1 Ha ojehu Amulón opytãporã lamanita-kuéra rréi resa renondépe; upévare, lamanita-kuéra rréi oheja chupe ha ijoykeʼykuérape toñehenói mboʼeháraramo itavayguakuéra ári, heẽ, jepe tavayguakuéra oĩva Shemlón retãme g̃uarã, ha Shilom retãme, ha Amulón retãme.

2 Lamanita-kuéra ojagarráguikuri opa koʼã yvy; upévare, lamanita-kuéra rréi ohenóikuri rreikuéra opa koʼã tetã ári.

3 Ha koʼág̃a pe lamanita-kuéra rréi réra haʼe Lamán, oñemeʼẽvo chupe itúva réra; ha upévare oñehenói chupe rréi Lamán. Ha haʼe rréi tavayguakuéra hetaitereíva ári.

4 Ha haʼe ohenói mboʼeharakuéra Amulón joykeʼykuéra apytégui opa umi tetã itavayguakuéra oguerekóvape g̃uarã; ha péicha oñepyrũ oñemboʼe Nefi ñeʼẽ opa lamanita-kuéra tavayguakuéra apytépe.

5 Ha haʼekuéra haʼe peteĩ tavayguakuéra ipyʼaporãva oñondive; upevére ndoikuaái hikuái Tupãme; ni Amulón joykeʼykuéra nomboʼéi chupekuéra mbaʼeve pe Ñandejára Itupã rehegua, ni pe Moisés léi; ni nomboʼéi chupekuéra umi Abinadí ñeʼẽ;

6 Ha katu omboʼe chupekuéra oguerahavaʼerãha hikuái ikuatiajehaipyre, ha ohaivaʼerã ojupe hikuái.

7 Ha péicha lamanita-kuéra oñepyrũ oñembotuichave pirapirépe, ha oñepyrũ oñemu oñondive ha oñembotuicha, ha oiko chuguikuéra tavayguakuéra ikatupyry ha iñarandúva, pe yvóra iñaranduháicha, heẽ, peteĩ tavayguakuéra ikatupyrýva, horýva opáichagua tekoñaña ha ñemondápe, ha katu ndaʼupéichai ijoykeʼykuéra apytépe.

8 Ha koʼág̃a ojehu Amulón oñepyrũ oiporu autorida Alma ha ijoykeʼykuéra ári, ha oñepyrũ omuña chupe, ha ojapo itaʼyrakuéra omuña umíva raʼykuérape.

9 Amulón oikuaágui Alma-pe, haʼehague peteĩva umi rréi sacerdote-kuéra apytégui, ha haʼe ogueroviahague Abinadí ñeʼẽ ha upévare oñemosẽvaʼekue pe rréi renondégui, ha upévare ipochy hendive; oĩgui haʼe rréi Lamán poguýpe, upevére oiporu autorida hiʼarikuéra, ha omeʼẽ chupekuéra hembiaporã, ha omoĩ mburuvicha hiʼarikuéra.

10 Ha ojehu tuichaiterei ijehasaʼasykuéra ha oñepyrũ ojerureʼasyeterei hikuái Tupãme.

11 Ha Amulón heʼi chupekuéra anive hag̃ua ojerureʼasy; ha omoĩ ñangarekoharakuéra omaña hag̃ua hesekuéra, ikatu hag̃uáicha ojetopávape oñemboʼéva hína Tupãme ojejuka.

12 Ha Alma ha itavayguakuéra ndohupivéi iñeʼẽ Ñandejára Itupãme, ha katu oñohẽ hikuái chupe ikorasõ; ha haʼe oikuaa ikorasõkuéra oipotáva.

13 Ha ojehu Ñandejára ñeʼẽ ou chupekuéra ijeikoʼasýpe, heʼívo: Pehupi pene akã ha peñemokyreʼỹ, aikuaágui pe konvénio pejapovaʼekue chendive; ha che ajapóta konvénio che tavayguakuéra ndive ha amosãsóta chupekuéra ñeñapytĩmbýgui.

14 Ha avei ambovevýita umi mbaʼepohýi oñemoĩva pene lómo ári, jepe ndaikatúi peve peñandu pende apére, jepeve peime aja ñeñapytĩmbýpe; ha kóva che ajapóta peẽ haʼe hag̃ua chéve testígoramo koʼág̃a guive, ha peikuaa porã hag̃ua che, pe Tupã Ñandejára, ajuha che tavayguakuérape ijeikoʼasýpe.

15 Ha koʼág̃a ojehu umi mbaʼepohýi oñemoĩvaʼekue Alma ha ijoykeʼykuéra ári oñembovevýi; heẽ; Ñandejára omombarete chupekuéra ha upéicha ogueropuʼaka hikuái imbaʼepohyikuéra ndahasýi hag̃ua, ha oñemeʼẽ hikuái vyʼápe ha ñehaʼarõkuaa reheve opa Ñandejára rembipotápe.

16 Ha ojehu tuichaitereígui ijerovia ha iñehaʼarõkuaa Ñandejára ñeʼẽ oujey chupekuéra, heʼívo: Peñemokyreʼỹ, koʼẽrõ pomosãsótagui ñeñapytĩmbýgui.

17 Ha heʼi Alma-pe: Nde rehóta ko tavayguakuéra renonderã, ha che aháta nendive ha amosãsóta ko tavayguakuérape ñeñapytĩmbýgui.

18 Koʼág̃a ojehu pyharekue Alma ha itavayguakuéra ombyaty hymbaʼatykuéra, ha avei hiʼyva raʼỹikuéragui; heẽ, jepe pyhare pukukue ombyaty hikuái hymbaʼatykuéra.

19 Ha pyhareve Ñandejára ojapo peteĩ jeke atã tou lamanita-kuéra ári, heẽ, ha opa huvichakuéra oke hatã.

20 Ha Alma ha itavayguakuéra osẽ pe taveʼỹme; ha oho rire pe ára pukukue aja omoĩ hikuái hogaaokuéra peteĩ yvytypaʼũme, ha ombohéra hikuái upe yvytypaʼũme Alma, haʼe ogueraha haguére chupekuéra pe taveʼỹre.

21 Heẽ, ha yvytypaʼũ Alma-pe oñohẽ hikuái hiʼaguyje Tupãme haʼe oiporiahuvereko haguére chupekuéra, ha ombovevýikuri imbaʼepohyikuéra, ha omosãso chupekuéra ñeñapytĩmbýgui; haʼekuéra oĩguikuri ñeñapytĩmbýpe, ha avave ndaikatúi omosãso chupekuéra ndahaʼéiramo Ñandejára Itupã.

22 Ha omeʼẽ hikuái aguyje Tupãme, heẽ, opa ikuimbaʼe ha opa kuña ha opa imitãnguéra ikatúva oñeʼẽ omopuʼã iñeʼẽ momorãme Itupãme.

23 Ha koʼág̃a Ñandejára heʼi Alma-pe: Ejapura ha esẽ nde ha ko tavayguakuéra ko tetãgui, lamanita-kuéra opáymagui ha nemuña; upévare esẽ ko tetãgui, ha che ajokóta lamanita-kuérape ko yvytypaʼũme anive omuña hikuái ko tavayguakuérape.

24 Ha ojehu osẽ hikuái pe yvytypaʼũgui, ha omoñepyrũ hikuái iguata pe taveʼỹre.

25 Ha oĩ rire hikuái pe taveʼỹre doce ára aja og̃uahẽ Zarahemla retãme; ha rréi Mosíah omog̃uahẽ avei chupekuéra vyʼápe.