“Sa Lain na Usab nga Kasamok,” kapitulo 39 sa Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018)
Kapitulo 39: “Sa Lain na Usab nga Kasamok”
Kapitulo 39
Sa Lain na Usab nga Kasamok
Niadtong Agosto 11, 1842, ang buwan miamag diha sa mangitngit nga suba samtang si Joseph ug ang iyang higalang si Erastus Derby hilum kaayong nagbugsay sa gamayng bangka diha sa suba sa Mississippi. Sa unahan, makita nila ang porma sa duha ka isla nga may kakahuyan subay sa suba taliwala sa Nauvoo ug Montrose. Nagmaniubra sa taliwala sa mga isla, ang mga kalalakin-an nakasigpat og laing bangka nga nagdunggo sa tampi sa sapa ug mibugsay padulong niini.1
Sa miaging adlaw, si Joseph ug Porter hilum ra nga miyuhot paggawas sa Nauvoo aron sa paglikay sa pagdakop, nabalaka nga dili sila makakuha og patas nga paghusay. Si Porter mipadulong sa silangan aron mobiya sa estado samtang si Joseph sa kasadpan, mitabok sa suba ngadto sa balay sa iyang uyoan nga si John sa Iowa Territory, gawas na sa hurisdiksyon sa sheriff sa Ilinois ug sa iyang mga tawo. Mitago siya didto sa tibuok adlaw, apan nagkadako ang iyang tinguha sa pagpakigkita sa iyang pamilya ug mga higala.
Dihang gidunggo nilang Joseph ug Erastus ang ilang bangka sa isla, si Emma, Hyrum, ug pipila sa mga suod nga higala ni Joseph mitagbo nila. Naggunit sa kamot ni Emma, si Joseph naminaw samtang ang grupo naglingkod diha sa bangka ug hilum nga nag-istorya bahin sa sitwasyon didto sa Nauvoo.2
Ang kakuyaw mas grabe pa kay sa gilauman ni Joseph. Ang iyang mga higala nakadungog nga ang gobernador sa Iowa miisyu usab og usa ka warrant sa pagdakop kaniya ug ni Porter, nagpasabut nga dili na luwas alang ni Joseph nga magtago sa balay sa iyang uyoan. Karon nagdahum na sila nga anaa na ang mga sheriff sa isig ka habig sa suba aron sa pagpangita niya.
Nagtuo gihapon ang mga higala ni Joseph nga ang pagdakop ilegal, usa ka walay uwaw nga plano sa pagpanglaang sa iyang mga kaaway didto sa Missouri sa pagdakop sa propeta. Sa pagkakaron, ang labing maayong buhaton ni Joseph mao ang pagtago didto sa umahan sa usa ka higala sa luyo nga bahin sa habig sa suba sa Ilinois ug maghulat hangtud mokalma na ang mga panghitabo.3
Sa pagbiya ni Joseph sa isla, naghingapin ang iyang gibati nga pagpasalamat. Ang uban mibiya ug mibudhi kaniya sa matag karon ug unya atubangan sa kalisdanan. Apan kini nga mga higala miabut aron sa pagtabang kaniya sa mangiob nga kagabhion, mipili nga moabag kaniya ug sa kamatuoran nga iyang gimahal.
“Sila ang akong mga kaigsoonan,” sa iyang hunahuna, “ug ako mabuhi.”
Gani mibati siya og dakong pasalamat ni Emma. “Ania na usab siya,” naghunahuna siya, “bisan sa lain na usab nga kasamok, walay kahadlok, lig-on ug dili matarug, dili mausab, mahigugmaon nga si Emma!”4
Regular nga nakigsulti si Emma kang Joseph sa misunod nga mga adlaw ug mga semana. Kon dili sila magkita, magsinulatay sila. Kon iyang malikayan ang mga tinugyanan sa balaod kinsa nagbantay sa iyang matag lihok, siya nakig-uban kaniya sa usa ka balay nga luwas ug planohon ang ilang sunod nga lihok. Sa kanunay iyang ihatud ang mga mensahe ngadto ug ang gikan sa mga Santos, magpili sa mga tawo nga iyang masaligan ug likayan kadtong makahimo kaniya og kadaut.5
Tungod sa makahulga nga pagpangita sa mga sheriff sa kada balay didto sa Ilinois kon mahimo, si Joseph nasayud nga ang mga Santos nabalaka nga siya sa dili madugay madakpan ug madala balik ngadto sa Missouri. Pipila sa iyang mga higala miawhag kaniya sa pag-eskapo ngadto sa pine forests sa amihanang bahin sa Illinois, diin ang mga Santos nagpuo sa mga kahoy alang sa templo.6
Wala makagusto si Joseph sa ideya sa pagdagan, mas mipili nga magpabilin sa Illinois ug makita ang krisis hangtud motapos. Apan andam siya nga moadto kon mao kana ang gusto ni Emma nga buhaton. “Ang akong kasiguroan anaa ra kanimo,” misulat siya. “Kon ikaw ug ang mga bata dili mokuyog nako, dili ko moadto.”
Adunay tipik niya nga nangandoy sa pagdala sa iyang pamilya sa laing dapit, bisan lang sulod sa mubo nga panahon. “Gikapoy na ko sa kangil-ad, kaubos, ug sa pagka mapasipad-on nga pagbinastos sa pipila ka bahin sa katilingban nga atong gipuy-an,” miingon siya ni Emma, “ug sa akong paminaw kon aduna lang koy malinawon nga mga unom ka bulan kauban ang akong pamilya, mao na kini ang labing nindot nga butang sa kinabuhi.”7
Si Emma mibalos sa iyang sulat sa kaulahian nianang adlawa. “Andam ko sa pag-uban nimo kon ikaw maobligar sa pagbiya,” misulat siya, “apan gibati gihapon ko og kamasaligon nga ikaw mapanalipdan bisan dili mobiya niining nasud. Adunay mas daghang paagi kay sa usa lang ang moamuma kanimo.”8
Pagkasunod gabii, misulat siya ngadto sa gobernador sa Illinois nga si Thomas Carlin nga mipasalig kaniya sa kainosente ni Joseph. Si Joseph wala sa Missouri sa dihang nahitabo ang pagsulay sa pagpatay, nangatarungan siya, ug siya inosente sa mga pasangil batok kaniya. Mituo siya nga si Joseph dili makakuha og patas nga paghusay didto sa Missouri ug lagmit gayud hinoon nga mapatay.
“Nagpakilooy ako nimo sa pagluwas sa akong inosente nga mga anak sa makagisi sa kasingkasing nga kaguol nga makita pag-usab ang ilang amahan nga dili makiangayon nga guyuron ngadto sa prisohan, o ngadto sa kamatayon,” nangaliyupo siya.9
Ang gobernador mitubag ngadto kang Emma sa wala madugay. Tinarung ang iyang sulat ug maayong pagkasulti, miinsister nga ang iyang gibuhat batok ni Joseph higpit nga pinasikad sa pagsunod sa katungdanan. Mipadayag siya og paglaum nga si Joseph mopaubos sa balaod, ug wala siya magpakita og timailhan nga andam siyang mousab sa iyang hunahuna kabahin sa maong butang.10
Mipursiger, si Emma misulat sa ikaduhang sulat, niini nga higayuna mipasabut kon nganong ang pagdakop sa iyang bana dili legal.
“Unsa may kaayohan ang makuha niini nga estado o sa Estados Unidos, o sa bisan unsa nga bahin niini nga estado o sa Estados Unidos, o sa imong kaugalingon, o ni bisan kinsang indibidwal,” siya nangutana sa gobernador, “sa pagpadayon niini nga mga pagpanglutos niini nga mga katawhan, o ngadto ni Mr. Smith?”
Iyang gipadala ang sulat ug mihulat sa tubag.11
Sa kasamtangan, kadaghanan sa mga Santos sa Nauvoo wala masayud nga si Joseph nagtago sa pipila lang ka milya ang gilay-on. Ang pipila nila nagtuo nga mibalik siya didto sa Washington, DC. Nagtuo ang uban nga miadto siya sa Europe. Samtang nanagtan-aw sila sa mga sheriff ug mga tinugyanan sa balaod nga naglibut-libut sa mga kadalanan sa Nauvoo, nangita og mga timailhan kon hain na si Joseph, ang mga Santos nag-anam kadako ang kabalaka sa iyang kaluwasan.12 Apan misalig sila nga ang Ginoo mopanalipod sa Iyang propeta ug mipadayon sila sa ilang inadlaw-adlaw nga panginabuhi.
Sama sa ubang mga British nga mga langyaw, si Mary Davis nag-adjust pa gihapon sa iyang bag-o nga panimalay sa Nauvoo. Sukad sa pag-abut sa siyudad, giminyoan niya si Peter Maughan, ang batan-ong biyudo nga iyang nakahimamat sa Kirtland, nahimong ina-ina sa iyang mga anak. Giabangan nila ang balay ni Orson Hyde, kinsa naa pa gihapon sa iyang misyon sa Jerusalem, ug nanglimbasug sa pagpangita og maayong trabaho aron makasuporta sa ilang pamilya.13
Nakahatag og daghang trabaho ang Nauvoo alang sa mga mamumuo ug tigtukod apan mas dyutay ang mga oportunidad alang sa mga hanas nga mga trabahante sama ni Peter, kinsa nabuhi ug nagtrabaho sa usa ka busy nga minahan ug sa sentro sa mga pagamaan sa England. Ang lokal nga mga negosyante naningkamot sa pagtukod og mga galingan, mga pabrika, ug mga tunawanan sa puthaw didto sa Nauvoo, apan kini nga mga patigayon bag-o lang nagsugod ug dili makapangempleyo sa tanang hanas nga mga trabahante nga midugok gikan sa England.14
Nagkulang sa permanenting trabaho, si Mary ug Peter nakasugakod ra sa una nilang tingtugnaw pinaagi sa pagpamaligya og pipila sa ilang mga butang aron makapalit og pagkaon ug kahoy nga pangsugnod. Sa dihang nahibaloan ni Joseph ang mahitungod sa trabaho ni Peter isip minero didto sa England, gipatrabaho niya siya sa pagmina og karbon (coal) nga nadiskubrihan diha sa yuta nga iyang gipanag-iya sa habagatang bahin sa Nauvoo. Ang karbon naprubahan nga taas og kalidad, ug si Peter nakakuha og tulo ka karwahe alang ni Joseph sa wala pa mahurot ang deposito.15
Ang pipila sa mga migrante nga mga pamilya mibiya sa Nauvoo aron mangita og trabaho nga mas maayo og sweldo diha sa mga kasikbit nga mga lungsod ug mga siyudad, apan si Mary ug Peter mipili nga magpabilin sa siyudad ug paigoon kon unsay anaa kanila. Nagtaud sila og mga tabla sa mga salog nga wala mahuman sa balay ni Hyde ug mipahimutang og mga balhibo para sa higdaanan. Naggamit sila og tarima aron mahimong lamesa ug gihipos ang ilang mga plato sa gawas tungod kay wala silay mga tukador.16
Ang kainit sa panahon sa ting-init sa Nauvoo naglagiting, apan kon ang temperatura mobugnaw sa kahapunon ug kagabhion, ang mga pamilya sama sa mga Maughan mobiya sa ilang gimbuhaton ug maglibut sa tibuok siyudad. Ang kadalanan kasagaran puno sa mga tawo nga mag-istoryahanay mahitungod sa politika, lokal nga mga balita, ug sa ebanghelyo. Usahay mipahigayon ang mga Santos og mga pagtudlo, mitambong og mga drama-drama, o maminaw sa bag-ong naporma nga Brass Band sa Nauvoo nga madungog sa kahanginan sa sikat nga musika nianang panahona. Ang pundok sa mga kabataan dili gayud layo, nagdyolen, nag-jumping rope, ug nanagdula og mga panggawas nga dula hangtud sa pagsalop sa adlaw sa Mississippi ug ang mga bituon mokidlap-kidlap sa kilum-kilom nga kalangitan.17
Sa hinapos sa Agosto, ang mga sulat ni John Bennett nga namantala og sayo nianang ting-init giprinta pag-usab diha sa pamantalaan sa tibuok nasud, nagdaut sa reputasyon sa simbahan ug hinungdan nga mas naglisud ang mga misyonaryo sa pagpaambit sa mensahe sa gipahiuli nga ebanghelyo. Agi og tubag, ang mga lider sa simbahan mitawag og gatusan ka mga elder ngadto sa misyon aron sa pagkigbatok sa negatibong pamahayag (press).
Pagka Agosto 29, ang mga elder nagpundok sa kakahoyan duol sa luna sa templo aron sa pagdawat og instruksyon. Atol sa pakigpulong ni Hyrum, nasurprisa ang kongregasyon sa dihang si Joseph misaka sa entablado ug milingkod. Danghang mga elder ang wala na makakita kaniya sukad siya nagtago sa sayong bahin nianang bulana.
Ang mga tinugyanan sa Illinois nagpangita pa gihapon si Joseph, apan bag-ohay lang silang mibiya sa dapit, nakahatag og higayon ni Joseph nga makarelaks sa iyang pagbantay. Hapit kapin sa usa ka semana, nagpuyo siya nga nagpakahilum diha sa panimalay uban sa iyang pamilya ug pribadong nakigmiting sa Napulog Duha ug sa ubang mga lider sa simbahan.18
Duha ka adlaw human sa komperensya uban sa mga elder, si Joseph mibati nga luwas ra ang pagtambong sa miting sa Relief Society. Siya namulong sa kababayen-an mahitungod sa iyang bag-o nga mga pagsulay ug sa mga gihimo nga mga pasangil batok kaniya. “Bisan tuod og makabuhat ko og sayop, wala ako magbuhat sa kasaypanan nga gipasangil nga akong gibuhat,” miingon siya. “Ang sayop nga akong nahimo tungod sa kahuyang sa kinaiyanhon sa tawo, sama sa ubang mga tawo. Walay tawo nga nabuhi nga walay sayop.”
Gipasalamatan niya si Emma ug ang ubang mga babaye sa pagpanalipod kaniya ug naghangyo sa gobernador alang sa iyang kaayohan. “Ang Kababayen-an sa Relief Society nakahimo og dakong bahin sa akong kaayohan batok sa akong mga kaaway,” miingon siya. “Kon kini nga mga paningkamot wala pa gibuhat, mas grabe unta nga mga sangputanan ang nahitabo.”19
Nianang tapos sa semana, siya ug si Emma miabi-abi ni kanhi apostol John Boynton. Bisan og si John nahimong usa ka masinupakon—ug gani mihulga sa igsoon ni Joseph pinaagi sa espada diha sa templo sa Kirtland—iyang gikalimtan ang iyang mga kasungian ni Joseph. Samtang nangaon ang pamilya sa ilang paniudto, usa ka sheriff sa Illinois ug duha ka armadong opisyal ang misulod sa balay dala ang bag-ong mando sa pagdakop sa propeta. Gibalda ni John ang kalalakin-an, naghatag og higayon ni Joseph sa pag-ikyas sa luyo, midagan sa kamaisan sa iyang tanaman, ug mipasalipud sa iyang tindahan.
Sa balay, si Emma mihangyo sa sheriff nga makita ang search warrant. Siya miingon niya nga wala siyay dala ug gitukmod siya dayong lahos kuyog sa iyang katawhan. Ilang gihiling ang matag kwarto, gitan-aw ang kada luyo sa pultahan ug mga kurtina, apan walay nakit-an.
Nianang gabhiona, human mibiya sa lungsod ang mga tinugyanan sa balaod, mibalhin si Joseph sa panimalay sa iyang mga higala nga si Edward ug Ann Hunter.20 “Ako mihunahuna niini nga kini kinahanglan ug kaalam ngari kanako nga ako mobiya sa dapit sulod sa mubo nga panahon, alang sa akong kaugalingon nga kahilwasan ug kasiguroan niini nga mga katawhan,” si Joseph misulat sa mga Santos sa pipila ka adlaw ang milabay. Dili niya gusto nga magdugay diha sa iyang mga pagsulay, bisan pa niana,ug iyang gipakigbahin ang usa ka bag-ong pagpadayag uban kanila mahitungod sa bunyag alang sa mga patay.
“Sa pagkatinuod sa ingon miingon ang Ginoo,” mabasa sa pagpadayag, “Himoa ang buluhaton sa akong templo, ug ang tanan nga mga buluhaton diin Ako mitudlo nganha kaninyo, magpadayon ug dili mohunong.” Ang Ginoo misugo sa mga Santos sa pagtipig og talaan sa mga proxy nga bunyag nga ilang gihimo ug sa paghatag og saksi alang niini, aron ang pagtubos sa mga patay mahimong narekord dinhi sa yuta ug didto sa langit.21
Pipila ka adlaw ang milabay, si Joseph mipadala sa mga Santos sa dugang instruksyon mahitungod sa ordinansa. “Ang yuta hampakon uban sa tunglo, gawas kon adunay nagsumpay nga pipila ka matang o lain tali sa mga amahan ug sa mga anak,…” siya misulat, nga nagkutlo ni Malaquias. Gipasabut niya nga ang nanglabay nga mga henerasyon ug ang kasamtangan kinahanglang magtambayayong sa pagtubos sa patay ug ipahinabo ang kahingpitan sa panahon, kon ipadayag na sa Ginoo ang tanang mga yawe, gahum, ug himaya nga Iyang gitagana alang sa mga Santos, lakip sa mga butang nga wala gayud Niya gipadayag sa una.
Ang kalipay ni Joseph diha sa kalooy sa Dios ngadto sa buhi ug sa patay walay kabutangan. Bisan nagtago-tago, dili makiangayon nga gipangita sa iyang mga kaaway, siya nagmaya diha sa gipahiuli nga ebanghelyo ni Jesukristo.
“Unsa ang atong nadungog mahitungod sa ebanghelyo?” nangutana siya sa mga Santos. “Ang tingog sa kalipay! Ang tingog sa kalooy gikan sa langit; ug tingog sa kamatuoran gikan sa yuta!” Malipayon siya nga misulat kabahin sa Basahon ni Mormon, sa mga anghel nga mipahiuli sa priesthood ug sa mga yawe niini, ug sa Dios nga nagpadayag sa Iyang plano nga pagtulun-an human sa usa ka pagtulun-an ug lagda human sa usa ka lagda.
“Kita dili ba mopadayon sa hilabihan nga mahinungdanon nga katuyoan?” nangutana siya. “Himoa ang inyong mga kasingkasing nga magmaya, ug paglipay sa hilabihan. Himoa ang yuta sa kalit motungha ngadto sa pag-awit. Himoa nga ang mga patay mopahayag og mga awit sa walay katapusan nga pagdayeg ngadto ni Hari Immanuel.” Tanang nilalang mipamatuod kang Jesukristo, ug ang Iyang kadaugan batok sa sala ug kamatayon sigurado.
“Unsa ka mahimayaon ang tingog nga atong nadungog gikan sa langit!” Si Joseph nagmaya.22
Niadtong tinglarag sa 1842, si Gobernador Carlin mitubag sa ikaduhang sulat ni Emma, mipadayag og pagdayeg sa debosyon ni Emma ngadto sa iyang bana apan sa katapusan mibalibad sa pagtabang kaniya.23 Sa sama gihapon nga higayon, si John Bennett mimantala og usa ka librohan nga eskandaloso nga taho bahin ni Joseph ug sa mga Santos. Misugod usab siya sa pagpanudlo sa unsay gitawag nga “The Secret Wife System at Nauvoo,” nga midani sa mga magbabasa inubanan sa gipalabihan nga mga hungihong nga iyang nadunggan—ug daghan pa nga iyang mga hinimo-himo lang sa iyang kaugalingon—mahitungod sa dinaghan nga kaminyoon ni Joseph.24
Tungod sa agresibong kampanya ni John nga hingpit nang mikatap, ug si Gobernador Carlin nga midumili sa pagpanginlabut, nabati ni Joseph nga mas natanggong na. Nasayud siya nga dili niya mahimong itugyan ang iyang kaugalingon ug moatubang sa kaso hangtud ang iyang mga kaaway didto sa Missouri gusto nga mapatay siya. Apan dili usab siya mahimong magpabilin nga magtago-tago sa tibuok niyang kinabuhi. Hangtud kanus-a man siya makalikay sa pag-aresto sa dili pa ang estado mokastigo sa iyang pamilya ug sa mga Santos tungod sa pagpanalipod kaniya?25
Niadtong Disyembre, human si Joseph nagtago sulod sa tulo ka bulan, ang termino ni Gobernador Carlin natapos. Bisan og ang bag-o nga gobernador, si Thomas Ford, mibalibad sa direktang pagpanginlabut sa kaso ni Joseph, siya mipadayag og simpatiya alang sa mga kalisud sa propeta ug pagsalig nga ang mga korte mohukom nga pabor niya.26
Wala makahibalo si Joseph kon makasalig ba siya sa bag-o nga gobernador, apan siya wala nay mas maayo nga kapilian. Sa adlaw liwas sa Pasko sa 1842, iyang gitugyan ang iyang kaugalingon ngadto ni Wilson Law, usa ka heneral sa Nauvoo Legion ug igsoon ni William Law. Miadto dayon sila sa Springfield, ang ulohan nga estado, alang sa hearing sa pagsuta kon ang gimando sa gobernador sa Missouri sa pagdakop kang Joseph legal ba ug kon ipadala ba siya og balik sa Missouri aron makasuhan.27
Ang pag-abut ni Joseph sa Springfield nakahimo og kaguliyang. Kuryuso nga tumatan-aw mipundok sa korte atbang sa karsada gikan sa bag-ong building sa kapitolyo, nanagduot ug nanuyhakaw ang mga liog aron makasigpat sa tawo kinsa miangkon nga usa ka propeta sa Dios.
“Hain man ana si Joe Smith?” dunay tawo nga nangutana. “Mao ba nang dakong tawo?”
“Pagkadako sa ilong!” miingon ang usa ka tawo. “Kamapahiyumon gud ana nga propeta!”28
Ang Huwes nga si Nathaniel Pope, usa sa labing tinahud nga mga tawo didto sa Illinois, ang midumala sa korte. Si Joseph milingkod uban sa iyang mga abogado, si Justin Butterfield, diha sa atubangan sa korte. Sa duol, si Willard Richards, ang akting nga sekretarya ni Joseph, nagduko sa abli nga notebook, nagsulat sa mga kahimoan. Pipila pa ka mga Santos ang nagdasok sa lawak.29
Sa hunahuna ni Huwes Pope, ang kaso ni Joseph dili mahitungod kon ang propeta ba nahimong usa ka kunsabo diha sa pagpamusil ni Boggs, apan kon didto ba siya sa Missouri sa dihang nahitabo ang krimen ug dayon misibat sa estado. Si Josiah Lamborn, ang batan-ong district attorney sa Illinois, gitutokan ang iyang pasiunang mga pamahayag bahin sa gipasangil nga propesiya mahitungod sa pagkamatay ni Boggs. Nangatarungan siya nga kon si Joseph mipropesiya sa pagkapusil ni Boggs, nan angay siyang manubag ug mahusay didto sa Missouri.30
Sa dihang nahuman si Mr. Lamborn sa iyang pamahayag, ang abogado ni Joseph milalis nga ang mga akusasyon ni Boggs mga depektoso, gumikan nga si Joseph wala didto sa Missouri sa dihang nahitabo ang pagpamusil. “Walay bisan gamayng tipik sa pagpamatuod nga si Joseph misibat gikan sa Missouri,” nangatarungan si Mr. Butterfield. “Siya dili mahimong madala hangtud nga mapamatud-an nga siya eskapo. Kinahanglan ilang mapamatud-an nga siya misibat!”
Dayon iyang gipresentar sa korte ang mga pagpamatuod sa mga saksi nga nagkumpirmar sa kainosente ni Joseph. “Dili ko motuo nga ang sinumbong maubos sa bisan unsang kahimtang sa pagtugyan ngadto sa Missouri,” siya mitapos.31
Pagkasunod buntag, Enero 5, 1843, miugong ang panag-istoryahay sa korte samtang si Joseph ug ang iyang mga abugado mibalik aron sa pagdungog sa hukom sa huwes. Ang mga Santos matinguhaong naghulat, nakahibalo nga kon si Huwes Pope modesisyon batok ni Joseph, ang propeta dali ra nga matumpawak sa mga kamot sa iyang mga kaaway sa pagkagabii.
Miabut si Huwes Pope pasado alas nuebe. Milingkod, iyang gipasalamatan ang mga attorney ug misugod sa pagsulti sa iyang desisyon. Daghan siya og ikasulti bahin sa kaso, ug samtang namulong siya, si Willard Richards midali sa pagsulat sa matag pulong.
Sumala sa depensa sa attorney nga milalis sa miaging adlaw, ang huwes mitapos nga ilegal ang pagpatawag ni Joseph aron sa pagbarug sa husay didto sa Missouri. “Si Smith kinahanglan gayud nga buhian,” mipahayag siya, nakita nga walay rason aron bilanggoon pa si Joseph.
Si Joseph mibarug gikan sa iyang lingkuranan ug miyukbo sa korte. Human sa lima ka bulan nga pagtago-tago, gawasnon na siya sa katapusan.32