1 Che, Zeniff, añemboʼévo opa Nefita-kuéra ñeʼẽme, ha aikuaávo Nefi retãgui, térã pe ñande rukuéra peteĩha yvy jehejapyrégui, ha añemondóvo amaʼẽñemi hag̃ua lamanita-kuéra apytépe ahecha hag̃ua imbaretépa hikuái, ore ehérsito hoʼa hag̃ua hiʼarikuéra ha ohundi hag̃ua chupekuéra—ha katu ahechávo pe iporãva oĩva ijapytepekuéra ndaipotái oñehundi hikuái.

2 Upévare, añorairõ che joykeʼykuéra ndive pe taveʼỹme; che aipotágui ore mburuvicha ojapo peteĩ ñeʼẽmeʼẽ hendivekuéra; ha katu haʼégui haʼe peteĩ kuimbaʼe ipyʼahatã ha oporojukaséva heʼi ojeipeʼa hag̃ua chehegui che rekove; ha katu che añemoʼã heta tuguy ñeñohẽ rupive; túva oñorairõgui túva ndive, ha joykeʼy joykeʼy ndive, hetavéva pe ore ehérsito oñehundipa peve pe taveʼỹme; ha ore, noromanóiva, rohojey Zarahemla retãme, romombeʼu hag̃ua koʼã mbaʼe hembireko ha itaʼyrakuérape.

3 Upevére, che ahupytysetereígui ore rukuéra retã, ambyaty opa ohosévape ohupyty hag̃ua upe tetã, ha roñepyrũjey roho pe taveʼỹre rojupi hag̃ua upe tetãme; ha katu rojeipyʼajopy ñembyahýi ha tuicha jeikoʼasy reheve; orembeguégui oremanduʼa hag̃ua Ñandejára ore Tupãre.

4 Upevére, roikorei rire heta ára pe taveʼỹre romoĩ ore rogaao pe tenda ore joykeʼykuéra omano haguépe, oĩva ore rukuéra retã ypýpe.

5 Ha ojehu che ahajey irundy che kuimbaʼekuéra ndive pe tavaguasúpe, upe rréi oĩháme, aikuaa hag̃ua pe rréi rembipota, ha aikuaa hag̃ua ikatútapa aha che tavayguakuéra ndive ha rohupyty upe tetã pyʼaguapýpe.

6 Ha aha pe rréi rendápe, ha haʼe ojapo chendive konvénio che ikatuha ahupyty Lehi-Nefi retã, ha Shilom retã.

7 Ha haʼe avei heʼi itavayguakuérape osẽ hag̃ua upe tetãgui, ha che ha che tavayguakuéra roike upe tetãme rohupyty hag̃ua.

8 Ha roñepyrũ romopuʼã ogaguasukuéra, ha romoĩporã jey upe tavaguasu tapiakuéra, heẽ, jepe Lehi-Nefi ha Shilom tavaguasu tapiakuéra.

9 Ha roñepyrũ roñemitỹ pe yvy, heẽ, opáichagua mbaʼeraʼỹi reheve, avati raʼỹi, ha trígo, ha seváda, ha neas, ha sheum reheve, ha opáichagua yva raʼỹi reheve; ha roñepyrũ roñemboheta ha roñakãrapuʼã upe tetãme.

10 Ha koʼág̃a, haʼékuri upe rréi Lamán katupyry ha japúgui, ogueru hag̃ua che tavayguakuérape ñeñapytĩmbýpe, haʼe ohejahague ore rohupyty upe yvy.

11 Upévare ojehu, roiko rire pe tetãme doce ary aja pe rréi Lamán oñepyrũ ojepyʼapy, okyhyjégui che tavayguakuéra oñemombaretevéramo g̃uarã upe tetãme, ha upéicha haʼekuéra ndaikatumoʼãi ipuʼaka hesekuéra ha ogueraha chupekuéra ñeñapytĩmbýpe.

12 Ha haʼe hikuái peteĩ tavayguakuéra iñateʼỹ ha itaʼãngarayhúva; upévare oregueruse hikuái ñeñapytĩmbýpe, ikatu hag̃uáicha henyhẽ hikuái ore po rembiapo reheve; heẽ, okaru hag̃ua hikuái ore mymbaʼaty oĩvagui ñúme.

13 Upévare ojehu rréi Lamán oñepyrũ omokyreʼỹ itavayguakuérape oñorairõ hag̃ua che tavayguakuéra ndive; upévare oñepyrũ oĩ ñorairõguasu ha joavy upe tetãme.

14 Ha decimotercer arýpe che arreinahague Nefi retãme, mombyry Shilom retãme sur gotyo, che tavayguakuéra omboyʼu ha omongaru jave imymbaʼatýpe ha oñemitỹ jave, ou hiʼarikuéra hetaiterei lamanita-kuéra, ha oñepyrũ ojuka chupekuéra, ha ogueraha imymbaʼatykuéra, ha avati ikokuepegua.

15 Heẽ, ha ojehu opavave umi ndojehupytyivaʼekue, oñani Nefi tavaguasu peve, ha ojerure chéve ñemoʼã.

16 Ha ojehu ambosakoʼi chupekuéra yvyrapã ha huʼy reheve, kysepuku ha simitárra reheve, mása ha ónda reheve, ha opa árma ikatúva rojuhu reheve, ha che ha che tavayguakuéra rosẽ roñorairõ hag̃ua lamanita-kuéra ndive.

17 Heẽ, Ñandejára puʼaka reheve rosẽ roñorairõ hag̃ua lamanita-kuéra ndive; che ha che tavayguakuéra rojerureʼasýgui Ñandejárape oremosãso hag̃ua ore rayhuʼỹha pógui, opáygui orepype manduʼa ore rukuéra ñemosãsóre.

18 Ha Tupã ohendu ore jerureʼasy ha ombohovái ore ñemboʼe; ha rosẽ ipuʼaka reheve; heẽ, rosẽ lamanita-kuéra rehe, ha peteĩ ára ha peteĩ pyhare rojuka tres mil cuarenta y tres-pe; rojuka chupekuéra romosẽ meve ore retãgui.

19 Ha che, chete, che po rupi, aipytyvõ oñeñotỹ hag̃ua heʼõnguekuéra. Ha péina ápe, ore mbyasy ha jaheʼo guasurã, doscientos setenta y nueve ore joykeʼykuéra ojejuka.