1 Saib seb, kuv cov kwv tij, nej tsis nco qab tias nej tau nyeem tus yaj saub Xenos tej lus lawm los, uas nws hais rau tsev neeg Ixayees, hais tias:

2 Cia li mloog, auj nej cov uas yog tsev neeg Ixayees es, thiab cia li mloog kuv tej lus, tus uas yog tus Tswv ib tug yaj saub.

3 Vim saib seb, tus Tswv hais li no tias, auj tsev neeg Ixayees es, kuv yuav muab nej piv rau ib tsob ntoo txiv roj nyeg, uas ib tug txiv neej tau coj mus tu nyob hauv nws lub vaj txiv ntoo roj; thiab tsob ntoo ntawd tau loj tuaj, thiab ciaj ua tsob ntoo txwj ntoo laus, thiab tau pib lwj mus.

4 Thiab tau muaj tias tus tswv vaj txiv ntoo roj tau tawm mus xyuas, thiab nws tau pom tias nws tsob ntoo txiv roj tau pib lwj; thiab nws hais tias: Kuv yuav muab tsob ntoo yim, thiab khawb av ncig, thiab tu, xwv kom tsob ntoo no yuav hlav tau tej ceg mos thiab tshiab tuaj, thiab yuav tsis tuag.

5 Thiab tau muaj tias nws tau mus yim tsob ntoo, thiab tau khawb av ncig, thiab mus tu raws li nws tej lus.

6 Thiab tau muaj tias tom qab ntau hnub tsob ntoo txiv roj tau pib hlav ob peb tug ceg mos thiab tshiab tuaj; tiam sis saib seb, lub ntsis ntawm tsob ntoo pib tuag mus.

7 Thiab tau muaj tias tus tswv ntawm lub vaj txiv ntoo roj pom tsob ntoo, thiab nws hais rau nws tus tub qhe tias: Ua rau kuv nyuaj siab uas kuv yuav xiam tsob ntoo no mus; yog li ntawd, cia li mus thiab rho ib tsob ntoo txiv roj qus tej ceg, thiab nqa los rau kuv ntawm no; thiab wb yuav rho tej ceg nyeg uas tab tom yuav qhuav mus no pov tseg, thiab wb yuav muab tej no pov rau hauv hluav taws xwv kom tej no yuav kub hnyiab mus.

8 Thiab saib seb, tus Tswv ntawm lub vaj txiv ntoo roj hais tias, kuv muab ntau tus ntawm tej ceg uas mos thiab tshiab no coj mus, thiab kuv yuav muab tej ceg no txuas rau qhov twg los xij uas kuv xav muab txuas; thiab tsis ua li cas txawm hais tias tsob ntoo no tej cag yuav piam sij mus, kuv thiaj yuav tshwj tau tej txiv ntawm tsob ntoo no rau kuv tus kheej; yog li ntawd, kuv yuav coj tej ceg uas mos thiab tshiab no, thiab kuv yuav muab tej ceg no txuas rau qhov twg los xij uas kuv xav muab txuas.

9 Koj cia li coj tej ceg ntawm tsob ntoo txiv roj qus, thiab muab tej ceg no coj los txuas rau hauv, los pauv cov ceg nyeg tej qub chaw; thiab cov ceg uas kuv tau muab rho pov tseg kuv yuav muab pov rau hauv hluav taws thiab muab tej ceg no hlawv, xwv kom tej ceg no thiaj li tsis sw tej av ntawm kuv lub vaj txiv ntoo roj.

10 Thiab tau muaj tias tus Tswv ntawm lub vaj txiv ntoo roj ntawd tus tub qhe ua raws nkaus li tus Tswv ntawm lub vaj txiv ntoo roj txoj lus, thiab tau muab tej ceg ntawm tsob ntoo txiv roj qus coj los txuas rau.

11 Thiab tus Tswv ntawm lub vaj txiv ntoo roj txib kom yuav tsum khawb av ncig tsob ntoo, thiab yim, thiab tu, hais rau nws tus tub qhe hais tias: Ua rau kuv nyuaj siab uas kuv yuav xiam tsob ntoo no mus; yog li ntawd, kom tej zaum kuv yuav tshwj tau tsob ntoo no tej cag tseg cia kom txhob piam sij, xwv kom kuv yuav tshwj tau tej cag tseg cia rau kuv tus kheej, kuv thiaj tau ua tej yam no.

12 Yog li ntawd, koj cia li mus; saib xyuas tsob ntoo, thiab tu tsob ntoo, raws li kuv tej lus.

13 Thiab kuv yuav muab cov ceg no coj mus tso rau qhov chaw uas deb tshaj plaws ntawm kuv lub vaj txiv ntoo roj, qhov twg los xij kuv, tsis ua li cas rau koj; thiab kuv ua li no xwv kom kuv yuav tshwj tau tej ceg nyeg ntawm tsob ntoo rau kuv tus kheej; thiab xwv kom kuv yuav tshwj tau cov txiv ntawm tsob ntoo rau kuv tus kheej rau lub caij uas yuav los; vim ua rau kuv nyuaj siab uas kuv yuav xiam tsob ntoo thiab cov txiv ntawm tsob ntoo no mus.

14 Thiab tau muaj tias tus Tswv ntawm lub vaj txiv ntoo roj tau ncaim mus, thiab muab tej ceg ntawm tsob ntoo txiv roj nyeg coj mus zais rau hauv tej chaw uas deb tshaj plaws ntawm lub vaj txiv ntoo roj, muab ib txhia coj mus tso rau ib qho thiab muab ib txhia coj mus tso rau lwm qhov, raws li nws lub siab xav thiab siab nyiam.

15 Thiab tau muaj tias ib lub sij hawm ntev dhau mus, thiab tus Tswv ntawm lub vaj txiv ntoo roj hais rau nws tus tub qhe hais tias: Los, cia wb mus rau nram lub vaj txiv ntoo roj, xwv kom wb thiaj tau ua hauj lwm nyob hauv lub vaj txiv ntoo roj.

16 Thiab tau muaj tias tus Tswv ntawm lub vaj txiv ntoo roj, thiab nws tus tub qhe thiab, tau mus rau nram lub vaj txiv ntoo roj mus ua hauj lwm. Thiab tau muaj tias tus tub qhe hais rau nws tus tswv hais tias: Saib seb, ntsia ntawm no; saib tsob ntoo seb.

17 Thiab tau muaj tias tus Tswv ntawm lub vaj txiv ntoo roj ntsia thiab pom tsob ntoo uas tau muab tej ceg ntoo txiv roj qus coj los txuas rau; thiab tsob ntoo tau pib loj hlob tuaj thiab tau pib txi txiv. Thiab nws tau pom tias tsob ntoo loj zoo nkauj; thiab cov txiv ntawm tsob ntoo los kuj zoo ib yam li cov txiv nyeg.

18 Thiab nws hais rau tus tub qhe tias: Saib seb, tej ceg ntawm tsob ntoo qus muaj peev xwm nqus tau dej los ntawm tsob ntoo no tej cag, ua rau tej cag ntawd muaj zog tuaj; thiab vim yog tsob ntoo no tej cag muaj zog, cov ceg qus thiaj tau txi txiv ntoo nyeg. Nim no, yog hais tias wb tsis tau muab cov ceg no los txuas rau, ces ntshai tsob ntoo no twb raug piam sij lawm. Thiab nim no, saib seb, kuv yuav khaws tau txiv ntoo ntau cia, uas yog tsob ntoo no tau txi; thiab cov txiv ntawd kuv yuav tseg cia rau kuv tus kheej rau lub caij uas yuav los.

19 Thiab tau muaj tias tus Tswv ntawm lub vaj txiv ntoo roj hais rau tus tub qhe tias: Los, cia wb mus rau tom tej chaw uas deb tshaj plaws ntawm lub vaj txiv ntoo roj, thiab saib seb tej ceg nyeg ntawm tsob ntoo puas tau txi txiv ntau ib yam thiab, xwv kom kuv yuav tseg tau cov txiv ntawm tsob ntoo ntawd cia rau kuv tus kheej rau lub caij uas yuav los.

20 Thiab tau muaj tias nkawd mus rau ntawm qhov uas tus tswv tau muab tej ceg nyeg ntawm tsob ntoo coj mus zais, thiab nws hais rau tus tub qhe tias: Ntsia cov no saib; thiab tus tub qhe pom thawj thawj ceg tias tau txi txiv ntau; thiab nws kuj pom tias yog ib qho uas zoo. Thiab nws hais rau tus tub qhe tias: De cov txiv ntawm thawj ceg ko, thiab khaws cia rau lub caij uas yuav los, xwv kom kuv yuav ceev cia rau kuv tus kheej; vim saib seb, nws hais tias, kuv tau tu tsob ntoo no los ntev npaum li no, thiab tsob ntoo no tau txi txiv ntau.

21 Thiab tau muaj tias tus tub qhe hais rau nws tus tswv tias: Yog vim li cas koj ho tuaj cog tsob ntoo no, los sis tus ceg ntawm tsob ntoo, rau ntawm no? Vim saib seb, qhov chaw yog qhov uas phem tshaj plaws ntawm tej av nyob hauv koj lub vaj txiv ntoo roj.

22 Thiab tus Tswv ntawm lub vaj txiv ntoo roj hais rau nws tias: Tsis txhob ntuas kuv; kuv yeej paub tias qhov chaw no yog ib thaj av tsis zoo; yog li ntawd, kuv thiaj hais rau koj tias, kuv tau tu tsob ntoo no ntev npaum li no, thiab koj pom tias tsob ntoo no tau txi txiv ntau.

23 Thiab tau muaj tias tus Tswv ntawm lub vaj txiv ntoo roj hais rau nws tus tub qhe tias: Ntsia ntawm no saib; saib seb kuv kuj tau cog ib tug ceg ntawm tsob ntoo ntxiv thiab; thiab koj paub tias thaj av no haj yam tsis zoo npaum li thawj thaj. Tiam sis, saib tsob ntoo seb. Kuv tau tu tsob ntoo no ntev npaum li no, thiab tsob ntoo no tau txi txiv ntau heev; yog li ntawd, cia li sau cov txiv no, thiab tseg cia rau lub caij uas yuav los, xwv kom kuv yuav tshwj tau cov txiv ntawd rau kuv tus kheej.

24 Thiab tau muaj tias tus Tswv ntawm lub vaj txiv ntoo roj rov qab hais rau nws tus tub qhe dua tias: Ntsia ntawm no saib, thiab saib dua lwm tus ceg thiab, uas kuv tau cog; saib seb kuv kuj tau tu nws tib yam thiab, thiab nws tau txi txiv.

25 Thiab nws hais rau tus tub qhe tias: Ntsia ntawm no thiab saib tus ceg uas yog tus kawg. Saib seb, tus ceg no kuv tau muab cog rau hauv qhov av zoo; thiab kuv tau tu tus ceg no ntev npaum li no; thiab tsuas yog ib feem ntawm tsob ntoo thiaj txi txiv nyeg xwb, thiab ib feem txi txiv qus; saib seb, kuv tau tu tsob ntoo no ib yam nkaus li lwm tsob.

26 Thiab tau muaj tias tus Tswv ntawm lub vaj txiv ntoo roj hais rau tus tub qhe tias: Cia li muab tej ceg uas tsis txi txiv zoo rho, thiab muab pov rau hauv hluav taws.

27 Tiam sis saib seb, tus tub qhe hais rau nws tias: Cia wb muab tsob ntoo no yim, thiab khawb av ncig, thiab tu kom ib nyuag ntev zog ntxiv, xwv kom tej zaum tsob ntoo no yuav txi tau cov txiv zoo rau koj, xwv kom koj yuav khaws tau cia rau lub caij uas yuav los.

28 Thiab tau muaj tias tus Tswv ntawm lub vaj txiv ntoo roj thiab tus tub qhe ntawm tus Tswv ntawm lub vaj txiv ntoo roj tau tu tag nrho cov txiv ntawm lub vaj txiv ntoo roj.

29 Thiab tau muaj tias ib lub sij hawm ntev dhau mus, thiab tus Tswv ntawm lub vaj txiv ntoo roj hais rau nws tus tub qhe hais tias: Los, cia wb mus rau nram lub vaj txiv ntoo roj, xwv kom wb thiaj tau ua hauj lwm nyob hauv lub vaj txiv ntoo roj dua. Vim saib seb, lub caij nyoog twb los ze ze, thiab qhov kawg twb yuav los sai sai; yog li ntawd, kuv yuav tsum tau khaws cov txiv ntoo cia rau lub caij uas yuav los, rau kuv tus kheej.

30 Thiab tau muaj tias tus Tswv ntawm lub vaj txiv ntoo roj thiab tus tub qhe mus rau nram lub vaj txiv ntoo roj; thiab nkawd mus rau ntawm tsob ntoo uas tau muab tej ceg nyeg lov tawm, thiab tau muab tej ceg qus coj los txuas rau; thiab saib seb txhua hom txiv tau txi ua rau tsob ntoo qaug.

31 Thiab tau muaj tias tus Tswv ntawm lub vaj txiv ntoo roj tau saj cov txiv, txhua hom tsis hais hom ntau tshaj thiab hom tsawg tshaj, thiab tus Tswv ntawm lub vaj txiv ntoo roj hais tias: Saib seb wb tau tu tsob ntoo no ntev npaum li no, thiab kuv tau khaws tej txiv ntau cia rau kuv tus kheej rau lub caij uas yuav los.

32 Tiam sis saib seb, zaum no tsob ntoo tau txi txiv ntau heev, thiab tsis muaj ib lub uas zoo li. Thiab saib seb, muaj txhua hom txiv phem; thiab tsis muaj nuj nqis dab tsi rau kuv, txawm tias wb tau sib zog ua hauj lwm; thiab nim no ua rau kuv nyuaj siab uas kuv yuav xiam tsob ntoo no mus.

33 Thiab tus Tswv ntawm lub vaj txiv ntoo roj tau hais rau tus tub qhe tias: Wb yuav ua li cas rau tsob ntoo, xwv kom kuv yuav rov qab tshwj tau cov txiv zoo ntawm tsob ntoo rau kuv tus kheej dua?

34 Thiab tus tub qhe hais rau nws tus tswv tias: Saib seb, vim koj tau muab tej ceg ntoo txiv roj qus coj los txuas rau tej ceg no tau pab tej cag, es tej cag thiaj ciaj sia nyob thiab tsis tau piam sij; yog li ntawd koj pom hais tias tej cag no tseem zoo.

35 Thiab tau muaj tias tus Tswv ntawm lub vaj txiv ntoo roj hais rau nws tus tub qhe tias: Tsob ntoo tsis muaj nuj nqis dab tsi rau kuv, thiab tej cag ntawd tsis muaj nuj nqis dab tsi rau kuv yog tias tsob ntoo tseem txi cov txiv phem.

36 Txawm li ntawd los, kuv paub tias tej cag yeej zoo, thiab kuv tau muab tshwj cia rau kuv tej lub hom phiaj; thiab vim tej cag no muaj zog heev tej cag no thiaj tau txi txiv zoo ua ntej lub sij hawm no, los ntawm tej ceg qus.

37 Tiam sis saib seb, tej ceg qus tau loj tuaj thiab loj duav tej cag ntawm tsob ntoo; thiab vim tias tej ceg qus tau loj yeej tej cag ntawm tsob ntoo li ntawd, tau txi cov txiv phem ntau; thiab vim tias tau txi cov txiv phem ntau heev koj pom tias tsob ntoo no pib piam sij mus; thiab tsis ntev yuav siav, xwv kom yuav muab pov rau hauv hluav taws, tsuas yog tias wb ua tej yam rau tsob ntoo no pab muab tshwj cia xwb.

38 Thiab tau muaj tias tus Tswv ntawm lub vaj txiv ntoo roj hais rau nws tus tub qhe tias: Cia wb mus rau nram qhov chaw uas deb tshaj plaws nyob hauv lub vaj txiv ntoo roj, thiab saib seb tej ceg nyeg puas txi cov txiv phem thiab.

39 Thiab tau muaj tias nkawd mus rau nram qhov chaw uas deb tshaj plaws hauv lub vaj txiv ntoo roj. Thiab tau muaj tias nkawd pom tias cov txiv ntawm tej ceg nyeg kuj tau lwj tas; muaj tseeb tiag, thawj cov ceg thiab cov ceg thib ob thiab cov ceg nav thiab; thiab cov txiv tag nrho tau lwj tas.

40 Thiab cov txiv ntoo qus ntawm tus ceg nav tau loj yeej feem ntawm tsob ntoo uas txi cov txiv zoo, ua rau tus ceg tau qhuav thiab tuag mus.

41 Thiab tau muaj tias tus Tswv ntawm lub vaj txiv ntoo roj los kua muag, thiab hais rau tus tub qhe tias: Tshuav dab tsi ntxiv uas kuv tsis tau ua rau kuv lub vaj txiv ntoo roj?

42 Saib seb, kuv paub tias tag nrho cov txiv hauv lub vaj txiv ntoo roj tau lwj tas, tsuas yog tshuav cov no xwb. Thiab nim no cov no uas thaum ub tau txi cov txiv zoo kuj tau lwj tas; thiab nim no txhua tsob ntoo uas nyob hauv kuv lub vaj txiv ntoo roj tsis zoo ua tus dab tsi tsuas yog tias muab ntov kom vau thiab pov rau hauv hluav taws xwb.

43 Thiab saib seb tsob ntoo kawg no, uas tej ceg tau qhuav mus lawm, kuv twb muab cog rau hauv ib qho av uas zoo; muaj tseeb tiag, twb yog qhov chaw uas kuv paub tias zoo tshaj lwm qhov av uas nyob hauv kuv lub vaj txiv ntoo roj.

44 Thiab koj pom tias kuv kuj ntov tej ntoo uas ntxoov thaj av no, xwv kom kuv yuav tau muab tsob ntoo no cog rau ntawm qhov no.

45 Thiab koj pom tias muaj ib txhia ceg ntawd tau txi cov txiv zoo, thiab muaj ib txhia ntawd ho txi cov txiv qus; thiab vim tias kuv tsis tau txiav tej ceg ntawd thiab tsis tau muab pov rau hauv hluav taws, saib seb, tej ceg ntawd tau loj yeej tej ceg uas zoo ua rau tej ceg uas zoo qhuav mus.

46 Thiab nim no, saib seb, txawm tias wb tau ua txhua yam los pab rau kuv lub vaj txiv ntoo roj los, tej ntoo no tseem lwj tas, ua rau tej ntoo no tsis txi cov txiv uas zoo; thiab kuv tau cia siab tias yuav tshwj cov no cia, cia rau kuv tus kheej rau lub caij uas yuav los. Tiam sis, saib seb, tej tsob ntoo no tau hloov los zoo li tej ntoo txiv roj qus, thiab tsis muaj nuj nqis dab tsi tsuas yog tias muab ntov kom vau thiab pov rau hauv hluav taws xwb; thiab ua rau kuv nyuaj siab uas kuv yuav xiam tej tsob ntoo no.

47 Tiam sis tshuav dab tsi ntxiv uas kuv tsis tau ua nyob hauv kuv lub vaj txiv ntoo roj? Puas yog kuv nkaum kuv txhais tes, es kuv thiaj tsis tau tu lub vaj? Tsis yog li ntawd, kuv twb tau tu kuv lub vaj txiv ntoo roj, thiab kuv tau khawb av ncig, thiab kuv tau yim, thiab kuv tau muab chiv rau kuv lub vaj; thiab kuv tau xyab kuv txhais tes yuav luag tas hnub, thiab qhov kawg twb los txog ze lawm. Thiab ua rau kuv nyuaj siab uas kuv yuav tau muab tag nrho cov ntoo hauv kuv lub vaj txiv ntoo roj ntov pov tseg, thiab muab cov ntoo pov rau hauv hluav taws xwv kom yuav kub hnyiab mus. Leej twg yog tus ua rau kuv lub vaj txiv ntoo roj lwj?

48 Thiab tau muaj tias tus tub qhe hais rau nws tus tswv tias: Puas yog txoj kev khav theeb ntawm koj lub vaj txiv ntoo roj—puas yog tej ceg ntawd tau loj yeej tej cag uas zoo? Thiab vim yog tej ceg tau loj yeej tej cag ntawd, saib seb tej ceg loj hlob nrawm dua tej cag lub zog, muaj lub zog rau lawv tus kheej. Saib seb, kuv hais tias, puas yog qhov no ua rau tej ntoo hauv koj lub vaj txiv ntoo roj lwj tas?

49 Thiab tau muaj tias tus Tswv ntawm lub vaj txiv ntoo roj hais rau tus tub qhe tias: Cia wb mus thiab muab cov ntoo ntawm lub vaj txiv ntoo roj ntov kom vau thiab muab pov rau hauv hluav taws, xwv kom thiaj li tsis sw tej av hauv kuv lub vaj txiv ntoo roj, vim kuv twb tau ua txhua yam. Tseem tshuav dab tsi uas kuv tsis tau ua rau kuv lub vaj txiv ntoo roj?

50 Tiam sis, saib seb, tus tub qhe hais rau tus Tswv ntawm lub vaj txiv ntoo roj tias: Cia lub vaj nyob ib nyuag ntev me ntsis tso.

51 Thiab tus Tswv tau hais tias: Muaj tseeb tiag, kuv yuav cia kuv lub vaj nyob ib nyuag ntev me ntsis tso, vim ua rau kuv nyuaj siab uas kuv yuav xiam cov ntoo hauv kuv lub vaj txiv ntoo roj mus.

52 Yog li ntawd, cia wb muab tej ceg no uas kuv tau muab cog rau hauv tej chaw uas deb tshaj hauv kuv lub vaj txiv ntoo roj, thiab cia wb muab txuas rov rau tej ntoo uas tau txiav ceg los; thiab cia wb muab tej ceg uas txi cov txiv iab tshaj txiav pov tseg, thiab muab tej ceg nyeg ntawm tsob ntoo coj los txuas rau tej ntawd qhov chaw.

53 Thiab kuv yuav ua li no xwv kom tsob ntoo thiaj li tsis piam sij, kom, tej zaum, kuv yuav tshwj tau tej cag ntawm tsob ntoo rau kuv lub hom phiaj.

54 Thiab, saib seb, tej cag ntawm tej ceg nyeg ntawm tsob ntoo uas kuv tau muab cog rau qhov twg los xij kuv tseem muaj sia; yog li ntawd, xwv kom kuv yuav tshwj tau tej cag no cia rau kuv tus kheej lub hom phiaj thiab, kuv yuav txiav tsob ntoo no tej ceg, thiab kuv yuav muab tej ceg coj mus txuas rau tej cag no. Muaj tseeb tiag, kuv yuav muab tsob niam ntoo tej ceg txuas rau tej cag no, xwv kom kuv yuav tshwj tau tej cag rau kuv tus kheej, xwv kom thaum muaj zog txaus tej cag yuav txi cov txiv uas zoo rau kuv, thiab tej zaum kuv tseem yuav tau yeeb koob los ntawm cov txiv ntawm kuv lub vaj txiv ntoo roj.

55 Thiab tau muaj tias nkawd muab tej ceg nyeg ntawm tsob ntoo uas tau hloov los ua ntoo qus, thiab tau muab txuas rau tsob ntoo nyeg, uas kuj tau hloov los ua ntoo qus lawm thiab.

56 Thiab nkawd kuj tau muab tej ceg ntawm tej ntoo nyeg uas tau hloov los ua ntoo qus, thiab tau muab txuas rau tsob niam ntoo.

57 Thiab tus Tswv ntawm lub vaj txiv ntoo roj hais rau tus tub qhe tias: Tsis txhob muab tej ceg qus txiav tawm ntawm tej ntoo, tsuas yog txiav tej uas iab tshaj xwb; thiab koj cia li muab txuas rau tej ntoo ntawd raws li tej uas kuv tau hais.

58 Thiab wb yuav rov tu tej ntoo ntawm lub vaj txiv ntoo roj dua, thiab wb yuav yim tej ceg ntawd; thiab wb yuav muab tej ceg uas qhuav lawm, uas yeej yuav piam sij mus, thiab muab pov rau hauv hluav taws.

59 Thiab kuv ua li no xwv kom, tej zaum, tej cag ntawd yuav muaj zog tuaj vim yog tej cag txoj kev zoo; thiab vim yog tau muab tej ceg ntawd sib hloov, tej zaum tej uas zoo yuav loj yeej tej uas phem.

60 Thiab vim tias kuv tau muab tej ceg nyeg thiab tej cag ntawd tshwj cia, thiab vim tias kuv tau muab tej ceg nyeg rov qab los txuas rau tsob niam ntoo, thiab tau tshwj tsob niam ntoo ntawd tej cag cia, xwv kom, tej zaum, tej ntoo hauv kuv lub vaj txiv ntoo roj yuav rov txi cov txiv uas zoo; thiab kom kuv yuav rov muaj kev xyiv fab rau cov txiv hauv kuv lub vaj txiv ntoo roj, thiab, tej zaum, kom kuv yuav xyiv fab kawg nkaus tias kuv tau muab tej cag thiab tej ceg ntawm thawj cov txiv tshwj cia—

61 Yog li ntawd, cia li mus, thiab hu cov tub qhe, xwv kom peb yuav rau siab ntso ua hauj lwm tas peb lub dag lub zog nyob hauv lub vaj txiv ntoo roj, xwv kom peb yuav npaj tau txoj kev, xwv kom kuv yuav muaj cov txiv nyeg dua tuaj, cov txiv nyeg uas yog cov zoo thiab cov uas qab tshaj plaws dua tag nrho lwm cov txiv.

62 Yog li ntawd, cia peb mus thiab ua hauj lwm kom tas peb dag peb zog zaum kawg no, vim saib seb qhov kawg los txog ze lawm, thiab zaum no yog zaum kawg uas kuv yuav yim kuv lub vaj txiv ntoo roj.

63 Txuas tej ceg rau; pib txuas tej tom kawg ua ntej xwv kom tej no yuav tau los ua thawj, thiab cov tom thawj ho yuav tau los ua qab, thiab khawb av ncig cov ntoo, tag nrho cov laus thiab cov mos, cov thawj thiab cov nav; thiab cov nav thiab cov thawj, xwv kom yuav tu tau tag nrho ib zaug ntxiv ua zaum kawg.

64 Yog li ntawd, khawb av ncig, thiab yim, thiab rau chiv rau cov ntoo no, ib zaug ntxiv, ua zaum kawg, vim qhov kawg los txog ze lawm. Thiab yog tias tej ceg uas txuas zaum kawg no ho loj hlob, thiab txi tau cov txiv nyeg, ces nej yuav npaj txoj kev rau lawv, xwv kom tej ceg no yuav loj hlob.

65 Thiab thaum tej ceg no pib loj hlob tuaj nej yuav tsum muab tej ceg uas txi cov txiv iab tshem mus, raws li lub zog ntawm tej ceg uas zoo thiab seb tej ceg uas zoo ntawd loj npaum li cas; thiab nej tsis txhob ua tib zaug muab tej ceg uas phem ntawd tshem mus kom tag nrho, nyob tsam tej cag ntawd ho muaj zog dhau rau cov uas muab los txuas, thiab cov uas muab los txuas ntawd ho piam sij, thiab ua rau kuv xiam cov ntoo ntawm kuv lub vaj txiv ntoo roj mus.

66 Vim ua rau kuv nyuaj siab uas kuv yuav xiam tej ntoo ntawm kuv lub vaj txiv ntoo roj; yog li ntawd nej yuav tsum muab cov phem tshem mus raws li cov zoo yuav loj tuaj, xwv kom tej cag thiab tej ntsis yuav muaj zog sib npaug zos, kom txog thaum cov zoo yuav loj yeej cov phem, thiab cov phem raug ntov kom vau thiab muab pov rau hauv hluav taws, xwv kom tsis txhob sw tej av ntawm kuv lub vaj txiv ntoo roj; thiab kuv yuav cheb cov phem tawm ntawm kuv lub vaj txiv ntoo roj mus zoo li no.

67 Thiab kuv yuav muab tej ceg ntawm tsob ntoo nyeg rov qab los txuas rau tsob ntoo nyeg;

68 Thiab kuv yuav muab tej ceg ntawm tsob ntoo nyeg txuas rau tej ceg nyeg ntawm tsob ntoo; thiab kuv yuav rov coj los ua ke zoo li no, xwv kom yuav txi cov txiv nyeg, thiab lawv yuav los ua ib tsob.

69 Thiab yuav muab cov phem pov tseg, muaj tseeb tiag, twb yuav pov tawm hauv tag nrho tej av ntawm kuv lub vaj txiv ntoo roj mus; vim saib seb, kuv yuav yim kuv lub vaj txiv ntoo roj tib zaug no xwb.

70 Thiab tau muaj tias tus Tswv ntawm lub vaj txiv ntoo roj xa nws tus tub qhe; thiab tus tub qhe tau mus thiab ua raws li tus Tswv tau txib nws, thiab coj lwm cov tub qhe; thiab lawv tsis muaj coob.

71 Thiab tus Tswv ntawm lub vaj txiv ntoo roj hais rau lawv tias: Cia li mus, thiab ua hauj lwm nyob hauv lub vaj txiv ntoo roj, nrog nej lub dag lub zog. Vim saib seb, zaum no yog zaum kawg uas kuv yuav tu kuv lub vaj txiv ntoo roj; vim qhov kawg twb yuav txog lawm, thiab lub caij twb yuav los sai sai; thiab yog tias nej ua hauj lwm nrog nej lub dag lub zog nrog kuv nej yuav muaj kev xyiv fab txog cov txiv uas kuv yuav tseg cia rau kuv tus kheej rau lub caij uas yuav los sai sai no.

72 Thiab tau muaj tias cov tub qhe tau mus thiab ua hauj lwm nrog lawv lub dag lub zog; thiab tus Tswv ntawm lub vaj txiv ntoo roj los kuj nrog lawv ua hauj lwm thiab; thiab lawv tau ua raws li tus Tswv ntawm lub vaj txiv ntoo roj tej lus txib ua txhua yam.

73 Thiab rov pib muaj dua tej txiv ntoo nyeg nyob hauv lub vaj txiv ntoo roj; thiab tej ceg nyeg pib loj hlob thiab loj zoo heev li; thiab tej ceg qus raug muab txiav tawm thiab muab pov tseg; thiab lawv tau ceev tej cag thiab tej ntsis ntawm tsob ntoo nyeg kom xwm yeem, raws li tsob ntoo ntawd lub zog.

74 Thiab lawv rau siab ntso ua hauj lwm tag nrho lawv lub dag lub zog li no, raws li tus Tswv ntawm lub vaj txiv ntoo roj tej lus txib, mus txog thaum tej uas phem tau raug muab pov tseg tawm ntawm lub vaj txiv ntoo roj mus, thiab tus Tswv tau tshwj tseg cia rau nws tus kheej, tej ntoo uas rov qab txi cov txiv nyeg dua; thiab tej ntoo no tau hloov kom zoo li ib lub cev; thiab cov txiv loj xwm yeem; thiab tus Tswv ntawm lub vaj txiv ntoo roj tau tshwj tseg cia rau nws tus kheej cov txiv nyeg, uas yog cov qab tshaj plaws rau nws txij thaum chiv keeb los.

75 Thiab tau muaj tias thaum tus Tswv ntawm lub vaj txiv ntoo roj pom tias nws cov txiv yeej zoo, thiab pom tias nws lub vaj txiv ntoo roj tsis lwj ntxiv lawm, nws hu nws cov tub qhe los ua ke, thiab hais rau lawv tias: Saib seb, vim peb tau tu kuv lub vaj txiv ntoo roj ua zaum kawg; thiab nej pom tias kuv tau ua tiav raws li kuv lub siab nyiam; thiab kuv tau tshwj cov txiv nyeg tseg cia, cov txiv thiaj zoo, twb zoo ib yam li thaum chiv keeb. Thiab nej tau koob hmoov; vim rau qhov nej rau siab ua hauj lwm nrog kuv nyob hauv kuv lub vaj txiv ntoo roj, thiab tau ua raws li kuv tej lus txib, thiab coj tau cov txiv nyeg rov los rau kuv, ua rau kuv lub vaj txiv ntoo roj tsis lwj ntxiv lawm, thiab muab cov phem pov tseg, saib seb nej yuav tau kev xyiv fab nrog kuv vim yog cov txiv ntawm kuv lub vaj txiv ntoo roj.

76 Vim saib seb, rau ib lub sij hawm uas ntev heev, kuv yuav tseg cia cov txiv hauv kuv lub vaj txiv ntoo roj rau kuv tus kheej rau lub caij, uas yuav los sai sai no; thiab yog zaum kawg uas kuv tu, thiab yim, thiab khawb av ncig, thiab rau chiv rau kuv lub vaj txiv ntoo roj; yog li ntawd kuv yuav khaws cov txiv cia rau kuv tus kheej, rau ib lub sij hawm uas ntev heev, raws li qhov uas kuv tau hais.

77 Thiab thaum lub sij hawm uas cov txiv phem rov los rau hauv kuv lub vaj txiv ntoo roj dua, thaum ntawd kuv yuav ua kom cov phem thiab cov zoo raug muab sau los; thiab kuv yuav tshwj cov zoo cia rau kuv tus kheej, thiab kuv yuav muab cov phem pov rau hauv cov phem qhov chaw. Thiab thaum ntawd lub caij thiab qhov kawg los; thiab kuv yuav ua kom kuv lub vaj txiv ntoo roj raug hluav taws kub hnyiab mus.