1 Ha koʼág̃a, rréi Benjamín oñandu oñeikotevẽha, oñeʼẽmba rire itavayguakuérape, ohai umi terakuéra maymáva ojapovaʼekue konvénio rehegua iñeʼẽrendutaha Tupã rembiapoukapykuérare.

2 Ha ojehu ndaipóri avave ánga, ndahaʼéiramo umi mitã michĩ, ndoikeivaʼekue upe konvéniope ha omoĩvaʼekue hiʼarikuéra Cristo réra.

3 Ha avei, ojehu rréi Benjamín ombopaha rire koʼã mbaʼe, ha okonsagra rire itaʼýra Mosíah-pe haʼe hag̃ua sãmbyhyhára ha rréi itavayguakuéra ári, ha omeʼẽ rire chupe opa tembiapo upe rréino reheguáva, ha avei ohenói rire sacerdote omboʼe hag̃ua itavayguakuérape, upéicha ohendu ha oikuaa hag̃ua hikuái Tupã rembiapoukapykuéra, ha omokyreʼỹ hag̃ua chupekuéra ñemomanduʼápe umi ñeʼẽmeʼẽ ojapovaʼekuégui, haʼe omomaitei pe atyguasúpe, ha oho hikuái, opavave, hogaguakuéra ndive, hogakuérape.

4 Ha Mosíah oñepyrũ orreina itúva rendaguépe. Ha haʼe oñepyrũ orreina pe trigésimo ary hekove aja, ha ohasáma, cuatrocientos setenta y seis ary rupi Lehi osẽ guive Jerusalén-gui.

5 Ha rréi Benjamín oikove mbohapy ary aja, ha omano.

6 Ha ojehu rréi Mosíah oguata Ñandejára rapére, ha ojesareko ihuísio ha hembipotakuérare, ha iñeʼẽrendu hembiapoukapykuérare opa mbaʼe Ñandejára ojerurevaʼekuépe chupe.

7 Ha rréi Mosíah omombaʼapouka itavayguakuérape oñemitỹ hag̃ua pe yvy. Ha haʼe avei, haʼete, ombaʼapo pe yvýre, ani hag̃ua oiko chugui mbaʼepohýi itavayguakuérape g̃uarã, ojapo hag̃ua itúva ojapo haguéicha opa mbaʼépe. Ha ndaipóri joavy opa itavayguakuéra apytépe mbohapy ary aja.