1 Ha ojehu Limhi ha itavayguakuéra ohojey Nefi tavaguasúpe, ha oñepyrũ jey oiko upe tetãme pyʼaguapýpe.

2 Ha ojehu heta ára rire lamanita-kuéra oñepyrũ jey oñemokyreʼỹ pochýpe nefita-kuéra rehe, ha oñepyrũ oike hikuái umi tetã rembeʼýpe oĩva jerére.

3 Koʼág̃a haʼekuéra noñanimái ojukávo chupekuéra, pe ñeʼẽmeʼẽ irreikuéra ojapovaʼekue Limhi-pe rupi; ha katu haʼekuéra oinupã chupekuéra hovápe, ha oiporu autorida hiʼarikuéra; ha oñepyrũ omoĩ mbaʼe pohýi hiʼarikuéra, ha ogueraha chupekuéra haʼeramoguáicha mburika ikirirĩva—

4 Heẽ, opa koʼã mbaʼe ojejapókuri Ñandejára ñeʼẽ oñekumpli hag̃ua.

5 Ha koʼág̃a nefita-kuéra jeikoʼasy tuicha, ha ndaipóri mbaʼéichapa ikatu hikuái oñemosãso lamanita-kuéra pógui, haʼekuéra ojerégui hesekuéra opárupi.

6 Ha oñepyrũ tavayguakuéra ichiʼõ upe rréipe ijeikoʼasykuéra rupi; ha oñepyrũ osẽse hikuái ñorairõme lamanita-kuéra rehe. Ha ojopyeterei hikuái upe rréipe ichiʼõme; upévare haʼe oheja ojapo hikuái ojaposeháicha.

7 Ha haʼekuéra oñembyatyjey, ha omoĩ hiʼarmadurakuéra, ha osẽ hikuái lamanita-kuéra rehe oguenohẽ hag̃ua chupekuéra hetãgui.

8 Ha ojehu Lamanita-kuéra ipuʼaka, ha omboguevi chupekuéra, ha ojuka hetápe.

9 Ha oĩ tuicha tasẽ ha jaheʼo Limhi tavayguakuéra apytépe, imenaveʼỹva hasẽ iménare, tajýra ha taʼýra hasẽ itúvare, ha joykeʼykuéra ijoykeʼýre.

10 Koʼág̃a oĩ heta imenaveʼỹva upe tetãme, ha ojerureʼasy hikuái mbaretépe ára ha ára, oúgui hiʼarikuéra peteĩ kyhyje tuicha lamanita-kuéragui.

11 Ha ojehu ijerureʼasy meme omokyreʼỹ Limhi tavayguakuérape pochýpe lamanita-kuéra rehe; ha osẽjey hikuái ñorairõme, ha katu oñemboguevi jey chupekuéra, ohasávo hikuái heta ñemano.

12 Heẽ, osẽ jey hikuái jepe mbohapyjey jave, ha ohasaʼasy jey hikuái ohasa haguéicha; ha umi ndojejukaivaʼekue oho jey Nefi retãme.

13 Ha oñemomirĩ hikuái jepe yvytimbo peve, oñemoĩvo hikuái pe ñeñapytĩmby poguýpe, oñemoĩvo ojeipyʼajopy hag̃ua, ha ojeguerahávo chupekuéra ágotyo ha pégotyo, ha oguerahávo mbaʼepohýi, oipotaháicha ihayhuʼỹhakuéra.

14 Ha oñemomirĩ hikuái jepe ñemomirĩ pypuku peve; ha ojerureʼasy mbaretépe Tupãme; heẽ, jepe opa ára ojerureʼasy hikuái Itupãme oipeʼa hag̃ua chupekuéra ijeikoʼasýgui.

15 Ha koʼág̃a Ñandejára imbegue ohendu hag̃ua ijerureʼasy hembiapovaikuéra rupi; upevére Ñandejára ohendu ijerureʼasykuéra, ha oñepyrũ omohuʼũ lamanita-kuéra korasõ, upéicha oñepyrũ ombovevýi imbaʼepohyikuéra; upevére Ñandejára ndohechaporãi omosãso gueteri chupekuéra ñeñapytĩmbýgui.

16 Ha ojehu oñepyrũ oñakãrapuʼã mbeguekatu hikuái upe tetãme, ha oñepyrũ omongakuaave yvaraʼỹi, ha ovecha, ha vaka atykuéra, upéicha ndohasái hikuái ñembyahýi.

17 Koʼág̃a oĩ heta kuña, ha hetave kuimbaʼégui; upévare rréi Limhi heʼi mayma kuimbaʼe omeʼẽvaʼerãha umi imenaveʼỹva ha imembykuérape ikarurã, ani omano hikuái ñembyahýigui; ha ojapo hikuái koʼãva oĩgui hetaiterei omanovaʼekue.

18 Koʼág̃a Limhi tavayguakuéra ojoaju peteĩ atýpente ikatuha peve, ha oñongatu hiʼyvaraʼỹikuéra ha imymbaʼatykuéra;

19 Ha pe rréi noñanimái osẽvo tavaguasu tápiagui, oguerahaʼỹre iñangarekoharakuéra hendive, okyhyjégui oimeháicha hoʼáramo g̃uarã lamanita-kuéra pópe.

20 Ha haʼe ojapouka itavayguakuéra omañañemi umi tetã oĩva jerére, ikatúramo g̃uarã ojagarra hikuái umi sacerdote okañyvaʼekue taveʼỹme, omokañyvaʼekue lamanita-kuéra rajýpe, ha ojapovaʼekue tuichaite ñehundi ou hiʼarikuéra.

21 Haʼekuéra ojagarraségui chupekuéra ikatu hag̃uáicha ohavira chupekuéra; oúgui hikuái Nefi retãme pyharekue, ha ogueraha hiʼyvaraʼỹikuéra ha heta imbaʼeporãkuéra; upévare haʼekuéra ohaʼarõ ñemi chupekuéra.

22 Ha ojehu ndaiporivéi joavy lamanita-kuéra ha Nefi tavayguakuéra apytépe, jepe ára Ammón ha ijoykeʼykuéra og̃uahẽ meve upe tetãme.

23 Ha upe rréi oĩvo tavaguasu rokẽgui okápe iñangarekoharakuéra ndive, ohecha Ammón ha ijoykeʼykuérape, ha oimoʼãgui haʼe hikuái upe rréi Noé sacerdote-kuéra upévare ojagarrauka ha ojokuauka ha oityka chupekuéra kaʼirãime. Ha haʼérire hikuái Noé sacerdote-kuéra ojukaukavaʼerãmoʼã chupekuéra.

24 Ha katu ohechakuaávo ndahaʼeiha hikuái, ha katu haʼeha ijoykeʼykuéra, ouvaʼekue Zarahemla retãgui, henyhẽ tuicha vyʼapavẽgui.

25 Koʼág̃a rréi Limhi omondo, Ammón ou mboyve, mbovymi kuimbaʼekuéra oheka hag̃ua Zarahemla retã; ha katu ndojuhúi hikuái, ha okañy pe taveʼỹme.

26 Upevére, ojuhu hikuái peteĩ yvy ojeiko haguépe; heẽ, peteĩ tetã henyhẽva kangue pirúgui; heẽ, peteĩ tetã ojeiko haguépe ha oñehundivaʼekue; ha haʼekuéra, oimoʼãvo haʼe Zarahemla retã, ohojey Nefi retãme, og̃uahẽvo upe tetã rembeʼýpe ndahetái ára ou mboyve Ammón.

27 Ha ogueru hendivekuéra peteĩ kuatiajehaipyre, jepe umi tavayguakuéra ikangue ojuhuvaʼekue kuatiajehaipyre; ha ojehai pláncha oroguigua ári.

28 Ha koʼág̃a Limhi henyhẽ jey vyʼágui ohendúvo Ammón juru rupi upe rréi Mosíah oguerekoha peteĩ Tupã don, ikatúva rupi ohesaʼỹijo umi jehaipyre; heẽ, ha Ammón avei ovyʼa.

29 Upevére Ammón ha ijoykeʼykuéra henyhẽ vyʼaʼỹgui heta ijoykeʼykuéra ojejuka haguére;

30 Ha avei upe rréi Noé ha isacerdotekuéra ojapoukágui tavayguakuérape heta angaipa ha tembiapovai Tupã rehe; ha haʼekuéra avei ombyasy Abinadí ñemano; ha avei Alma jeho ha tavayguakuéra ohovaʼekue hendive, omopuʼãvaʼekue peteĩ Tupã tupao pe Tupã mbarete ha puʼaka rupive, ha jerovia oguerekovaʼekue umi ñeʼẽ Abinadí heʼivaʼekuére.

31 Heẽ, haʼekuéra ombyasy ijeʼoikuéra, ndoikuaáigui hikuái moõpa okañyvaʼekue. Haʼekuéra vyʼápe ojoajuvaʼerãmoʼãgui hendivekuéra, koʼãva ojapo haguére peteĩ konvénio Tupã ndive oipytyvõ ha iñeʼẽrendutaha hembiapoukapykuérare.

32 Ha koʼág̃a Ammón ou guive, rréi Limhi oike avei peteĩ konvénio peTupã ndive, ha avei heta itavayguakuéra apytégui, oipytyvõ ha iñeʼẽrendutaha hembiapoukapykuérare.

33 Ha ojehu rréi Limhi ha heta itavayguakuéra apytégui oñemongaraise; ha katu ndaipóri avave upe tetãme oguerekóva Tupã autorida. Ha Ammón ndojaposéi koʼã mbaʼe, oimoʼãgui haʼe haʼeha peteĩ tembiguái hekojojaʼỹva.

34 Upévare noñembyatýi hikuái tupaoicha upe árape, ohaʼarõvo Ñandejára Espíritu-pe. Koʼág̃a haʼese hikuái Alma ha ijoykeʼykuéraicha, okañyvaʼekue pe taveʼỹme.

35 Haʼekuéra oñemongaraise testígo ha testimónioramo oipytyvõseha hikuái Tupãme opa ikorasõkuéra reheve; upevére omohaʼarõ hikuái upe ára; ha oñemeʼẽta tenondeve peteĩ iñemongaraikuéra ñemombeʼu.

36 Ha koʼág̃a opa mbaʼe oipotáva Ammón ha itavayguakuéra, ha Limhi ha itavayguakuéra, haʼe oñemosãso lamanita-kuéra poguýgui ha ñeñapytĩmbýgui.