1 Ha koʼág̃a rréi Mosíah ojapo opa tavayguakuéra toñembyaty.

2 Koʼág̃a ndahetái Nefi taʼyrakuéra, térã ndahetái umi Nefi ñemoñaréva, pe Zarahemla tavayguakuéraicha, haʼéva Mulek ñemoñare, ha umi ouvaʼekue hendive taveʼỹme.

3 Ha ndahetái umi Nefi tavayguakuéra ha Zarahemla tavayguakuéra, hetaháicha umi lamanita-kuéra, heẽ, ndahaʼéi ni imbytere.

4 Ha koʼág̃a opa Nefi tavayguakuéra oñembyaty, ha avei opa Zarahemla tavayguakuéra, ha oñembyaty hikuái mokõi atýpe.

5 Ha ojehu Mosíah omoñeʼẽ, ha omoñeʼẽuka, Zeniff kuatiajehaipyrekuéra itavayguakuérape; heẽ, omoñeʼẽ Zeniff tavayguakuéra kuatiajehaipyrekuéra, osẽ guive hikuái Zarahemla retãgui ára oujey peve hikuái.

6 Ha avei omoñeʼẽ Alma ha ijoykeʼykuéra ñemombeʼu, ha opa ijeikoʼasykuéra, ára osẽ guive hikuái Zarahemla retãgui ára oujey peve hikuái.

7 Ha koʼág̃a, Mosíah omoñeʼẽmbávo umi kuatiajehaipyre, itavayguakuéra oikóva upe tetãme henyhẽ ñemombaʼeguasu ha techaramógui.

8 Ndoikuaái mbaʼépa ojepyʼamongetáta hikuái; ohechávogui hikuái umi oñemosãsovaʼekue ñeñapytĩmbýgui, henyhẽ peteĩ vyʼa tuichaitereívagui.

9 Ha avei, ojepyʼamongetávo ijoykeʼykuérare lamanita-kuéra ojukavaʼekuépe henyhẽ hikuái vyʼaʼỹgui, ha jepe oñohẽ hikuái heta tesay vyʼaʼỹgui.

10 Ha avei, ojepyʼamongetávo hikuái pe Tupã pyʼaporã hiʼag̃uietévare, ha ipuʼaka omosãso hag̃ua Alma ha itavayguakuérape lamanita-kuéra pógui ha ñeñapytĩmbýgui, omopuʼã hikuái iñeʼẽ ha omeʼẽ aguyje Tupãme.

11 Ha avei, ojepyʼamongetávo hikuái lamanita-kuérare, haʼéva ijoykeʼykuéra, ha pe iñeime angaipa ha mbaʼevaípe, henyhẽ hikuái vyʼaʼỹ ha jepyʼapýgui hiʼangakuéra ñeimeporãre.

12 Ha ojehu umi haʼéva Amulón raʼy ha ijoykeʼykuéra, omendavaʼekue lamanita-kuéra rajýre, ipochy ituvakuéra ojapovaʼekuére, ha ndoguerahasevéima hikuái ituvakuéra réra, upévare ojagarra hiʼarikuéra Nefi réra, oñehenói hag̃ua Nefi raʼy ha ojeipapa hag̃ua umi oñehenóiva nefita apytépe.

13 Ha koʼág̃a opa Zarahemla tavayguákuéra ojeipapa nefita-kuéra ndive, ha ojejapo upéicha pe rréino noñemeʼẽigui avavépe ndahaʼéiva umi Nefi ñemoñarépente.

14 Ha koʼág̃a ojehu Mosíah oñeʼẽmba rire ha omoñeʼẽmba rire tavayguakuérape, haʼe oipota Alma avei oñeʼẽ itavayguakuérape.

15 Ha Alma oñeʼẽ chupekuéra, ijatývo hikuái tuicha atýpe, ha oho peteĩ atýgui ambuévape, omboʼévo tavayguakuérape arrepentimiénto ha Ñandejárare jeguerovia.

16 Ha haʼe oñemoñeʼẽ Limhi tavayguakuéra ha ijoykeʼykuérape, opa umi oñemosãsovaʼekuépe ñeñapytĩmbýgui, imanduʼa hag̃ua hikuái Ñandejára omosãsohague chupekuéra.

17 Ha ojehu Alma omboʼe rire tavayguakuérape heta mbaʼe, ha oñeʼẽmba rire chupekuéra, pe rréi Limhi oñemongaraise; ha opa itavayguakuéra oñemongaraise avei.

18 Upévare, Alma oike pe ýpe ha omongarai chupekuéra; heẽ, omongarai chupekuéra ojapo haguéicha ijoykeʼykuérape Mormón ýpe; heẽ, ha opa haʼe omongaraívape oike Tupã tupaópe; ha kóva oguerovia haguére hikuái Alma ñeʼẽ.

19 Ha ojehu rréi Mosíah oheja Alma omoĩ tupaokuéra opa Zarahemla retãme; ha omeʼẽ chupe puʼaka oʼordena hag̃ua sacerdote ha mboʼeharakuéra opa tupao ári.

20 Koʼág̃a kóva ojejapo hetaitereígui umi tavayguakuéra ha peteĩ mboʼehárante ndaikatúi omboʼe chupekuéra; ni opavave ndaikatúi ohendu Tupã ñeʼẽ peteĩ ñembyatýpe.

21 Upévare oñembyaty hikuái opáichagua atýpe, oñehenóiva tupao; ha opavave tupao oguereko isacerdote ha imboʼeharakuéra, ha opa sacerdote omboʼe pe ñeʼẽ oñemeʼẽháicha chupe Alma juru rupive.

22 Ha péicha, jepe oĩ heta tupao opavave haʼe peteĩ tupao, heẽ, jepe Tupã tupao; mbaʼeve noñemboʼéigui opa tupaokuérape ndahaʼéirõ pe arrepentimiénto haTupãre jeguerovia.

23 Ha koʼág̃a siete tupao oĩ pe Zarahemla retãme. Ha ojehu opavave ojagarraséva hiʼári Cristo réra, térã Tupã réra, ojoaju hikuái Tupã tupaokuérape;

24 Ha oñehenói hikuái Tupã tavayguakuéra. Ha Ñandejára oñohẽ ijespíritu hiʼarikuéra, ha ojehovasa hikuái, ha oñakãrapuʼã upe tetãme.