te mafaufau ai i ona tiga. Sa ia matuai manaomia lava se fuafuaga mo le mea o le a ia faia.¹³

I se taimi puupuu talu ona uma le teteaga, na talanoa atu ai Susie ia Peresitene Ioane Teila e uiga i lona lumanai. Na ia nofo mai le aoga i le sefulufa o ona tausaga, ae o lea la ua ia manao e toe foi. Sa lagolagoina o ia e Peresitene Teila ma sa ia ofo mai e fesoasoani ia te ia e amata i le aoga tulaga lua i le lotoifale. Ina ua tuua e Susie lona ofisa, sa la fetaui ma aposetolo Erastus Snow.

“A e fia alu i le aoga, o le a ou tauina atu ia te oe le mea e te alu i ai,” na ia faapea ane ai. “O se nofoaga e mafai ona e faatumuina ai lou agaga i le malamalama tele o le fagaeetia atoa ai ma le faatumuina o lou mafaufau i aoaoga anamua ma ona po nei. O lenei nofoaga o le Aoga a Polika Iaga i Provo.”

O le aso na sosoo ai, sa pue e Susie le nofoaafi e vaai i le aoga. E ui ina faavaeina e lona tama le aoga, sa itiiti lava se mea na ia iloa e faatatau i ai po o lona faamoemoega. Ina ua ia taunuu atu, sa la fetaui ma le puleaoga, o lana faiaoga tuai o Karl Maeser. Na ia faafeiloaiina o ia ma le agaalofa ma faaopoopoina lona igoa i lisi o le aoga.¹⁴

---

I le taimi lava lea, i luga o le Penisula i Kalaupapa i le motu o Molokai, sa tigaina lava Jonathan Napela ma ua faasolo ina leaga tele. Ina ua amata ona nofo faatasi Napela ma tagata lepela i le penisula, sa lei aafia o ia i le faamai na lavevea ai le tele o isi tagata Hawaii, e aofia ai lona toalua o Kitty. Lea la, toeitiiti lima tausaga mulimuli ane, ua maua foi o ia i le faamai. Sa fulafula ona foliga i le tulaga ua tau le iloa ai o ia, ma o le tele o ona nifo sa toulu. O ona lima, ia sa faamanuia ai le tele o tagata mo le silia i le luasefulu tausaga, sa lilo i maisua.¹⁵

I le aso 26 o Ianuari, 1878, sa talia ai e Napela ma Kitty ni faifeautalai se toalua i lo la fale, o Henry Richards ma Keau Kalawaia, faapea foi ma Nehemia Kahuelaau, o le pulefaamalumalu o le Ekalesia i Molokai. O Keau ma Nehemia o ni Au Paia ua leva i Hawaii, ma o i laua uma sa auauna atu i ni nai misiona. O Henry o le uso laitiiti o le aposetolo o Franklin Richards ma sa auauna atu i lana misiona muamua i atumotu i le 1850, i ni nai tausaga talu ona maea le papatisoga o Napela. Na vaai mulimuli lava Henry ia Napela i le Aai o Sate Leki i le 1869, ae o lea la, i le itiiti ma le sefulu tausaga mulimuli ane, sa faateia o ia i le tele o le suiga i foliga o Napela.¹⁶

O le aso na sosoo ai o le Sapati, ma sa fuafua Napela e ave ana malo e asiasi i paranesi o le penisula. E ui i lona gasegase, sa faaauau pea ona taitai e Napela le Ekalesia i Kalaupapa, ma vaaia Au Paia e fitusefuluvalu i ni paranesi se lua. Ae ao lei alu atu Henry e asiasi i nuu, sa manaomia ona ia faaali atu se faatagaga faaletagataasiasi ia Father Damien, o le faitaulaga Katoliko sa auauana o le taitai sili o le kolone. Ona sa fautuaina e le aufono o le soifua maloloina a Hawaii tagata asiasi e aua le momoe faatasi ma tagata lepela i le po, lea o le a nofo ai Henry i le fale o Father Damien seia ao.

O Father Damien ua maua foi i le lepela, ae faatoa i ai i tulaga amata o le faamai ma sa le iloa e sesi le tulaga ua ia oo i ai. E pei o Napela, sa ia faaaluina lona olaga e tausia ai le tulaga faaleagaga ma le faaletino o tagata faaaunuua i luga o Kalaupapa. E ui ina le manatu tutusa o ia ma Napela i ni nai mataupu faalelotu, na avea i laua ma se uo lelei.¹⁷

I le taeao, sa auai atu Napela ma Henry i se fono a le paranesi i le fale o Lepo, o le peresitene o le paranesi o Au Paia i le itu i sasae o le penisula. I le va o le fasefulu ma le limasefulu tagata, o le toatele o i latou sa le o ni tagata o le Ekalesia, sa auai i le fonotaga. O le tele o i latou sa foliga soifua maloloina. O nisi sa lilofia mai le ulu e faasolo atu i vae i maisua. O le vaaiga i o latou mafatiaga sa ootia ai Henry i loimata. O i laua ma Keau sa lauga mo le tai fasefulu-lima minute. Ina ua maea, sa tuuina atu e Nehemia ma Napela ni nai tautalaga pupuu.

Ina ua maea le sauniga o le taeao, sa ave e Napela Henry ma Keau e asiasi atu i le isi paranesi i le penisula. Ona faaalu lea o le afiafi atoa e Henry ma le taeao na sosoo ai e asiasi ai i e ua sili ona mamai i le nuu faatasi ma Father Damien.

O Napela, Nehemia ma Keau sa faatalitali ia Henry ina ua ia foi mai. Ae lei malaga ese atu ana malo, sa fesili atu Napela ia i laua mo se faamanuiaga. E le o toe mamao ae le mafai ona toe feoai i laua ma Kitty, ma e masalo o le a la le toe vaai foi ia Henry.

Na faaee atu lima o Henry i luga o le ulu o Napela ma tau atu upu o le faamanuiaga. Faatasi ma loto mafatia, sa faatofa nei uo ua leva, ma amata atu le savaliga a Henry, Keau ma Nehemia i luga o le auala o le mauga tu sao i luga.¹⁸

---

Mulimuli ane i lena taumafanafana, i le nuutua o Farmington, Iuta, sa fai ai le taumafataga o le afiafi a Aurelia Rogers ma taitai iloga o le Aualofa mai i le Aai o Sate Leki, o Eliza Snow ma Emmeline Wells. Na o mai ia tamaitai i Farmington mo se konafesi o le Aualofa, ma o Aurelia, o se failautusi a le Aualofa i le lotoifale, sa i ai sona manatu na ia manao vave lava e faasoa atu ia te i laua.¹⁹

Sa iloa lelei lava e Aurelia le manaoga o i ai i tamaiti. Ina ua sefululua ona tausaga, sa maliu lona tina, na tuua ai na o ia ma lona uso matua e vaaia o la tei laiti e toafa ao auauna atu lo la tama i se misiona. Lea la, i le fasefulu ma ona tupu o ona tausaga, sa toafitu lana fanau o feola, o le tama laiitiiti ua nao le tolu tausaga. Talu ai nei lava, sa ia popole ai e uiga i tama talavou i lona nuu. Sa malovale ma sa tele ina tafafao i fafo i le leva o le po.

“O le a se mea a fai e matou teine mo ni toalua lelei?” Sa fesili atu ai Aurelia ao faia le taumafataga o le afiafi. “Pe le mafai ona i ai se faalapotopotoga mo tama laiti, ma aoao ai i latou ia avea ma alii lelei?”

Sa fiafia i ai Eliza. Sa ia ioeina le manaomia e tama laiti le taialaina faaleagaga ma le faaleamio pulea sili atu nai lo nao aoaoga ua latou mauaina i le Aoga Sa po o aso masani o le aoga.

Sa tuuina atu e Eliza le manatu ia Ioane Teila, lea sa tuuina mai lana faatagaga. Sa ia sailia foi le lagolago a le epikopo a Aurelia, o John Hess. Sa tusi atu Eliza ia te ia e uiga i lea faalapotopotoga taufaaofi, ma e lei leva ae valaauina e Epikopo Hess Aurelia o le peresitene o le Asosi Mo le Alualu i Luma o le Peraimeri fou a le uarota.

Ao fuafua e Aurelia le auala e feagai ai ma tama laiti i lana uarota, sa ia iloa ai e le atoatoa a latou fonotaga pe afai e le iai teine laiti. Sa ia tusi atu ia Eliza, ma fesili i ai pe mafai foi ona ia valaauliaina teine laiti e auai i le Peraimeri.

“E tatau ona i ai teine e faapei foi o tama,” sa toe tusi atu ai Eliza. “E tatau ona aoaoina faatasi.”²⁰

I se Aso Sa ia Aokuso i le 1878, sa feiloai ai Aurelia ma Epikopo Hess ma matua i Farmington e faatulaga le Peraimeri. Na muamua saunoa le Epikopo. “Ou te faamoemoe o le a lagona e matua le taua o lenei gaoioiga,” na ia fai atu ai. “Afai e i ai se mea i lenei olaga e maua mai ai le lagolago o matua, o le tausiaina lea o a latou fanau.” Sa ia vaetofia Aurelia ma ona fesoasoani, ma sa saunoa faapitoa lava Aurelia e uiga i le manaomia o se faalapotopotoga e lagolagoina matua i le aoaoina o fanau.

“Ou te lagona o lenei gaoioiga o le a tele sona aoga,” sa ia fai atu ai. Ona ia faatusatusa lea o fanau i Farmington i se faatoaga o laau laiti. “E tatau ona vaavaaia a’a o laau,” na ia fai atu ai, “aua afai e lelei a’a, o le a lelei le laau, ma o le a itiiti faafitauli i lala.”²¹

E silia i le lua selau tamaiti na faapotopoto i Aso Sa e lua mulimuli ane mo le uluai fonotaga o le Peraimeri. Sa taumafai Aurelia i le mea sili na te mafaia ia faafifilemu ai. Sa ia faatulaga tamaiti i ni vasega e fua i o latou tausaga ma tofia le tamaititi matua ai lava i vasega taitasi e vaaia. I le isi fonotaga, sa ia valaaulia tamaiti ia sii o latou lima e lagolagoina o ia ma isi taitai.

O aoaoga a Aurelia i tamaiti sa faigofie ma mai le loto: E leai se tamaitiiti e sili atu nai lo le isi. Aloese mai finauga ma isi. Faafoi atu le lelei mo le leaga i taimi uma.²²

---

Ia Setema i le 1878, pe a ma se masina talu ona faavaeina le faalapotopotoga o le Peraimeri, sa auina atu e Peresitene Teila aposetolo Orson Pratt ma Iosefa F. Samita i se misiona e aoina mai nisi faamatalaga e faatatau i le talafaasolopito i le tauamataina o le Ekalesia. O Orson o le tusi talafaasolopito a le Ekalesia, ae o Iosefa ua leva ona galue i le Ofisa o Talafaasolopito.

I le malaga atu i sasae, sa afe ai Orson ma Iosefa i Misuri e asiasi ia Tavita Uitimera o se tasi o Molimau e Toatolu o le Tusi a Mamona. Sa mananao aposetolo e faatalatalanoa o ia ma vaai pe mafai ona ia faatauina mai ia te i laua le lomiga lea na faaaoga e le masini lomitusi e ta ai le lomiga muamua o le Tusi a Mamona. Na maliu Matini Arisi i Iuta i le 1875, ma ua na o Tavita le sui o Molimau e Toatolu o loo soifua pea.

Sa malie Tavita e talanoa i aposetolo i le la potu o le faletalimalo. Sa ia lei toe foi mai i le Ekalesia talu le tapeina o lona igoa i le 1838, e ui ina ia fesoasoani talu ai nei lava e faavae se lotu sa faaaogaina le Tusi a Mamona o se tusitusiga paia. Lea la i le silia ma le fitusefulu tausaga, sa faateia Tavita ina ua faailoa atu e Orson o ia lava. I le 1835, sa fesoasoani ai Tavita ia Iosefa Samita, Oliva Kaotui, ma Matini Arisi e valaauina Orson o se tasi o uluai aposetolo o le tisipenisone. I lena taimi, o Orson sa o se alii talavou matamuli paee. Ao lea ua lapoa, faaitiitia lauulu, ma i ai se ava uumi paepae.²³

Ao lei leva ona amata le faatalanoaga, sa fesili atu Orson ia Tavita pe o ia manatua le taimi na ia vaai ai i papatusi auro lea sa faaaoga e Iosefa Samita e faaliliu ai le Tusi a Mamona.

“O Iuni i le 1829,” sa fai atu ai Tavita. “Sa pei lava na matou nonofo ma Iosefa, ma Oliva i luga o se ogalaau, ae susulu mai loa se malamalama ia i matou.” Sa faapea mai Tavita na sau ia te i latou se agelu ma faamaumauga anamua, le Urima ma le Tumema, ma isi measina a le au Sa Nifae.

“Na ou vaai atu i ai e pei ona ou vaai atu i lenei moega,” na ia faapea ane ai, ao po atu e lona lima le moega i ona autafa. “Sa ou faalogo i le siufofoga o le Alii e manino lava ou te lei faalogo ai i se isi lava mea i lo’u olaga, o faapea mai o faamaumauga o i papatusi o le Tusi a Mamona sa faaliliuina i le meaalofa ma le mana o le Atua .”

Sa fesili atu Orson ma Iosefa i nisi fesili se tele e uiga i le Ekalesia ua tuanai, ma sa taliina e Tavita i le auiliili e mafai ona ia faia. Na la fesili atu e uiga i tusiga a le lomitusi o le Tusi a Mamona, lea na tuuina atu e Oliva Kaotui ia Tavita. “Pe mafai ona e faatauina mai ia i maua?” Na fesili atu ai Orson.

“Leai. Na tuuina mai e Oliva ia te au ia teuina,” sa fai atu ai Tavita. “Ou te vaai i nei mea o ni mea paia ma ou te le tuueseina atu pe faatauina mo se tupe.”²⁴

I le aso na sosoo ai, na faaali atu ai e Tavita i aposetolo tusitusiga. Ao ia faia, na ia maitauina ai na finagalo le Alii i Ana auauna ia avatu le Tusi a Mamona i le lalolagi atoa.

“Ioe,” na tali atu ai Iosefa, “ma ua matou auina atu le tusi i le au Tenimaka, le au Suiti, le au Sipaniolo, le au Italia, le au Farani, le au Siamani, le au Uelese, ma motu o le moana.”

“O lea la, Tama Uitimera,” na faaauau atu ai Iosefa, “e lei nofoai le Ekalesia.”²⁵

---

Mulimuli ane i lena tau toulu, i Iuta, sa malaga atu ai Ane Sophie Dorius e onosefulu-fitu tausaga i le malumalu o St. George faatasi ma lona atalii aupito i matua, o Carl. Ua toeitiiti atoa le tolusefulu tausaga talu ona tetea Ane Sophie ma le tama o Carl, o Nicolai, ina ua ia auai atu i le Au Paia o Aso e Gata Ai. Talu mai lena taimi ua ia lafoeseina lona le fiafia i le Ekalesia, opogi le talalelei e faavavau, ma tuua lona nuu o Tenimaka ina ia faapotopoto i Siona. O lea o le a ia auai i sauniga paia ia o le a amata ai ona faaleleia lona aiga malepe.²⁶

Na malaga mai Ane Soohie i Iuta i le 1874, i le lua tausaga talu ona maliu Nicolai. Ao lei maliu Nicolai, na ia faaleo atu lona faamoemoe faapea o le a i ai se aso e faamauina ai faatasi o ia ma Ane Sophie mo le faavavau.²⁷

Ina ua taunuu mai Ane Sophie i Iuta, na ia nofo i Sanpete Valley e latalata i aiga o lana fanau ma Nicolai e toatolu na feola mai —o Carl, Hohan, ma Augusta. I le mavae ai o ni tausaga, na vaaia ai e Ane Sophie ona atalii i le taimi o a latou misiona i Scandinavia. Ae ina ua la toe faatasi ma Augusta, lea ua tolusefulu-ono tausaga ma o se tina o se fanau e toafitu, o le taimi muamua lea ua la toe vaai ai le tasi i le isi i le silia ma le lua sefulu tausaga.²⁸

Na nofo i Ephraim, ma fiafia ai Ane Sophie i lona olaga fou o se tina ma se tinamatua. Ina ua toe faatulaga e Polika Iaga ma isi taitai o le Ekalesia uarota ma siteki i le 1877, na latou vaeluaina le Uarota a Ephraim ma valaaulia Carl e auauna atu o se epikopo o le Uarota o Ephraim South. Mulimuli ane, soo se taimi lava e auai ai Ane Sophie i se tala faatino po o se faafiafiaga faamusika i le taulaga, e ulufale atu o ia e aunoa ma se pepa ulufale ma na ona faailo atu lava ma se ataata, “O au o le tina o Bishop Dorius.”

O Ane Sophie o se faifalaoa faamanuiaina i Tenimaka, ma na faamanuiaina lona aiga i Iuta i lana taleni ina ua ia taunuu mai. E fiafia o ia e laei faamanaia mo faatasiga lea na tufaina atu ai ni taumafa Tenimaka. I lona asofanau, na te ofuina se ofu ma se fugalaau mumu, taoina se keke lapoa, ma valaaulia uma lona aiga ma uo e faamanatu faatasi ma ia.²⁹

Na ulu atu Ane Sophie ma Carl i le malumalu o St. George i le aso 5 o Novema, ma na papatisoina Ane mo lona tina ma mo lona uso na maliu ao laitiiti. Na maua e Carl le sauniga mo le tama o Ane Sophie. Na maua e Ane Sophie lona faaeega paia i le aso na sosoo ai ma na mulimuli ane faia sauniga mo lona tina ma lona uso ao avea Carl ma sui o lona tamamatua. Na faamauina faatasi foi matua o Ane Sophie, ma o ia ma Carl na fai ma sui.

I le aso na ia maua ai lona faaeega paia, na faamauina ai Ane Sophie ia Nicolai, ao Carl na fai ma sui, ma faamaloloina ai le sootaga lea na motusia i le lalolagi. Ona faamauina ai lea o Carl i ona matua, ao aposetolo Erastus Snow, se tasi o faifeautalai i Tenimaka, na fai ma sui mo lona tama.³⁰

---

I le amataga o Ianuari, 1879, na tuua ai e Emmeline Wells ma Zina Presendia Williams, se tasi o afafine o Polika Iaga, ina ia auai i se faatasiga a le atunuu o taitai o le aia tatau a tamaitai i Uosigitone, TC.³¹ Talu mai fonotaga e faaalia ai manatu i le 1870, na faaauau ona siamupini tamaitai o le Au Paia o Aso e Gata Ai i le faalauiloaina atu o aia tatau i Iuta ma le atunuu atoa. O la latou galuega na tosina mai ai nisi o taitai iloga o le atunuu mo le aia tatau a tamaitai, e aofia ai Susan B. Anthony ma Elizabeth Cady Stanton, ia na o mai faatasi i le Aai o Sate Leki ma talanoa atu i tamaitai o le Au Paia o Aso e Gata Ai i le taumafanafana o le 1871.³²

Ao auai i le fonotaga i Uosigitone, na fuafua Emmeline ma Zina Presendia e uunaia le Konakeresi e fai ma sui i le Ekalesia ma tamaitai o Iuta. Talu ai nei, ini taumafaiga faifaipea ina ia faaitiitia le auai i faigamalo o le Au Paia, na fautuaina ai e ni sui o le malo le aveesea o le aia tatau e palota ai mai tamaitai o Iuta. Na mananao Emmeline ma Zina Presendia e puipuia la latou aia tatau e palota ai, le tautala atu e faasaga i taumafaiga a le malo e faalavelave i le Ekalesia, ma le sailia o le lagolago faalemalo i se taimi na iloilo ai le faasalaga o George Reynolds i le faiava e toalua e le Faamasinoga Maualuga o le Iunaite Setete.³³

E le o le taimi muamua lenei na faia ai e Emmeline se luitau taua mo le Ekalesia. I le 1876, i le taimi o le matautia o le mala o le akerise, na valaaulia ai e Polika Iaga, Eliza Snow, ma taitai o le taumafaiga o le faaitiitia o le faaalu tupe o ia e taitaia taumafaiga e toe faaleleia ai faatoaga i le teritori. E oo atu i le faaiuga o le 1877, ua ia taitaia le Aualofa ma le Faalapotopotoga a Tamaitai Talavou i le faaputuputuina o le silia ma le toluselau lima sefulu kupita mita o saito ma fausia le lua fale teuoloa i le Aai o Sate Leki. I le mulimuli ai i ana faatonuga, na teuina ai foi e le toatele o Aualofa ni pusa o saito i a latou potu tetele o Aualofa po o fale o uarota.³⁴

O Emmeline, o se tasi o ava faaautaunonofo a Daniel Well, na iloa foi o se puipui malosi o le faaipoipoga faaautaunonofo ma le aia tatau a tamaitai o le Au Paia o Aso e Gata Ai. I le 1877, na avea ai o ia ma faatonu o le Woman’s Exponent, ma na ia faaaogaina ona koluma e faaleo ai ona manatu i mataupu eseese, faalemalo ma faaleagaga. E ui i le tele o galuega talu mai le taitai o le nusipepa, na ia talitonu o le lolomiina sa taua tele i le galuega a le Au Paia o Aso e Gata Ai.³⁵

“Ua agai i luma la tatou pepa ma ua faamanuiaina ai le nuu,” na tusia ai e Emmeline i lana apitalaaga i le taimi lava na ia vaaia ai le Woman’s Exponent. “Ou te naunau e faia mea uma i lou malosi e fesoasoani e faalelei ai le tulaga o ou lava tagata, ae maise lava tamaitai.”³⁶

Ina ua taunuu Emeline ma Sina Peresenia i Uosigitone, na faafeiloaia i latou i le aai e Siaosi Q. Kanona, Susana B. Anetone, ma Elisapeta Kati Sitatone. Na latou iloa ai foi, o le lua aso na muamua atu, na autasi ai le Faamasinoga Maualuga e lagolago le faasalaga o Siaosi Renolo, le faaiuga lea e faapea o le Faavae o le Iunaite Setete o loo puipuia ai talitonuga faaletapuaiga, a e le aofia ai atoa faatinoga faaletapuaiga. O le faaiuga a le faamasinoga, lea ua le o mafai ona toe apili, ua manino mai ai o loo saoloto le faigamalo faale atunuu e pasia ma faamamalu tulafono e faasolitulafono ai faaipoipoga faaautaunonofo.³⁷

I aso na mulimuli ai, na auai Emmeline ma Zina Presendia i le fonotaga a tamaitai, ma puipuia le faaipoipoga faaautaunonofo ma la latou aia e palota ai. “E lei solia lava e tamaitai o Iuta se tulafono o lena teritori,” na folafola atu ai Emmeline, “ma o le a le faamaoni foi ma e le tutusa ai ma tulafono le taofia o i latou i lenei aia tatau.”

“E le fautuaina e tamaitai o Iuta le tuuesea o a latou aia tatau,” na faaopoopo atu ai Zina Persendia, “ae ia fesoasoani i o latou uso i le laueleele atoa.”³⁸

I le aso 13 o Ianuari, na malaga atu ai Emmeline, Zina Presendia, ma isi tamaitai e toalua mai le fono i le Maota Paepae e feiloai ma Peresitene Rutherford Hayes. Na valaaulia e le peresitene le vaega i lana potu tusi ma faalogo atu ma le faaaloalo ao faitau e tamaitai faaiuga o le fono, e aofia ai isi na tuuaia ai o ia mo le le faia o nisi mea e lagolago ai le aia a tamaitai.

Na lapatai atu foi Emmeline ma Zina Presendia i le peresitene e faasaga i le faamalosia o le Tulafono e faasa autaunonofo i le 1862. “E tele afe o tamaitai o le a teena,” na latou tau atu ai, “ma o le a avea a latou fanau o fanau i fafo o le faaipoipoga i luma o le lalolagi.”

Na faaleo atu e Peresitene le agaalofa, ae na te lei faia ni folafolaga e fesoasoani. Na ulufale vave atu lona faletua, o Lucy, i le potu, ma faalogologo ma le faaaloalo i le talosaga toe iloilo a Emmeline ma Zina Presendia, ma tuuina atu i malo se maimoaga i le Maota Paepae.³⁹

I vaiaso na sosoo ai, na molimau atu ai Emmeline ma Zina Presendia i luma o le komiti o le konakeresi ma saunoa atu i taitai o le malo e fai ai ma sui o le Au Paia. Na la tuuina atu foi se faamanatu i le Konakeresi e talosaga ai mo le toe iloiloina o le tulafono e Faasa ai autaunonofo. I le faamanatu, na latou talosaga atu ai i le Konekeresi ia pasia tulafono e iloa ai le tulaga faaletulafono o ava ma fanau i totonu o faaipoipoga faaautaunonofo.⁴⁰ O nisi tagata sa ofo i lo la lototetele i le puipuia o talitonuga o le Au Paia. O isi na faia i laua e pei o ni tagata ese pe faitio foi i le faatagaina e tautatala e uiga i ava faaautaunonofo i le fono a le atunuu i aia o tamaitai.⁴¹

Ae lei tuua Uosigitone, na auai Emmeline ma Zina Presendia i ni pati se lua na faia e Lucy Haynes. E ui lava i a laua taumafaiga, na le mafai e Emmeline ma Zina Presendia ona suia le manatu o le peresitene i le Au Paia, ma na ia tumau pea le naunau e faatoilalo le “malosi faaletino” o le Ekalesia i Iuta. Ae ui i lea, na faafetai Emmeline i le agalelei o Lucy ma fiafia i ona laei faigofie, uiga fiafia, ma le tumau i le faasaina o le ava malosi i le Maota Paepae.

I se faatasiga i le aso 18 o Ianuari, na tuuina atu ai e Emeline ia Lusi se kopi o le O Tamaitai Mamona ma se tusi mo ia lava. I totonu o le tusi sa ia tusia ai se savali pu’upu’u.

“Faamolemole talia lenei faailoga o le faaaloalo o se ava Mamona.”⁴²

1. “Lying in State—Preparations for the Funeral,” Deseret Evening News, Sept. 1, 1877, [2]; Account of the Funeral Proceedings, [1]–[2]; Woodruff, Journal, Aug. 29–Sept. 1, 1877; “Monday’s Celebration,” Deseret News, Jan. 12, 1870, [7]; Hannah Tapfield King, “Mormonism,” Woman’s Exponent, Nov. 15, 1877, 91; Isaiah 35:1; Howard B. Grose, “Across Continent Sketches,” Watchman, Aug. 12, 1897, 78:14; Arrington, Fox, and May, Building the City of God, 54–57; Arrington, Brigham Young, 402–3; Plewe, Mapping Mormonism, 88–89. Autu: Brigham Young

2. “Funeral of President Brigham Young,” Deseret Evening News, Sept. 3, 1877, [2]; Walker, “Salt Lake Tabernacle,” 217; Eliza R. Snow, “Funeral of President Brigham Young,” in Derr and Davidson, Eliza R. Snow, 900; Gates, “As the families of my Aunts increased in size,” box 1, folder 5, item [14], 8.

3. Autu: John Taylor

4. “Funeral of President Brigham Young,” Deseret Evening News, Sept. 3, 1877, [2].

5. “Death of Brigham Young,” New-York Times, Aug. 30, 1877, 1–2; “Brigham Young as a Ruler,” Salt Lake Daily Tribune, Aug. 30, 1877, [2].

6. Reynolds, Journal, Dec. 21, 1875, and [Oct. 1876]; Van Orden, Prisoner for Conscience’ Sake, 74–79, 84–90.

7. “Funeral of President Brigham Young,” Deseret Evening News, Sept. 3, 1877, [2].

8. Susa Young to Zina Young Williams, May 18, 1878, [1]–[4], Early Papers and Memorabilia, Susa Young Gates, Papers, CHL. Autu: Susa Young Gates

9. Susa Young to Zina Young Williams, May 18, 1878, [2], [4]–[5], Early Papers and Memorabilia, Susa Young Gates, Papers, CHL; Gates, “As the families of my Aunts increased in size,” box 1, folder 5, item [14], 6.

10. Susa Young to Zina Young Williams, May 18, 1878, [11], Early Papers and Memorabilia, Susa Young Gates, Papers, CHL; Embry, Mormon Polygamous Families, 253; “Plural Marriage and Families in Early Utah,” Gospel Topics, topics.ChurchofJesusChrist.org. Autu: Plural Marriage in Utah [Faaipoipoga Faaautaunonofo i Iuta]

11. Madsen, “Utah Law and the Case of Plural Wives,” 431–34; Campbell and Campbell, “Divorce among Mormon Polygamists,” 4–23; Arrington, Brigham Young, 318–20.

12. Grossberg, Governing the Hearth, 238, 240, 250–53; Susan Y. Dunford v. Alma B. Dunford, Divorce Decree, May 6, 1878, Washington Co., Probate Court Civil and Criminal Record Books, series 3, 168, 68–69, Utah Division of Archives and Records Service, Utah State Archives, Salt Lake City; Susa Young to Zina Young Williams, May 18, 1878, [5]–[8], [18]–[19], Early Papers and Memorabilia, Susa Young Gates, Papers, CHL; Isaac and Leah Bailey Dunford Family Story, 10–11, 17, 65–66.

13. Susa Young to Zina Young Williams, May 18, 1878, [19]–[20], [25]–[26], Early Papers and Memorabilia, Susa Young Gates, Papers, CHL.

14. “Old B. Y. Academy,” Young Woman’s Journal 3, no. 8 (May 1892): 337. Autu: Church Academies [Aoga a le Ekalesia]

15. Henry P. Richards, Diary, Jan. 26, 1878; Woods, “Jonathan Napela,” 34–36. Autu: Jonathan Napela

16. Henry P. Richards, Diary, Jan. 19–20 and 26, 1878; Henry P. Richards, “A Visit to the Lepers,” Deseret News, Apr. 3, 1878, [10]; “Kalawaia, K.,” and “Nihipali, Nehemia Kahuelaau,” Andrew Jenson Collection, CHL; “Richards, Henry Phinehas,” in Jenson, Latter-day Saint Biographical Encyclopedia, 1:813.

17. Henry P. Richards, Diary, Jan. 26–27, 1878; Korn, News from Molokai, 192. Mo faamatalaga i a Tama Damien, tagai i le Woods, Kalaupapa, 28–34; Daws, Holy Man, 97–99; and Stewart, Leper Priest of Molokaʻi, 157–58.

18. Henry P. Richards, Diary, Jan. 27–28, 1878; Woods, Kalaupapa, 19–25.

19. “Home Affairs,” Woman’s Exponent, July 15, 1878, 7:29; Wells, Diary, volume 4, July 10, 1878; Madsen, Emmeline B. Wells, 164, 167, 176; Rogers, Life Sketches, 181.

20. Aurelia Spencer Rogers, Reminiscences of Aug. 1878, as Published in “History of Primary Work,” 1898, in Derr and others, First Fifty Years of Relief Society, 431–34; Wells, Diary, volume 4, July 10, 1878; Snow, “Sketch of My Life,” 38; Farmington Ward, Primary Association Minutes and Records, volume 1, Aug. 11, 1878; Rogers, Life Sketches, 35, 41, 47–48. Autu: Primary[Peraimeri]

21. Farmington Ward, Primary Association Minutes and Records, volume 1, Aug. 11, 1878.

22. Farmington Ward, Primary Association Minutes and Records, volume 1, Aug. 11 and 25, 1878; Sept. 7 ma 14, 1878; Aurelia Spencer Rogers, Reminiscences of Aug. 1878, as Published in “History of Primary Work,” 1898, in Derr and others, First Fifty Years of Relief Society, 430.

23. Orson Pratt and Joseph F. Smith to John Taylor and the Council of the Twelve, Sept. 17, 1878, Joseph F. Smith, Papers, CHL; Joseph F. Smith, Journal, Sept. 2 and 7, 1878; Neilson and Schaefer, “Excavating Early Mormon History,” 359–61; Orson Pratt to Marian Pratt, Sept. 18, 1878, CHL; Saints, volume 1, chapter 19; Whitmer, Address to All Believers in Christ; “Whitmer, John,” Biographical Entry, Joseph Smith Papers website, josephsmithpapers.org.

24. Orson Pratt and Joseph F. Smith to John Taylor and the Council of the Twelve, Sept. 17, 1878, Joseph F. Smith, Papers, CHL; Joseph F. Smith, Journal, Sept. 7, 1878; tagai foi Orson Pratt to Marian Pratt, Sept. 18, 1878, CHL; and Saints, volume 1, chapter 7.

25. Orson Pratt and Joseph F. Smith to John Taylor and the Council of the Twelve, Sept. 17, 1878, Joseph F. Smith, Papers, CHL; Joseph F. Smith, Journal, Sept. 8, 1878. Autu: Witnesses of the Book of Mormon[Molimau o le Tusi a Mamona]

26. Carl Dorius, Diary, Nov. 5, 1878. E foliga mai o Ane Sophie sa alu i lona igoa ao lei faaipoipo, o Christoffersen, i Iuta.

27. Dorius, “Sketch of the Life,” 66–67; Carl Dorius, Diary, 1874 and Nov. 5, 1878.

28. Dorius, Dorius Heritage, 6–7, 155–56; Stevens, Autobiography, 1, 8–10.

29. Dorius, “Sketch of the Life,” 3; Dorius, Dorius Heritage, 155–56.

30. Carl Dorius, Diary, Nov. 5, 1878; St. George Temple, Baptisms for the Dead, Book H, 411–12, microfilm 170,847; St. George Temple, Endowments for the Dead, Book D, 13–16, microfilm 170,543, U.S. and Canada Record Collection, Family History Library; St. George Temple, Sealings for the Dead, Couples, Book B, 378–81, microfilm 170,596; St. George Temple, Sealings of Children to Parents, Book A, 107, microfilm 170,583, U.S. and Canada Record Collection, Family History Library. Autu: Denmark[Tenimaka]

31. Wells, Diary, volume 5, Jan. 1, 1879; Madsen, Emmeline B. Wells, 183. Autu: Women’s Suffrage[Mafatiaga o Tamaitai]

32. “Part 3: 1867–1879,” in Derr and others, First Fifty Years of Relief Society, 242–46; Stanton, Eighty Years and More, 283–87.

33. Madsen, Advocate for Women, 160–68.

34. Henderson, Crickets and Grasshoppers in Utah, 20; “Grain Meeting,” Woman’s Exponent, Dec. 1, 1877, 6:102; Wells, “The Mission of Saving Grain,” 47; see also Committees on the Grain Movement, Minutes, Nov. 17, 1876, in Derr and others, First Fifty Years of Relief Society, 399–401.

35. Emmeline B. Wells [Blanche Beechwood, pseud.], “Why, Ah! Why,” Woman’s Exponent, Sept. 30, 1874, 3:67; Madsen, Advocate for Women, 50–55.

36. Wells, Diary, volume 4, Jan. 4, 1878. Autu: Emmeline B. Wells

37. Wells, Diary, volume 5, Jan. 9, 1879; “Washington,” Salt Lake Daily Tribune, Jan. 7, 1879, [1]; Reynolds v. United States, 98 U.S. 145 (1879); George Q. Cannon, Journal, Jan. 11, 1879. Autu: Antipolygamy Legislation[Tulafono e Tetee i Autaunonofo]

38. “The Utah Ladies in Washington,” Deseret Evening News, Jan. 18, 1879, [2].

39. “Miss Grundy,” “Mormon Ladies Calling at the White House,” Woman’s Exponent, Mar. 15, 1879, 7:212; Wells, Diary, volume 5, Jan. 13, 1879; George Q. Cannon, Journal, Jan. 13, 1879. Ua faasa’oina le upusii e faafaigofie ai le faitauina; ua faaaoga faalua le upu “made”.

40. Wells, Diary, volume 5, Jan. 14–30, 1879; Memorial of Emeline B. Wells and Zina Young Williams.

41. Madsen, Advocate for Women, 163–68; George Q. Cannon, Journal, Jan. 18, 1879.

42. Van Orden, Prisoner for Conscience’ Sake, 90; Wells, Diary, volume 5, Jan. 14 and 18, 1879; [Emmeline B. Wells], “Visit to Washington,” Woman’s Exponent, Feb. 15, 1879, 7:194; Madsen, Advocate for Women, 167.