1 Ha ojehu oĩ heta pe ñemoñareʼaty pyahu apytépe ndaikatúiva oikũmby rréi Benjamín ñeʼẽnguéra, michĩgui gueteri hikuái ára haʼe oñeʼẽramoguare itavayguakuérape; ha ndogueroviái hikuái ituvakuéra jepokuaa.

2 Ndogueroviái hikuái ojeʼevaʼekue umi omanomavaʼekue jeikovejeýre, ni ndogueroviái hikuái pe Cristo jeju rehegua.

3 Ha koʼág̃a ijegueroviaʼỹ rupi ndaikatúi oikũmby hikuái Tupã ñeʼẽ; ha oñemohatã ikorasõkuéra.

4 Ha noñemongaraiséi hikuái; ni ndojoajuséi pe tupaópe. Ha oiko chuguikuéra peteĩ tavayguakuéra ojeíva ijeroviápe, ha péicha opyta hikuái upe ára guive, hoʼo ha angaipa ñeimépe; nohenoiséigui hikuái Ñandejára Itupãme.

5 Ha koʼág̃a rréi Mosíah oisãmbyhy aja ndohupytýi hikuái ni pe Tupã tavayguakuéra mbytere; ha katu pe joavy oĩva joykeʼykuéra apytépe rupi oñembohetave hikuái.

6 Ha ojehu haʼekuéra iñeʼẽ mbojuruheʼẽme ombotavy hetápe, haʼéva tupaopegua, ha ojapouka chupekuéra heta angaipa; upévare oñeikotevẽ umi tupaopegua ojapóramo angaipa, tupao toñemoñeʼẽ chupekuéra.

7 Ha ojehu ojegueraha chupekuéra umi sacerdote renondépe, ha umi mboʼehára omeʼẽ chupekuéra umi sacerdote-pe; ha umi sacerdote ogueraha chupekuéra Alma renondépe, haʼéva pe sumo sacerdote.

8 Koʼág̃a rréi Mosíah omeʼẽkuri Alma-pe autorida tupao ári.

9 Ha ojehu Alma ndoikuaái mbaʼeve chuguikuéra; ha katu oĩ heta testígo hesekuéra; heẽ, heta umi tavayguakuéra ou ha otestifika hembiapovaikuéragui.

10 Koʼág̃a koʼã mbaʼe ndojehúivaʼekue pe tupaópe upe mboyve; upévare Alma ojejopy ijespíritupe, ha oguerahauka chupekuéra pe rréi renondépe.

11 Ha heʼi upe rréipe: Péina ápe, hetápe rogueru nerenondépe, ijoykeʼykuéra ombojáva hesekuéra tembiapovai; heẽ, ha ojejuhu chupekuéra opáichagua tembiapovaípe. Ha haʼekuéra noñearrepentíri hembiapovaikuéragui; upévare rogueru nerenondépe, nde rehusga hag̃ua chupekuéra hembiapovaikuérare.

12 Ha katu upe rréi Mosíah heʼi Alma-pe: Péina ápe, che ndahusgái chupekuéra; upévare amoĩ chupekuéra nde pópe ojehusga hag̃ua.

13 Ha koʼág̃a Alma espíritu ojepyʼapy jey; ha haʼe oho ha oporandu Ñandejárape mbaʼépa ojapovaʼerã upe mbaʼére, haʼe okyhyjégui ojapóramo g̃uarã ivaíva Ñandejára renondépe.

14 Ha ojehu oñohẽmba rire hiʼánga Tupãme, Ñandejára ñeʼẽ ou chupe, heʼívo:

15 Rejehovasáva nde, Alma, ha ojehovasáva umi oñemongaraivaʼekue Mormón ykuérape. Ha nde rejehovasa rejerovia rupi che rembiguái Abinadí ñeʼẽrente.

16 Ha ojehovasáva haʼekuéra ijerovia tuicha rupi umi ñeʼẽ nde erevaʼekuérente chupekuéra.

17 Ha rejehovasáva nde remoĩ haguére peteĩ tupao ko tavayguakuéra apytépe; ha haʼekuéra oñemoĩta, ha haʼéta hikuái che tavayguakuéra.

18 Heẽ, ojehovasáva ko tavayguakuéra oĩporãgui hikuái ogueraha hag̃ua che réra; che réra rupi oñehenóitagui chupekuéra; ha chembaʼe hikuái.

19 Ha reporandu haguére chéve pe hembiapovaíva rehe, nde rejehovasa.

20 Nde haʼe che rembiguái; ha ajapo nendive konvénio rehupytytaha tekove opaveʼỹva; ha nde chepytyvõta ha resẽta che rérape, ha rembyatýta che ovechakuéra.

21 Ha ohenduséva che ñeʼẽ haʼéta che ovecha; ha remog̃uahẽta chupe tupaópe, ha che avei amog̃uahẽta chupe.

22 Ha katu péina ápe, kóva haʼe che tupao; opavave oñemongaraíva oñemongaraíta arrepentimientorã. Ha opavave emog̃uahẽvape ogueroviavaʼerã che réra; ha che pojerápe aperdonáta chupe.

23 Che haʼégui ajagarráva chejehe yvóra angaipakuéra; che haʼégui ajapovaʼekue chupekuéra; ha che haʼe ameʼẽva pe ogueroviávape ipahaite peve peteĩ tenda che po akatúape.

24 Ha katu péina ápe, che réra rupi oñehenói hikuái; ha haʼekuéra cheikuaáramo oúta, ha oguerekóta hikuái peteĩ tenda che po akatúape tapiaite peve.

25 Ha ojehúta upe trompéta mokõiha ipu vove upéramo umi arakaʼeve ndachekuaaivaʼekue oúta ha oñemboʼýta che renondépe.

26 Ha upéramo haʼekuéra oikuaáta che haʼeha Ñandejára Itupã, che haʼeha Irredentor; ha katu haʼekuéra noñerredimiseivaʼekue.

27 Ha upéramo che haʼéta chupekuéra arakaʼeve ndaikuaaihague chupekuéra; ha ohóta hikuái peteĩ tata opaveʼỹvape oñembosakoʼivaʼekue aña ha hiʼangelkuérape g̃uarã.

28 Upévare che haʼe ndéve, pe nohenduséivape che ñeʼẽ, upévape neremog̃uahẽmoʼãi che tupaópe, che namog̃uahẽmoʼãigui chupe upe ára pahápe.

29 Upévare che haʼe ndéve, tereho, ha opavave hembiapovaívape cherehe, pévape rehusgáta umi angaipa ojapovaʼekuére; ha omombeʼúramo iñangaipakuéra nerenonde ha cherenondépe, ha oñearrepentíramo ikorasõ añetépe, reperdonáta chupe, ha che avei aperdonáta chupe.

30 Heẽ, ha opa ára che tavayguakuéra oñearrepentíramo aperdonáta chupekuéra umi hembiapovai cherehe.

31 Ha peẽ avei peñoperdonáta ojupe pene rembiapovaikuéra; añetehápe haʼégui ndéve, pe noperdonáiva hembiapovaikue hapichápe, haʼe heʼírõ oñearrepentiha, upéva ogueru hiʼári kondenasiõ.

32 Koʼág̃a che haʼe ndéve, tereho; ha opavave noñearrepentiséiva iñangaipágui upéva ndojeipapamoʼãi che tavayguakuéra apytépe; ha kóva ojejapóta koʼág̃a guive tenondeve peve.

33 Ha ojehu Alma ohendúvo koʼã ñeʼẽ haʼe ohai ikatu hag̃uáicha oguereko umíva, ha ikatu hag̃ua ohusga tupaogua tavayguakuérape umi Tupã rembiapoukapy heʼiháicha.

34 Ha ojehu Alma oho ha ohusga umi ojejuhuvaʼekue tembiapovaípe, Ñandejára ñeʼẽ heʼiháicha.

35 Ha opavave oñearrepentíva iñangaipágui ha omombeʼúva, umívape haʼe oipapa tupaogua tavayguakuéra apytépe.

36 Ha umi nomombeʼuséiva iñangaipakuéra ha noñearrepentiséiva hembiapovaígui, umívape ndojeipapái tupaogua tavayguakuéra apytépe, ha herakuéra ojeipeʼa.

37 Ha ojehu Alma omboguata opa mbaʼe tupaogua; ha oñepyrũ jey oguereko hikuái pyʼaguapy ha oñakãrapuʼã tuicha umi mbaʼe tupaopeguápe, oguatávo hikuái ñeñangarekópe Tupã renondépe, omog̃uahẽvo hetápe, ha omongaraívo hetápe.

38 Ha koʼág̃a Alma ha umi ipytyvõhára oisãmbyhýva pe tupao ojapo opa koʼã mbaʼe, oguatávo opa jesarekópe, omboʼévo Tupã ñeʼẽ opa mbaʼépe, ohasávo opáichagua jeikoʼasy, oñemuñávo hikuái opa umi ndahaʼéiva Tupã tupaopeguáre.

39 Ha haʼekuéra oñemoñeʼẽ ijoykeʼykuérape; ha avei oñemoñeʼẽ hikuái, opavave Tupã ñeʼẽ rupi, iñangaipakuérare, térã umi angaipa ojapovaʼekuére, heʼívo chupekuéra Tupã, oñemboʼe meme hag̃ua, ha omeʼẽ hag̃ua aguyje opa mbaʼépe.