Escritura-kuéra
Mosíah 13


Ñembyaty 13

Abinadí oñemoʼã Tupã rehegua puʼaka rupive—Haʼe omboʼe umi diez tembiapoukapykuéra—Pe salvasiõ ndoúi Moisés léi rupive añónte—Tupãite voi ojapóta peteĩ expiasiõ ha orredimíta itavayguakuérape. 148 ary rupi Cristo mboyve.

1 Ha koʼág̃a pe rréi ohendu rire koʼã ñeʼẽnguéra, heʼi isacerdotekuérape: Pegueraha pe kuimbaʼépe, ha pejuka; ha mbaʼe piko haʼe ñandéve g̃uarã, haʼe niko itavyrai.

2 Ha oñemotenonde ha oñehaʼã omoĩ hikuái ipo hiʼári; ha katu haʼe ogueropuʼaka, ha heʼi chupekuéra:

3 Ani pepoko cherehe, Tupã pendepyʼajopýta pemoĩramo pende po che ári, neʼĩragui ameʼẽ pe ñemomarandu Ñandejára heʼivaʼekue chéve ameʼẽ hag̃ua; ni ndaʼéi gueteri peẽme pejerurevaʼekue chéve haʼe hag̃ua; upévare, Tupã ndohejamoʼãi che añehundi koʼág̃a.

4 Ha katu ajapovaʼerã umi tembiapoukapykuéra Tupã heʼivaʼekue chéve; ha haʼégui peẽme añetegua pendepochy chendive. Ha avei, añeʼẽ haguére Tupã ñeʼẽ, chehusga chetavyraiha.

5 koʼág̃a ojehu Abinadí oñeʼẽ rire koʼã ñeʼẽnguéra rréi Noé tavayguakuéra noñanimái omoĩ ipo hiʼári, Ñandejára Espíritu oĩgui hiʼári, ha hova ojajái mimbi tuichaitereíva reheve, jepe Moiséicha Sinai yvytýpe, oñeʼẽramo guare Ñandejára ndive.

6 Ha haʼe oñeʼẽ Tupã puʼaka ha autorida reheve; ha oñeʼẽve, heʼívo:

7 Peẽ pehecha ndapeguerekoiha puʼaka chejuka hag̃ua, upévare che ambopaháta che ñemomarandu. Heẽ, ha ahecha pendejopyha pene korasõme che haʼégui pe añetegua pene rembiapovaikuérare.

8 Heẽ, ha che ñeʼẽnguéra penemyenyhẽ techaramo ha jurujáigui, ha pochýgui.

9 Ha katu che ambopaháta che ñemomarandu; ha upe rire taha ahahápe, ajesalváma guive.

10 Ha katu haʼe peẽme koʼãva, pejapóva chendive, kóva rire, haʼéta ñemohaʼanga ha taʼanga umi mbaʼe oútavagui.

11 Ha koʼág̃a amoñeʼẽ peẽme Tupã rembiapoukapykuéra rembyre, ahechágui umíva ndojehaíriha pene korasõme; che ahecha peñemoarandu ha pemboʼehague tembiapovai hetave ára pende rekove aja.

12 Ha koʼág̃a, penemanduʼa haʼehague peẽme: Nderejapomoʼãi mbaʼevéichagua taʼanga jejapopyre, ni mbaʼevéichagua mbojoja mbaʼeve yvate yvágape oĩva rehe, ni mbaʼeve yvýpe oĩva rehe, térã umi oĩva ykuérape yvyguýpe.

13 Ha avei: Nereñesũmoʼãi henondepekuéra, ni nereipytyvõmoʼãi chupekuéra; che Ñandejára nde Tupã haʼégui peteĩ Tupã hakateʼỹva, amboúva tuvakuéra rembiapovai taʼyrakuéra ári, mbohapyha ha irundyha ñemoñareʼaty peve umi ndacherayhúivagui;

14 Ha ahechauka poriahuvereko miles umi che rayhúvape ha iñeʼẽrendúva che rembiapoukapykuérare.

15 Nderejagarra reimoʼãi Ñandejára nde Tupã réra; Ñandejára ndohechamoʼãigui iñangaipaʼỹvaicha héra ojagarrareívape.

16 Nemanduʼáke ára japytuʼuvaʼerãháre, emomarangatu hag̃ua.

17 Séi ára rembaʼapóta, ha rejapopáta ne rembiapo;

18 Ha katu pe sétimo ára, Ñandejára nde Tupã ára japytuʼuvaʼerãhápe, nderejapomoʼãi mbaʼevéichagua tembiapo, nde, ni nde raʼy, ni nde rajy, ni kuimbaʼe ne rembiguáiva, ni kuña ne rembiaguáiva, ni ne rymbakuéra, ni nde pytagua oĩva ne rokẽ ryepýpe;

19 Ñandejára ojapógui séi árape yvága ha yvy, ha yguasu, ha opa mbaʼe ipype oĩva; upévare, Ñandejára ohovasa pe ára japytuʼuvaʼerãha, ha omomarangatu.

20 Emombaʼeguasu nde sy ha nde rúpe, oñembopuku hag̃ua nde arakuéra yvy ári Ñandejára nde Tupã omeʼẽvaʼekue ndéve.

21 Ndereporojukamoʼãi.

22 Nderejapomoʼãi ñemoakãratĩ. Neremondamoʼãi.

23 Neremopuʼãmoʼãi ñeʼẽ añeteguaʼỹva nde rapicha rehe.

24 Ndereipotamoʼãi nde rapicha róga, ni ndereipotamoʼãi nde rapicha rembireko, ni kuimbaʼe hembiguáiva, ni kuña hembiguáiva, ni iguéi, ni imburika, ni mbaʼeve haʼéva nde rapicha mbaʼe.

25 Ha ojehu Abinadí heʼipa rire koʼã ñeʼẽ, haʼe heʼi chupekuéra: Pemboʼe piko ko tavayguápe oñehaʼãvaʼerãha ojapopa hikuái koʼã mbaʼe iñeʼẽrendu hag̃ua koʼã tembiapoukapykuérare?

26 Che haʼe peẽme, Nahániri, pejapórire, Ñandejára ndohejaivaʼerãmoʼã che aju aprofetisa hag̃ua mbaʼevai ko tavayguakuéra rehe.

27 Ha koʼág̃a peẽ pejékuri pe salvasiõ ouha Moisés léi rupi. Che haʼe peẽme tekotevẽha peneñeʼẽrendu gueteri pe Moisés léire; ha katu haʼe peẽme, outaha ára noñeikotevẽmoʼãvéimaha oñeñeʼẽrendu Moisés léire.

28 Ha avei, che haʼe peẽme, pe salvasiõ ndouiha upe léi rupi añónte; ha ndahaʼéirire pe expiasiõ Tupãite voi ojapótava itavayguakuéra angaipa ha rembiapovaíre, haʼekuéra omanomantevaʼerã, upe Moisés léi jepevére.

29 Ha koʼág̃a haʼe peẽme oñeikotevẽhague oñemeʼẽ peteĩ léi Israel raʼykuérape, heẽ, jepe peteĩ léi ipohyietéva; haʼégui hikuái peteĩ tavayguakuéra ipyʼahatãva, ipyaʼéva ojapo hag̃ua tembiapovai ha imbeguéva imanduʼa hag̃ua Ñandejára Itupã rehe;

30 Upévare, oñemeʼẽ chupekuéra peteĩ léi, heẽ, peteĩ léi rembipota ha ordenánsa reheguáva, peteĩ léi haʼekuéra oñehaʼãvaʼerã ojapo porã ára ha ára, oñemomanduʼa hag̃ua chupekuéra Tupãre ha hembiaporã hendive g̃uarãre.

31 Ha katu péina ápe, che haʼe peẽme opa koʼã mbaʼe haʼeha ñemohaʼanga umi mbaʼe oútavagui.

32 Ha koʼág̃a, oikũmby piko hikuái upe léi? Che haʼe peẽme, Nahániri, haʼekuéra noikũmbyiete upe léi; ha kóva ikorasõ atã rupi; noikũmbýigui hikuái avave yvypóra ndaikatumoʼãiha ojesalva ndahaʼéiramo tupã rredensiõ rupive.

33 Ha péina ápe, ndoprofetisái piko Moisés chupekuéra pe Mesías jeju rehe, ha Tupã orredimitaha itavayguakuérape? Heẽ, ha jepeve opa profetakuéra oprofetisavaʼekue yvóra ñepyrũmby guive—noñeʼẽi piko hetave térã mbovyve koʼã mbaʼe rehe?

34 Ndeʼíri piko hikuái Tupãite voi oguejytaha yvypóra raʼykuéra apytépe, ha ojagarrataha ijehe kuimbaʼe raʼanga, ha ohotaha puʼaka reheve yvy ape ári?

35 Heẽ, ha ndeʼíri piko avei hikuái haʼe ojapotaha omanomavaʼekue jeikovejey, ha haʼete ojejopy ha oñemoingoʼasytaha?