ព្រះគ្រីស្ទមានព្រះជន្មរស់ឡើងវិញ សេចក្តីជំនឿលើទ្រង់នឹងរើភ្នំចេញបាន
សេចក្តីជំនឿលើព្រះយេស៊ូវគ្រីស្ទគឺជាអំណាចដ៏ធំបំផុតដែលយើងមាននៅក្នុងជីវិតនេះ ។ ការណ៍ទាំងអស់នឹងសម្រេចបានដល់អ្នកណាដែលជឿ ។
បងប្អូនប្រុសស្រីជាទីស្រឡាញ់ ខ្ញុំមានអំណរគុណចំពោះឯកសិទ្ធិដើម្បីនិយាយទៅកាន់បងប្អូន នៅថ្ងៃអាទិត្យបុណ្យអ៊ីស្ទើរនេះ ។១ ពលិកម្មធួន និងការរស់ឡើងវិញរបស់ព្រះយេស៊ូគ្រីស្ទបានផ្លាស់ប្តូរជីវិតយើងម្នាក់ៗជារៀងរហូត ។ យើងស្រឡាញ់ ហើយថ្វាយបង្គំទ្រង់ និងព្រះវរបិតាសួគ៌ដោយអំណរគុណ ។
អំឡុងប្រាំមួយខែចុងក្រោយនេះ យើងនៅតែបន្ដពុះពារនឹងជំងឺរាតត្បាតជាសកល ។ ខ្ញុំសូមសរសើរភាពអត់ធន់ និងកម្លាំងខាងវិញ្ញាណរបស់បងប្អូន ពេលប្រឈមនឹងជំងឺ ការបាត់បង់ ព្រមទាំងភាពកណ្ដោចកណ្ដែង ។ ខ្ញុំអធិស្ឋានជានិច្ចថា បងប្អូននឹងទទួលអារម្មណ៍ក្ដីស្រឡាញ់ដ៏ឥតរេរារបស់ព្រះអម្ចាស់ចំពោះបងប្អូន ពេលបងប្អូនឆ្លងកាត់រឿងទាំងនេះ ។ បើបងប្អូនបានឆ្លើយតបនឹងការសាកល្បងដោយភាពជាសិស្សដ៏រឹងមាំ នោះឆ្នាំមុននេះនឹងមិនអត់ប្រយោជន៍ឡើយ ។
នៅព្រឹកនេះ យើងបានស្ដាប់ថ្នាក់ដឹកនាំសាសនាចក្រមកពីគ្រប់ទ្វីបលើផែនដីនេះ ។ ពិតណាស់ ពរជ័យនៃដំណឹងល្អគឺមានសម្រាប់ គ្រប់ពូជសាសន៍ ភាសា និងមនុស្សទាំងអស់ ។ សាសនាចក្រនៃព្រះយេស៊ូវគ្រីស្ទគឺជាសាសនាចក្រ សាកលមួយ ។ ព្រះយេស៊ូវគ្រីស្ទគឺជាអង្គដឹកនាំរបស់យើង ។
យើងពេញដោយអំណរគុណ ទោះបីមានជំងឺរាតត្បាតនេះក្ដី ក៏វាមិនអាចបន្ថយការរីកចម្រើនដ៏ឥតឈប់ឈរនៃសេចក្ដីពិតរបស់ទ្រង់បានដែរ ។ ដំណឹងល្អនៃព្រះយេស៊ូវគ្រីស្ទគឺជាអ្វីដែលត្រូវការចាំបាច់សម្រាប់ពិភពលោកដ៏ភាន់ច្រឡំ ទាស់ទែង និងនឿយហត់នេះ ។
កូនចៅរបស់ព្រះម្នាក់ៗសមនឹងមានឱកាសស្ដាប់ ហើយទទួលយកសារលិខិតនៃការព្យាបាល និងការប្រោសលោះរបស់ព្រះយេស៊ូវគ្រីស្ទ ។ គ្មានសារលិខិតណាផ្សេងទៀតដែលសំខាន់ជាងសុភមង្គលរបស់យើងឡើយ—ទាំងពេលនេះ និងពេលអនាគត ។២ គ្មានសារលិខិតណាដែលពោរពេញដោយសេចក្ដីសង្ឃឹមខ្លាំងជាងនេះទេ ។ គ្មានសារលិខិតណាដែលអាចលុបបំបាត់ការទាស់ទែងគ្នាក្នុងសង្គមយើងបានទេ ។
សេចក្តីជំនឿលើព្រះយេស៊ូវគ្រីស្ទគឺជាគ្រឹះនៃជំនឿទាំងអស់ និងជារបៀបដើម្បីទទួលបានព្រះចេស្ដារបស់ព្រះ ។ យោងតាមសាវកប៉ុល « បើឥតមានសេចក្តីជំនឿទេ នោះមិនអាចនឹងគាប់ដល់ព្រះហឫទ័យ [ ព្រះ ] បានឡើយ ដ្បិតអ្នកណាដែលចូលទៅឯព្រះ នោះត្រូវតែជឿថា មានព្រះមែន ហើយថា ទ្រង់ប្រទានរង្វាន់ដល់អស់អ្នកដែលស្វែងរកទ្រង់ » ។៣
អ្វីៗគ្រប់យ៉ាងដែលល្អក្នុងជីវិត—គ្រប់ពរជ័យដែលសំខាន់ដ៏អស់កល្ប—ចាប់ផ្ដើមដោយសេចក្ដីជំនឿ ។ ការទុកឲ្យព្រះឈ្នះនៅក្នុងជីវិតយើង ចាប់ផ្ដើមដោយសេចក្ដីជំនឿថា ទ្រង់ស្ម័គ្រព្រះទ័យដឹកនាំយើង ។ ការប្រែចិត្តដ៏ពិតចាប់ផ្ដើមដោយសេចក្ដីជំនឿថា ព្រះយេស៊ូវគ្រីស្ទមានព្រះចេស្ដាដើម្បីសម្អាត ព្យាបាល និងពង្រឹងយើង ។៤
ព្យាការីមរ៉ូណៃបានប្រកាសថា « សូមកុំបដិសេធព្រះចេស្ដានៃព្រះឡើយ ដ្បិតទ្រង់ធ្វើការដោយព្រះចេស្ដា ស្របតាមសេចក្ដីជំនឿនៃកូនចៅមនុស្ស ថ្ងៃនេះក៏ដូចគ្នានឹងថ្ងៃស្អែក និងរហូតតទៅ » ។៥ គឺសេចក្ដីជំនឿ របស់យើងដែលចាក់សោបើកព្រះចេស្តានៃព្រះមកក្នុងជីវិត របស់យើង។
ហើយការអនុវត្តសេចក្ដីជំនឿអាចមើលទៅថាជារឿងដ៏លើសលប់ ។ ពេលខ្លះ យើងអាចឆ្ងល់ថា តើយើងអាចមានជំនឿគ្រប់គ្រាន់ដើម្បីទទួលបានពរជ័យ ដែលយើងចង់បានយ៉ាងខ្លាំងនោះដែរឬទេ ។ ប៉ុន្ដែ ព្រះអម្ចាស់បានរម្ងាប់ការភ័យខ្លាចទាំងនោះ តាមរយៈពាក្យសម្ដីរបស់ព្យាការីអាលម៉ាក្នុងព្រះគម្ពីរមរមន ។
អាលម៉ាគ្រាន់តែសុំយើងឲ្យ ធ្វើការពិសោធន៍ដល់ពាក្យសម្ដីនេះ ហើយ « អនុវត្តសេចក្ដីជំនឿមួយ តូចមែនហើយ គឺបើសិនជា [ យើង ] ពុំអាចធ្វើអ្វីក៏ដោយ ក្រៅពីការចង់ជឿ » ។៦ ឃ្លា « សេចក្ដីជំនឿមួយតូច » រំឭកខ្ញុំអំពីការសន្យារបស់ព្រះអម្ចាស់ក្នុងព្រះគម្ពីរប៊ីបថា បើយើង « មានសេចក្តីជំនឿដូច គ្រាប់ពូជ១យ៉ាងល្អិតនោះយើងនឹងអាច « និយាយទៅភ្នំនេះថា ចូររើចេញពីទីនេះទៅទីនោះចុះ នោះនឹងបានដូច្នោះហើយ ក៏គ្មានការអ្វីដែលអ្នករាល់គ្នាធ្វើមិនកើតនោះទេ៧
ព្រះអម្ចាស់យល់ពីភាពទន់ខ្សោយក្នុងជីវិតរមែងស្លាប់របស់យើង ។ យើងទាំងអស់គ្នាស្ទាក់ស្ទើរពេលខ្លះ ។ ប៉ុន្តែទ្រង់ក៏ស្គាល់សក្ដានុពលដ៏អស្ចារ្យរបស់យើងផងដែរ ។ គ្រាប់ពូជមួយនេះតូចមែន ប៉ុន្ដែវាធំទៅជាដើមឈើដ៏ធំមួយ ល្មមឲ្យបក្សាបក្សីធ្វើសំបុកលើមែកវាបាន ។ គ្រាប់ពូជនេះតំណាងឲ្យសេចក្ដីជំនឿដ៏តូច ប៉ុន្ដែវាបន្ដរីកចម្រើន ។១៣
ព្រះអម្ចាស់មិនតម្រូវឲ្យមានសេចក្ដីជំនឿ ឥតខ្ចោះ ដើម្បីឲ្យយើងមានអំណាច ឥតខ្ចោះរបស់ទ្រង់នោះទេ ។ ប៉ុន្តែទ្រង់បានបង្គាប់ឲ្យយើងជឿ ។
បងប្អូនប្រុសស្រីជាទីស្រឡាញ់ ខ្ញុំសូមឲ្យបងប្អូនគ្រប់រូបនៅព្រឹកអ៊ីស្ទើរនេះ ឲ្យ ចាប់ផ្ដើមថ្ងៃនេះដើម្បីបង្កើនសេចក្ដីជំនឿរបស់បងប្អូន ។ តាមរយៈសេចក្ដីជំនឿរបស់បងប្អូន នោះព្រះយេស៊ូវគ្រីស្ទនឹងបង្កើនសមត្ថភាពរបស់បងប្អូនឲ្យរើភ្នំក្នុងជីវិតរបស់បងប្អូនបាន ៩ទោះជាឧបសគ្គផ្ទាល់ខ្លួនរបស់បងប្អូនធំប៉ុនភ្នំអេវើរ៉េសក្ដី ។
ភ្នំរបស់បងប្អូនអាចជាភាពឯកោ ភាពសង្ស័យ ជំងឺ ឬបញ្ហាផ្ទាល់ខ្លួនផ្សេងៗទៀត ។ ភ្នំរបស់បងប្អូនអាចមានខុសៗគ្នា ប៉ុន្ដែចម្លើយចំពោះឧបសគ្គនីមួយៗរបស់បងប្អូនគឺ ត្រូវបង្កើនសេចក្ដីជំនឿរបស់បងប្អូន ។ សេចក្ដីជំនឿតម្រូវឲ្យមានសកម្មភាព ។ អ្នករៀនខ្ជិល និងពួកសិស្សខ្ជីខ្ជា តែងតែពិបាកមាន សូម្បីតែសេចក្ដីជំនឿមួយតូចក្ដី ។
ដើម្បីធ្វើអ្វីៗបានល្អ វាតម្រូវឲ្យមានការខិតខំ ។ ការក្លាយជាសិស្សដ៏ពិតម្នាក់របស់ព្រះយេស៊ូវគ្រីស្ទ តម្រូវឲ្យមានការខិតខំ ។ ការបង្កើនសេចក្ដីជំនឿ និងការទុកចិត្តរបស់បងប្អូនលើទ្រង់តម្រូវឲ្យមានការខិតខំ ។ ខ្ញុំសូមផ្ដល់យោបល់ចំនួនប្រាំ ដើម្បីជួយបងប្អូនឲ្យអភិវឌ្ឍសេចក្ដីជំនឿ និងការទុកចិត្តនោះ ។
ទីមួយ សូម សិក្សា សូមក្លាយជាអ្នករៀនដ៏ឧស្សាហ៍ ។ សូមជ្រមុជខ្លួនបងប្អូននៅក្នុងបទគម្ពីរ ដើម្បីយល់ពីបេសកកម្ម និងការងារបម្រើរបស់ព្រះគ្រីស្ទកាន់តែច្បាស់។ សូមដឹងពីគោលលទ្ធិនៃព្រះគ្រីស្ទ ដើម្បីឲ្យបងប្អូនយល់ពីអំណាចនៃគោលលទ្ធិក្នុងជីវិតរបស់បងប្អូន ។ សូមទទួលស្គាល់សេចក្ដីពិតថា ដង្វាយធួនរបស់ព្រះយេស៊ូវគ្រីស្ទអនុវត្តចំពោះ បងប្អូន ។ ទ្រង់បានលើកដាក់មកលើព្រះអង្គទ្រង់នូវការឈឺចាប់ របស់បងប្អូនកំហុស របស់បងប្អូនភាពទន់ខ្សោយ របស់បងប្អូននិងអំពើបាប របស់បងប្អូន ។ ទ្រង់បានបង់ថ្លៃសង ហើយបានផ្ដល់អំណាចឲ្យបងប្អូនអាចរើភ្នំ ទាំងអស់ដែលបងប្អូននឹងជួបប្រទះ ។ បងប្អូនទទួលបានអំណាចនោះ ដោយសារសេចក្ដីជំនឿ ការទុកចិត្ត និងការស្ម័គ្រចិត្តរបស់បងប្អូនដើម្បីធ្វើតាមទ្រង់ ។
ការរើភ្នំរបស់បងប្អូនអាចតម្រូវឲ្យមានអព្ភូតហេតុកើតឡើង ។ សូមរៀនពីអព្ភូតហេតុ ។ អព្ភូតហេតុកើតមានស្របតាមសេចក្ដីជំនឿរបស់បងប្អូនលើព្រះអម្ចាស់ ។ អ្វីដែលសំខាន់ចំពោះសេចក្ដីជំនឿនោះគឺ ការទុកចិត្តលើព្រះទ័យ និងកាលវិភាគរបស់ទ្រង់—របៀប និងពេលវេលាដែលទ្រង់នឹងប្រទានពរដល់បងប្អូន ឲ្យទទួលបានជំនួយដ៏អព្ភូតហេតុដែលបងប្អូនចង់បាននោះ ។ មានតែ ការឥតជំនឿ របស់បងប្អូនទេ ដែលនឹងរារាំងមិនឲ្យព្រះប្រទានពរដល់បងប្អូន ឲ្យមានអព្ភូតហេតុរើភ្នំក្នុងជីវិត របស់បងប្អូននោះ ។១០
កាលណាបងប្អូនរៀនពីព្រះអង្គសង្គ្រោះកាន់តែច្រើន នោះវាកាន់តែងាយស្រួលដើម្បីទុកចិត្តលើសេចក្ដីមេត្តារបស់ទ្រង់ សេចក្ដីស្រឡាញ់ដ៏និរន្ដររបស់ទ្រង់ និងព្រះចេស្ដារបស់ទ្រង់ក្នុងការពង្រឹង ព្យាបាល និងប្រោសលោះ ។ ព្រះអង្គសង្គ្រោះនឹងគង់នៅកាន់តែជិតបងប្អូន ពេលបងប្អូនកំពុងជួបបញ្ហា ឬកំពុងឡើងភ្នំដោយ សេចក្ដីជំនឿ ។
ទីពីរ សូមជ្រើសរើសដើម្បី ជឿលើព្រះយេស៊ូវគ្រីស្ទ ។ បើបងប្អូនសង្ស័យពីព្រះ ជាព្រះវរបិតា និងព្រះរាជបុត្រាសំណព្វរបស់ទ្រង់ ឬពីភាពពិតនៃការស្ដារឡើងវិញ ឬសេចក្ដីពិតពេញលេញនៃការហៅដ៏ទេវភាពរបស់យ៉ូសែប ស្ម៊ីធ ជាព្យាការី នោះសូម ជ្រើសរើសជឿ១១ ហើយបន្ដនៅស្មោះត្រង់ ។ សូមយកសំណួររបស់បងប្អូនទូលទៅព្រះអម្ចាស់ និងទៅកាន់ប្រភពដ៏ស្មោះសរផ្សេងទៀត ។ សូមសិក្សាដោយមានបំណងចិត្តដើម្បី ជឿ ជាជាងសង្ឃឹមថា បងប្អូននឹងរកឃើញកំហុសក្នុងជីវិតរបស់ព្យាការី ឬភាពមិនស្របគ្នានៅក្នុងបទគម្ពីរ ។ សូមឈប់បង្កើនការសង្ស័យរបស់បងប្អូន ដោយទៅការពិភាក្សាជាមួយអ្នកសង្ស័យផ្សេងទៀត ។ សូមទុកឲ្យព្រះអម្ចាស់ដឹកនាំបងប្អូនក្នុងដំណើររុករកខាងវិញ្ញាណរបស់បងប្អូន ។
ទីបី សូម ធ្វើសកម្មភាពដោយជំនឿ ។ តើបងប្អូននឹងធ្វើអ្វីខ្លះ បើសិនជាបងប្អូនមានជំនឿ បន្ថែមទៀតនោះ ? សូមគិតពីការណ៍នេះ ។ សូមកត់ត្រាវាទុក ។ រួចហើយ សូម ទទួលជំនឿបន្ថែមទៀតតាមរយៈការធ្វើអ្វីមួយដែល តម្រូវឲ្យមានជំនឿបន្ថែម ។
ទីបួន សូម ទទួលទានពិធីបរិសុទ្ធពិសិដ្ឋដោយភាពស័ក្ដិសម ។ ពិធីបរិសុទ្ធចាក់សោបើកព្រះចេស្ដានៃព្រះមកក្នុងជីវិតរបស់បងប្អូន ។១២
ហើយទីប្រាំ ចូរ ទូលសូមជំនួយពីព្រះវរបិតាសួគ៌របស់បងប្អូនដោយនៅក្នុងព្រះនាមនៃព្រះយេស៊ូវគ្រីស្ទ ។
សេចក្ដីជំនឿតម្រូវឲ្យមានសកម្មភាព ។ ការទទួលវិវរណៈតម្រូវឲ្យមានការអនុវត្ត ។ ប៉ុន្ដ « អស់អ្នកណាដែលសូម នោះរមែងបាន អ្នកណាដែលរក នោះរមែងឃើញ ហើយនឹងបើកឲ្យអ្នកណាដែលគោះដែរ » ។១៣ ព្រះជ្រាបពីអ្វីដែលនឹងជួយដល់សេចក្ដីជំនឿរបស់បងប្អូនឲ្យរីកចម្រើន ។ ចូរសូមហើយសូមទៀត ។
អ្នកឥតជំនឿអាចនិយាយថា សេចក្ដីជំនឿគឺសម្រាប់អ្នកទន់ខ្សោយ ។ ប៉ុន្ដែការថ្លែងដូច្នេះមើលរំលងនូវ អំណាចនៃសេចក្តីជំនឿ ។ បន្ទាប់ពីការសុគតរបស់ទ្រង់ តើសាវករបស់ព្រះអង្គសង្គ្រោះនឹងបន្ដបង្រៀនគោលលទ្ធិរបស់ទ្រង់ ទាំងប្រថុយប្រថានជីវិតរបស់ពួកគេទេ បើពួកគេសង្ស័យលើទ្រង់នោះ ?១៤ តើយ៉ូសែប និង ហៃរុម ស្ម៊ីធ ព្រមរងទុក្ខរហូតដល់ស្លាប់ពីជនកំណាច ដោយសារតែការពារដល់ការស្ដារឡើងវិញនៃសាសនាចក្ររបស់ព្រះអម្ចាស់ឬទេ លើកលែងតែពួកលោកមានសាក្សីបញ្ជាក់ពីការពិតនោះ ? តើពួកបរិសុទ្ធជិត ២,០០០ នាក់ព្រមស្លាប់នៅតាមផ្លូវត្រួសត្រាយឬទេ១៥បើពួកគេសង្ស័យថា ដំណឹងល្អនៃព្រះយេស៊ូវគ្រីស្ទមិនត្រូវបានស្ដារឡើងវិញនោះ ? ពិតណាស់ សេចក្ដីជំនឿគឺជាអំណាចដែល ធ្វើឲ្យ រឿងដែលមិនអាចធ្វើទៅរួច ក្លាយទៅជារឿងដែលអាចសម្រេចបាន ។
សូមកុំកាត់បន្ថយសេចក្ដីជំនឿ ដែលបងប្អូនមានរួចទៅហើយនោះឡើយ ។ វាត្រូវការសេចក្ដីជំនឿដើម្បីចូលរួមក្នុងសាសនាចក្រនេះ ហើយបន្ដនៅស្មោះត្រង់ ។ វាត្រូវការសេចក្ដីជំនឿដើម្បីធ្វើតាមព្យាការី ជាជាងធ្វើតាមអ្នកជំនាញការ និងទស្សនៈល្បីល្បាញ ។ វាត្រូវការសេចក្ដីជំនឿដើម្បីបម្រើបេសកកម្មអំឡុងជំងឺរាតត្បាត ។ វាត្រូវការសេចក្ដីជំនឿដើម្បីមានជីវិតមួយដ៏បរិសុទ្ធ កាលលោកិយស្រែកថា ច្បាប់ព្រហ្មចារីភាពរបស់ព្រះគឺហួសសម័យ ។ វាត្រូវការសេចក្ដីជំនឿដើម្បីបង្រៀនដំណឹងល្អដល់កូនចៅក្នុងពិភពលោកមួយដែលមិនជឿលើព្រះ ។ វាត្រូវការសេចក្ដីជំនឿដើម្បីអង្វរសូមជីវិតរបស់មនុស្សជាទីស្រឡាញ់ម្នាក់ ហើយវាត្រូវការសេចក្ដីជំនឿកាន់តែខ្លាំងដើម្បីទទួលយកចម្លើយដែលមិនដូចចិត្តនោះ ។
កាលពីរឆ្នាំមុនស៊ីស្ទើរ ណិលសុន និងខ្ញុំបានធ្វើទស្សនកិច្ចទៅកាន់ប្រទេស សាម័រ តុងហ្គា ហ្វីជី និងតាហ៊ីទី ។ ប្រជាជាតិដែលនៅលើកោះនីមួយៗបានជួបនឹងគ្រោះភ្លៀងដ៏ធំរាប់សិបថ្ងៃ ។ សមាជិកបានតមអាហារ និងអធិស្ឋាន ដើម្បីកុំឲ្យភ្លៀងលើការប្រជុំនៅហាលវាលរបស់ពួកគេ ។
នៅប្រទេសសាម័រ ហ្វីជី និងតាហ៊ីទីគឺភ្លៀងបានរាំងភ្លាម ពេលដែលការប្រជុំចាប់ផ្ដើម ។ ប៉ុន្ដែនៅប្រទេសតុងហ្គា ភ្លៀងមិនបានរាំងទេ ។ ប៉ុន្ដែ ពួកបរិសុទ្ធដ៏ស្មោះត្រង់ចំនួន ១៣,០០០ នាក់បានមកចាប់កៅអីរាប់ម៉ោងមុន បានរង់ចាំដោយអំណត់នៅកណ្ដាលភ្លៀងដ៏ជោគជាំ រួចហើយអង្គុយក្នុងការប្រជុំពីរម៉ោងទាំងទទឹកជោគ ។
យើងបានឃើញសេចក្ដីជំនឿដ៏រឹងមាំក្នុងចំណោមអ្នកកោះទាំងនោះ—ជាសេចក្ដីជំនឿដែលគ្រប់គ្រាន់ដើម្បីបញ្ឈប់ភ្លៀង និងជាសេចក្ដីជំនឿដើម្បីតស៊ូព្យាយាម ទោះភ្លៀងមិនរាំងក្ដី ។
ភ្នំនៅក្នុងជីវិតរបស់យើងមិនរើតាមរបៀប ឬពេលវេលាដែលយើងចង់ឲ្យវារើចេញជានិច្ចទេ ។ ប៉ុន្ដែសេចក្ដីជំនឿរបស់យើងនឹងធ្វើឲ្យយើងឆ្ពោះទៅមុខ ជានិច្ច ។ សេចក្ដីជំនឿ តែងតែបង្កើនលទ្ធភាពយើងឲ្យទទួលបានអំណាចពីព្រះ ។
សូមចាំការណ៍នេះ ៖ បើអ្វីគ្រប់យ៉ាង ហើយមនុស្សគ្រប់គ្នាក្នុងពិភពលោកនេះដែលបងប្អូនទុកចិត្ត ធ្វើឲ្យបងប្អូនខកចិត្ត នោះព្រះយេស៊ូវគ្រីស្ទ និងសាសនាចក្ររបស់ទ្រង់នឹង មិនដែលធ្វើឲ្យបងប្អូនខកចិត្តឡើយ ។ ព្រះអម្ចាស់មិនដែលងោកងុយ ក៏មិនដែលផ្ទំលក់ឡើយ ។១៦ ទ្រង់ « គឺនៅតែដដែលទោះជាម្សិលមិញ ថ្ងៃនេះ និង [ ថ្ងៃស្អែក ] » ១៧ ទ្រង់នឹងមិនបោះបង់ចោលរាស្ត្រក្នុងសេចក្ដីសញ្ញារបស់ទ្រង់ឡើយ ១៨ ការសន្យារបស់ទ្រង់ ឬសេចក្ដីស្រឡាញ់របស់ទ្រង់ចំពោះរាស្ត្ររបស់ទ្រង់ ។ ទ្រង់ធ្វើឲ្យមានអព្ភូតហេតុនៅថ្ងៃនេះ ទ្រង់ក៏នឹងធ្វើឲ្យមានអព្ភូតហេតុនៅថ្ងៃស្អែកដែរ ។១៩
សេចក្តីជំនឿលើព្រះយេស៊ូវគ្រីស្ទគឺជាអំណាចដ៏ធំបំផុតដែលយើងមាននៅក្នុងជីវិតនេះ ។ ការណ៍ទាំងអស់នឹងសម្រេចបានដល់អ្នកណាដែលជឿ ។២០
សេចក្ដីជំនឿរបស់បងប្អូនទៅលើទ្រង់ ដែលចម្រើនឡើង នឹងរើភ្នំចេញ—មិនមែនជាភ្នំថ្មដែលធ្វើឲ្យផែនដីនេះស្រស់ស្អាតនោះទេ—តែជាភ្នំនៃទុក្ខសោកក្នុងជីវិតរបស់បងប្អូនវិញ ។ សេចក្ដីជំនឿ ដ៏លូតលាស់របស់បងប្អូននឹងជួយបងប្អូនឲ្យបង្វែរឧបសគ្គទៅជាការរីកចម្រើន និងឱកាសដ៏មិនអាចប្រៀបផ្ទឹមបានវិញ ។
នៅថ្ងៃអាទិត្យអ៊ីស្ទើរនេះ ដោយមានសេចក្ដីស្រឡាញ់ និងការដឹងគុណដ៏ជ្រាលជ្រៅ ខ្ញុំសូមប្រកាសជាសាក្សីថា ព្រះយេស៊ូវគ្រីស្ទគឺពិតមានព្រះជន្មរស់ឡើងវិញ » ។ ទ្រង់មានព្រះជន្មរស់ឡើងវិញដើម្បីដឹកនាំសាសនាចក្ររបស់ទ្រង់ ។ ទ្រង់មានព្រះជន្មរស់ឡើងវិញដើម្បីប្រទានពរដល់ជីវិតកូនចៅទាំងអស់របស់ព្រះ មិនថាពួកគេរស់នៅទីណានោះទេ ។ ដោយមានសេចក្ដីជំនឿទៅលើទ្រង់ យើងអាចរើភ្នំទាំងឡាយចេញពីក្នុងជីវិតរបស់យើងបាន ។ ខ្ញុំសូមថ្លែងទីបន្ទាល់ដូច្នោះក្នុងព្រះនាមនៃព្រះយេស៊ូវគ្រីស្ទ អាម៉ែន ៕