1 Ha ojehu roñepyrũjey romoĩporã pe rréino ha rohupyty jey upe tetã pyʼaguapýpe. Ha ajapouka árma ñorairõrã opaichaguáva, upéicha che aguereko hag̃ua armakuéra che tavayguakuérape g̃uarã, ára lamanita-kuéra osẽ jey vove g̃uarã ñorairõguasúpe che tavayguakuéra rehe.

2 Ha amoĩ ñangarekohára upe tetã jerére, ani lamanita-kuéra hoʼa jey ñehaʼarõʼỹme ore ári ha orerundi; ha péicha amoʼã che tavayguakuéra ha che mymbaʼatykuéra, ha ndahejái hoʼa hikuái orerayhuʼỹha pópe.

3 Ha ojehu rohupyty ore rukuéra retã heta ary aja, heẽ, veintidos ary pukukue.

4 Ha ajapo kuimbaʼekuéra oñemitỹ pe yvy, ha omongakuaa opáichagua mbaʼeraʼỹi ha opáichagua yva.

5 Ha ajapo kuñanguéra ombovyvy, ha hembiapo, ha ombaʼapo, ha ombaʼapo opáichagua líno hechapyrãva rehe, heẽ, ha opáichagua ao romonde hag̃ua ore opívo; ha upéicha roñakãrapuʼã upe tetãme—upéicha roguereko meme pyʼaguapy upe tetãme veintidos ary aja.

6 Ha ojehu rréi Lamán omano, ha itaʼýra oñepyrũ orreina hendaguépe. Ha haʼe oñepyrũ omokyreʼỹ itavayguakuérape opuʼã hag̃ua che tavayguakuéra rehe; upévare oñepyrũ oñembosakoʼi hikuái ñorairõguasurã, ha ou hag̃ua ñorairõme che tavayguakuéra rehe.

7 Ha katu che amondo che maʼẽñemiharakuéra omaʼẽñemi hag̃ua Shemlón retã jerére, aikuaa hag̃ua iñembosakoʼikuéragui, añemoʼã hag̃ua chuguikuéra, ani hag̃ua ou hikuái che tavayguakuéra ári ha ohundi chupekuéra.

8 Ha ojehu ojupi hikuái Shilom retã nórte gotyo, heta iñorairõharakuéra ndive, kuimbaʼe oguerekóva yvyrapã ha huʼy, kysepuku ha simitárra, ita ha ónda; ha oñapi hikuái iñakã ha ijopívo; ha omoĩ ijehe fáha vakapígui ojejapóva ombojeréva ilómore.

9 Ha ojehu ajapouka kuña ha mitãnguéra che tavayguapegua toñeñomi pe taveʼỹme; ha ajapo avei opa tuja ikatúva ogueraha árma, ha opa mitãrusu ikatúva ogueraha árma, oñembyatypa oñondive oho hag̃ua oñorairõ lamanita-kuéra ndive; ha amoĩ chupekuéra hendápe, opavave kuimbaʼe ary oguerekoháicha.

10 Ha ojehu rosẽ roñorairõ hag̃ua lamanita-kuéra ndive; ha che, che jepeve, che tujámava, aha añorairõ hag̃ua lamanita-kuéra ndive. Ha ojehu rosẽ Ñandejára puʼaka reheve ñorairõme.

11 Ha koʼág̃a, lamanita-kuéra mbaʼeve ndoikuaái Ñandejáragui, ni pe Ñandejára puʼakágui, upévare ojerovia hikuái ipuʼaka rehe. Upevére haʼekuéra haʼe peteĩ tavayguakuéra imbaretéva, yvypóra imbareteháicha.

12 Haʼe hikuái peteĩ tavayguakuéra saite, ha iñarõva, ha oporojukaséva, ogueroviáva ituvakuéra jepokuaa, haʼéva kóva—Oguerovia hikuái oñemosẽhague Jerusalén retãgui ituvakuéra rembiapovai rupi, ha ijoykeʼykuéra ojaheihague hesekuéra taveʼỹme, ha ojejaheihague hesekuéra ohasa aja yguasu ári.

13 Ha avei, ojejaheihague hesekuéra oiko aja hikuái ijyvy jehejapyre peteĩháme, ohasa rire hikuái pe yguasu ári, ha opa koʼã mbaʼe Nefi ijeroviarekove haguére iñeʼẽrendúvo Ñandejára rembiapoukapykuérare—upévare Ñandejára ohovasa chupe, Ñandejára ohendúgui iñemboʼe ha ombohovái chupe, ha haʼe oisãmbyhy chupekuéra pe taveʼỹre.

14 Ha ijoykeʼykuéra ipochy hendive noikũmbýigui hikuái Ñandejára rembiapo; ha avei ipochy hendive pe y ári omohatãgui hikuái ikorasõ Ñandejára rehe.

15 Ha avei, ipochy hendive hikuái og̃uahẽvo pe yvy ñeʼẽmeʼẽnguéme, heʼígui hikuái haʼe oipeʼahague ipoguikuéra pe tavayguakuéra ñeisãmbyhy; ha oñehaʼã ojuka chupe hikuái.

16 Ha avei, ipochy hikuái hendive osẽ haguére pe taveʼỹme Ñandejára heʼi haguéicha chupe, ha ogueraha umi kuatiajehaipyre ojehaíva pláncha bronce-guigua ári, heʼígui hikuái haʼe omondahague umíva.

17 Ha upéicha omboʼe hikuái itaʼyrakuérape ndohayhúi hag̃ua chupekuéra, ha ojuka hag̃ua chupekuéra, ha omonda ha oipeʼapa hag̃ua chuguikuéra, ha ojapo hag̃ua hikuái opa mbaʼe ikatúva ohundi hag̃ua chupekuéra; upévare oguereko hikuái peteĩ jehayhuʼỹ opaveʼỹva Nefi raʼykuérare.

18 Ha koʼã mbaʼére pe rréi Lamán, ikatupyry, ha ijapu rupi, ha iñeʼẽmeʼẽ añeteguaʼỹva rupi, chembotavy, che agueru hag̃ua che tavayguakuérape kóva ko tetãme, haʼekuéra ohundi hag̃ua chupekuéra; heẽ, ha ore rohasaʼasy opa koʼã ary pukukue ko tetãme.

19 Ha koʼág̃a che, Zeniff, amombeʼupa rire koʼã mbaʼe che tavayguakuérape lamanita-kuéra rehegua, amokyreʼỹ chupekuéra osẽ hag̃ua oñorairõ opa ipuʼaka reheve, omoĩvo ijerovia Ñandejárare; upévare, roñorairõ hendivekuéra, ojováre.

20 Ha ojehu romosẽjey chupekuéra ore retãgui; ha rojuka chupekuéra tuicha jejukápe, heẽ hetaitereígui ndaikatúi roipapa.

21 Ha ojehu rojevy jey ore retãme, ha che tavayguakuéra oñepyrũ jey oñangareko imymbaʼatýre, ha oñemitỹ ijyvy.

22 Ha koʼág̃a che, chetujámavo, ameʼẽ upe rréino peteĩ che raʼýpe; upévare, ndaʼevéima mbaʼeve. Ha ajerure Ñandejára tohovasa che tavayguakuérape. Amén.