1 Koʼág̃a Mosíah ojapo rire koʼãva haʼe omondo peteĩ momarandu opa tetãme, opa tavayguakuéra apytépe, oikuaaségui mbaʼépa heʼi hikuái mávapa haʼevaʼerã irreikuéra.

2 Ha ojehu pe tavayguakuéra ñeʼẽ ou, heʼívo: Ore roipota Aarón nde raʼy tahaʼe ore rréi ha ore sãmbyhyhára.

3 Koʼág̃a Aarón ojupíkuri Nefi retãme, upévare upe rréi ndaikatúi omeʼẽ chupe upe rréino; ni Aarón ndojagarraséi imbaʼerã upe rréino; ni mavave Mosíah raʼykuéra ndojagarraséi imbaʼerã upe rréino.

4 Upévare rréi Mosíah omondojey tavayguakuéra apytépe; heẽ, jepe peteĩ momarandu jehaipyre omondo tavayguakuéra apytépe. Ha koʼãva haʼe umi ñeʼẽ ojehaivaʼekue, heʼívo:

5 Péina ápe, O peẽ che tavayguakuéra, térã che joykeʼykuéra, che pohayhúgui haʼerõguáicha, che aipota pejepyʼamongeta upe mbaʼe ojeʼevaʼekuére peẽme pejeipyʼamongeta hag̃ua—peẽ peguerekoségui peteĩ rréi.

6 Koʼág̃a haʼe peẽme upe oñemeʼẽvaʼerãme hekoitépe upe rréino ndoipotái, ha ndojagarraséi imbaʼerã upe rréino.

7 Ha oñehenóiramo ambue hendaguépe, péina ápe akyhyje oĩramo g̃uarã joavy pende apytépe. Ha máva piko oikuaa che raʼy, imbaʼéva pe rréino, ikatumbaʼe ipochy ha ogueraha hapykuéri tavayguakuéra apytégui, oguerútava ñorairõguasu ha joavy pende apytépe, ha péva oguerúta heta tuguy ñeñohẽ ha Ñandejára rapekuéra ñembyai, heẽ, ha ohundíta heta tavayguakuéra ánga.

8 Koʼág̃a che haʼe peẽme ñaneakãguapýna ha jajepyʼamongeta koʼã mbaʼére, ndajaguerekóigui derécho ñahundívo che raʼýpe, ni ñahundívo ambue oñehenóivape hendaguépe.

9 Ha che raʼy oñemovã jeýramo ijorgúllo ha umi mbaʼe vyroreípe ojevýne umi heʼivaʼekuégui, ha ojerure iderécho pe rréinope, mbaʼe ojapoukátava chupe ha avei ko tavayguakuérape heta angaipa.

10 Ha koʼág̃a ñaneakãguapýna ha ñañemotenonde koʼã mbaʼére, ha jajapo umi mbaʼe omombaretétava ko tavayguakuéra pyʼaguapy.

11 Upévare che pende rréita che ára rembyre aja; upevére, ñahenói huekuéra, ohusga hag̃ua ko tavayguakuérape ñande léi heʼiháicha; ha ñamoĩporãta umi mbaʼe ko tavayguakuéra rehegua ambuéicha, ñahenóitagui kuimbaʼekuéra iñarandúva haʼe hag̃ua hue, ohusgátava ko tavayguakuérape Tupã rembiapoukapykuérape heʼiháicha.

12 Koʼág̃a iporãve yvypóra ojehusga Tupãre ojehusgarangue yvypórare, ijojágui tapiaite Tupã huisiokuéra, ha katu yvypóra huisiokuéra nameméi ijoja.

13 Upévare, ikatúrire peẽ peguereko yvypóra ijojáva haʼe hag̃ua pende rréi, omoĩva Tupã leikuéra, ha ohusgáva ko tavayguakuérape hembiapoukapykuérape heʼiháicha, heẽ, peguerekórire rréiramo kuimbaʼe ojapóva jepe che ru Benjamín ojapo haguéicha ko tavayguakuérare—Che haʼe peẽme, tapiaite péicharire oĩporãta peguereko tapiaite rreikuéra pene sãmbyhy hag̃ua.

14 Ha jepe chete ambaʼapo opa puʼaka ha katupyry aguerekóva reheve, pomboʼe hag̃ua Tupã rembiapoukapykuéra, ha amoĩ hag̃ua pyʼaguapy opa ko tetãme, ani oĩ ñorairõguasu ni joavy, ni ñemonda, ni jejavyky, ni jejuka, ni mbaʼevéichagua tembiapovai;

15 Ha opavave ojapóva tembiapovai, che ahavira chupe pe mbaʼevai ojapovaʼekuére, umi léi ñande rukuéra omeʼẽvaʼekue ñandéve heʼiháicha.

16 Koʼág̃a haʼe peẽme, ndahekojojáigui opavave yvypóra naiporãi peguereko peteĩ rréi térã rreikuéra penesãmbyhy hag̃ua.

17 Ha péina ápe, mboy tembiapovai piko ojapouka peteĩ rréi iñañáva, heẽ, ha tuichaitéva ñehundi!

18 Heẽ, penemanduʼa rréi Noé rehe, hembiapovai ha hembiapokyʼakuéra, ha avei itavayguakuéra rembiapovai ha rembiapokyʼakuéra. Péina ápe tuichaite ñehundi hoʼavaʼekue hiʼarikuéra; ha avei hembiapovaikuéra rupi ojeguerahavaʼekue chupekuéra ñeñapytĩmbýpe.

19 Ha ndojeruréirire hesekuéra Ijapohare oikuaapáva, ha upéva oñearrepentígui hikuái añetehápe, opytavevaʼeramoʼã hikuái ñeñapytĩmbýpe koʼág̃aite peve.

20 Ha katu péina ápe, haʼe omosãso chupekuéra oñemomirĩ haguére hikuái henondépe; ha ojerureʼasy mbarete haguére hikuái chupe omosãso hag̃ua chupekuéra ñeñapytĩmbýgui; ha péicha ombaʼapo Ñandejára ipuʼaka reheve opa mbaʼépe yvypóra raʼykuéra apytépe, oipysóvo ijyva poriahuvereko umi omoĩva gotyo hese ijerovia.

21 Ha péina ápe, koʼág̃a haʼe peẽme, ndaikatúi pemosẽ peteĩ rréi hembiapovaívape ndahaʼéirõ heta joavy, ha heta tuguy ñeñohẽ rupi.

22 Ha péina ápe, haʼe oguerekógui iñirũnguéra tembiapovaípe, ha haʼe oguereko iñangarekoharakuéra ijerére; ha haʼe ombyai umi léi omoĩvaʼekue umi orreinavaʼekue tekojojápe haʼe mboyve; ha opyrũ ipýpe Tupã rembiapoukapykuérare.

23 Ha haʼe ojapo leikuéra, ha omondo itavayguakuéra apytépe, heẽ, leikuéra hekoñañaichaite; ha oimeraẽ naiñeʼẽrendúivape ileikuérare haʼe ohundika; ha oimeraẽ oñemoĩva hesépe haʼe omboúta ijehersitokuéra oñorairõ hag̃ua hendive, ha ikatúramo ohundíta chupekuéra; ha péicha peteĩ rréi hekojojaʼỹva ombyai opa tekojoja rape.

24 Ha koʼág̃a péina ápe che haʼe peẽme, naiporãi peichagua tembiapokyʼakuéra ou pende ári.

25 Upévare, peiporavo kóva ko tavayguakuéra ñeʼẽ rupive, huekuéra, pejehusga hag̃ua umi leikuéra oñemeʼẽvaʼekue peẽme ñande rukuérare heʼiháicha, ojavyʼỹva, ha oñemeʼẽvaʼekue chupekuéra Ñandejára po rupive.

26 Koʼág̃a ndajepiguái pe tavayguakuéra ñeʼẽ oipota peteĩ mbaʼe ndaijojáiva; ha katu jepive pe tavayguakuéra michĩvéva oipota pe ndaijojáiva; upévare kóvare pejesarekóta ha pejapóta chugui pende léi—pejapóta pene mbaʼekuéra tavayguakuéra ñeʼẽ rupi.

27 Ha og̃uahẽramo ára tavayguakuéra ñeʼẽ oiporavo pe tembiapovai, upéramo haʼe ára Tupã huisiokuéra outaha pende ári; heẽ, upéramo haʼe ára haʼe outaha peẽme tuicha ñehundi reheve jepe haʼe ou haguéicha koʼág̃a peve ko tetãme.

28 Koʼág̃a peguerekóramo hue ha haʼekuéra ndohusgáiramo upe léi oñemeʼẽvaʼekuépe heʼiháicha, peẽ ikatu pehusgaka chupekuéra peteĩ hue tuichavéva rupi.

29 Ha pende hue tuichavéva ndohusgáiramo huísio ijojáva, peẽ pejápota mbovymi pende hue michĩvéva oñembyaty, ha haʼekuéra ohusgáta pende hue tuichavévape, tavayguakuéra ñeʼẽ heʼiháicha.

30 Ha haʼe peẽme pejapo hag̃ua koʼã mbaʼe Ñandejára jekyhyjépe; ha che haʼe peẽme pejapo hag̃ua koʼã mbaʼe, ha ani hag̃ua peguereko rréi; kóva ko tavayguakuéra ojapóramo angaipa ha tembiapovaikuéra umíva ojegueru hag̃ua iñakã arikuéra.

31 Ha péina ápe che haʼe peẽme, heta tavayguakuéra angaipakuéra ojejapo irreikuéra rembiapovai rupi; upévare hembiapovaikuéra hoʼa irreikuéra akã ári.

32 Ha koʼág̃a che aipota ko jojaʼỹ anive oĩ ko tetãme, ko che tavayguakuéra apytépe voi; ha katu che aipota ko tetã tahaʼe peteĩ tetã oĩháme sãso, ha opavave yvypóra tohupyty iderécho ha hemimeʼẽ peteĩchaite, Ñandejárape iporã aja jaiko ha jahupyty upe tetã, heẽ, jepe oimeraẽva ñane ñemoñarekuéra opyta aja peve yvy ape ári.

33 Ha hetave mbaʼe ohai chupekuéra rréi Mosíah, ohechaukávo chupekuéra opa jepyʼapy ha pyʼarasy ohasáva peteĩ rréi hekojojáva, heẽ, opa hiʼánga ñembyasy itavayguakuéra rehe, ha avei opa chiʼõ ojapóva tavayguakuéra irréipe; ha omyesakã chupekuéra opa koʼã mbaʼe.

34 Ha haʼe heʼi chupekuéra opa koʼã mbaʼe ndaiporivaʼerãha; ha katu pe mbaʼepohýi oĩvaʼerãha opa tavayguakuéra ári, opavave yvypóra ogueropuʼaka hag̃ua imbaʼéva.

35 Ha haʼe ohechauka avei chupekuéra opa mbaʼevai guýpe ombaʼapotaha hikuái, oisãmbyhýramo chupekuéra peteĩ rréi hekojojaʼỹva;

36 Heẽ, opa hembiapovai ha hembiapokyʼakuéra, ha opa ñorairõguasu, ha joavy, ha tuguy ñeñohẽ, ha ñemonda, ha jejavyky, ha tekovaikuéra jejapo, ha opáichagua tembiapovai ndaikatúiva ojeipapa—heʼívo chupekuéra koʼã mbaʼe ndaiporivaʼerãha, umíva añetehápe ombohovai haguére Tupã rembiapoukapy.

37 Ha koʼág̃a ojehu, rréi Mosíah omondo rire koʼã mbaʼe tavayguakuéra apytépe haʼekuéra oñekonvense iñeʼẽ añeteguaha.

38 Upévare ndoguerekosevéima hikuái rréi, ha oipotaiterei hikuái opa yvypóra oguereko jehupyty joja upe tetãme; heẽ, ha opavave yvypóra heʼi oĩporãha chupekuéra ogueru hiʼári iñangaipakuéra.

39 Upévare, ojehu haʼekuéra oñembyaty atyguasúpe opárupi upe tetãme, omeʼẽ hag̃ua iñeʼẽ mávapa haʼevaʼerã ihuekuéra, ohusga hag̃ua chupekuéra upe léi oñemeʼẽvaʼekue chupekuérape heʼiháicha; ha ovyʼaiterei hikuái pe sãso oñemeʼẽvaʼekue chupekuérare.

40 Ha oñemombareteve pe mborayhu oñandúva hikuái Mosíah rehe; heẽ, ohayhuve chupe hikuái opa yvypóragui; ndohecháigui chupe hikuái peteĩ mburuvicha ñañáramo ohekáva imbaʼerãnte, heẽ, pe pirapire ombyaíva pe ánga; haʼe ndojeruréigui chupekuéra pirapire, ni ndahoryivaʼekue tuguy ñeñohẽme; ha katu haʼe omoĩvaʼekue pyʼaguapy upe tetãme, ha haʼe ohejavaʼekue itavayguakuéra isãso opáichagua ñeñapytĩmbýgui; upévare ohayhu chupe hikuái, heẽ, ohayhueterei chupe hikuái, ndaikatúiva jaʼepa.

41 Ha ojehu ohenói hikuái huekuéra oisãmbyhy hag̃ua hiʼarikuéra, térã ohusga hag̃ua chupekuéra upe léipe heʼiháicha; ha koʼãva ojapo hikuái opárupi upe tetãme.

42 Ha ojehu Alma oñehenói haʼe hag̃ua hue mburuvicha peteĩha, haʼévo avei pe sumo sacerdote, omeʼẽvo chupe itúva pe tembiapo, ha omeʼẽvo chupe ñeñangareko opa mbaʼe tupaopeguáre.

43 Ha koʼág̃a ojehu Alma oguatákuri Ñandejára rapekuérare, ha haʼe iñeʼẽrendu hembiapoukapykuérare, ha ohusga huisiokuéra ijojáva; ha oĩ meme pyʼaguapy upe tetãme.

44 Ha péicha oñepyrũ huekuéra ñeisãmbyhy opa Zarahemla retãme, opa tavayguakuéra hérava Nefita-kuéra apytépe; ha Alma haʼékuri hue mburuvicha peteĩha.

45 Ha koʼág̃a ojehu itúva omano, oguerekóvo ochenta y dos ary, oikóvo okumpli hag̃ua Tupã rembiapoukapykuéra.

46 Ha ojehu Mosíah omano avei, pe trigésimo tercer ary orreina haguépe, sesenta y tres ary oguerekópe, ha upe peve ohasámakuri quinientos nueve ary Lehi osẽhague Jerusalén-gui.

47 Ha péicha opa rreikuéra rreinádo Nefi tavayguakuéra ári; ha péicha opa Alma arakuéra, haʼéva itupaokuéra mopuʼãhare.