1 Ha ojehu Mosíah ojapo rire itúva heʼivaʼekue chupe, ha omomarandu rire opárupi upe tetãme, tavayguakuéra oñembyaty opaite hendágui, ojupi hag̃ua témplope ohendu hag̃ua umi ñeʼẽ rréi Benjamín oñeʼẽtava chupekuéra.

2 Ha hetaiterei hikuái, hetaiterei ndaikatúiva ojeipapa chupekuéra; oñembohetavetereígui hikuái ha oñembotuicha hikuái upe tetãme.

3 Ha avei ogueraha hikuái imymbaʼatykuéra heñoiporãvévagui, oikuaveʼẽ hag̃ua mymbajuka ha mymbajehapy Moisés léipe heʼiháicha;

4 Ha avei omeʼẽ hag̃ua hikuái aguyje Ñandejára Itupãme, oguenohẽvaʼekue chupekuéra Jerusalén retãgui, ha oipeʼavaʼekue chupekuéra ihayhuʼỹhakuéra pógui, ha omoĩvaʼekue chupekuéra yvypóra hekojojáva mboʼehararã, ha avei peteĩ yvypóra hekojojáva haʼe hag̃ua irréi, omoĩvaʼekue pyʼaguapy Zarahemla retãme, ha omboʼevaʼekue chupekuéra iñeʼẽrendu hag̃ua Tupã rembiapoukapykuérare, ovyʼa hag̃ua hikuái ha henyhẽ hag̃ua mborayhúgui Tupã ha opa yvypóra rehe.

5 Ha ojehu og̃uahẽvo hikuái témplope, omoĩ hogaao upe jerére, opavave yvypóra hogaguakuéra ndive, haʼéva hembireko, ha taʼyrakuéra, ha tajyrakuéra, ha koʼãva raʼy, ha rajykuéra, itujavéva guive imitãvéva peve, opavave ogayguakuéra oñemboykévo peteĩva ambuévagui.

6 Ha omoĩ hikuái hogaao témplo jerére, opavave yvypóra omomaʼẽvo pe hogaao rokẽ témplo gotyo, upéicha opyta hag̃ua hikuái hogaaópe ha ohendu hag̃ua umi ñeʼẽ rréi Benjamín heʼítava chupekuéra.

7 Ha tuichaitereígui pe atyguasu rréi Benjamín ndaikatúi omboʼe opavavépe pe témplo ryepýpe, upévare omopuʼãka peteĩ tórre, upéicha ikatu hag̃ua itavayguakuéra ohendu umi ñeʼẽ haʼe heʼítava chupekuéra.

8 Ha ojehu oñepyrũ oñeʼẽ itavayguakuérape upe tórre guive; ha ndaopavavéi ikatu ohendu iñeʼẽ tuichaitereígui pe atyguasu; upévare ojapouka umi ñeʼẽ haʼe heʼíva ojehai hag̃ua ha ojegueraha hag̃ua umi ndohupytýivape iñeʼẽ ryapu, koʼãva ohupyty hag̃ua avei iñeʼẽnguéra.

9 Ha koʼãva haʼe umi ñeʼẽ haʼe heʼivaʼekue ha ohaiukavaʼekue, heʼívo: Che joykeʼykuéra, opavave peñembyatyvaʼekue oñondive, peẽ ikatúva pehendu che ñeʼẽ haʼétava peẽme ko árape; ndaʼéi peẽme pejupi hag̃ua koʼápe napemombaʼéi hag̃ua umi ñeʼẽ haʼétava, ha katu pecherendu hag̃ua, ha peipeʼa hag̃ua pende apysa pehendu hag̃ua, ha pene korasõ peikũmby hag̃ua, ha pene apytuʼũ Tupã mbaʼeñemimbykuéra ojeipyso hag̃ua pende resa renondépe.

10 Ndaʼéikuri peẽme pejupi hag̃ua koʼápe pekyhyje hag̃ua chehegui, ni peimoʼã hag̃ua che chejehegui haʼeveha peteĩ yvypóra omanokuaávagui.

11 Ha katu che haʼe peẽicha, aĩva opáichagua mbaʼasy tete ha apytuʼũmegua poguýpe; upevére ajeiporavo ko tavayguakuérare, ha che ru chekonsagra, ha Ñandejára po oheja che tahaʼe kóva ko tavayguakuéra rréi ha sãmbyhyhára; ha añeñongatu ha ajejokókuri ipuʼaka ijojaʼỹva rupive, poipytyvõ hag̃ua opa puʼaka, apytuʼũ ha mbarete Ñandejára omeʼẽvaʼekuére chéve.

12 Haʼe peẽme péicha ojehejahague chéve aiporu che arakuéra poipytyvõ hag̃ua, jepeve ko ára peve, ha ndajeruréi peẽme óro ni pláta ni mbaʼevéichagua mbaʼehepykuéra;

13 Ni ndahejaivaʼekue peñemboty kaʼirãime, ni pejapo ojuehegui tembiguái, ni peporojuka, ni penepopinda, ni pemonda, ni pejapo ñemoakãratĩ; ni ndahejaivaʼekue pejapo mbaʼevéichagua tekoñaña, ha pomboʼe peneñeʼẽrenduvaʼerãha Ñandejára rembiapoukapykuérare, opa mbaʼépe haʼe heʼíva peẽme—

14 Ha jepeve che, chejehegui, ambaʼapovaʼekue che poitére ikatu hag̃ua poipytyvõ, ha ani hag̃ua pejejopy tetãme moĩmbyre reheve, ni hoʼa pende ári mbaʼeve ipohýiva jagueropuʼaka—ha opa koʼã mbaʼe añeʼẽvaʼekuégui, peẽ haʼe testígo ko árape.

15 Upevére, che joykeʼykuéra, ndajapóikuri koʼã mbaʼe añembotuicha hag̃ua, ni haʼe peẽme koʼã mbaʼe pomoĩvai hag̃ua upévare; ha katu añeʼẽ koʼã mbaʼe peikuaa hag̃ua ikatuha ambohovái pyʼapotĩ reheve Tupã renondépe ko árape.

16 Péina ápe, haʼe peẽme, che haʼe haguére peẽme aiporuhague che arakuéra poipytyvõ hag̃ua, nañembotuichaséi, ha katu aiménte Tupã pytyvõme.

17 Ha péina ápe, haʼe peẽme koʼã mbaʼe penearandu hag̃ua; peikuaa hag̃ua peime jave pende rapicha pytyvõme, peimehánte pende Tupã pytyvõme.

18 Péina ápe, peẽ cherenói pende rréi; ha che, pehenóiva pende rréi, ambaʼapóramo poipytyvõ hag̃ua, napembaʼapoivaʼerã piko peẽ, peñopytyvõ hag̃ua ojupe?

19 Ha péina ápe avei, che, pehenóiva pende rréi, ahasavaʼekue che ára pene pytyvõme, ha jepe upéicha aiménte Tupã ñepytyvõme, añemboaguyjevaʼerã penderehe, O mbaʼeichaite piko pemeʼẽvaʼerã aguyje pende Rréi Yvagaguápe!

20 Haʼe peẽme, che joykeʼykuéra, pemeʼẽrire opa aguyje ha momorã pene ánga oguerekóva, Tupã pende apoharépe, ha pendejoko ha peneñongatuvaʼekue, ha penembovyʼavaʼekue, ha ohejavaʼekue peiko pyʼaguapýpe oñondive—

21 Haʼe peẽme peipytyvõramo pende apoharépe iñepyrũmby guive, ha pendejokóva ára ha ára, omeʼẽvo peẽme pytu peikove hag̃ua, peñemonguʼe ha pembaʼapo hag̃ua pendejehegui, ha jepeve oñangareko penderehe opa ára—haʼe peẽme peipytyvõramo jepe chupe opa pene ánga reheve, haʼéta gueteri tembiguái ndahaʼéiva mbaʼeve.

22 Ha péina ápe, opa haʼe ojeruréva peẽme haʼe peneñeʼẽrendu hag̃ua hembiapoukapykuérare; ha oñeʼẽmeʼẽ peẽme peneñeʼẽrendúramo hembiapoukapykuérare peñakãrapuʼãtaha upe tetãme; ha haʼe arakaʼeve ndojevýiva pe heʼivaʼekuégui; upévare, peneñeʼẽrendúramo hembiapoukapykuérare haʼe penderovasa ha penemoakãrapuʼã.

23 Ha koʼág̃a, peteĩraẽve, haʼevaʼekue pende apohare ha omeʼẽvaʼekue peẽme pende rekove, ha upévare pedevéma chupe.

24 Ha mokõiveha, haʼe ojerure peẽme pejapo hag̃ua pe heʼivaʼekue peẽme; ha pejapóramo, haʼe penderovasa pyaʼete; ha upévare ohepymeʼẽma peẽme. Ha upéicha pedeve gueteri chupe; ha pedeve ha pedevéta chupe tapiaite peve; upévare, mbaʼégui piko peñembotuicháta?

25 Ha koʼág̃a aporandu, ikatu piko peje peteĩ mbaʼe pendejehegui? Ambohovái peẽme, Nahániri. Ndaikatúi peje peẽ haʼeha yvytĩmbóicha jepe; upevére, pejejapovaʼekue yvytimbógui; ha katu péina ápe, upéva haʼe pende apohare mbaʼe.

26 Ha ni che, heẽ che, pehenóiva pende rréi, cheporãve pendehegui, haʼégui yvytimboguigua avei. Ha pehecha chetujamaha, ha aimemaha ameʼẽmbotávo ko tete omanokuaáva isy yvýpe.

27 Upévare, haʼe haguéicha peẽme poipytyvõhague, aikóvo pyʼapotĩme Tupã renondépe, upéicha ko árape pombyatyuka, ajejuhu hag̃ua kulpaʼỹre, ha pende ruguy ani hag̃ua oĩ che ári aha vove Tupã chehusga hag̃ua umi mbaʼe ojerurevaʼekuére chéve penderehe.

28 Haʼe peẽme pombyatyukahague amopotĩ hag̃ua che aokuéra pende ruguýgui, ko árape aime jave aguejýtavo che ñeñotỹháme, aguejy hag̃ua pyʼaguapýpe, ha che ánga omanokuaaʼỹva ojoaju hag̃ua umi yvágape opurahéiva ndive, apurahéi hag̃ua ñemomorã Tupã ijojávape.

29 Ha avei, haʼe peẽme pombyatyukahague haʼe hag̃ua peẽme ndaikatuveimaha haʼe pene mboʼehára ni pende rréi;

30 Ha jepeve koʼág̃a opa che rete oryryieterei, añehaʼãvo añeʼẽ peẽme; ha katu Tupã Ñandejára chejoko ha oheja añeʼẽ peẽme, ha heʼi chéve haʼe hag̃ua peẽme ko árape che raʼy Mosíah haʼeha pende rréi ha pende sãmbyhyhára.

31 Ha koʼág̃a, che joykeʼykuéra, aipota pejapo koʼág̃a peve pejapo haguéicha. Peneñeʼẽrendu haguéicha che rembiapoukapykuérare, ha avei che ru rembiapoukapykuérare, ha peñakãrapuʼã, ha peñeñongatu ani hag̃ua peʼa penderayhuʼỹha pópe, upéicha avei, peneñeʼẽrendúramo che raʼy rembiapoukapykuérare, térã Tupã rembiapoukapykuéra haʼe omeʼẽtavare peẽme che raʼy rupive, peñakãrapuʼãta upe tetãme, ha penderayhuʼỹhakuéra ndaipuʼakamoʼãi penderehe.

32 Ha katu, peñeñangareko, O che tavayguakuéra, ani oĩ joavy pende apytépe, ha peneñeʼẽrenduse pe espíritu ñaña, oñeʼẽvaʼekuére che ru Mosíah.

33 Ha péina ápe, oñemoĩ peteĩ ái pe iñeʼẽrenduséva ári upe espíritu heʼívare, ha iñeʼẽrendúramo hese, ha opyta ha omano iñangaipápe, hoyʼu kondenasiõ hiʼángape g̃uarã; ohupytýgui ijehepymeʼẽrã peteĩ jeipyʼajopy opaveʼỹva, ohasa haguére Tupã léi ári oñemoĩvo pe haʼe oikuaáva rehe.

34 Che haʼe peẽme, ndaiporiha avave pende apytépe, ndahaʼéiramo pene mitã michĩnguéra, noñemboʼeivaʼekuépe koʼã mbaʼe rehe, ndoikuaáiva pedeveha tapiaite peve pende Ru Yvagaguápe, pemeʼẽ hag̃ua chupe opa mbaʼe peguerekóva ha haʼéva peẽ; ha avei noñemboʼéiva chupe umi kuatiajehaipyrére oguerekóva profesiakuéra ojeʼevaʼekue profetakuéra imarangatúva rupive, jepeve ára ñande ru, Lehi, osẽramoguare Jerusalén-gui.

35 Ha avei, opa mbaʼe ñande rukuéra heʼivaʼekue ko ág̃a peve. Ha péina ápe, avei, haʼekuéra oñeʼẽkuri Ñandejára heʼivaʼekue chupekuéra; upévare, umíva ijoja ha añetegua.

36 Ha koʼág̃a, che haʼe peẽme, che joykeʼykuéra, peikuaa ha peñehekomboʼe rire opa koʼã mbaʼépe, penerembiapovaíramo ha peñemoĩramo pe oñeñeʼẽvaʼekue rehe, ha upéicha pejei pe Ñandejára Espíritugui, ani hag̃ua henda pendepype pendegueraha hag̃ua pe tape iñarandúva rehe pejehovasa hag̃ua, peñakãrapuʼã, ha peñeñongatu hag̃ua.

37 Che haʼe peẽme, pe yvypóra ojapóva upéicha, upéva opuʼã ha oñemoĩ Tupã rehe; upévare haʼe iñeʼẽrenduse pe espíritu ñaña rehe, ha oiko chugui opa tekojoja ohayhuʼỹva; upévare, Ñandejára ndaijái ipype, haʼe ndoikóigui témplo ikyʼávape.

38 Upéicha pe yvypóra noñearrepentíriramo, ha opyta ha omano tupãme ohayhuʼỹvaicha; pe divína hustísia ojeruréva omombáy hiʼánga omanokuaaʼỹvape peteĩ temiandu resakã hembiapovaikuéragui omboguevíva chupe Ñandejára renondégui, ha omyenyhẽ ipytiʼa ñeñanduvai, tasy ha vyʼaʼỹgui, haʼéva peteĩ tata opaveʼỹvaicha, hata opuʼãva tapiaite peve.

39 Ha koʼág̃a haʼe peẽme, poriahuvereko ndaikatuiha ojerure péva pe yvypórare; upévare, henda paha haʼe topyta peteĩ jehasaʼasy opaveʼỹvape.

40 O, maymáva peẽ yvypóra itujámava, ha avei peẽ mitãrusukuéra, ha peẽ mitãkuéra ikatúva peikũmby che ñeʼẽnguéra, añeʼẽgui peẽme tesakãme ikatu hag̃ua peikũmby, añemboʼe pepáy hag̃ua peteĩ ñemomanduʼa upe ñeimevaietégui oĩvape umi hoʼavaʼekue tembiapovaípe.

41 Ha avei, aipota pehecha pe vyʼapavẽ ha jehovasápe ñeime ohupytýva umi iñeʼẽrendúva Tupã rembiapoukapykuérare. Ha péina ápe, haʼekuéra ojehovasa opa mbaʼépe, tete ha espirituguávape; ha opytáramo hikuái jeroviarekópe ipahaite peve oñemoinge chupekuéra yvágape, upéicha oiko hag̃ua hikuái Tupã ndive—peteĩ vyʼapavẽ opaveʼỹvape. O penemanduʼáke, penemanduʼáke koʼã mbaʼe añeteguaha; Tupã Ñandejára heʼígui.