ព្រះនៅក្នុងចំណោមពួកយើង
ព្រះគង់នៅក្នុងចំណោមពួកយើង— ហើយជាប់ទាក់ទងដោយផ្ទាល់នៅក្នុងជីវិតរបស់យើង និងកំពុងដឹកនាំកូនចៅរបស់ទ្រង់យ៉ាងសកម្ម ។
គ្រប់សម័យកាលទាំងអស់ ព្រះបានមានបន្ទូលតាមរយៈពួកអ្នកបម្រើរបស់ទ្រង់ គឺពួកព្យាការី ។១ ព្រឹកនេះ យើងមានឯកសិទ្ធិដើម្បីស្ដាប់ព្យាការីរបស់ព្រះ ថ្លែងទៅមនុស្សទាំងអស់ក្នុងពិភពលោកនេះ ។ យើងស្រឡាញ់លោក ប្រធាន ណិលសុន ហើយខ្ញុំសូមលើកទឹកចិត្តមនុស្សគ្រប់រូបនៅគ្រប់ទីកន្លែងឲ្យសិក្សា និងគោរពតាមពាក្យសម្ដីរបស់លោក ។
មុនដល់ខួបអាយុ ១២ ឆ្នាំរបស់ខ្ញុំ គ្រួសារយើងត្រូវបង្ខំឲ្យចាកចេញពីផ្ទះពីរដង ហើយចាប់ផ្ដើមជីវិតឡើងវិញក្នុងភាពចលាចល ការភ័យខ្លាច និងភាពមិនប្រាកដប្រជា ដែលបណ្ដាលមកពីសង្គ្រាម និងការបែងចែកខាងនយោបាយ ។ ជាពេលដ៏អន្ទះសាមួយសម្រាប់ខ្ញុំ ប៉ុន្ដែវាគួរឲ្យតក់ស្លុតសម្រាប់ឪពុកម្ដាយជាទីស្រឡាញ់របស់ខ្ញុំ ។
ឪពុកម្តាយខ្ញុំមិនសូវឲ្យពួកយើងបួននាក់ដឹងពីបន្ទុកនេះប៉ុន្មានទេ ។ ពួកគាត់រែកបន្ទុក និងការឈឺចាប់នេះតែឯងតាមដែលពួកគាត់អាចធ្វើបាន ។ ភាពភ័យខ្លាចប្រាកដជាសង្កត់សង្កិន បំផ្លាញពេល និងបំបាក់សង្ឃឹមរបស់ពួកគាត់ ។
ពេលដ៏សោកសៅបន្ទាប់ពីសង្គ្រាមលោកលើកទីពីរនេះ វាជះឥទ្ធិពលយ៉ាងខ្លាំងលើពិភពលោក ។ វាមានឥទ្ធិពលលើខ្ញុំ ។
នៅគ្រានោះ ជាគ្រាដ៏ឯកោបំផុតរបស់ខ្ញុំ ជារឿយៗខ្ញុំឆ្ងល់ថា « តើនៅមានសល់ក្ដីសង្ឃឹមខ្លះទេនៅលើពិភពលោកនេះ ? »
ទេវតានៅក្នុងចំណោមពួកយើង
កាលខ្ញុំពិចារណាពីសំណួរនេះ ខ្ញុំបានគិតពីពួកអ្នកផ្សព្វផ្សាយសាសនាជនជាតិអាមេរិកវ័យក្មេង ដែលបានបម្រើក្នុងចំណោមពួកយើងនៅអំឡុងឆ្នាំទាំងនោះ ។ ពួកគេបានចាកចេញពីផ្ទះដ៏សុវត្ថិភាព បានធ្វើដំណើរទៅប្រទេសអាល្លឺម៉ង់ដែលនៅមួយចំហៀងផែនដីពីគ្នា—ជាប្រទេសសថ្មីរបស់ពួកគេ—ដើម្បីផ្ដល់ក្ដីសង្ឃឹមដ៏ទេវភាពដល់ប្រជាជនរបស់យើង ។ ពួកគេមិនមែនមកដើម្បីបន្ទោស ទេសនា ឬបន្ទោសនោះទេ ។ ពួកគេស្ម័គ្រចិត្តលះបង់ជីវិត ដោយមិនគិតពីផលប្រយោជន៍ខាងលោកិយ ព្រោះពួកគេគ្រាន់តែចង់ជួយមនុស្សដទៃឲ្យរកឃើញអំណរ និងសេចក្ដីសុខសាន្ដដែលពួកគេមាន ។
ចំពោះខ្ញុំ យុវជន និងយុវនារីទាំងនេះគឺឥតខ្ចោះ ។ ខ្ញុំដឹងថា ពួកគេនៅមានការខ្វះចន្លោះ ប៉ុន្ដែចំពោះខ្ញុំ ពួកគេឥតខ្ចោះ ។ ខ្ញុំតែងគិតថា ពួកគេជាបុគ្គលអស្ចារ្យជាងអ្វីៗក្នុងជីវិតនេះជានិច្ច—ជាទេវតានៃពន្លឺ និងសិរីល្អ អ្នកផ្ដល់ការងារបម្រើនៃសេចក្ដីមេត្តាករុណា សេចក្ដីល្អ និងសេចក្ដីពិត ។
ខណៈដែលពិភពលោកបានលិចលង់ក្នុងទុទិដ្ឋិនិយម ភាពល្វីងជូរចត់ ការស្អប់គ្នា និងភាពភ័យខ្លាច នោះគំរូ និងការបង្រៀនរបស់យុវវ័យទាំងនេះបានផ្ដល់សេចក្ដីសង្ឃឹមដល់ខ្ញុំ ។ សារលិខិតនៃដំណឹងល្អដែលពួកគេបានផ្ដល់នោះ មានន័យលើសពីនយោបាយ ប្រវត្តិសាស្ដ្រ ការចងកំហឹង ទុក្ខព្រួយ និងរបៀបវារៈផ្ទាល់ខ្លួនទៅទៀត ។ វាផ្ដល់ចម្លើយដ៏ទេវភាពចំពោះសំណួរសំខាន់ៗ ដែលយើងមានអំឡុងពេលដ៏លំបាកទាំងនេះ ។
សារលិខិតនោះគឺថា ព្រះមានព្រះជន្មរស់ ហើយទ្រង់ខ្វល់ព្រះទ័យពីពួកយើង ទោះជាក្នុងគ្រាជ្រួលច្របល់ ភាន់ច្រឡំ និងចលាចលទាំងនេះក្ដី ។ ថាទ្រង់ពិតជាបានបង្ហាញព្រះកាយនៅជំនាន់យើងមែន ដើម្បីស្ដារសេចក្ដីពិត និងពន្លឺឡើងវិញ—គឺដំណឹងល្អ និងសាសនាចក្ររបស់ទ្រង់ ។ ថាទ្រង់មានបន្ទូលទៅកាន់ពួកព្យាការីម្ដងទៀត ថាព្រះគង់នៅក្នុងចំណោមពួកយើង—ហើយខ្វល់ខ្វាយនឹងជីវិតយើងម្នាក់ៗ ព្រមទាំងដឹកនាំបុត្រាបុត្រីរបស់ទ្រង់យ៉ាងសកម្មផងដែរ ។
វាអស្ចារ្យណាស់ចំពោះអ្វីដែលយើងអាចរៀន នៅពេលយើងមើលផែនការនៃសេចក្ដីសង្គ្រោះ និងការលើកតម្កើងរបស់ព្រះវរបិតាសួគ៌យើងឲ្យជាក់ជាងនេះបន្ដិច ថាជាផែនការនៃសុភមង្គលសម្រាប់កូនចៅរបស់ទ្រង់ ។ ពេលយើងមានអារម្មណ៍ថា ខ្លួនឯងមិនសូវសំខាន់ ត្រូវគេបោះបង់ និងបំភ្លេចចោល នោះយើងដឹងថា យើងអាចទទួលបានការអះអាងថា ព្រះមិនភ្លេចយើងទេ—ការពិតទៅ គឺទ្រង់ផ្ដល់អ្វីមួយដែលមិនអាចស្រមៃបានដល់បុត្រាបុត្រីទាំងអស់របស់ទ្រង់ ៖ ដើម្បីក្លាយជា « អ្នកគ្រងមរតកនៃព្រះជាមួយនឹងព្រះគ្រីស្ទ » ។២
តើការណ៍នេះមានន័យដូចម្ដេចទៅ ?
គឺយើងនឹងរស់នៅជារៀងរហូត ទទួលភាពពោរពេញនៃសេចក្ដីអំណរ៣ហើយមានសក្ដានុពលដើម្បី « គ្រងបល្ល័ង្កទាំងឡាយ នគរទាំងឡាយ ក្សត្របុរីទាំងឡាយ និងអំណាចទាំងឡាយ » ។៤
វាជារឿងដ៏រាបសាខ្លាំងមួយ ពេលដឹងថា អនាគតដ៏អស្ចារ្យ និងទេវភាពនេះអាចកើតឡើងបាន—មិនមែនដោយសារយើងទេ តែដោយសារព្រះវិញ ។
ពេលដឹងរឿងនេះ តើយើងអាចរអ៊ូរទាំ ឬបន្ដឈឺចាប់ទៀតម្ដេចនឹងកើតទៅ ? តើយើងអាចបន្ថោកខ្លួនឯងម្តេចកើត ពេលស្តេចលើអស់ទាំងស្តេចអញ្ជើញយើងឲ្យបំពេញសក្ដានុពល ដើម្បីទៅកាន់អនាគតដ៏រុងរឿងមួយនៃសុភមង្គលដ៏ទេវភាពនោះ ?៥
សេចក្ដីសង្គ្រោះនៅក្នុងចំណោមពួកយើង
ដោយសារតែក្ដីស្រឡាញ់ដ៏ឥតខ្ចោះរបស់ព្រះសម្រាប់ពួកយើង និងពលិកម្មដ៏អស់កល្បរបស់ព្រះយេស៊ូវគ្រីស្ទ នោះអំពើបាបរបស់យើង—ទាំងធំ ទាំងតូច—អាចបានលុបចេញ ហើយមិនចាំទៀតទេ ។៦ យើងអាចឈរនៅចំពោះព្រះភក្ដ្រទ្រង់ដោយភាពបរិសុទ្ធ ភាពស័ក្ដិសម និងការបន្សុទ្ធ ។
ដួងចិត្តខ្ញុំពោរពេញដោយការដឹងគុណចំពោះព្រះវរបិតាសួគ៌របស់ខ្ញុំ ។ ខ្ញុំដឹងថា ទ្រង់មិនផ្ដន្ទាទោសកូនចៅទ្រង់ឲ្យជំពប់ដួលក្នុងជីវិតរមែងស្លាប់នេះ ដោយគ្មានក្ដីសង្ឃឹមថានឹងមានអនាគតដ៏ត្រចះត្រចង់ និងអស់កល្បនោះឡើយ ។ ទ្រង់បានប្រទានការណែនាំ ដែលបង្ហាញពីផ្លូវត្រឡប់ទៅកាន់ទ្រង់វិញ ។ ហើយចំណុចសំខាន់នៃអ្វីៗទាំងអស់គឺ ព្រះរាជបុត្រាបង្កើតរបស់ទ្រង់ គឺព្រះយេស៊ូវគ្រីស្ទ ៧និងពលិកម្មរបស់ទ្រង់សម្រាប់យើង ។
ដង្វាយធួនដ៏និរន្ដរ៍របស់ព្រះអង្គសង្គ្រោះផ្លាស់ប្ដូរទាំងស្រុង នូវរបៀបដែលយើងអាចមើលទៅការរំលង និងភាពមិនឥតខ្ចោះរបស់យើង ។ ជំនួសឲ្យការបន្ដនៅក្នុងសភាពនេះ និងគ្មានអារម្មណ៍ថាបានប្រោសលោះ ឬអស់សង្ឃឹម នោះយើងអាចរៀនពីវា ហើយមានក្ដីសង្ឃឹមបាន ។៨ អំណោយទាននៃការប្រែចិត្តដែលសម្អាតអំពើបាបនេះ អនុញ្ញាតឲ្យយើងទម្លាក់អំពើបាបរបស់យើងចោល ហើយកើតជាថ្មី ។៩
ដោយសារតែព្រះយេស៊ូវគ្រីស្ទ នោះកំហុសរបស់យើងមិនកំណត់ពីយើងឡើយ ។ កំហុសនោះអាចបន្សុទ្ធយើងវិញ ។
ដូចដែលតន្ដ្រីករសមភ្លេង នោះយើងអាចមើលទៅការភ្លាត់ស្នៀត គុណវិបត្តិ និងអំពើបាបរបស់យើង ថាជាឱកាសដើម្បីមានការគ្រប់គ្រងលើខ្លួនឯងកាន់តែខ្លាំង បង្កើនក្ដីស្រឡាញ់ដ៏ស្មោះត្រង់កាន់តែជ្រាលជ្រៅ និងកាន់តែច្រើនសម្រាប់មនុស្សដទៃ ហើយបន្សុទ្ធខ្លួនឯងតាមរយៈការប្រែចិត្ត ។
បើយើងប្រែចិត្ត នោះកំហុសមិនអាចធ្វើឲ្យយើងមិនស័ក្ដិសមបានទេ ។ កំហុសជាផ្នែកមួយនៃការរីកចម្រើនរបស់យើង ។
យើងទាំងអស់គ្នាគឺជាទារក បើប្រៀបធៀបទៅនឹងអង្គដែលមានសិរីល្អ និងមហស្ចារ្យដែលយើងត្រូវបានរចនាឲ្យប្រែក្លាយនោះ ។ គ្មានបុគ្គលរមែងស្លាប់ណារីកចម្រើនពីការវារទៅការដើរទៅការរត់ ដោយមិនជំពប់ដួល ទង្គិច និងមានរបួសជាញឹកញយនោះទេ ។ នោះគឺជារបៀបដែលយើងរៀន ។
បើយើងបន្ដអនុវត្តដោយអស់ពីចិត្ត ខិតខំកាន់តាមបទបញ្ញត្តិរបស់ព្រះជានិច្ច និងប្ដេជ្ញាចិត្តយើងថាខំប្រែចិត្ត ស៊ូទ្រាំ និងអនុវត្តអ្វីដែលយើងបានរៀន មួយបន្ទាត់ម្ដងៗ នោះយើងនឹងប្រមូលពន្លឺដាក់ក្នុងព្រលឹងយើងកាន់តែច្រើន ។១០ ហើយទោះជាយើងអាចមិនយល់ច្បាស់ពីសក្ដានុពលដ៏ពេញលេញរបស់យើងនាពេលនេះក្ដី ក៏ « យើងដឹងថា កាលណា [ ព្រះអង្គសង្គ្រោះ ] លេចមក » នោះយើងនឹងឃើញព្រះភក្ដ្ររបស់ទ្រង់នៅលើយើង ហើយ « នោះយើងនឹងឃើញទ្រង់យ៉ាងនោះឯង » ។១១
ឱ នេះជាការសន្យាដ៏រុងរឿងមួយ !
មែនហើយ ពិភពលោកនេះស្ថិតក្នុងភាពជ្រួលច្របល់ ។ ហើយពិតណាស់ យើងមានភាពទន់ខ្សោយ ។ ប៉ុន្ដែយើងមិនចាំបាច់ជ្រប់មុខដោយក្ដីអស់សង្ឃឹមឡើយ ពីព្រោះយើងអាចទុកចិត្តព្រះបាន យើងអាចទុកចិត្តលើព្រះរាជបុត្រារបស់ទ្រង់ គឺព្រះយេស៊ូវគ្រីស្ទ ហើយយើងអាចទទួលយកអំណោយទាននៃព្រះវិញ្ញាណ ដើម្បីដឹកនាំយើងនៅលើផ្លូវនេះទៅកាន់ជីវិតមួយ ដែលពោរពេញដោយអំណរ និងសុភមង្គលដ៏ទេវភាព ។១២
ព្រះយេស៊ូវនៅក្នុងចំណោមពួកយើង
ជារឿយៗ ខ្ញុំងឿងឆ្ងល់ថា តើព្រះយេស៊ូវនឹងបង្រៀន ហើយធ្វើអ្វីខ្លះ បើទ្រង់គង់នៅក្នុងចំណោមពួកយើងថ្ងៃនេះ ?
បន្ទាប់ពីការមានព្រះជន្មរស់ឡើងវិញ ព្រះយេស៊ូវគ្រីស្ទបានបំពេញសេចក្ដីសន្យារបស់ទ្រង់ដើម្បីទៅជួបនឹង « ចៀមឯទៀត » របស់ទ្រង់ ។១៣
ព្រះគម្ពីរមរមន ៖ សក្ខីបទមួយទៀតអំពីព្រះយេស៊ូវគ្រីស្ទ ថ្លែងអំពីការបង្ហាញព្រះកាយទ្រង់ទៅកាន់ប្រជាជននៅទ្វីបអាមេរិក ។ យើងមានកំណត់ត្រាដ៏មានតម្លៃនេះ ជាសាក្សីជាក់ស្ដែងនៃកិច្ចការរបស់ព្រះអង្គសង្គ្រោះ ។
ប្រជាជននៅក្នុងព្រះគម្ពីរមរមនបានរស់នៅម្ខាងទៀតនៃពិភពលោកនេះ—ប្រវត្តិសាស្ដ្រ វប្បធម៌ និងបរិយាកាសខាងនយោបាយរបស់ពួកគេគឺខុសគ្នាខ្លាំងណាស់ពីប្រជាជន ដែលព្រះយេស៊ូវបានបង្រៀនអំឡុងការងារបម្រើក្នុងជីវិតរមែងស្លាប់របស់ទ្រង់ ។ ប៉ុន្ដែ ទ្រង់នៅតែបង្រៀនពួកគេពីការណ៍ដូចគ្នាជាច្រើនដែលទ្រង់បានបង្រៀននៅដែនដីដ៏បរិសុទ្ធ ។
ហេតុអ្វីទ្រង់ធ្វើដូច្នោះ ?
ព្រះអង្គសង្គ្រោះតែងតែបង្រៀនពីសេចក្ដីពិតដ៏អស់កល្ប ។ សេចក្ដីពិតទាំងនោះអនុវត្តចំពោះមនុស្សគ្រប់វ័យ និងគ្រប់កាលៈទេសៈ ។
សារលិខិតរបស់ទ្រង់ធ្លាប់ជា និងនៅតែជាសារលិខិតនៃសេចក្ដីសង្ឃឹម និងមានចំណែក—ជាទីបន្ទាល់មួយដែលថា ព្រះជាព្រះវរបិតាសួគ៌យើងមិនបោះបង់បុត្រាបុត្រីរបស់ទ្រង់ឡើយ ។
ថាព្រះគង់នៅក្នុងចំណោមពួកយើង !
ពីររយឆ្នាំកន្លងទៅ ព្រះអង្គសង្គ្រោះបានត្រឡប់មកកាន់ផែនដីនេះម្ដងទៀត ។ រួមជាមួយនឹងព្រះជាព្រះវរបិតា ទ្រង់បានបង្ហាញព្រះកាយដល់យ៉ូសែប ស្ម៊ីធដែលមានអាយុ ១៤ ឆ្នាំ ហើយបាននាំផ្លូវទៅកាន់ការស្ដារឡើងវិញនៃដំណឹងល្អ និងសាសនាចក្ររបស់ព្រះយេស៊ូវគ្រីស្ទ ។ តាំងពីថ្ងៃនោះមក ស្ថានសួគ៌បានបើក ហើយសារទូតនៃស្ថានសួគ៌បានយាងចុះពីស្ថាននៃសិរីល្អដ៏អមតៈ ។ ពន្លឺ និងចំណេះដឹងបានចាក់ស្រោចពីបល្ល័ង្កសេឡេស្ទាល ។
ព្រះអម្ចាស់ព្រះយេស៊ូវគ្រីស្ទបានមានបន្ទូលជាថ្មីម្ដងទៀតមកកាន់ពិភពលោកនេះ ។
តើទ្រង់បានមានបន្ទូលអ្វីខ្លះ ?
ជាពរជ័យរបស់យើង ព្រះបន្ទូលរបស់ទ្រង់ជាច្រើនត្រូវបានកត់ត្រានៅក្នុងគម្ពីរគោលលទ្ធិ និង សេចក្ដីសញ្ញា—ដែលមានដល់មនុស្សគ្រប់គ្នាក្នុងពិភពលោកនេះ ដែលចង់អាន និងសិក្សាវា ។ ឱ បន្ទូលទាំងនេះមានតម្លៃខ្លាំងណាស់ចំពោះពួកយើងនាសព្វថ្ងៃនេះ !
ហើយយើងមិនគួរភ្ញាក់ផ្អើលទេ ពេលឃើញថា ព្រះអង្គសង្គ្រោះបង្រៀនសារលិខិតដ៏សំខាន់នៃដំណឹងល្អរបស់ទ្រង់ម្ដងទៀតនោះ ៖ « អ្នកត្រូវស្រឡាញ់ដល់ព្រះអម្ចាស់ជាព្រះនៃអ្នកឲ្យអស់ពីចិត្តនៃអ្នក អស់ពីពលំ អស់ពីគំនិត ហើយអស់ពីកម្លាំងនៃអ្នក ហើយដោយនូវព្រះនាមនៃព្រះយេស៊ូវគ្រីស្ទ នោះអ្នកត្រូវបម្រើទ្រង់ » ។១៤ ទ្រង់បំផុសគំនិតយើងឲ្យស្វែងរកព្រះ១៥ហើយរស់នៅតាមការបង្រៀនទាំងឡាយ ដែលទ្រង់បានបើកសម្ដែងដល់ពួកអ្នកបម្រើរបស់ទ្រង់ គឺពួកព្យាការី ។១៦
ទ្រង់បង្រៀនយើងឲ្យស្រឡាញ់គ្នាទៅវិញទៅមក១៧ហើយ « ពេញទៅដោយសេចក្ដីសប្បុរសដល់មនុស្សទាំងអស់ » ។១៨
ទ្រង់អញ្ជើញយើងឲ្យធ្វើជាព្រះហស្ដរបស់ទ្រង់ ឲ្យដើរចុះឡើងធ្វើការល្អ ។១៩ « យើងមិនត្រូវស្រឡាញ់ដោយពាក្យសម្ដី…គឺដោយការប្រព្រឹត្ត និងសេចក្តីពិតវិញ » ។២០
ទ្រង់សំណូមពរឲ្យយើងផ្ទៀងស្ដាប់សេចក្ដីបង្គាប់ដ៏ធំរបស់ទ្រង់ ៖ ឲ្យស្រឡាញ់ ចែកចាយ អញ្ជើញមនុស្សទាំងអស់មករកដំណឹងល្អរបស់ទ្រង់ និងសាសនាចក្ររបស់ទ្រង់ ។២១
ទ្រង់បង្គាប់យើងឲ្យសង់ព្រះវិហារបរិសុទ្ធ ហើយចូលទៅបម្រើនៅទីនោះ ។២២
ទ្រង់បង្រៀនយើងឲ្យប្រែក្លាយជាពួកសិស្សរបស់ទ្រង់— ដែលដួងចិត្តរបស់យើងមិនគួរព្យាយាមរកអំណាច ទ្រព្យសម្បត្តិ ឬតំណែងផ្ទាល់ខ្លួនឡើយ ។ ទ្រង់បង្រៀនយើងឲ្យ « ទុកចោលរបស់ទាំងឡាយនៃពិភពលោកនេះ ហើយចូរស្វែងរករបស់ទាំងឡាយណាដែលគ្រាន់បើជាងនេះវិញ » ។២៣
ទ្រង់ជម្រុញឲ្យយើងស្វែងរកអំណរ ការចេះដឹង សេចក្ដីសុខសាន្ដ សុភមង្គល២៤និងសេចក្ដីសន្យានៃជីវិតអមតៈ និងដ៏អស់កល្ប ។២៥
ចូរយើងបោះមួយជំហានទៀតដើម្បីធ្វើការណ៍នេះ ។ សូមស្រមៃថា ព្រះយេស៊ូវបានមកវួដ ឬសាខាបងប្អូន ឬទៅផ្ទះរបស់បងប្អូននៅថ្ងៃនេះ ។ តើវាមានសភាពយ៉ាងណាដែរ ?
ទ្រង់នឹងទតធ្លុះដល់ចិត្តបងប្អូន ។ អាការៈខាងក្រៅនឹងលែងសំខាន់ទៀតហើយ ។ ទ្រង់ស្គាល់បងប្អូនថាបងប្អូនជានរណា ។ ទ្រង់ជ្រាបពីបំណងប្រាថ្នាក្នុងចិត្តរបស់បងប្អូន ។
ទ្រង់នឹងលើកពួកអ្នកឱនលំទោន និងរាបសា ។
ទ្រង់នឹងព្យាបាលអ្នកឈឺ ។
ទ្រង់នឹងបញ្ចូលសេចក្ដីជំនឿ និងសេចក្ដីក្លាហានដល់អ្នកសង្ស័យឲ្យជឿ ។
ទ្រង់នឹងបង្រៀនយើងឲ្យបើកដួងចិត្តយើងទៅកាន់ព្រះ ហើយឈោងទៅជួយមនុស្សដទៃ ។
ទ្រង់នឹងទទួលស្គាល់ ហើយផ្ដល់កិត្តិយសដល់ភាពស្មោះត្រង់ ការបន្ទាបខ្លួន សេចក្ដីទៀងត្រង់ ការមានជំនឿពេញលេញ សេចក្ដីមេត្តាករុណា និងសេចក្ដីសប្បុរស ។
ដោយគ្រាន់តែមើលទៅព្រះនេត្ររបស់ទ្រង់ នោះយើងនឹងលែងដូចមុនទៀតហើយ ។ យើងនឹងផ្លាស់ប្ដូរជារៀងរហូត ។ បានប្រែរូបដោយការចេះដឹងដ៏ជ្រាលជ្រៅថា ព្រះគង់នៅក្នុងចំណោមពួកយើងពិតមែន ។
តើយើងត្រូវធ្វើដូចម្តេចខ្លះ ?២៦
ខ្ញុំបែរទៅគិតដោយចិត្តមេត្តាដល់ខ្លួនឯង កាលជាយុវវ័យ ជាគ្រាដែលខ្ញុំបានធំលូតលាស់ ។ បើខ្ញុំអាចបកក្រោយទៅអតីតកាលបាន នោះខ្ញុំលួងលោមខ្លួនឯង ហើយប្រាប់ខ្លួនឯងឲ្យបន្ដនៅលើផ្លូវត្រូវ និងបន្ដស្វែងរក ។ ហើយខ្ញុំនឹងសុំឲ្យខ្លួនឯងយាងព្រះយេស៊ូវគ្រីស្ទចូលមកក្នុងជីវិតនេះ ដោយសារព្រះគង់នៅក្នុងចំណោមពួកយើង !
បងប្អូនប្រុសស្រីជាទីស្រឡាញ់របស់ខ្ញុំអើយ ចំពោះបងប្អូន និងចំពោះមនុស្សទាំងអស់ដែលកំពុងស្វែងរកចម្លើយ សេចក្ដីពិត និងសុភមង្គល នោះខ្ញុំសូមផ្ដល់ការប្រឹក្សាដូចគ្នានេះ ៖ សូមបន្ដស្វែងរកដោយសេចក្ដីជំនឿ និងការអត់ធ្មត់ ។២៧
ចូរសូម នោះតែងនឹងឲ្យមកអ្នក ។ ចូរគោះ នោះតែងនឹងបើកឲ្យអ្នក ។២៨ ចូរទីពឹងដល់ព្រះយេហូវ៉ា ។២៩
នៅក្នុងជីវិតប្រចាំថ្ងៃរបស់យើង វាជាកិច្ចការដ៏សំខាន់របស់យើង និងឱកាសដ៏មានពរដើម្បីជួបនឹងព្រះ ។
កាលយើងដាក់ការឆ្មើងឆ្មៃទុកមួយអន្លើរ ហើយចូលទៅបល្ល័ង្ករបស់ទ្រង់ដោយចិត្តសោកសង្រេង និងវិញ្ញាណទន់ទាប៣០នោះទ្រង់នឹងខិតមកជិតយើង ។៣១
កាលយើងព្យាយាមធ្វើតាមព្រះយេស៊ូវគ្រីស្ទ និងដើរលើផ្លូវនៃភាពជាសិស្ស មួយបន្ទាត់ម្ដងៗ នោះថ្ងៃនោះនឹងមកដល់ ពេលដែលយើងនឹងដកពិសោធន៍នូវអំណោយទានដែលមិនអាចស្រមៃបាននោះ គឺការទទួលបានភាពពេញលេញនៃអំណរ ។
មិត្តជាទីស្រឡាញ់របស់ខ្ញុំអើយ ព្រះវរបិតាសួគ៌របស់បងប្អូនស្រឡាញ់បងប្អូនដោយក្ដីស្រឡាញ់ដ៏ឥតខ្ចោះ ។ ទ្រង់បានបញ្ជាក់សេចក្ដីស្រឡាញ់របស់ទ្រង់តាមរបៀបជាច្រើន ប៉ុន្ដែលើគ្រប់អ្វីៗទាំងអស់គឺ ការប្រទានព្រះរាជបុត្រាបង្កើតតែមួយគត់របស់ទ្រង់ទុកជាពលិកម្ម និងអំណោយទានដល់កូនចៅទ្រង់ ដើម្បីធ្វើឲ្យការត្រឡប់ទៅកាន់ព្រះវរមាតាបិតាសួគ៌របស់យើងវិញគឺជារឿងពិត ។
ខ្ញុំសូមថ្លែងសាក្សីថា ព្រះវរបិតាសួគ៌របស់យើងមានព្រះជន្មរស់ ថាព្រះយេស៊ូវគ្រីស្ទដឹកនាំសាសនាចក្ររបស់ទ្រង់ ហើយថាប្រធាន រ័សុល អិម ណិលសុន គឺជាព្យាការីរបស់ទ្រង់ ។
ខ្ញុំសូមផ្ដល់សេចក្ដីស្រឡាញ់ និងពរជ័យរបស់ខ្ញុំដល់បងប្អូននៅរដូវបុណ្យអ៊ីស្ទើរដ៏រីករាយនេះ ។ សូមបើកចិត្តបងប្អូនចំពោះព្រះអង្គសង្គ្រោះ និងព្រះប្រោសលោះរបស់យើង មិនថាបងប្អូនស្ថិតក្នុងកាលៈទេសៈណាទេ មិនថាការសាកល្បង ការរងទុក្ខ ឬកំហុសអ្វីឡើយ បងប្អូនអាចដឹងថា ទ្រង់មានព្រះជន្មរស់ ថាទ្រង់ស្រឡាញ់បងប្អូន ហើយដោយសារតែទ្រង់ នោះបងប្អូននឹងមិនឯកោសោះឡើយ ។
ព្រះគង់នៅក្នុងចំណោមពួកយើង ។
ខ្ញុំថ្លែងទីបន្ទាល់ និងជាសាក្សីអំពីការណ៍នេះ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។