កូវីដ-១៩ និងព្រះវិហារបរិសុទ្ធ
សូមរក្សាសេចក្តីសញ្ញាក្នុងព្រះវិហារបរិសុទ្ធនិងពរជ័យទាំងឡាយដែលសំខាន់បំផុតនៅក្នុងគំនិត និងដួងចិត្តរបស់បងប្អូន ។ សូមបន្តនៅពិតចំពោះសេចក្តីសញ្ញាដែលបងប្អូនបានធ្វើ ។
ឱ ! បងប្អូនប្រុសស្រីជាទីស្រឡាញ់របស់ខ្ញុំ យើងពិតជាមានអាហារខាងវិញ្ញាណដ៏វិសេសវិសាល ។ ខ្ញុំមានអំណរគុណណាស់ ចំពោះការអធិស្ឋាន សារលិខិត និងតន្រ្តីនៅក្នុងសន្និសីទនេះទាំងមូល ។ សូមអរគុណចំពោះបងប្អូនរាល់គ្នា ដែលបានចូលរួមជាមួយយើង មិនថាបងប្អូននៅទីណាក្ដី ។
នៅដើមឆ្នាំមុន ពីព្រោះតែជំងឺរាតត្បាតសកល កូវីដ-១៩ និងបំណងប្រាថ្នារបស់យើងដើម្បីធ្វើជាពលរដ្ឋល្អនៅទូទាំងពិភពលោក យើងបានធ្វើការសម្រេចចិត្តដ៏លំបាកក្នុងការបិទព្រះវិហារបរិសុទ្ធទាំងអស់ជាបណ្តោះអាសន្ន ។ ក្រោយពីការបិទអស់រយៈពេលប៉ុន្មានខែមក យើងបានទទួលអារម្មណ៍ការបំផុសគំនិតឲ្យបើកព្រះវិហារបរិសុទ្ធឡើងវិញបន្តិចម្តងៗ ដោយមានវិធានការយ៉ាងប្រុងប្រយ័ត្ន ។ ឥឡូវនេះ ព្រះវិហារបរិសុទ្ធបានបើក និងកំពុងប្រតិបត្តិការនៅក្នុងដំណាក់កាលបួន ដោយប្រកាន់ខ្ជាប់តាមច្បាប់ក្នុងស្រុក និងពិធីការសុវត្ថិភាពយ៉ាងតឹងតែង ។
ចំពោះព្រះវិហារបរិសុទ្ធក្នុងដំណាក់កាលទី ១ គូស្វាមីភរិយាដែលមានភាពស័ក្ដិសមដែលបានទទួលអំណោយទានពិសិដ្ឋរបស់ខ្លួនពីមុនមក អាចធ្វើការផ្សារភ្ជាប់ជាស្វាមី និងភរិយាបាន ។
ចំពោះព្រះវិហារបរិសុទ្ធក្នុងដំណាក់កាលទី ២ ពិធីបរិសុទ្ធសម្រាប់អ្នកនៅរស់គឺត្រូវបានធ្វើឡើង ដោយរួមទាំងអំណោយទានពិសិដ្ឋផ្ទាល់ខ្លួន ការផ្សារភ្ជាប់ជាស្វាមី និងភរិយា និង ការផ្សារភ្ជាប់កូនៗទៅនឹងឪពុកម្តាយ ។ ថ្មីៗនេះ យើងបានកែតម្រូវលក្ខខណ្ឌដែលបានចែងនៅក្នុងដំណាក់កាលទី ២ ហើយឥឡូវនេះ យើងអនុញ្ញាតឲ្យយុវវ័យ សមាជិកថ្មី និងអ្នកដទៃទៀតដែលមានប័ណ្ណសម្រាប់ការប្រើប្រាស់មានកម្រិត ឲ្យចូលរួមធ្វើពិធីបុណ្យជ្រមុជទឹកជំនួសឲ្យបុព្វការីជនរបស់ពួកគេ ។
ចំពោះព្រះវិហារបរិសុទ្ធក្នុងដំណាក់កាលទី ៣ អស់អ្នកដែលបានដាក់កាលវិភាគណាត់ជួប មិនត្រឹមតែអាចចូលរួមនៅក្នុងពិធីបរិសុទ្ធសម្រាប់អ្នកដែលនៅរស់ប៉ុណ្ណោះទេ ប៉ុន្តែក៏អាចចូលរួមក្នុងពិធីបរិសុទ្ធជំនួសឲ្យបុព្វការីជនដែលបានស្លាប់ផងដែរ ។
ដំណាក់កាលទី ៤ គឺការបើកពេញលេញវិញ គឺមានន័យថាសកម្មភាពព្រះវិហារបរិសុទ្ធមានដូចធម្មតាវិញ ។
យើងមានអំណរគុណចំពោះសេចក្តីអំណត់របស់បងប្អូន និងការបម្រើដ៏ស្មោះស្ម័គ្រនៅអំឡុងគ្រានៃការផ្លាស់ប្តូរ និងដ៏ឧបសគ្គនេះ ។ ខ្ញុំសូមបួងសួងឲ្យបំណងប្រាថ្នារបស់បងប្អូនក្នុងការថ្វាយបង្គំ និងបម្រើនៅក្នុងព្រះវិហារបរិសុទ្ធកាន់តែខ្មួលខ្មាញ់ឡើង សម្រាប់ពេលឥឡូវនិងជារៀងដរាប ។
បងប្អូនប្រហែលជាកំពុងឆ្ងល់ថា តើពេលណាដែលបងប្អូនអាចត្រឡប់ទៅព្រះវិហារបរិសុទ្ធវិញបាន ។ ចម្លើយ ៖ ព្រះវិហារបរិសុទ្ធរបស់បងប្អូននឹងបើក នៅពេលដែលច្បាប់រដ្ឋាភិបាលក្នុងស្រុករបស់បងប្អូនអនុញ្ញាតឲ្យ ។ នៅពេលឧប្បត្តិហេតុនៃជំងឺកូវីដ-១៩ នៅក្នុងតំបន់របស់បងប្អូនស្ថិតក្នុងកម្រិតមួយដែលមានសុវត្ថិភាព នោះព្រះវិហារបរិសុទ្ធរបស់បងប្អូននឹងបើកឡើងវិញហើយ ។ យើងសូមលើកទឹកចិត្តបងប្អូន ឲ្យខំអស់ពីលទ្ធភាពរបស់បងប្អូនដើម្បីទម្លាក់តួលេខជំងឺកូវីដឲ្យនៅទាបតាមតំបន់របស់បងប្អូន ដើម្បីឲ្យឱកាសបើកព្រះវិហារបរិសុទ្ធអាចកើនឡើង ។
ទន្ទឹមនឹងនេះ សូមរក្សាសេចក្តីសញ្ញាក្នុងព្រះវិហារបរិសុទ្ធ និងពរជ័យទាំងឡាយដែលសំខាន់បំផុតនៅក្នុងគំនិត និងដួងចិត្តរបស់បងប្អូន ។ សូមបន្តនៅពិតចំពោះសេចក្តីសញ្ញាដែលបងប្អូនបានធ្វើ ។
យើងកំពុងសាងសង់ឥឡូវនេះដើម្បីអនាគត ! ព្រះវិហារបរិសុទ្ធចំនួនសែសិបមួយកន្លែងកំពុងដំណើរការសាងសង់ ឬជួសជុល ។ គ្រាន់តែឆ្នាំមុននេះ ទោះបីជាមានការរាតត្បាតក្តី ក៏នៅតែមានការបើកការដ្ឋានសាងសង់ព្រះវិហារបរិសុទ្ធថ្មីចំនួន ២១ កន្លែងដែរ !
យើងចង់នាំយកដំណាក់របស់ព្រះអម្ចាស់ ឲ្យនៅកាន់តែជិតនឹងសមាជិករបស់យើង ដើម្បីសមាជិកអាចមានឯកសិទ្ធិដ៏ពិសិដ្ឋដើម្បីចូលរួមនៅក្នុងព្រះវិហារបរិសុទ្ធ ឲ្យបានញឹកញាប់តាមកាលៈទេសៈហុចឲ្យ ។
នៅពេលខ្ញុំប្រកាសផែនការរបស់យើងដើម្បីសាងសង់ព្រះវិហារបរិសុទ្ធចំនួន ២០ បន្ថែមទៀត ខ្ញុំពិចារណានិងសរសើរដល់អ្នកត្រួសត្រាយ—ពីអតីតកាល និងបច្ចុប្បន្ន—ដែលបានលះបង់ជីវិតជួយបង្កើតប្រវត្តិសាស្ត្រនេះសម្រាប់ពេលបច្ចុប្បន្ននេះ ។ ព្រះវិហារបរិសុទ្ធថ្មីនឹងសង់ឡើងនៅទីកន្លែងនីមួយៗដូចខាងក្រោម ៖អូលឡូ ប្រទេសន័រវេស; ទីក្រុង ព្រុចសែល ប្រទេសបែលហ្ស៊ិក; វីយែន ប្រទេសអូទ្រីស; គូម៉ាសា ប្រទេសហ្កាណា; ប៊ីរ៉ា ប្រទេសម៉ូហ្សំប៊ិក; ខេបថោន អាហ្វ្រិកខាងត្បូង; សាធារណរដ្ឋ សិង្ហបុរី ប៊ីឡូហ្សូរីហ្សូនី ប្រទេសប្រេស៊ីល; កាលី ប្រទេសកូឡុំប៊ី; ឃឺរេធីតា ប្រទេសម៉ិកស៊ីកូ; តូរេន ប្រទេសម៉ិកស៊ិក; ហេលេណា ប្រទេសម៉ុនតាណា; ហ្គាស្ពើរ, វ៉ាយអូមីង មហាប្រសព្វរដ្ឋខូឡូរ៉ាដូ; ហ្វាមីងតុន ម៉ិកស៊ីកូថ្មី ប៊ូលី រដ្ឋអៃដាហូ; អេកហ្គេនអូរីហ្គុន; អេលកូ រដ្ឋនេវ៉ាដា; ចូបាលីនដា រដ្ឋកាលីហ្វ័រញ៉ា; និង ស្ម៊ីធហ្វាយ រដ្ឋយូថាហ៍ ។
ព្រះវិហារបរិសុទ្ធទាំងឡាយគឺជាផ្នែកដ៏សំខាន់នៃការស្តារឡើងវិញនៃដំណឹងល្អនៃព្រះយេស៊ូវគ្រីស្ទក្នុងភាពពេញលេញ ។ ពិធីបរិសុទ្ធទាំងឡាយក្នុងព្រះវិហារបរិសុទ្ធបំពេញជីវិតរបស់យើងជាមួយអំណាច និងកម្លាំងដែលពុំមានតាមរបៀបផ្សេងទៀតឡើយ ។ យើងសូមអរព្រះគុណដល់ព្រះចំពោះពរជ័យទាំងនេះ ។
កាលដែលយើងបញ្ចប់សន្និសីទនេះ យើងសូមបង្ហាញសេចក្តីស្រឡាញ់ចំពោះបងប្អូនម្តងទៀត ។ យើងអធិស្ឋានសូមឲ្យព្រះនឹងចាក់ស្រោចពរជ័យរបស់ទ្រង់ និងមើលថែបងប្អូនម្នាក់ៗ ។ យើងចូលរួមចំណែកនៅក្នុងការបម្រើដ៏ពិសិដ្ឋរបស់ទ្រង់ជាមួយគ្នា ។ ដោយសេចក្តីក្លាហាន ចូរយើងទាំងអស់គ្នាខិតខំនៅក្នុងកិច្ចការដ៏រុងរឿងរបស់ព្រះអម្ចាស់ ! ខ្ញុំសូមអធិស្ឋានសម្រាប់ពរជ័យនេះ ក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕