ពួកគេពុំអាចយកឈ្នះបានឡើយ យើងមិនអាចរលំបានឡើយ
បើយើងសង់គ្រឹះរបស់យើងលើព្រះយេស៊ូវគ្រីស្ទ នោះយើងមិនអាចរលំបានឡើយ ។
ព្យាការីជាទីស្រឡាញ់របស់យើង ប្រធាន រ័សុល អិម ណិលសុន បានថ្លែងនៅក្នុងសន្និសីទទូទៅលើកមុនថា « នៅក្នុងពេលដ៏លំបាកទាំងនេះ សាវកប៉ុលបានព្យាករ សាតាំងមិនទាំងចាំបាច់ប៉ុនប៉ងដើម្បីលាក់បាំងការវាយប្រហាររបស់វាមកលើផែនការរបស់ព្រះទៀតឡើយ ។ សេចក្តីអាក្រក់មានច្រើនក្រៃលែង ។ ហេតុដូច្នោះហើយ មានតែវិធីមួយប៉ុណ្ណោះដើម្បីបានរស់ខាងវិញ្ញាណ គឺត្រូវប្តេជ្ញាចិត្តទុកឲ្យព្រះឈ្នះនៅក្នុងជីវិតរបស់យើង ត្រូវរៀនស្តាប់សំឡេងរបស់ទ្រង់ និងប្រើប្រាស់កម្លាំងរបស់យើងជួយនៅក្នុងការប្រមូលផ្តុំអ៊ីស្រាអែល » ។១
កាលយើងពិចារណាពីការអញ្ជើញរបស់ព្យាការីឲ្យរៀនស្ដាប់តាមសំឡេងរបស់ព្រះ តើចិត្តយើងប្ដេជ្ញាចិត្តធ្វើតាម ឬរឹងរូស ? ចូរយើងចងចាំដល់ពាក្យទូន្មាននៅក្នុង យ៉ាកុប ៦:៦ ៖ « មែនហើយ ថ្ងៃនេះ បើសិនជាអ្នករាល់គ្នាឮសំឡេងទ្រង់ ចូរកុំធ្វើចិត្តរឹងរូសឡើយ ដ្បិតហេតុអ្វីក៏បងប្អូនចង់ស្លាប់ ? » ចូរយើងប្ដេជ្ញាចិត្តដើម្បីទុកឲ្យព្រះឈ្នះនៅក្នុងជីវិតរបស់យើង ។
តើយើងអាចទុកឲ្យព្រះឈ្នះនៅក្នុងជីវិតរបស់យើង ហើយមិនមែនជាមារសត្រូវដោយរបៀបណា ? នៅ គោលលទ្ធិ និង សេចក្ដីសញ្ញា ៦:៣៤យើងអានថា « ហេតុដូច្នេះហើយ កុំឲ្យខ្លាចឡើយ ហ្វូងតូចអើយ ចូរធ្វើល្អចុះ ចូរឲ្យផែនដី និងស្ថាននរករួមគ្នាប្រឆាំងនឹងអ្នកចុះ ដ្បិតបើសិនជាអ្នករាល់គ្នាបានសង់នៅលើថ្មដារបស់យើង នោះពួកគេពុំអាចយកឈ្នះបានឡើយ » ។ វាគឺជាការសន្យាដ៏សំខាន់មួយ ។ ទោះបីជាផែនដី និងស្ថាននរករួមគ្នាប្រឆាំងនឹងយើងក្ដី ក៏ពួកគេមិនអាចយកឈ្នះបានឡើយ ប្រសិនបើយើងជ្រើសរើសទុកឲ្យព្រះឈ្នះ តាមរយៈការស្ថាបនាជីវិតរបស់យើងនៅលើថ្មដារបស់ទ្រង់នោះ ។
ពេលមានបន្ទូលទៅពួកសិស្ស ព្រះយេស៊ូវគ្រីស្ទបានបង្រៀនអំពីមនុស្សប្រាជ្ញា និងមនុស្សល្ងង់ ដូចបានកត់ត្រានៅក្នុងគម្ពីរម៉ាថាយ ជំពូកទី ៧ នៃព្រះគម្ពីរសញ្ញាថ្មី ។ បងប្អូនជាច្រើនធ្លាប់បានស្ដាប់បទចម្រៀងថ្នាក់កុមារ « មនុស្សប្រាជ្ញា និងមនុស្សល្ងង់ » ។២ បើបងប្អូនចំណាយពេលប្រៀបធៀបបួនវគ្គក្នុងបទចម្រៀងនេះ បងប្អូននឹងឃើញថា វគ្គទី ១ និង ២ គឺស្រដៀងគ្នាខ្លាំងនឹងវគ្គទី ៣ និង ៤ ។ ទាំងមនុស្សប្រាជ្ញា និងមនុស្សល្ងង់កំពុងតែសង់ផ្ទះ ។ ពួកគេចង់ផ្ដល់ផ្ទះដ៏មានសុវត្ថិភាព និងកក់ក្ដៅមួយដល់គ្រួសាររបស់ពួកគេ ។ ពួកគេចង់រស់នៅជាមួយគ្នាជាគ្រួសារយ៉ាងរីករាយជារៀងរហូត គឺដូចជាបងប្អូន និងខ្ញុំដែរ ។ ស្ថានភាពដែលបានកើតឡើងគឺដូចគ្នា ៖ « ភ្លៀង ក៏ធ្លាក់មក ហើយទឹកក៏ជន់ឡើង » ។ យើងច្រៀងឃ្លានេះប្រាំមួយដង ពេលយើងច្រៀងបទនោះ ។ ភាពខុសគ្នាតែមួយគត់គឺថា មនុស្សប្រាជ្ញាបានសង់ផ្ទះរបស់ខ្លួននៅលើសិលា ហើយផ្ទះនោះឈរយ៉ាងមាំ ខណៈមនុស្សល្ងង់បានសង់ផ្ទះរបស់ខ្លួននៅលើដីខ្សាច់ ហើយផ្ទះរបស់គេបានរសាត់ទៅឆ្ងាយ ។ ហេតុដូច្នេះហើយ ទីតាំងនៃគ្រឹះរបស់យើងពិតជាសំខាន់ខ្លាំងណាស់ ហើយវាមានឥទ្ធិពលយ៉ាងខ្លាំងទៅលើលទ្ធផលនៅទីបំផុត និងដ៏អស់កល្ប ។
ខ្ញុំសង្ឃឹម និងអធិស្ឋានថា យើងទាំងអស់គ្នានឹងរកឃើញ ហើយបន្ដនៅលើគ្រឹះដ៏ខ្ជាប់ខ្ជួននេះ កាលយើងស្ថាបនាជីវិតនាពេលអនាគតរបស់យើង ។ ហេលេមិន ៥:១២ រំឭកយើងថា « ហើយឥឡូវនេះ ឱកូនប្រុសទាំងឡាយរបស់ឪពុកអើយ ចូរចងចាំចុះ ចូរចងចាំចុះថា គឺនៅលើសិលានៃព្រះដ៏ប្រោសលោះនៃយើង គឺព្រះគ្រីស្ទជាព្រះរាជបុត្រានៃព្រះ ដែលកូនត្រូវសង់គ្រឹះរបស់កូន ដើម្បីកាលណាអារក្សបញ្ចេញខ្យល់ដ៏ខ្លាំងក្លារបស់វាមក មែនហើយ ព្រួញរបស់វានៅក្នុងខ្យល់កួច មែនហើយ កាលណាព្រិល និងខ្យល់ព្យុះកំណាចទាំងអស់របស់វាបោកបក់មកលើកូន នោះវានឹងគ្មានអំណាចមកលើកូនឡើយ ដើម្បីទាញកូនចុះទៅក្នុងជង្ហុកនៃសេចក្ដីវេទនា និងទុក្ខលំបាកដ៏មិនចេះចប់មិនចេះហើយ ពីព្រោះមកពីសិលាដែលកូនបានសង់នៅលើនោះ ដែលជាគ្រឹះដ៏ខ្ជាប់ខ្ជួនមួយ ជាគ្រឹះមួយ បើសិនណាមនុស្សសង់នៅលើនោះ នោះពួកគេមិនអាចរលំបានឡើយ » ។
នោះគឺជាការសន្យាមកពីព្រះ ! បើយើងសង់គ្រឹះរបស់យើងលើព្រះយេស៊ូវគ្រីស្ទ នោះយើងមិនអាចរលំបានឡើយ ។ កាលយើងស៊ូទ្រាំដល់ទីបញ្ចប់ដោយភាពស្មោះត្រង់ នោះព្រះនឹងជួយយើងឲ្យស្ថាបនាជីវិតរបស់យើងនៅលើថ្មដារបស់ទ្រង់ « ហើយទ្វារនៃស្ថាននរកនឹងមិនដែលយកឈ្នះយើងឡើយ » ( សូមមើល គោលលទ្ធិ និង សេចក្ដីសញ្ញា ១០:៦៩ ) ។ យើងប្រហែលជាពុំអាចផ្លាស់ប្តូរអ្វីទាំងអស់ដែលនឹងកើតឡើងបានឡើយ ប៉ុន្តែយើងអាចជ្រើសរើសរបៀបដែលយើងរៀបចំខ្លួនសម្រាប់អ្វីដែលនឹងកើតឡើងនោះ ។
ពួកយើងមួយចំនួនអាចគិតថា « ដំណឹងល្អគឺល្អប្រពៃ ដូច្នេះយើងត្រូវដាក់វាក្នុងជីវិតយើង ប្រហែលជាម្ដងក្នុងមួយសប្ដាហ៍ » ។ គ្រាន់តែទៅព្រះវិហារម្ដងក្នុងមួយសប្ដាហ៍នោះ វាមិនគ្រប់គ្រាន់ដើម្បីសង់នៅលើថ្មដាទេ ។ ជីវិតរបស់យើងទាំងស្រុងគួរតែពោរពេញដោយដំណឹងល្អនៃព្រះយេស៊ូវគ្រីស្ទ ។ ដំណឹងល្អមិនមែនជាផ្នែកមួយនៃជីវិតរបស់យើងនោះទេ ប៉ុន្ដែជីវិតយើងទេ ដែលជាផ្នែកមួយនៃដំណឹងល្អរបស់ព្រះយេស៊ូវគ្រីស្ទ ។ សូមគិតពីការណ៍នេះ ។ តើវាមិនត្រឹមត្រូវទេឬអី ? ជីវិតរមែងស្លាប់របស់យើងគឺគ្រាន់តែជាផ្នែកមួយនៃផែនការនៃសេចក្ដីសង្គ្រោះ និងការតម្កើងឡើងទាំងមូលប៉ុណ្ណោះ ។
ព្រះគឺជាព្រះវរបិតាសួគ៌របស់យើង ។ ទ្រង់ស្រឡាញ់យើងទាំងអស់គ្នា ។ ទ្រង់ស្គាល់សក្ដានុពលរបស់យើងច្រើនជាងយើងស្គាល់ខ្លួនឯង ។ ទ្រង់មិនត្រឹមតែញាណដឹងពីសេចក្ដីលម្អិតនៃជីវិតរបស់យើងនោះទេ ។ ព្រះថែមទាំងញាណដឹងពីសេចក្ដីលម្អិតនៃភាពលម្អិតនៃការណ៍លម្អិតនៃជីវិតរបស់យើងទៀតផង ។
សូមធ្វើតាមការទូន្មានដ៏វាងវៃរបស់ព្យាការីដែលនៅរស់របស់យើង គឺប្រធានណិលសុន ។ ដូចបានកត់ត្រានៅក្នុង គោលលទ្ធិ និង សេចក្ដីសញ្ញា ២១:៥–៦ ៖
« ដ្បិតពាក្យសម្ដីរបស់លោកនោះហើយ អ្នកនឹងបានទទួល ហាក់ដូចជាបានមកពីព្រះឱស្ឋរបស់យើងផ្ទាល់ ដោយសេចក្ដីអត់ធន់ និងសេចក្ដីជំនឿគ្រប់យ៉ាង ។
« ដ្បិតដោយសារការធ្វើការទាំងនេះហើយ ទ្វារស្ថាននរកនឹងពុំដែលឈ្នះអ្នកឡើយ មែនហើយ ហើយព្រះអម្ចាស់ដ៏ជាព្រះ ទ្រង់នឹងកម្ចាត់អំណាចនៃសេចក្ដីងងឹតចេញពីអ្នកទៅ ហើយនឹងបណ្ដាលឲ្យផ្ទៃមេឃញាប់ញ័រ ដើម្បីសេចក្ដីល្អដល់អ្នក និងសិរីល្អដល់ព្រះនាមរបស់ទ្រង់ » ។
ដោយសារមូលហេតុនោះហើយ ទើបពួកគេពុំអាចយកឈ្នះបានឡើយ ហើយយើងមិនអាចរលំបានឡើយ !
ខ្ញុំសូមថ្លែងទីបន្ទាល់ដល់បងប្អូនថា ព្រះគ្រីស្ទនឹងយាងមកម្ដងទៀតជាលើកទីពីរ ដូចទ្រង់បានធ្វើនៅលើកទីមួយដែរ ប៉ុន្ដែលើកនេះ វានឹងពេញដោយសិរីល្អ និងព្រះចេស្ដាដ៏មហិមា ។ ខ្ញុំសង្ឃឹម និងអធិស្ឋានថា ខ្ញុំនឹងបានត្រៀមខ្លួនជាស្រេចដើម្បីទទួលទ្រង់ មិនថានៅខាងនេះនៃវាំងនន ឬនៅខាងនោះនៃវាំងននទេ ។ កាលយើងអបអរសាទរក្នុងរដូវកាលបុណ្យអ៊ីស្ទើរដ៏អស្ចារ្យនេះ ខ្ញុំសង្ឃឹមថា តាមរយៈដង្វាយធួនរបស់ព្រះយេស៊ូវគ្រីស្ទ និងអំណាចនៃដំណើររស់ឡើងវិញរបស់ទ្រង់ ( សូមមើល មរ៉ូណៃ ៧:៤១នោះខ្ញុំនឹងអាចឡើងទៅជួបនឹងព្រះដ៏បង្កបង្កើតរបស់ខ្ញុំ ហើយទូលថា « សូមអរព្រះគុណ » ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕