1 Ha koʼág̃a, ojehu Abinadí oñeʼẽmba rire koʼã ñeʼẽ oipyso ipo ha heʼi: Oúta ára maymáva ohechatahápe Ñandejára salvasiõ; opa tetãnguéra, avaretãnguéra, ñeʼẽnguéra, ha tavakuéra ohechataha hesa tee rupi ha omombeʼúta Tupã renondépe ihuisiokuéra ijojaha.

2 Ha upérõ umi iñañáva oñemosẽta okápe, ha oguerekóta hikuái mbaʼérepa oguahu ha hasẽ, ojaheʼo, ha ombopu hãikuéra; ha upéva nohenduséi haguére hikuái Ñandejára ñeʼẽ; upévare, Ñandejára norredimíri chupekuéra.

3 Haʼekuéra oñemeʼẽgui hete oipotávape ha iñaña, ha pe aña oguereko puʼaka hesekuéra; heẽ, jepe pe mbói ymaguare ombotavyvaʼekue ñande rukuérape, haʼevaʼekue ijeʼakuéra apoha; ojapovaʼekue opa yvypóra oñemeʼẽ hete oipotávape, mbaʼevaípe, ha añaguiguápe, oikuaávo iporãva ha ivaíva, oñemoĩvo pe aña poguýpe.

4 Upéicha mayma yvypóra okañy; ha péina ápe, haʼekuéra okañyvaʼerãmoʼã tapiaite peve Tupã norredimíri rire itavayguakuérape iñeime kañy ha jeʼágui.

5 Ha katu penemanduʼa pe oñemeʼẽva hete oipotávape, ha oho meméva angaipakuéra ha Tupãre ñepuʼã rapére, opyta iñeime jeʼápe ha pe aña oguereko opa puʼaka hese. Upévare haʼe opyta ndojejapoiramoguáicha mbaʼevéichagua rredensiõ, haʼévo Tupã ohayhuʼỹva; ha avei pe aña haʼe Tupã ohayhuʼỹva.

6 Ha koʼág̃a Cristo ndoúi rire yvórape, añeʼẽvo mbaʼe oikótavagui oikomaramoguáicha, ndaiporivaʼerãmoʼã rredensiõ.

7 Ha Cristo nopuʼãirire omanomavaʼekue apytégui, térã ndojoráirire ñemano jokuahakuéra pe ñeñotỹha ndoguerekói hag̃ua puʼaka, ni pe ñemano ndoguerekói hag̃ua popĩa, ndaiporivaʼerãmoʼã jeikovejey.

8 Ha katu oĩ peteĩ jeikovejey, upévare pe ñeñotỹha ndoguerekói puʼaka, ha pe ñemano popĩa oñemoĩ Cristo poguýpe.

9 Haʼe niko haʼe pe yvóra resape ha rekove; heẽ, peteĩ tesape opaveʼỹva, arakaʼeve ndaikatúiva iñypytũ; heẽ, ha avei peteĩ tekove opaveʼỹva, anive hag̃ua oĩ ñemano.

10 Jepe ko omanokuaáva oñemondéta ñemanoʼỹgui, ha ko oñembyaikuaáva oñemondéta ñembyaiʼỹgui, ha ojegueraháta oñemboʼy hag̃ua Tupã trivunal renondépe, ojehusga hag̃ua hese hembiapokuérare tahaʼe iporã térã ivaíva—

11 Iporãramo, peteĩ jeikovejey tekove opaveʼỹvape ha vyʼapavẽme; ha ivaíramo katu, peteĩ jeikovejey kondenasiõ opaveʼỹvape, oñemeʼẽvo pe añáme, omoĩva chupekuéra ipoguýpe, ha upéva haʼe kondenasiõ—

12 Ojapóvo hikuái hete rembipota ha oipotaháicha; nohenóivo arakaʼeve Ñandejárape pe ijyva poriahuvereko ojeipyso aja chupekuéra g̃uarã; pe poriahuvereko jyva ojeipysógui chupekuéra g̃uarã, ha ndoipotaivaʼekue hikuái; ojeʼe rire chupekuéra hembiapovaikuéragui ha upevére ndojeíri hikuái chuguikuéra; ha ojeʼe chupekuéra oñearrepenti hag̃ua ha upevére noñearrepentiséi hikuái.

13 Ha koʼág̃a, ndaperyryivaʼerã piko ha peñearrepenti pene angaipakuéragui, ha penemanduʼa Cristo-pe ha haʼe rupi mante ikatuha pejesalva?

14 Upévare, pemboʼéramo Moisés léi, pemboʼe avei omohaʼangaha umi mbaʼe oútava—

15 Pemboʼe chupekuéra pe rredensiõ ouha Cristo-pe Ñandejára rupive, haʼéva pe añetegua Túva Ijapyraʼỹva. Amén.