1 Ha koʼág̃a ojehu Abinadí oñeʼẽmba rire, pe rréi heʼi umi sacerdote-kuérape ojagarra ha ojuka hag̃ua chupe.

2 Ha katu oĩ ijapytepekuéra peteĩ hérava Alma, haʼéva avei Nefi ñemoñare. Ha haʼe peteĩ kuimbaʼe imitãva, ha oguerovia umi ñeʼẽnguéra Abinadí oñeʼẽvaʼekue, oikuaágui umi tembiapovai Abinadí otestifikavaʼekue hesekuéra; upévare haʼe oñepyrũ oñeʼẽ upe rréipe ani hag̃ua ipochy Abinadí ndive, ha katu toheja chupe toho pyʼaguapýpe.

3 Ha katu pe rréi oñekoʼõivéntema, ha omosẽka Alma-pe ijapytepekuéragui, ha omondo hapykuéri hembiguaikuérape ojuka hag̃ua chupe.

4 Ha katu haʼe oñani henondeguikuéra ha okañy ha upéicha ndojuhúi chupe hikuái. Ha okañy aja heta ára ohai opa umi ñeʼẽnguéra Abinadí oñeʼẽvaʼekue.

5 Ha ojehu pe rréi omondo hembiguaikuérape ojere hag̃ua Abinadí rehe ha ojagarra hag̃ua chupe; ha ojokua ha oity hikuái chupe kaʼirãime.

6 Ha mbohapy ára rire, oñeʼẽvo isacerdotekuéra ndive, haʼe heʼi ojegueraha jey hag̃ua chupe henondépe.

7 Ha haʼe heʼi chupe: Abinadí, rojuhu peteĩ mbaʼe roʼevaʼerã nderehe, ha upévare rejejukavaʼerã.

8 Nde ere haguére Tupãite voi oguejytaha yvypóra raʼykuéra apytépe; ha koʼág̃a, upéva rupi ojeipeʼáta ndehegui nde rekove nderejevýiramo opa umi ñeʼẽ vai erevaʼekue cherehe ha che tavayguakuéra rehe.

9 Koʼág̃a Abinadí heʼi chupe: Che haʼe ndéve, ndajevymoʼãiha umi ñeʼẽ haʼevaʼekue ndéve ko tavayguakuérare, haʼégui añetegua; ha reikuaa hag̃ua añeteguaha che ahejákuri taʼa nde pópe.

10 Heẽ, ha ahasáta ñemano jepeve, ha ndajevymoʼãi che ñeʼẽnguéragui, ha koʼãva opuʼãta testimónioramo nderehe. Ha chejukáramo reñohẽta tuguy iñangaipaʼỹva, ha kóva opuʼãta avei testimónioramo nderehe pe ára pahápe.

11 Ha koʼág̃a rréi Noé haimete ojora chupe, okyhyjégui iñeʼẽgui; haʼe okyhyjégui Tupã huisiokuéra oúramo g̃uarã hiʼári.

12 Ha katu umi sacerdote omopuʼã iñeʼẽ Abinadí rehe, ha oñepyrũ oñeʼẽʼapi hese heʼívo: Haʼe oñeʼẽvai pe rréire. Upévare pe rréi oñemokyreʼỹ hese pochyrã, ha omeʼẽ chupe ojejuka hag̃ua.

13 Ha ojehu ojagarra ha ojokua chupe hikuái, ha ohavira hete tatapỹime, heẽ, jepe omano meve.

14 Ha koʼág̃a umi tatarendy oñepyrũvo ohapy chupe, haʼe osapukái chupekuéra, heʼívo:

15 Péina ápe, jepe pejapo haguéicha cherehe, péicha pene ñemoñare hetápe ombohasaukáta koʼã mbaʼeʼasy che ahasáva, jepe tata rupi ñemano; ha kóva ogueroviágui hikuái pe Ñandejára Itupã salvasiõ.

16 Ha ojehúta peẽ pejejopýta opáichagua mbaʼasy reheve penerembiapovai haguére.

17 Heẽ, ha pejeipyʼajopýta opárupi, ha peñemosẽ ha peñemosarambíta ágotyo ha pégotyo, jepe peteĩ mymba kaʼaguy aty oñemuñaháicha mymba kaʼaguy saite ha iñarõvare.

18 Ha upe árape pejejagarráta, ha peʼáta penderayhuʼỹhakuéra pópe, ha pehasaʼasýta, che ahasaʼasy haguéicha, tata rupi ñemano mbaʼeʼasykuéra.

19 Péicha ojapo Tupã ivengánsa umi itavayguakuérape ohundíva ári. O Tupã, ejagarra che ánga.

20 Ha koʼág̃a, Abinadí heʼi rire koʼã ñeʼẽ, hoʼa, ohasa rire ñemano tata rupi; heẽ, ojejuka rire chupe nonegaséigui Tupã rembiapoukapykuéra, osella rire iñeʼẽ añetegua iñemano rupi.