1 Ha ojehu pe rréi ehérsito oujey, ohekarei rire Ñandejára tavayguakuérape.

2 Ha koʼág̃a péina ápe, upe rréi ehérsito mbovymi, oñemomichĩgui, ha oñepyrũ oĩ peteĩ ñembojaʼo umi tavayguakuéra rembyre apytépe.

3 Ha umi imbovyvéva oñepyrũ oñeʼẽpohýi upe rréi rehe, ha oñepyrũ oĩ tuicha joavy ijapytepekuéra.

4 Ha koʼág̃a oĩkuri ijapytepekuéra peteĩ kuimbaʼe hérava Gedeón, ha haʼévo peteĩ kuimbaʼe imbaretéva ha rréipe ohayhuʼỹva, upévare haʼe oguenohẽ ikysepuku, ha oñeʼẽmeʼẽ iñekoʼõime ojukataha upe rréipe.

5 Ha ojehu haʼe oñorairõ pe rréi ndive; ha pe rréi ohechávo haʼe ipuʼakatamaha hese okañy ha oñani ha ojupi pe tórre oĩva témplo ypýpe.

6 Ha Gedeón oho hapykuéri ha ojupítakuri pe tórrepe ojuka hag̃ua rréipe, ha upe rréi omaña Shemlón retã gotyo, ha péina ápe, lamanita-kuéra ehérsito oĩma pe tetã rembeʼy ryepýpe.

7 Ha koʼág̃a upe rréi ojerureʼasy opa hiʼánga jepyʼapy reheve, heʼívo: Gedeón, che perdonána, Lamanita-kuéra niko oĩ ñande ári, ha ñanerundíta; heẽ, ohundíta hikuái che tavayguakuérape.

8 Ha koʼág̃a upe rréi ndojepyʼapyiete itavayguakuérare ojepyʼapyháicha hekovére; upevére, Gedeón operdona chupe hekove.

9 Ha upe rréi heʼi itavayguakuérape okañy hag̃ua lamanita-kuéra renondégui, ha haʼete voi oho henonderãkuéra, ha haʼekuéra okañy taveʼỹme, hembireko ha itaʼyrakuéra ndive.

10 Ha ojehu lamanita-kuéra oho hapykuerikuéra, ha ohupyty, ha oñepyrũ ojuka chupekuéra.

11 Ha ojehu upe rréi heʼi opavave kuimbaʼekuéra ohejavaʼerãha hembireko ha itaʼyrakuérape, ha okañy Lamanita-kuéra renondégui.

12 Koʼág̃a oĩ heta ndohejaséiva chupekuéra, ha katu opytase omano hag̃ua hendivekuéra. Ha umi ambuéva oheja hembireko ha taʼyrakuérape ha okañy.

13 Ha ojehu umi opytavaʼekue hembireko ha itaʼyrakuéra ndive oheja itajyrakuéra iporãitéva osẽ ha ojerure hesekuéra lamanita-kuérape ani hag̃ua ojuka chupekuéra.

14 Ha ojehu lamanita-kuéra oiporiahuvereko chupekuéra, oguerohoryetereígui hikuái umi ikuñanguéra porãngue.

15 Upévare lamanita-kuéra operdona chupekuéra hekove, ha ojagarra chupekuéra ñeñapytĩmbýpe ha oguerahajey Nefi retãme, ha oheja chupekuéra ohupyty upe tetã omoĩtaramo hikuái rréi Noé-pe lamanita-kuéra pópe, ha omeʼẽ hikuái imbaʼehepykuéra, jepe opa mbaʼe oguerekóvagui imbytere, hiʼóro, ha ipláta, ha opa imbaʼe porãnguéra mbytere, ha upéicha ohepymeʼẽvaʼerã hikuái tetãme ojehepymeʼẽva lamanita-kuéra rréipe peteĩ arýgui ambue arýpe.

16 Ha koʼág̃a oĩkuri peteĩ upe rréi raʼy umi ojeguerahavaʼekue ñeñapytĩmby apytépe, hérava Limhi.

17 Ha koʼág̃a Limhi ndoipotái itúva oñehundi; upevére, Limhi, oikuaa itúva hembiapovaiha, heʼégui haʼe kuimbaʼe hekojojáva.

18 Ha ojehu Gedeón omondo kuimbaʼekuéra kañyháme taveʼỹme, oheka hag̃ua rréi Noé-pe ha umi hendive oĩvape. Ha ojehu haʼekuéra ojuhu tavayguakuérape taveʼỹme, opavavépe ha upe rréi ha umi isacerdotekuérape katu nahániri.

19 Koʼág̃a haʼekuéra oñeʼẽmeʼẽkuri ikorasõme oujeytaha Nefi retãme, ha hembirekokuéra ha itaʼyrakuéra ojejukáramo, ha avei umi opytavaʼekue hendivekuéra, oñehaʼãta hikuái oñevenga ha omanóta avei hendivekuéra.

20 Ha upe rréi heʼi chupekuéra ani hag̃ua ohojey; ha ipochy hikuái upe rréi ndive, ha ombohasa chupe hikuái, jepe pe tata rupive ñemano.

21 Ha ojagarrapota jave avei hikuái sacerdote-kuérape ha ojuka, haʼekuéra okañy henondeguikuéra.

22 Ha ojehu oĩma hikuái ohojey hag̃uáicha Nefi retãme, ha ojuhu hikuái Gedeón kuimbaʼekuérape. Ha Gedeón kuimbaʼekuéra omombeʼu chupekuéra opa mbaʼe ojehuvaʼekue hembireko ha itaʼyrakuérape; ha lamanita-kuéra ohejahague chupekuéra ohupyty upe tetã ohepymeʼẽvo lamanita-kuérape peteĩ tetãme ojehepymeʼẽva haʼéva opa umi mbaʼe oguerekóva mbyte.

23 Ha tavayguakuéra omombeʼu Gedeón kuimbaʼekuérape ojukahague hikuái upe rréipe, ha isacerdotekuéra okañyhague chuguikuéra pe taveʼỹme.

24 Ha ojehu opa rire pe ñembyaty, ohojey hikuái Nefi retãme, vyʼápe, hembireko ha itaʼyrakuéra ndojejukái haguére; ha omombeʼu Gedeón-pe ojapovaʼekue hikuái upe rréi rehe.

25 Ha ojehu pe lamanita-kuéra rréi ojapo chupekuéra peteĩ ñeʼẽmeʼẽ, itavayguakuéra ndojukamoʼãiha chupekuéra.

26 Ha avei Limhi, haʼévo pe rréi raʼy, oñemeʼẽvo chupe upe rréino tavayguakuéra rupi, ojapo peteĩ ñeʼẽmeʼẽ lamanita-kuéra rréipe itavayguakuéra ohepymeʼẽtaha chupe tetãme ojehepymeʼẽva, jepe opa imbaʼerepykuéra mbytégui.

27 Ha ojehu Limhi oñepyrũ omopuʼã upe rréino ha omoĩ pyʼaguapy itavayguakuéra apytépe.

28 Ha Lamanita-kuéra rréi omoĩ ñangarekohára upe tetã jerére, ikatu hag̃ua ojoko upe tetãme Limhi tavayguakuérape, ani hag̃ua oho hikuái taveʼỹme; ha omongaru iñangarekoharakuérape upe tetãme ojehepymeʼẽva ohupytýva nefita-kuéragui reheve.

29 Ha koʼág̃a rréi Limhi oguereko pyʼaguapy meme irréinope mokõi ary aja, lamanita-kuéra nomyangekói ni noñehaʼãvéigui ohundi chupekuéra.