1 Ha ojehu Ammón ha rréi Limhi oñepyrũ oporandu tavayguakuérape mbaʼéichapa ikatu oñemosãso hikuái pe ñeñapytĩmbýgui; ha ombyatyuka hikuái opa tavayguakuérape; ha péva ojapo hikuái oguereko hag̃ua tavayguakuéra ñeʼẽ upe mbaʼére.

2 Ha ojehu ndojuhúi hikuái mbaʼéichapa oñemosãsóta ñeñapytĩmbýgui, ndahaʼéiramo ojagarra hembireko ha taʼyrakuéra, ijovecha, ha ivakaʼatykuéra, ha hogaaokuéra, ha okañy pe taveʼỹme; lamanita-kuéra hetaitereígui, ndaikatumoʼãi Limhi tavayguakuéra oñorairõ hendivekuéra, oimoʼãvo oñemosãsotaha ñeñapytĩmbýgui pe kysepuku rupi.

3 Ha ojehu Gedeón osẽ ha oñemboʼy pe rréi renondépe, ha heʼi chupe: O rréi, koʼág̃a peve rehenduvaʼekue heta ára che ñeʼẽnguéra ñañorairõramoguare ñande joykeʼy, lamanita-kuéra ndive.

4 Ha koʼág̃a O rréi, ndachejuhúiramo tembiguái oñeikotevẽʼỹva, térã koʼág̃a peve oimeháicha rehendúramokuri che ñeʼẽnguéra, ha haʼekuéra neipytyvõvaʼekue, upéicharamo aipota rehendu che ñeʼẽnguéra koʼág̃a, ha che haʼéta ne rembiguái ha amosãsóta nde tavayguápe ñeñapytĩmbýgui.

5 Ha upe rréi oheja chupe oñeʼẽ. Ha Gedeón heʼi chupe:

6 Péina ápe pe tape poʼi tapykuepegua, ohasáva pe tápia tapykueguáre, upe tavaguasu rapykuépe. Lamanita-kuéra, térã lamanita-kuéra ñangarekohára, okaʼu pyharekue; upévare ñamondóta peteĩ momarandu opa ko tavayguakuéra apytépe, ombyaty hag̃ua hikuái ijovecha ha ivakaʼatykuéra, ikatu hag̃uáicha ogueraha taveʼỹme pyharekue.

7 Ha aháta nde ereháicha ha ahepymeʼẽta ipaháva tetãme ojehepymeʼẽva víno rehegua Lamanita-kuérape, ha haʼekuéra okaʼúta; ha ñande jahasáta pe tape poʼi ñemi rupive iñu asu gotyo haʼekuéra okaʼu ha oke aja.

8 Upéicha jajeʼóita ñane rembireko ha ñande raʼykuéra ndive, ñande ovecha ha vakaʼatykuéra reheve pe taveʼỹme; ha jaguatáta Shilom retã rembeʼýre.

9 Ha ojehu upe rréi ohendu Gedeón ñeʼẽnguéra.

10 Ha rréi Limhi ombyatyuka itavayguakuérape imymbaʼatykuéra; ha omondo pe tetãme jahepymeʼẽva víno rehegua lamanita-kuérape; ha avei omondove víno temimeʼẽicha chupekuéra g̃uarã; ha haʼekuéra hoyʼu hoyʼuseháicha upe vínogui rréi Limhi omondovaʼekue chupekuéra.

11 Ha ojehu rréi Limhi tavayguakuéra ojeʼói pyharekue pe taveʼỹme ijovecha ha ivakaʼatykuéra reheve, ha oho hikuái Shilom retã rembeʼýre pe taveʼỹme, ha omoĩ ijeho Zarahemla retã gotyo, ojeguerahávo Ammón ha ijoykeʼykuérare.

12 Ha oguerahákuri hikuái hendive opa hiʼóro, ha pláta, ha imbaʼe porãnguéra ikatúva ogueraha, ha avei hembiʼurãkuéra, pe taveʼỹme; ha omoñepyrũ ijeʼói.

13 Ha oĩ rire hikuái heta ára pe taveʼỹme og̃uahẽ hikuái Zarahemla retãme, ha ojoaju Mosíah tavayguakuéra ndive, ha oñemoĩ hikuái ipoguýpe.

14 Ha ojehu Mosíah omog̃uahẽ chupekuéra vyʼápe; ha avei ojagarra ikuatiajehaipyrekuéra, ha avei umi kuatiajehaipyre ojuhuvaʼekue Limhi tavayguakuéra.

15 Ha ojehu lamanita-kuéra ohechakuaávo Limhi tavayguakuéra osẽhague pe tetãgui pyharekue, omondo peteĩ ehérsito pe taveʼỹme omuña hag̃ua chupekuéra.

16 Ha omuña rire chupekuéra mokõi ára aja, ndaikatuvéi oho hikuái hapykuerikuéra; upévare okañy hikuái pe taveʼỹme.