1 Ha koʼág̃a, ojehu rréi Mosíah oguereko rire pyʼaguapy mbohapy ary aja, haʼe oikuaase tavayguakuéragui ojupivaʼekue oiko hag̃ua yvy Lehi-Nefi-pe; térã Lehi-Nefi tavaguasúpe; itavayguakuéra ndoikuaáigui mbaʼeve chuguikuéra ára osẽ guive hikuái Zarahemla retãgui; upévare, omyangekói chupe hikuái ijerure jey jeýpe.

2 Ha ojehu rréi Mosíah oheja diesisei ikuimbaʼekuéra imbaretevéva ojupi Lehi-Nefi retãme, oporandu hag̃ua ijoykeʼykuérare.

3 Ha ojehu upe koʼẽme oñepyrũ ojupi hikuái, ha oguereko hendivekuéra peteĩ hérava Ammón, kuimbaʼe imbarete ha ipuʼakapáva, ha haʼéva Zarahemla ñemoñare; ha haʼéva avei imburuvichakuéra.

4 Ha koʼág̃a, haʼekuéra ndoikuaái moõ gotyopa ohovaʼerã pe taveʼỹme ojupi hag̃ua Lehi-Nefi retãme; upévare, oikorei hikuái heta ára pe taveʼỹre, jepe cuarenta ára aja oikorei hikuái.

5 Ha oikorei rire hikuái cuarenta ára aja, og̃uahẽ hikuái peteĩ yvytýpe oĩva Shilom retã nórte gotyo, ha upépe omoĩ hikuái hogaaokuéra.

6 Ha Ammón ojagarra mbohapy ijoykeʼykuérape, ha héra hikuái Amalekí, Helem, ha Hem, ha oguejy hikuái Nefi retãme.

7 Ha péina ápe, ojuhu hikuái pe rréi tavayguakueragua oikóva Nefi retãme, ha Shilom retãme; ha ojere hesekuéra umi rréi rembiguaikuéra, ha ojejagarra, ha ojejokua ha oñemoĩ chupekuéra kaʼirãime.

8 Ha ojehu oĩ rire hikuái kaʼirãime mokõi ára aja, ojegueru jey chupekuéra pe rréi renondépe, ha ojejora chuguikuéra ijokuaha; ha oñemboʼy hikuái pe rréi renondépe, ha ojeheja chupekuéra, térã katu, ojeʼe chupekuéra ombohovái hag̃ua umi mbaʼe haʼe oporandútava.

9 Ha haʼe heʼi chupekuéra: Péina ápe, che haʼe Limhi, Noé raʼy, haʼevaʼekue Zeniff raʼy, pe osẽvaʼekue Zarahemla retãgui ohupyty hag̃ua kóva ko yvy, haʼevaʼekue ituvakuéra yvy, pe oñemoĩvaʼekue rréiramo tavayguakuéra ñeʼẽ rupi.

10 Ha koʼág̃a aikuaase mbaʼérepa pendepyʼaguasuete peñemoag̃ui hag̃ua ko tavaguasu tápiare, chete aime jave pe okẽme che rembiguaikuéra ndive.

11 Ha koʼág̃a, péva rupi aheja peẽ peñeñongatu, che ikatu hag̃ua aporandu peẽme, ndaupéichairire, ahejavaʼerãmoʼã che rembiguaikuéra pendejuka. Ojeheja peẽme peñeʼẽ.

12 Ha koʼág̃a, Ammón ohechámarõ ojehejaha chupe oñeʼẽ, oho ha ojayvy pe rréi renondépe; ha opuʼãjeývo, heʼi: O rréi, ameʼẽ aguyje Tupãme ko árape aikove haguére, ha ojeheja haguére chéve añeʼẽ; ha añehaʼãta añeʼẽ pyʼaguasúpe;

13 Aikuaa porãgui cheikuaárire nderehejaivaʼerãmoʼã oñemoĩ chéve koʼã jokuaha. Che haʼégui Ammón, peteĩ Zarahemla ñemoñare, ha ajupi Zarahemla retãgui aporandu hag̃ua ore joykeʼykuéragui, Zeniff ogueruvaʼekue upe tetãgui.

14 Ha ojehu Limhi ohendu rire Ammón ñeʼẽ, ovyʼaiterei, ha heʼi: Koʼág̃a aikuaa porã che joykeʼykuéra oĩvaʼekue Zarahemla retãme oikoveha gueteri. Ha koʼág̃a avyʼáta; ha koʼẽrõ ahejáta che tavayguakuéra ovyʼa avei.

15 Ha péina ápe, roime lamanita-kuéra poguýpe, ha oñemoĩ ore ári peteĩ mbaʼe hasyetereíva jagueropuʼaka hag̃ua. Ha koʼág̃a, péina ápe, ore joykeʼykuéra oremosãsóta ore ñeñapytĩmbýgui, térã lamanita-kuéra pógui, ha roikóta hembiguaikuéraramo; iporãvégui roime nefita-kuéra rembiguáiramo rohepymeʼẽrangue pirapire lamanita-kuéra rréipe.

16 Ha koʼág̃a, rréi Limhi heʼi hembiguaikuérape anive hag̃ua ojokua Ammón ha ijoykeʼykuérape, ha katu toheja oho hikuái pe yvytýpe oĩva Shilom nórte gotyo, ha ogueru ijoykeʼykuérape pe tavaguasúpe, ikatu hag̃ua okaru, hoyʼu, ha opytuʼu hikuái ijeguatágui; ohaságui hikuái heta mbaʼe, ohasa hikuái ñembyahýi, yʼuhéi ha kaneʼõ.

17 Ha koʼág̃a, ojehu upe koʼẽme rréi Limhi omondo peteĩ momarandu opa itavayguakuéra apytépe, oñembyaty hag̃ua hikuái témplope, ohendu hag̃ua umi ñeʼẽ haʼe heʼítava chupekuéra.

18 Ha ojehu oñembyaty rire hikuái oñeʼẽ chupekuéra péicha, heʼívo: O peẽ, che tavayguakuéra, pemopuʼã pene akã ha peneangapyhy; péina ápe, pe ára hiʼaig̃uímagui, térã namombyrýi, nañaimemoʼãveimaha ñande rayhuʼỹha poguýpe, jepeve umi ñane ñorairõ heta, haʼevaʼekue mbaʼerei; upevére ajerovia oĩ gueteriha peteĩ ñorairõ ovalétava.

19 Upévare, pemopuʼã pene akã ha pevyʼa, ha pemoĩ pende jerovia Tupãre, pe Tupã haʼevaʼekue Abraham, ha Isaac, ha Jacob Tupã; ha avei, pe Tupã oguenohẽvaʼekue Israel-pe Egipto retãgui, ha ombohasavaʼekue chupekuéra mar rojo rupive haʼerõguáicha yvy ikãva ári, ha omongaruvaʼekue chupekuéra mana reheve ani hag̃ua omano hikuái taveʼỹme; ha hetave mbaʼe haʼe ojapókuri hesekuéra.

20 Ha avei, upéva upe Tupã ogueruvaʼekue ñande rukuérape Jerusalén retãgui, ha oñangareko ha oñongatuvaʼekue itavayguakuérape jepe koʼág̃a peve; ha péina ápe, ñane rembiapovai ha ñane rembiapokyʼa rupi haʼe ñandeguerúkuri ñeñapytĩmbýpe.

21 Ha opavave peẽ haʼe testígo ko árape, Zeniff, oñemoĩvaʼekue rréiramo kóva ko tavayguakuéra ári, haʼe ohupytysetereígui pe ituvakuéra yvy, upévare oñembotavy chupe pe rréi Lamán katupyry ha japu rupive, ojapovaʼekue peteĩ ñeʼẽmeʼẽ rréi Zeniff ndive, ha omoĩ ipópe peteĩ yvy pehẽngue, térã pe tavaguasu Lehi-Nefi, ha Shilom tavaguasu; ha umi yvy ijypypegua—

22 Ha opa koʼã mbaʼe haʼe ojapo, oipyʼajopy térã ogueru hag̃uánte ñeñapytĩmbýpe kóva ko tavayguakuérape. Ha péina ápe, ore koʼág̃a romeʼẽ tetãme jehepymeʼẽ lamanita-kuéra rréipe, haʼéva ore avati, ha ore cebada, ha jepe opa ore granokuéra mbytere, tahaʼe haʼéva; ha ore mymbakuéra ha ore mymbaʼatykuéra ñemoña mbytere; ha lamanita-kuéra rréi ojerure oréve opa mbaʼe roguerekóva mbytere, térã romeʼẽvaʼerã ore rekove.

23 Ha koʼág̃a, ndahasyieterei piko kóva jagueropuʼaka hag̃ua? Ha ndatuichái piko, ko ñande jehasaʼasy? Koʼág̃a péina ápe, jaguereko heta mbaʼére ñanerasẽ hag̃ua.

24 Heẽ, haʼe peẽme, jaguerekoha tuicha mbaʼére ñanerasẽ hag̃ua; ha péina ápe, mboy piko ñande joykeʼykuéra ojejukavaʼekue, ha huguykuéra oñeñohẽ rei, ha opa koʼã mbaʼe pe tembiapovai rupi.

25 Ha kóva ko tavayguakuéra ndoʼáirire tembiapovaípe Ñandejára ndohejaivaʼerãmoʼã ou hiʼarikuéra ko tuicha mbaʼevai. Ha katu péina ápe, nohenduséi hikuái iñeʼẽnguéra; ha katu oñepyrũ oĩ joavy ijapytepekuéra, hetaiterei, oñohẽ meve hikuái huguykuéra.

26 Ha ojuka hikuái peteĩ Ñandejára profétape; heẽ, peteĩ kuimbaʼe Tupã oiporavovaʼekue, oñeʼẽvaʼekue chupekuéra hekoñaña ha hembiapokyʼáre, ha oprofetisa heta mbaʼe oikótava rehe; heẽ, jepe Cristo jeju rehe.

27 Ha heʼi haguére chupekuéra Cristo haʼeha Tupã, opa mbaʼe Túva, ha heʼi omoĩtaha ijehe kuimbaʼe raʼanga, ha haʼéta pe taʼanga kuimbaʼe ojejapo haguéicha iñepyrũmbýpe; térã ambue ñeʼẽme, heʼi pe kuimbaʼe ojejapohague Tupã raʼangáicha, ha Tupã oguejytaha yvypóra raʼykuéra apytépe, ha ojagarráta ijehe toʼo ha tuguy, ha ohóta yvy ape ári—

28 Ha koʼág̃a, haʼe heʼi haguére kóva, ojuka chupe hikuái; ha heta mbaʼe ojapove hikuái oguerúva hiʼarikuéra Tupã ñekoʼõi. Upévare, máva piko ohecharamóta oĩ haguére hikuái ñeñapytĩmbýpe, ha ojeipyʼajopy haguére chupekuéra tuichaite jeikoʼasy reheve?

29 Ha péina ápe, Ñandejára heʼivaʼekue: Naipytyvõmoʼãi che tavayguakuérape hembiapovai ára aja; ha katu ambyaíta hapekuéra ani hag̃ua oñakãrapuʼã hikuái; ha hembiapokuéra haʼéta ita ñepysangaháicha henondepekuéra.

30 Ha avei, haʼe heʼi: Che tavayguakuéra oñotỹramo mbaʼekyʼakuéra omonoʼõta hatykue pe yvytuʼatãjerépe; ha upéva haʼe popĩa.

31 Ha haʼe heʼi jey: che tavayguakuéra oñotỹramo mbaʼekyʼakuéra omonoʼõta hikuái pe yvytu kuarahyresẽvopegua, oguerúva ñehundi pyaʼe.

32 Ha koʼág̃a, péina ápe, Ñandejára ñeʼẽmeʼẽ oñekumplíma, ha peẽ pejeipyʼajopy ha peikoʼasy.

33 Ha katu pejeréramo Ñandejára gotyo korasõ añetépe, ha pemoĩramo pende jerovia hese, ha peipytyvõramo chupe opa pene apytuʼũ jesarekópe, pejapóramo kóva, haʼe, heʼiháicha ha oipotaháicha, penemosãsóta pe ñeñapytĩmbýgui.