1 Ha koʼág̃a, ojehu Alma, okañyvaʼekue rréi Noé rembiguaikuéragui, oñearrepenti iñangaipa ha hembiapovaikuéragui, ha oho ñemiháme tavayguakuéra apytépe, ha oñepyrũ omboʼe Abinadí ñeʼẽnguéra—

2 Heẽ, pe ouvaʼerã rehe, ha avei umi omanovaʼekue jeikovejey rehe ha pe tavayguakuéra rredensiõ rehe, ojejapótava Cristo puʼaka, jehasaʼasy, ha ñemano rupive, ha ijeikovejey ha yvágape ijejupi rupive.

3 Ha opa ohendusévape iñeʼẽ haʼe omboʼe. Ha haʼe omboʼe chupekuéra kañyháme, ani hag̃ua pe rréi oikuaa. Ha heta oguerovia iñeʼẽnguéra.

4 Ha ojehu opavave ogueroviáva chupe oho peteĩ tenda hérava Mormón-pe, térã oñemeʼẽvaʼekue chupe pe rréi rehe, ha oĩva upe tetã rembeʼýpe, ha sapyʼa pyʼa térã hiʼaraitépe, henyhẽva mymba saitégui.

5 Koʼág̃a, oĩ Mormón-pe peteĩ ykua yvu satĩ, ha Alma oho jepi upépe, oĩgui pe y ypýpe peteĩ tenda henyhẽva yvyramataʼígui, okañyháme arakue aja pe rréi jehekágui.

6 Ha ojehu opavave ogueroviáva chupe oho upépe ohendu hag̃ua iñeʼẽnguéra.

7 Ha ojehu heta ára rire oĩ heta ijatýva pe tenda hérava Mormón-pe, ohendu hag̃ua Alma ñeʼẽnguéra. Heẽ, opavave ogueroviáva iñeʼẽnguéra oñembyaty ohendu hag̃ua chupe. Ha omboʼe chupekuéra, ha omboʼe chupekuéra pe arrepentimiénto, ha pe rredensiõ, ha Ñandejárare jeguerovia.

8 Ha ojehu haʼe heʼi chupekuéra: Péina ápe, Mormón ykuéra (upéicha oñehenóigui) ha koʼág̃a, peikeséramo Tupã rredílpe ha peñehenói itavayguakuéra, ha peguerahase ojupe pene mbaʼe pohyikuéra ivevúi hag̃ua;

9 Heẽ, ha penerasẽséramo umi hasẽva ndive; heẽ, ha pemoangapyhyse umi oikotevẽvape angapyhy, ha haʼeséramo Tupã testígo opa ára, ha opa mbaʼépe, ha opa tenda peimehápe, jepe ñemano meve, peñerredimi hag̃ua Tupãre, ha pejeipapa hag̃ua umi jeikovejey peteĩha rehegua ndive, peguereko hag̃ua tekove opaveʼỹva—

10 Koʼág̃a haʼe peẽme, péva haʼéramo pene korasõ oipotáva, mbaʼére piko napeñemongaraimoʼãi Ñandejára rérape, testimónioramo henondépe pejapohague peteĩ konvénio hendive, peipytyvõtaha chupe ha peneñeʼẽrendutaha hembiapoukapykuérare, haʼe oñohẽve hag̃ua ijespíritu pende ári?

11 Ha koʼág̃a umi tavayguakuéra ohendúvo koʼã ñeʼẽ, ojepopete hikuái vyʼágui, ha heʼi: Péva haʼe ore korasõ oipotáva.

12 Ha koʼág̃a ojehu Alma ojagarra Helam-pe, haʼéva peteĩháva, ha oho ha oike ýpe, ha ojerureʼasy, heʼívo: O Ñandejára, eñohẽ nde Espíritu ne rembiguái ári, haʼe ojapo hag̃ua ko tembiapo korasõ marangatu reheve.

13 Ha heʼi rire koʼã ñeʼẽ, Ñandejára Espíritu ou hiʼári, ha haʼe heʼi: Helam, che romongarai, aguerekóvo Tupã Ipuʼakapáva autorida, testimónioramo rejapohague konvénio reipytyvõtaha chupe remano meve pe tete omanokuaávape; ha Ñandejára Espíritu toñeñohẽ nde ári; ha haʼe tomeʼẽ ndéve tekove opaveʼỹva, Cristo rredensiõ rupive, haʼe ombosakoʼivaʼekuépe yvy ojejapo ypy guive.

14 Ha Alma heʼi rire koʼã ñeʼẽ, mokõivéva Alma ha Helam oñapymi ýpe; ha opuʼã hikuái ha osẽ pe ýgui vyʼápe, henyhẽgui hikuái pe Espíritugui.

15 Ha avei, Alma ojagarra ambuévape, ha oike ýpe mokõiha jey, ha omongarai chupe ojapo haguéicha pe peteĩha ndive, ha katu haʼe noñapymivéima ýpe.

16 Ha péicha omongarai opavave ohóvape tenda Mormón-pe; ha haʼe hikuái doscientos cuatro ánga; heẽ, ha oñemongarai hikuái Mormón ykuérape, ha henyhẽ hikuái Tupã grásiagui.

17 Ha oñehenói chupekuéra Tupã tupao, térã Cristo Tupao, upe ára guive tenonde peve. Ha ojehu mayma oñemongaraíva Tupã puʼaka ha autorida rupive, oñemoĩ itupaópe.

18 Ha ojehu Alma, oguerekóvo Tupã puʼaka, oʼordena sacerdote-kuéra, jepe peteĩ sacerdote cincuenta haʼekueraguávape g̃uarã haʼe oʼordena ohekomboʼe hag̃ua chupekuéra, ha omboʼe chupekuéra umi mbaʼe Tupã rreinopegua.

19 Ha heʼi chupekuéra ani hag̃ua omboʼe mbaʼeve ndahaʼéiramo umi mbaʼe haʼe omboʼevaʼekue, ha ojeʼevaʼekue profetakuéra marangatu juru rupive.

20 Heẽ, jepe heʼi chupekuéra ani hag̃ua omboʼe mbaʼeve ndahaʼéiramo pe arrepentimiénto ha jeguerovia Ñandejárare, orredimivaʼekue itavayguakuérape.

21 Ha heʼi chupekuéra ndaiporivaʼerãha ñorairõ ijapytepekuéra, ha katu omaʼẽvaʼerãha hikuái tenonde gotyo peteĩ ñemaʼẽme, oguerekóvo peteĩ jerovia ha peteĩ ñemongarai, ombojoajúvo ikorasõkuéra joaju ha mborayhúpe peteĩva ambuévare.

22 Ha péicha haʼe heʼi chupekuéra omboʼe hag̃ua. Ha péicha oiko chuguikuéra Tupã raʼy.

23 Ha heʼi chupekuéra ojesarekovaʼerãha pe ára japytuʼuvaʼerãháre, ha omomarangatuvaʼerã hikuái, ha avei omeʼẽvaʼerã aguyje opa ára Ñandejára Itupãme.

24 Ha heʼi avei chupekuéra umi sacerdote oñeordenavaʼekue ombaʼapovaʼerãha ipo rupi oñemongaru hag̃ua ijupe.

25 Ha oĩ peteĩ ára arapokõindypegua oñemoĩvaʼekue oñembyaty hag̃ua hikuái omboʼe hag̃ua itavayguakuérape, ha otupaitũ hag̃ua Ñandejára Itupãme, ha avei, pyʼỹi ikatuháicha, oñembyatyvaʼerã hikuái.

26 Ha umi sacerdote nosãingói tavayguakuérare oñemongaru hag̃ua; ha katu hembiapo rupi ohupytyvaʼerã hikuái Tupã grásia, oñemombarete hag̃ua pe Espíritu-pe, oguerekóvo Tupãgui jeikuaa, omboʼe hag̃ua hikuái Tupã puʼaka ha autorida reheve.

27 Ha avei Alma heʼi pe tupaopegua tavayguakuéra omeʼẽvaʼerãha imbaʼerepýgui, opavave oguerekoháicha; oguereko hetavérõ omeʼẽvevaʼerã; ha pe oguerekoʼivévape, mbovymínte ojejerurevaʼerã; ha pe ndoguerekóivape oñemeʼẽvaʼerã.

28 Ha péicha omeʼẽvaʼerã hikuái imbaʼehepýgui haʼekuéra oipotareígui ha omeʼẽporãségui Tupãme, ha umi sacerdote oikotevẽvape, heẽ, ha umi ánga oikotevẽtereíva, ha ijopívovape.

29 Ha kóva haʼe heʼi chupekuéra, heʼígui chupe Tupã; ha oguatajoja hikuái Tupã renondépe, omeʼẽvo ojupe yvy arigua ha espíritu reheguáva oikotevẽ ha oipotaháicha hikuái.

30 Ha koʼág̃a ojehu opa koʼãva ojejapo Mormón-pe, heẽ, Mormón ykuéra ykére, kaʼaguýpe oĩva Mormón ykuéra ypýpe; heẽ, Mormón renda, Mormón ykuéra, Mormón kaʼaguy, iporãite piko umíva umi upépe Irredentor jeikuaápe og̃uahẽvaʼekue resa renondépe; heẽ, ha ojehovasaite piko hikuái, haʼekuéra opurahéitagui iñemomorã tapiaite peve.

31 Ha koʼã mbaʼe ojejapo pe tetã rembeʼýpe, ani hag̃ua oikuaa upe rréi.

32 Ha katu péina ápe, ojehu upe rréi, ohechakuaávo peteĩ ñemomýi itavayguakuéra apytépe, omondo hembiguaikuérape omañañemi hag̃ua hesekuéra. Upévare ára oñembyaty jave hikuái ohendu hag̃ua Ñandejára ñeʼẽ oñemombeʼu chuguikuéra rréipe.

33 Ha koʼág̃a pe rréi heʼi Alma omokyreʼỹha tavayguakuérape opuʼã hag̃ua hese; upévare omondo ijehérsito ohundi hag̃ua chupekuéra.

34 Ha ojehu Alma ha Ñandejára tavayguakuérape ojeikuaauka ouha pe rréi ehérsito; upévare ojagarra hikuái hogaao ha hogaguakuérape ha osẽ hikuái pe taveʼỹme.

35 Ha oĩ hikuái cuatrocientos cincuenta ánga rupi.