ពន្លឺការពិត និងក្តីស្រឡាញ់នៃដំណឹងល្អ
ខ្ញុំសូមថ្លែងទីបន្ទាល់ថា ពន្លឺការពិត និងក្តីស្រឡាញ់នៃដំណឹងល្អរះចែងចាំងនៅទូទាំងផែនដីសព្វថ្ងៃនេះ ។
ទំនុកតម្កើងពួកបរិសុទ្ធថ្ងៃចុងក្រោយដ៏ពីរោះ « ស្តាប់សំឡេងសួគ៌ាជាតិសាសន៍ទាំងឡាយ ! » ផ្ដិតជាប់នូវសេចក្ដីសាទរ និងភាពរីករាយនៃភាពពេញលេញនៃដំណឹងល្អ ដែលចេញទៅពិភពលោកទាំងមូល ។ នៅក្នុងទំនុកតម្កើងនេះ យើងច្រៀង ៖
ស្តាប់សំឡេងសួគ៌ា ជាតិសាសន៍ទាំងឡាយ !
នៅគ្រប់ទិសទីមូលមីអរសប្បាយ !
ពួកទេវតារុងរឿងស្រែកច្រៀងបន្ទរ ៖
ការពិតស្តារឡើងវិញហើយ !១
ដោយលូអីស អែហ្វ ម៉ក ដែលជាអ្នកនិពន្ធទំនុកច្រៀងដ៏រីករាយនេះ គឺជាអ្នកប្រែចិត្តជឿជនជាតិអាល្លឺម៉ង់ ដែលបាននិពន្ធទំនុកច្រៀងដ៏បំផុសគំនិតសម្រាប់ទំនុកតម្កើងនេះ ខណៈរស់នៅប្រទេសស្វីសអំឡុងការបម្រើបេសសកម្មពេញម៉ោងរបស់លោកនៅទ្វីបអឺរ៉ុប ។២ អំណរដែលកើតចេញពីការធ្វើជាសាក្សីនៃឥទ្ធិពលទូទាំងសកលលោកនៃការស្ដារឡើងវិញ ត្រូវបានពិពណ៌នាយ៉ាងច្បាស់នៅក្នុងទំនុកច្រៀងនៃទំនុកតម្កើងដូចតទៅ ៖
ស្វែងរកក្នុងទីងងឹតចិត្តសោកសៅ
ចាំមើលថ្ងៃរះដែលបាត់បង់យូរទៅ
នាំគ្នារីករាយយប់យន់ឈប់មានហើយ
ដ្បិតឡើយមានសេចក្តីពិត !៣
ដោយសារតែការចាប់ផ្ដើមជាង ២០០ ឆ្នាំមុននៃការស្ដារឡើងវិញដែលនៅតែបន្ដនេះ « ពន្លឺការពិតនិងក្តីស្រឡាញ់ »៤បញ្ចេញរស្មីពេញទាំងផែនដីនាពេលនេះ ។ ព្យាការី យ៉ូសែប បានដឹងនៅឆ្នាំ ១៨២០ ហើយមនុស្សរាប់លាននាក់ថែមទៀតបានដឹងតាំងពីពេលនោះមកថា ព្រះ « ទ្រង់ប្រទានដល់មនុស្សទាំងអស់ដោយសទ្ធា និងឥតបន្ទោសផង » ។៥
មិនយូរប៉ុន្មានក្រោយពីការរៀបចំសាសនាចក្រនៅគ្រាកាន់កាប់ត្រួតត្រាចុងក្រោយនេះ ព្រះអម្ចាស់បានមានបន្ទូលទៅយ៉ូសែប ស្ម៊ីធ ហើយបានបើកសម្ដែងក្ដីស្រឡាញ់យ៉ាងបរិបូរណ៍របស់ទ្រង់សម្រាប់ពួកយើង កាលទ្រង់មានបន្ទូល ៖
« ហេតុដូច្នេះហើយ យើងជាព្រះអម្ចាស់ ដោយជ្រាបនូវគ្រោះដែលនឹងមានមកលើបណ្ដាជនទាំងឡាយនៅលើផែនដី នោះបានហៅយ៉ូសែប ស៊្មីធ ជុញ្ញ័រ ជាអ្នកបម្រើរបស់យើង ហើយបាននិយាយមកកាន់លោកពីលើស្ថានសួគ៌ ហើយបានប្រទានព្រះបញ្ញត្តិទាំងឡាយដល់លោក …
« ដើម្បីឲ្យសេចក្ដីសញ្ញាដ៏អស់កល្បជានិច្ចរបស់យើងអាចបានតាំងឡើង
« ដើម្បីឲ្យភាពពោរពេញនៃដំណឹងល្អរបស់យើង អាចបានប្រកាសប្រាប់ដោយពួកកម្សោយ និងពួករាបទាបដល់អស់ចុងផែនដី និងនៅចំពោះពួកមហាក្សត្រនិង ពួកអ្នកត្រួតត្រាទាំងឡាយ » ។៦
ភ្លាមៗបន្ទាប់ពីវិវរណៈនេះត្រូវបានទទួល ពួកអ្នកផ្សព្វផ្សាយសាសនាចាប់ផ្ដើមទទួលការហៅ ហើយត្រូវបានបញ្ជូនទៅកាន់ជាតិសាសន៍ជាច្រើនក្នុងពិភពលោកនេះ ។ គឺដូចដែលព្យាការីនីហ្វៃបានរំពឹងទុក សារលិខិតនៃដំណឹងល្អដែលបានស្ដារឡើងវិញបានចាប់ផ្ដើមផ្សាយ « នៅក្នុងចំណោមគ្រប់ទាំងសាសន៍ គ្រប់ពូជមនុស្ស គ្រប់ភាសា និងគ្រប់ទាំងប្រជាជន » ។៧
« សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ត្រូវបានរៀបចំឡើងជាផ្លូវការនៅក្នុងផ្ទះឈើតូចមួយ នៅប៉ែកខាងជើងនៃរដ្ឋញូវ យ៉ក ក្នុងឆ្នាំ ១៨៣០ ។
« វាចំណាយពេល ១១៧ ឆ្នាំ—មកទល់ឆ្នាំ ១៩៤៧—ដើម្បីឲ្យសាសនាចក្ររីកចម្រើន ចាប់ពីមានសមាជិកប្រាំមួយនាក់ដំបូង មកដល់មានសមាជិកមួយលាននាក់ ។ ពួកអ្នកផ្សព្វផ្សាយសាសនាគឺជាមុខងារសំខាន់មួយរបស់សាសនាចក្រតាំងពីជំនាន់ដើម ដោយបានដុះដាលទៅគ្រប់ទិសទីដល់ដែនដីអាមេរិកាំងដើម ទៅប្រទេសកាណាដា ហើយនៅឆ្នាំ ១៨៣៧ ហួសពីទ្វីបអាមេរិកខាងជើងទៅកាន់ប្រទេសអង់គ្លេស ។ មិនយូរប៉ុន្មានក្រោយពីនោះ ពួកអ្នកផ្សព្វផ្សាយសាសនាបានធ្វើការនៅទ្វីបអឺរ៉ុប ហើយទៅសែនឆ្ងាយដល់ប្រទេសឥណ្ឌា និងបណ្ដុំកោះប៉ាស៊ីភិចផងដែរ ។
« សាសនាចក្រឈានដល់កំណត់ត្រាមានសមាជិកពីរលាននាក់ក្នុងរយៈពេល ១៦ ឆ្នាំក្រោយមក គឺនៅឆ្នាំ ១៩៦៣ ហើយកំណត់ត្រាបីលាននាក់នៅប្រាំបីឆ្នាំក្រោយមក » ។៨
ដោយគូសបញ្ជាក់ពីការរីកចម្រើនយ៉ាងលឿនរបស់សាសនាចក្រ ប្រធាន រ័សុល អិម ណិលសុន បានថ្លែងនាពេលថ្មីៗនេះថា « សព្វថ្ងៃនេះ កិច្ចការរបស់ព្រះអម្ចាស់នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺកំពុងតែបោះជំហានទៅមុខក្នុងល្បឿនដ៏លឿនមួយ ។ សាសនាចក្រនឹងមានអនាគតដែលមិនធ្លាប់មានពីមុនមក និងមិនអាចប្រៀបផ្ទឹមបាន » ។៩
ការស្ដារឡើងវិញចំពោះភាពពេញលេញនៃដំណឹងល្អរបស់ព្រះយេស៊ូវគ្រីស្ទ ការរៀបចំសាសនាចក្រដ៏សកម្មរបស់ព្រះអម្ចាស់ម្ដងទៀតនៅលើផែនដីនេះ និងការរីកចម្រើនដ៏អស្ចារ្យតាំងពីនោះមក បានធ្វើឲ្យពរជ័យនៃបព្វជិតភាពកើតមាននៅពេញទាំងផែនដីនេះ ។ ពិធីបរិសុទ្ធ និងសេចក្ដីសញ្ញាដ៏ពិសិដ្ឋដែលចងយើងទៅនឹងព្រះ ហើយដាក់យើងនៅលើផ្លូវនៃសេចក្ដីសញ្ញា សម្ដែងយ៉ាងច្បាស់ពី « អំណាចនៃព្រះ » ។១០ នៅពេលយើងចូលរួមក្នុងពិធីបរិសុទ្ធដ៏ពិសិដ្ឋទាំងនេះសម្រាប់អ្នកនៅរស់ និងអ្នកបានស្លាប់ហើយ នោះយើងជួយប្រមូលផ្ដុំអ៊ីស្រាអែលដែលនៅទាំងសងខាងវាំងនន ហើយរៀបចំផែនដីសម្រាប់ការយាងមកជាលើកទីពីររបស់ព្រះអង្គសង្គ្រោះ ។
នៅខែ មេសា ឆ្នាំ ១៩៧៣ ឪពុកម្ដាយរបស់ខ្ញុំ និងខ្ញុំបានធ្វើដំណើរពីប្រទេសអាហ្សង់ទីន ដែលជាប្រទេសកំណើតរបស់យើង ដើម្បីទៅផ្សារភ្ជាប់នៅក្នុងព្រះវិហារបរិសុទ្ធ ។ ដោយសារពុំមានព្រះវិហារបរិសុទ្ធនៅអាមេរិកឡាទីនទាំងមូលនៅពេលនោះ ដូច្នេះយើងបានធ្វើដំណើរជាង ៩៧០០ គីឡូម៉ែត្រដើម្បីបានផ្សារភ្ជាប់នៅក្នុងព្រះវិហារបរិសុទ្ធ សលត៍ លេក ។ ទោះជាខ្ញុំទើបតែមានអាយុពីរឆ្នាំនៅពេលនោះ ហើយមិនចាំសេចក្ដីទាំងអស់នៃបទពិសោធន៍ដ៏ពិសេសនោះក្ដី ក៏មានអនុស្សាវរីយពិសេសបីពីការធ្វើដំណើរនោះ ដែលបានដិតជាប់ក្នុងចិត្តខ្ញុំ ហើយខ្ញុំនៅចាំរហូតមក ។
ទីមួយ ខ្ញុំនៅចាំថាត្រូវបានដាក់ឲ្យអង្គុយក្បែរបង្អួច ហើយមើលឃើញពពកដ៏សស្អាតនៅខាងក្រោម ។
ពពកដ៏ស្រស់ចែងចាំងទាំងនោះនៅក្នុងចិត្តខ្ញុំជានិច្ច វាដូចជាបាល់សំឡីដ៏ធំ ។
អនុស្សាវរីយមួយទៀតដែលបន្ដស្ថិតក្នុងចិត្តខ្ញុំគឺ រូបកំប្លែងពីរបីនៅសួនកម្សាន្ដនៅក្រុងឡូស អាន់ជីឡេស ។ យើងមិនងាយភ្លេចរូបទាំងនោះឡើយ ។
ប៉ុន្ដែអ្វីដែលសំខាន់ខ្លាំងជាងនេះនោះគឺ អនុស្សាវរីយដ៏ត្រចះត្រចង់ និងមិនអាចបំភ្លេចបាននេះ ៖
ខ្ញុំចាំយ៉ាងច្បាស់ថាបាននៅក្នុងបន្ទប់មួយដ៏ពិសិដ្ឋនៅព្រះវិហារបរិសុទ្ធសលត៍ លេក ជាកន្លែងដែលធ្វើការផ្សារភ្ជាប់គូស្វាមីភរិយា និងក្រុមគ្រួសារចំពោះវេលាកាល និងចំពោះអស់ទាំងភាពអស់កល្បជានិច្ច ។ ខ្ញុំនៅចាំពីអាសនាដ៏ស្រស់ស្អាតក្នុងព្រះវិហារបរិសុទ្ធ ហើយចាំថាមានពន្លឺថ្ងៃចាំងចូលតាមបង្អួចនៃបន្ទប់នោះ ។ ខ្ញុំបានទទួលអារម្មណ៍នៅពេលនោះ ហើយនៅតែបន្ដមានអារម្មណ៍តាំងពីនោះមកថាទទួលបានភាពកក់ក្ដៅ សុវត្ថិភាព និងការលួងលោមនៃពន្លឺការពិត និងក្តីស្រឡាញ់នៃដំណឹងល្អ ។
អារម្មណ៍ស្រដៀងគ្នានេះត្រូវបានបញ្ជាក់ម្ដងទៀតក្នុងចិត្តខ្ញុំរយៈពេល ២០ ឆ្នាំក្រោយមក ពេលខ្ញុំបានចូលព្រះវិហារបរិសុទ្ធដើម្បីផ្សារភ្ជាប់ម្ដងទៀត—លើកនេះ គឺគូដណ្ដឹងខ្ញុំ និងខ្ញុំបានផ្សារភ្ជាប់សម្រាប់វេលាកាល និងអស់ទាំងភាពអស់កល្បជានិច្ច ។ ប៉ុន្ដែនៅក្នុងឱកាសនេះ យើងមិនចាំបាច់ធ្វើដំណើររាប់ពាន់គីឡូម៉ែត្រទេ ដោយសារព្រះវិហារបរិសុទ្ធ ប៊ុយណូស៊ែ អាហ្សង់ទីន ត្រូវបានសាងសង់ និងឧទ្ទិសរួចហើយ ហើយយើងបើកឡានជិតពីផ្ទះយើងទៅ ។
ម្ភៃពីរឆ្នាំក្រោយពីអាពាហ៍ពិពាហ៍ និងការផ្សារភ្ជាប់របស់យើង យើងមានពរជ័យដើម្បីត្រឡប់ទៅកាន់ព្រះវិហារបរិសុទ្ធដដែលនេះវិញ ប៉ុន្ដែលើកនេះទៅជាមួយនឹងកូនស្រីដ៏ស្រស់ស្អាតរបស់យើង ហើយយើងបានផ្សារភ្ជាប់ជាក្រុមគ្រួសារសម្រាប់វេលាកាល និងអស់ទាំងភាពអស់កល្បជានិច្ច ។
កាលខ្ញុំគិតអំពីគ្រាដ៏សែនពិសិដ្ឋទាំងនេះក្នុងជីវិតខ្ញុំ នោះខ្ញុំបានពេញដោយអំណរដ៏ជ្រាលជ្រៅ និងអង្វែង ។ ខ្ញុំបានមានអារម្មណ៍ ហើយបន្ដមានអារម្មណ៍នូវក្ដីស្រឡាញ់របស់ព្រះវរបិតា ដ៏សណ្ដោសប្រណីដែលគង់នៅស្ថានសួគ៌ ដែលជ្រាបពីតម្រូវការផ្ទាល់ខ្លួន និងបំណងប្រាថ្នាដ៏ស្មោះត្រង់របស់យើង ។
កាលមានបន្ទូលអំពីការប្រមូលផ្ដុំអ៊ីស្រាអែលនៅថ្ងៃចុងក្រោយ ព្រះអម្ចាស់យេហូវ៉ាបានមានបន្ទូល ៖ « យើងនឹងដាក់ក្រឹត្យវិន័យរបស់យើងនៅខាងក្នុងខ្លួនគេ ទាំងចារឹកទុកក្នុងចិត្តគេ នោះយើងនឹងធ្វើជាព្រះដល់គេ ហើយគេនឹងបានជារាស្ត្ររបស់យើង » ។១១ ខ្ញុំមានអំណរដ៏អស់កល្ប ព្រោះតាំងពីខ្ញុំនៅក្មេងមក ក្រឹត្យវិន័យរបស់ព្រះអម្ចាស់បានចារឹកទុកយ៉ាងជ្រៅក្នុងចិត្តខ្ញុំ តាមរយៈពិធីបរិសុទ្ធដ៏ពិសិដ្ឋនៅក្នុងព្រះដំណាក់ដ៏បរិសុទ្ធរបស់ទ្រង់ ។ វាជាគ្រឹះដ៏មាំដើម្បីដឹងថា ទ្រង់គឺជាព្រះរបស់យើង ថាយើងគឺជារាស្ដ្ររបស់ទ្រង់ ហើយថា មិនថាយើងស្ថិតក្នុងកាលៈទេសៈអ្វីនោះទេ ប្រសិនបើយើងស្មោះត្រង់ និងគោរពតាមសេចក្ដីសញ្ញាដែលយើងបានចុះនោះ យើងអាច « ត្រូវបានឱបក្រសោបជាអង្វែងតទៅ ដោយព្រះពាហុនៃសេចក្ដីស្រឡាញ់របស់ទ្រង់ » ។១២
អំឡុងសម័យប្រជុំស្ដ្រីនៃសន្និសីទទូទៅក្នុងខែ តុលា ឆ្នាំ ២០១៩ ប្រធានណិលសុនបានថ្លែងថា « រាល់ការខិតខំរបស់យើងដើម្បីផ្ដល់ការងារបម្រើដល់គ្នាទៅវិញទៅមក ប្រកាសដំណឹងល្អ ធ្វើឲ្យពួកបរិសុទ្ធបានគ្រប់លក្ខណ៍ ហើយប្រោសលោះមនុស្សស្លាប់ គឺទាក់ទងគ្នានៅក្នុងព្រះវិហារបរិសុទ្ធ » ។១៣
ដូចគ្នាដែរ អំឡុងសន្និសីទទូទៅដដែលនេះ ប្រធានណិលសុនបានបង្រៀន ៖ « ប្រាកដណាស់ ចំណែកដ៏សំខាន់បំផុតនៃការស្ដារឡើងវិញគឺព្រះវិហារបរិសុទ្ធ ។ ពិធីបរិសុទ្ធ និងសេចក្តីសញ្ញាដ៏ពិសិដ្ឋទាំងឡាយនៃព្រះវិហារបិរសុទ្ធ គឺសំខាន់ចំពោះការរៀបចំមនុស្សដែលត្រៀមខ្លួនជាស្រេច ដើម្បីស្វាគមន៍ព្រះអង្គសង្គ្រោះនៅក្នុងការយាងមកជាលើកទីពីររបស់ទ្រង់ » ។១៤
ការស្ដារឡើងវិញជាបន្ដបន្ទាប់ត្រូវបានកត់ចំណាំតាមរយៈអគារ និងការឧទ្ទិសព្រះវិហារបរិសុទ្ធក្នុងល្បឿនដ៏លឿនមួយ ។ កាលយើងប្រមូលផ្ដុំគ្នានៅទាំងសងខាងវាំងនន កាលយើងធ្វើការលះបង់ដើម្បីបម្រើ និងធ្វើឲ្យព្រះវិហារបរិសុទ្ធជាផ្នែកដ៏សំខាន់ក្នុងជីវិតរបស់យើង នោះព្រះអម្ចាស់កំពុងស្ថាបនាយើងពិតមែន—ទ្រង់កំពុងស្ថាបនារាស្ត្រនៃសេចក្ដីសញ្ញារបស់ទ្រង់ ។
ឱ ! បល្ល័ង្កសួគ៌ារុងរឿងអ្វីម៉្លេះ
ជះពន្លឺការពិតនិងក្តីស្រឡាញ់ !
រស្មីប្រៀបបីដូចជាព្រះអាទិត្យ
ស្ថិតគ្រប់ដែនដីសព្វថ្ងៃ ។១៥
ខ្ញុំសូមថ្លែងទីបន្ទាល់ថា ពន្លឺការពិត និងក្តីស្រឡាញ់នៃដំណឹងល្អរះចែងចាំងនៅទូទាំងផែនដីសព្វថ្ងៃនេះ ។ « ការណ៍អស្ចារ្យ ហើយចំឡែក » ដែលត្រូវបានព្យាករដោយព្យាការីអេសាយ១៦និងបានឃើញដោយនីហ្វៃ១៧កំពុងតែកើតឡើងក្នុងល្បឿនដ៏លឿនមួយ ទោះជាក្នុងពេលនេះដែលមានឧបសគ្គច្រើនក្ដី ។ ដូចដែល យ៉ូសែប ស្ម៊ីធ បានប្រកាសតាមការព្យាករថា « បទដ្ឋាននៃសេចក្ដីពិតត្រូវបានបង្កើតឡើង គ្មានដៃមិនបរិសុទ្ធណាមួយអាចបញ្ឈប់កិច្ចការនេះមិនឲ្យរីកចម្រើនបានឡើយ … រហូតដល់គោលបំណងនៃព្រះនឹងបានសម្រេច ហើយព្រះយេហូវ៉ាដ៏មហិមានឹងមានបន្ទូលថា កិច្ចការបានចប់សព្វគ្រប់ហើយ » ។១៨
បងប្អូនប្រុសស្រី សូមឲ្យយើងស្ម័គ្រចិត្ត និងសម្រេចចិត្តនៅថ្ងៃនេះដើម្បីឲ្យខ្លួនយើង និងក្រុមគ្រួសាររបស់យើងស្ដាប់តាមសំឡេងនៃស្ថានសួគ៌ គឺជាសំឡេងរបស់ព្រះអង្គសង្គ្រោះយើង ។ សូមឲ្យយើងចុះសេចក្ដីសញ្ញាជាមួយព្រះ និងកាន់តាមសេចក្ដីសញ្ញានោះ ដែលនឹងការពារយើងយ៉ាងខ្ជាប់ខ្ជួន នៅលើផ្លូវដែលនាំយើងត្រឡប់ទៅវត្តមានរបស់ទ្រង់វិញ ហើយសូមឲ្យយើងអររីករាយនឹងពរជ័យនៃពន្លឺដ៏រុងរឿង និងសេចក្ដីពិតនៃដំណឹងល្អ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕