1 Ha che joykeʼykuéra, aipotajey pejapysaka porã cherehe, aguerekovégui haʼevaʼerã peẽme; ha péina ápe, aguereko mbaʼe haʼevaʼerã peẽme umi oútavare.

2 Ha umi mbaʼe haʼétava peẽme ojeikuaauka chéve peteĩ Tupã ángel rupive. Ha heʼi chéve: Epáy; ha apáy, ha péina ápe haʼe oñemboʼy cherenondépe.

3 Ha heʼi chéve: Epáy, ha ehendu umi ñeʼẽ haʼétava ndéve; ha péina ápe, che aju haʼe hag̃ua ndéve mbaʼe porã pyahu tuicha vyʼa rehegua.

4 Ñandejára ohendúgui ne ñemboʼe, ha ohusga nde rekojojaha, ha chembou haʼe hag̃ua ndéve revyʼa hag̃ua; ha emomarandu hag̃ua nde tavayguakuérape, haʼekuéra henyhẽ hag̃ua avei vyʼágui.

5 Ha péina ápe, ou ára, ha namombyrýi, puʼakápe, Ñandejára Ipuʼakapáva orreináva, haʼevaʼekue, ha haʼéva ára apyraʼỹgui ára apyraʼỹmeve, oguejytaha yvágagui yvyporakuéra raʼy apytépe, ha oikóta peteĩ tete yvyguiguápe, ha ohóta yvyporakuéra apytépe, ojapóvo tuicha milágro, omonguerávo hasývape, omopuʼã omanóvape, omboguata umi oguataʼỹvape, ha ojapóvo umi ohechaʼỹva tohechajey, ha umi ohenduʼỹva tohendujey, ha omonguerávo opáichagua mbaʼasy.

6 Ha omombóta okápe umi aña, térã umi espíritu ñaña oikóva yvyporakuéra raʼy korasõme.

7 Ha péina ápe, haʼe ohasáta pyʼaraʼã, ha tete rasy, ñembyahýi, yʼuhéi, ha kaneʼõ, tuichavéva yvypóra ikatúvagui ohasa, omanoʼỹre; ha péina ápe, tuguy osẽta opa ipirekua rupi, tuichaitereíta ijehasaʼasy itavayguakuéra rekoñaña ha rembiapovaíre.

8 Ha hérata Jesucristo, Tupã raʼy, Túva yvága ha yvypegua, opa mbaʼe Apohare iñepyrũmby guive; ha isy hérata María.

9 Ha péina ápe, haʼe ou imbaʼekuéravape, pe salvasiõ og̃uahẽ hag̃ua yvyporakuéra raʼýpe pe hérare jerovia rupive; ha jepeve opa koʼã mbaʼe rire, ohecháta chupe hikuái yvypóraicha, ha heʼíta hikuái oguerekoha ipype peteĩ aña, ha oinupãta ha ojukáta hikuái chupe kurusúre.

10 Ha mbohapy ára rire opuʼãjeýta omanovaʼekue apytégui, ha péina ápe, haʼe opuʼã ohusga hag̃ua yvórape; ha péina ápe, opa koʼã mbaʼe ojejapo oguejy hag̃ua peteĩ huísio ijojáva yvyporakuéra raʼy ári.

11 Ha péina ápe, huguy oexpia avei umi Adán rembiapovai rupi hoʼavaʼekue angaipakuérare, umi omanovaʼekue oikuaaʼỹre Tupã oipotáva chuguikuéra, térã ojapovaʼekue angaipa jeikuaaʼỹme.

12 Ha katu ái, ái pe oikuaáva opuʼãha hína Tupã rehe! Mavave koʼãvape ndoʼúigui upe salvasiõ ndahaʼéirõ pe arrepentimiénto ha jerovia rupive Ñandejára Jesucristo rehe.

13 Ha Tupã Ñandejára ombou iprofetakuéra marangatúpe opa yvyporakuéra raʼy apytépe, heʼi hag̃ua koʼã mbaʼe opa rréino, tetã ha ñeʼẽme, péicha rupi opa umi ogueroviáva Cristo outaha, umíva tohupyty iñangaipa jora, ha tovyʼa hikuái peteĩ vyʼa tuichaitévape, haʼe oumaramoguáicha ijapytepekuéra.

14 Upevére Tupã Ñandejára ohechákuri itavayguakuéra haʼeha peteĩ tavaygua ipyʼahatãva, ha omoĩkuri chupekuéra peteĩ léi, heẽ, pe Moisés léi.

15 Ha ohechauka chupekuéra heta techauka, ha techapyrã, ha taʼanga, pe ijeju rehegua; ha avei profetakuéra marangatu oñeʼẽ chupekuéra ijeju rehe; ha upevére omohatã ikorasõkuéra, ha noikũmbýi hikuái pe Moisés léi ndaikatuiha mbaʼeve ojapo ndahaʼéiramo pe huguy expiasiõ rupive.

16 Ha jepe ikatúrire umi mitã michĩva ojapo angaipa, ndaikatumoʼãikuri ojesalva hikuái; ha katu haʼe ndéve umíva ojehovasapyrevaha; ha péina ápe, Adán-pe, térã pe naturaleza rupi, haʼekuéra hoʼaháicha, upéicha avei Cristo ruguy oexpia iñangaipakuéra.

17 Ha avei, che haʼe ndéve ndaiporimoʼãiha ambue térã oñemeʼẽva ni ambue tape ni guataha og̃uahẽ hag̃ua salvasiõ yvyporakuéra raʼýpe, ndahaʼéirõ Cristo rérape ha rupi añónte, upe Ñandejára Ipuʼakapáva.

18 Ha péina ápe haʼe ohusga, ha ihuísio ijoja; ha pe mitã omanóva michĩ aja nomanói; ha katu yvyporakuéra hoyʼu kondenasiõ hiʼangakueraitépe g̃uarã noñemomirĩriramo ha haʼejey hikuái mitã michĩcha, ha oguerovia hikuái pe salvasiõ haʼehague, ha haʼe, ha ouvaʼerãha Cristo, Ñandejára Ipuʼakapáva ruguy expiatóriope ha upéva rupive.

19 Ha pe yvypóra inaturálva niko haʼe Tupãme ohayhuʼỹva, ha haʼevaʼekue Adán hoʼa guive, ha haʼéta tapiaite peve, noñemeʼẽiramo Espíritu Santo heʼívape, ha ojehekýi pe yvypóra natural-gui, ha oñemomarangatu pe Cristo Ñandejára expiasiõ rupive, ha haʼejey peteĩ mitã michĩvaicha, iñeʼẽrendúva, ndaipochýiva, oñemomirĩva, ha ohaʼarõkuaáva, henyhẽva mborayhúgui, ha oñemoĩséva Ñandejára poguýpe opa mbaʼépe haʼe ohusgáva iporã omoĩ hiʼári, pe mitã michĩ oñemoĩháicha itúva poguýpe.

20 Ha avei, che haʼe ndéve, oúta ára peteĩ Salvador-gui jeikuaa isarambitaha opa tetã, avaretã, ñeʼẽ ha tavayguakuéra apytépe.

21 Ha péina ápe, og̃uahẽ vove upe ára, mavave ndahaʼéiramo umi mitã michĩ, ndojejuhumoʼãi kulpaʼỹre Tupã renondépe, ndahaʼéiramo arrepentimiénto ha jeguerovia rupi Tupã Ñandejára Ipuʼakapáva rérare.

22 Ha jepe koʼág̃a, remboʼémavo nde tavayguakuérape umi mbaʼe nde Tupã Ñandejára heʼivaʼekue ndéve, upéicha rupi ndojejuhuvéima hikuái kulpaʼỹre Tupã resa renondépe, ndahaʼéirõ umi ñeʼẽ añeʼẽvaʼekue ndéve rupi añónte.

23 Koʼág̃a che añeʼẽkuri umi ñeʼẽ Tupã Ñandejára heʼivaʼekue chéve.

24 Ha péicha heʼi Ñandejára: Umíva oĩta testimónio omimbipávaramo kóva ko tavayguakuéra rehe, pe huísio árape; ha umívare ojehusgáta chupekuéra, opavave yvypóra hembiapo haguéicha, tahaʼe iporãva térã ivaíva.

25 Ha iñañáramo oñemoĩta chupekuéra pe mbaʼevaietépe ohechaukátava chupekuéra iñangaipa ha hembiapokyʼakuéra, omboguevítava chupekuéra Ñandejára renondégui peteĩ tekoʼasy ñeimépe ha peteĩ jehasaʼasy opaveʼỹvape, ndaikatumoʼãihágui oujey hikuái; upévare hoyʼu hikuái kondenasiõ hiʼángakuérape g̃uarã.

26 Upévare, hoyʼu hikuái pe Tupã ñekoʼõi kópagui, ndaikatumoʼãiva pe hustísia onega chupekuéra ndaikatuiháicha onega Adán-pe hoʼataha hoʼúramo guare pe yva ojeʼuʼỹvaʼerãgui; upévare, pe poriahuvereko ndaikatumoʼãvéima ojerure hesekuéra tapiaite peve.

27 Ha ijehasaʼasy haʼe peteĩ lágo tata ha asufre-guiguávaicha, hata ogueʼỹva, ha hatatĩ ojupíva tapiaite peve. Péicha heʼi chéve Ñandejára. Amén.