1 Ma o lenei, o’u uso pele e, ua ou faitau atu nei mea ina ia outou iloa e uiga i feagaiga a le Alii na osifeagaiga ai o ia ma le aiga uma o Isaraelu—

2 Ia na fetalai atu e ia i tagata Iutaia, e ala i fofoga o ana perofeta paia, mai lava i le amataga e oo mai nei, mai lea tupulaga i lea tupulaga, seia oo i le taimi e toefuatai ai i latou i le ekalesia moni ma le lotoa a le Atua; pe a faapotopotoina i latou i laueleele o o latou tofi, ma faatutumauina i o latou laueleele uma o le folafolaga.

3 Faauta, o’u uso pele e, ua ou tautala atu nei mea ia te outou ina ia outou olioli, ma faaea i luga o outou ulu e faavavau, ona o faamanuiaga o le a faaee mai e le Alii le Atua i luga o a outou fanau.

4 Ona ua ou iloa ua outou suesue tele, le toatele o outou, ia outou iloa e uiga i mea o le a oo mai; o le mea lea ua ou iloa ai ua outou iloa, ae iu ina vaivai o tatou tino ma oti; e ui i lea, o le a tatou vaai i le Atua i o tatou tino.

5 Ioe, ua ou iloa ua outou iloa o le a faaali atu e ia o ia lava i le tino i e o i Ierusalema, le mea na tatou o mai ai; ona e tatau ona faia lena mea i totonu o i latou, ona e tatau i le Foafoa Silisiliese ona ia tuuina atu o ia lava ia pule i ai tagata i la le tino, ma maliu mo tagata uma, ina ia mafai ona pule o ia i tagata uma.

6 Ona e pei ona oo mai le oti i tagata uma, e faataunuu ai le fuafuaga alofa mutimutivale a le Foafoa Silisiliese, e tatau ona i ai o se mana o le toetu, ma e tatau ona oo mai le toetu i le tagata ona o le pa’ū; ma na oo mai le pa’ū ona o le solitulafono; ma talu ai ona ua pa’u’ū tagata o lea ua vavae ese ai i latou mai luma o le Alii.

7 O le mea lea, e ao ina i ai se togiola aoao e lē gata—vagana o se togiola aoao e lē gata e lē mafai e lenei tino pala ona ofu i le tino lē pala. O le mea lea, o le faasalaga muamua na oo mai i le tagata o le a tatau ona tumau pea i se umi e lē gata. Ma afai e faapea, po ua taoto ifo lenei tino ia pala ma nuti i lona tinā o le eleele, e lē toetu mai.

8 E, le poto e o le Atua, lona alofa mutimutivale ma lona alofa tunoa! Aua faauta, afai e lē toetu mai le tino, o le a pulea o tatou agaga e lena agelu na pa’ū ifo mai luma o le Atua Faavavau, ma avea ma tiapolo, e lē toe tutu mai.

9 Ma po ua avea o tatou agaga e pei o ia, ma avea i tatou ma ni tiapolo, o agelu a le tiapolo, ua tapunia i fafo mai luma o lo tatou Atua, ma mau faatasi ma le tamā o pepelo, i le pagatia, e pei o ia lava; ioe, i lena tagata o lē na faaseseina o tatou uluai matua, o lē na liua o ia lava ia foliga mai o se agelu o le malamalama, ma faaoso le fanauga a tagata i faapotopotoga faalilolilo o le fasioti tagata ma galuega faalilolilo eseese uma o le pouliuli.

10 E, le silisiliese na’uā o le agalelei o lo tatou Atua, o lē ua saunia se ala mo lo tatou sosola ese mai le ’a’apa mai a lenei sauai leaga matautia; ioe, lena sauai, o le oti ma seoli, lea ou te ta’ua o le oti o le tino, ma le oti foi o le agaga.

11 Ma ona o le ala laveai a lo tatou Atua, le Paia e Toatasi o Isaraelu, o lenei oti, lea ua ou tautala atu ai, o le oti faaletino lea, o le a laveai mai e ia e ua oti; o le oti lea o le tuugamau.

12 Ma o lenei oti ua ou tautala atu ai, o le oti faaleagaga lea, o le a tatala mai e ia ona tagata oti; o le oti faaleagaga lea o seoli; o le mea lea, e ao i le oti ma seoli ona tatala mai o laua tagata oti, ma e ao ia seoli ona tatala mai ana agaga faatagataotauaina, ma e ao i le tuugamau ona tatala mai ana tino faatagataotauaina, ma o tino ma agaga o tagata o le a toefuataiina o le tasi i le isi; ma e faia lenei mea i le mana o le toetu mai o le Paia e Toatasi o Isaraelu.

13 E, le silisiliese na’uā o le fuafuaga a lo tatou Atua! Aua i le tasi itu, e ao i le parataiso a le Atua ona tatala mai agaga o e amiotonu, ma tatala mai e le tuugamau tino o e amiotonu; ma toefuatai le agaga ma le tino ia te ia lava, ma avea ai tagata uma ma tagata tino lē pala, ma tino ola pea, ma o i latou o ni tagata ola, ua i ai le malamalama atoatoa e pei o i tatou i la le tino, vagana ai o le a atoatoa lo tatou malamalama.

14 O le mea lea, o le a tatou maua se malamalama atoatoa o a tatou sala uma, ma lo tatou eleelea, ma lo tatou lē lavalavā; ma o le a maua e e amiotonu se malamalama atoatoa o lo latou olioli, ma lo latou amiotonu, ua faaoofuina i le mamā, ioe, i le ’ofu talaloa lava o le amiotonu.

15 Ma o le a oo mai a mavae ona solo atu o tagata uma mai lenei oti muamua i le ola, ona ua avea i latou ma tagata tino ola pea, e ao ina latou o atu i luma o le nofoa-faamasino o le Paia e Toatasi o Isaraelu; ma ona oo mai ai lea o le faamasinoga, ma ona faamasino ai lea o i latou e tusa ma le faamasinoga paia a le Atua.

16 Ma e moni lava, e pei ona soifua le Alii, ua fetalai mai ai le Alii le Atua, ma o lana fetalaiga lea e faavavau, e lē mafai lava ona mavae atu, o i latou o e amiotonu o le a amiotonu pea, ma o i latou o e ua eleelea o le a eleelea pea; o le mea lea, o i latou o e ua eleelea o le tiapolo lea ma ana agelu; ma o le a latou o ese atu i le afi tumau e faavavau, ua saunia mo i latou; ma o lo latou mafatia e pei o se lepa afi ma le teiō, o lona apeafi mumu e alu a’e pea i luga e faavavau faavavau lava ma ua leai sona iuga.

17 E, le silisiliese ma le faamasinotonu o lo tatou Atua! Ona e faataunuu e ia ana fetalaiga uma, ua tuuina mai lona fofoga, ma o le a faataunuuina lava lana tulafono.

18 Ae, faauta, o e amiotonu, o le au paia lea a le Paia e Toatasi o Isaraelu, o i latou ia o e sa talitonu i le Paia e Toatasi o Isaraelu, i latou ia o e na onosaia satauro o le lalolagi, ma inoino i lona maasiasi, o le a fai mo o latou tofi le malo o le Atua, na saunia mo i latou mai le faavaega o le lalolagi, ma o lo latou olioli o le a atoatoa e faavavau.

19 E, le silisiliese o le alofa mutimutivale o lo tatou Atua, le Paia e Toatasi o Isaraelu! Ona sa ia laveai lana au paia mai lena sauai leaga mata’utia o le tiapolo, ma le oti, ma seoli, ma lena lepa afi ma le teio, o le mafatia lea e lē gata.

20 E, le silisiliese na’uā o le paia o lo tatou Atua! Ona ua silafia e ia mea uma, ma ua leai se mea ua lē silafia e ia.

21 Ma e afio mai o ia i le lalolagi ina ia mafai ona faaolaina e ia tagata uma pe afai latou te faalogo i lona siufofoga; aua faauta, e mafatia o ia i tiga o tagata uma, ioe, tiga o tagata ola uma, o tane, o fafine, ma tamaiti, o e ua i ai i le aiga o Atamu.

22 Ma e sa mafatia o ia i lenei mea ina ia mafai ona oo mai le toetu i tagata uma, ina ia mafai e tagata uma ona tutu i ona luma i lena aso tele o le faamasinoga tele.

23 Ma ua ia poloaiina tagata uma e ao ina latou salamo, ma papatiso i lona suafa, i le faatuatua atoatoa i le Paia e Toatasi o Isaraelu, po ua lē mafai ona faaolaina i latou i le malo o le Atua.

24 Ma afai latou te lē salamo ma talitonu i lona suafa, ma papatiso i lona suafa, ma tumau e oo i le iuga, o le a ta’usalaina i latou; ona o le Alii le Atua, le Paia e Toatasi o Isaraelu, ua fetalai mai ai.

25 O le mea lea, ua tuu mai ai e ia se tulafono; ma o le mea ua leai se tulafono ua tuu mai ai ua leai se faasalaga; ma o le mea ua leai se faasalaga o i ai ua leai se ta’usalaga; ma o le mea ua leai se ta’usalaga o i ai, ua i ai i le alofa mutimutivale o le Paia e Toatasi o Isaraelu le aiā i luga o i latou, ona o le togiola; ona ua laveaiina i latou e lona mana.

26 Ona ua faamalie e le togiola manaoga o lona faamasinotonu i luga o i latou uma o e sa lei tuuina atu ia te i latou le tulafono, ua laveaiina ai i latou mai lena sauai leaga matautia, o le oti ma seoli, ma le tiapolo, ma le lepa afi ma le teio, o le mafatia lea e lē gata; ma ua toefuatai ai i latou i lena Atua o lē na ia tuuina mai le manava ia te i latou, o le Paia e Toatasi lea o Isaraelu.

27 Ae oi talofa ia te ia o lē ua tuuina atu i ai le tulafono, ioe, o lē ua i ai poloaiga uma a le Atua, e pei o i tatou, ma le ua solia i latou, ma ia faama’umau aso o lona nofo vaavaaia, ona ua leaga lava lona tulaga!

28 E, lena fuafuaga faatogafiti a lē ua leaga! E, le fiasili e, ma vaivaiga, ma le valelea o tagata! Pe a aoaoina i latou ua latou manatu ua popoto i latou, ma latou lē faalogo ai i le fautuaga a le Atua, ona ua latou tuueseina, i le manatu ua latou iloa mo i latou lava, o le mea lea, o lo latou poto o le valea lea, ma o le a lē aoga ia te i latou. Ma o le a fano i latou.

29 Ae o le aoaoina e lelei pe afai latou te faalogo i fautuaga a le Atua.

30 Ae oi talofa i e mauoa, o e e mauoa i mea o le lalolagi. Auā ona ua latou mauoa ua latou inoino ai i e matitiva, ma ua latou sauaina e ua agamalu, ma ua pupū o latou loto i a latou ’oa; o le mea lea, o a latou ’oa o lo latou atua lea. Ma faauta, o a latou ’oa o le a fano faatasi foi ma i latou.

31 Ma oi talofa i e ua tutuli e lē fia faalogo; ona o le a fano i latou.

32 Oi talofa i e ua tauaso e lē fia vaai; ona o le a fano foi i latou.

33 Oi talofa i e e lei peritomeina i le loto, ona o le a taia i latou i le aso gataaga i se malamalama ia latou amioletonu.

34 Oi talofa i lē e pepelo, ona o le a lafo o ia i seoli.

35 Oi talofa i lē e fasioti tagata ma le loto i ai, ona o le a oti o ia.

36 Oi talofa ia te i latou o e e faitaaga, ona o le a lafo i latou i seoli.

37 Ioe, oi talofa ia te i latou o e e ifo i tupua, ona o le a fiafia le tiapolo o tiapolo uma ia te i latou.

38 Ma, i sona aotelega, oi talofa ia te i latou uma o e e oti ia latou agasala; ona o le a toe foi atu i latou i le Atua, ma vaai i ona fofoga, ma tumau ai ia latou agasala.

39 E, o’u uso pele e, ia manatua le leaga tele o le solitulafono faasaga i le Atua Paia; ma le leaga tele foi o le gaua’i atu i faatosinaga a lena faitogafiti poto. Ia manatua, o le mafaufau-faaletino o le oti lea, ae o le mafaufau-faaleagaga o le ola lea e faavavau.

40 E, o’u uso pele e, ia ua’i mai o outou taliga i a’u upu. Ia outou manatua le silisiliese o le Paia e Toatasi o Isaraelu. Aua tou te fai mai ua ou tautala atu mea faigata e faasaga ia te outou; aua afai o lea, o le a outou faifai e faasaga i le upumoni; ona ua ou tautala atu afioga a Lē na faia outou. Ua ou iloa ua faigata upu moni e faasaga i mea lē mamā uma; ae o e e amiotonu e lē matata’u i ai, ona ua latou alolofa i le upumoni ma lē gatete ai.

41 O lea la, o’u uso pele e, inā o mai ia i le Alii, le Paia e Toatasi. Ia outou manatua ua amiotonu ona ala. Faauta, o le ala mo le tagata ua vaapiapi, ae ua taatia tonu i se ala sa’o i ona luma, ma o le leoleo o le faitotoa o le Paia e Toatasi o Isaraelu; ma na te lē faaaogaina se auauna iina; ma ua leai se isi lava auala vagana ai i le faitotoa; ona e lē mafai ona faaseseina o ia, ona o le Alii le Atua o lona suafa lea.

42 Ma ai se e tuitui atu, o ia e tatala mai i ai e ia; ma o e ua popoto, ma e ua aoaoina, ma i latou o e ua mauoa, o e ua faafefeteina ona o lo latou aoaoina, ma lo latou popoto, ma a latou ’oa—ioe, o i latou ia o e ua inosia e ia; ma vagana ai ua latou lafoai ese ia mea, ma manatu o i latou o ni vale i luma o le Atua, ma o ifo i le loloto o le lotomaualalo, e lē tatala mai e ia ia te i latou.

43 Ae o mea a e popoto ma e faautauta o le a natia mai ia te i latou e faavavau—ioe, le fiafia lena ua saunia mo le au paia.

44 E, o’u uso pele e, ia outou manatua a’u upu. Faauta, ou te tatala ese o’u ofu, ma ou luluina i latou i o outou luma; ou te tatalo i le Atua o lo’u olataga ia silasila mai ia te a’u i lona fofoga-ati i mea uma; o le mea lea, o le a outou iloa ai i le aso gataaga, pe a faamasinoina tagata uma ia latou galuega, sa molimauina e le Atua o Isaraelu sa ou lulu ese a outou amioletonu mai lo’u agaga, ma ou tu ma le susulu i ona luma, ua ou mamā mai i o outou toto.

45 E, o’u uso pele e, liliu ese ia mai ia outou agasala; lulu ese filifili a ia o lē na te vave saisai ia te outou; o mai i le Atua lena o lē o le papa o lo outou olataga.

46 Ia saunia o outou agaga mo lena aso matagofie pe a faataunuuina le faamasinotonu i e amiotonu, le aso lava lea o le faamasinoga, ina ia outou lē solomuli i le fefefe matau’tia; ina ia outou lē manatua ma le atoatoa la outou amioletonu mata’utia, ma faamalosia ai e alalaga atu: Ua paia, ua paia lava au faamasinoga, E, le Alii e le Atua Malosi Aoao—peitai ua ou iloa la’u amioletonu; sa ou solia lau tulafono, ma o a’u soligatulafono o a a’u lava ia; ma ua saisaitia a’u e le tiapolo, ma ua fai a’u ma mailei i lona pagatia mata’utia.

47 Ae faauta, o’u uso e, pe tatau ea ona ou fagua outou i le leaga mata’utia moni o nei mea? Pe ou te lāgā ea faaatuatuvale o outou agaga pe afai o mamā o outou mafaufau? Pe ou te tautala manino atu ea ia te outou e tusa ma le manino o le upumoni pe afai ua tuusaloto outou mai i le agasala?

48 Faauta, a na faapea ua outou paia po ua ou tautala atu ia te outou e uiga i le paia; ae ona ua outou lē paia, ma ua outou vaai mai ia te a’u o se aoao, o lea ua tatau ai ona ou aoao atu ia te outou le taunuuga o le agasala.

49 Faauta, ua inoino lo’u agaga i le agasala, ma ua fiafia lo’u loto i le amiotonu; ma o le a ou viia le suafa paia o lo’u Atua.

50 O mai ia, o’u uso e, outou uma o e ua fia feinu, ia outou o mai ia i le vai; ma o ia o lē ua leai se tupe, inā sau ia e faatau ma ’ai; ioe, o mai ia e faatau atu le uaina ma le susu e aunoa ma se tupe ma aunoa ma se tau.

51 O le mea lea, aua le faaaluina tupe mo mea ua leai se aoga, po o a outou galuega mo mea e lē ma’ona ai. Faalogo mai ia te a’u ma le filiga, ma ia manatua upu ua ou tautala atu ai; ma o mai i le Paia e Toatasi o Isaraelu, ma taumamafa fiafia i mea e lē faaleagaina, pe mafai ona pala, ma tuu mai o outou agaga e fiafia i le manuia o le Atua.

52 Faauta, o’u uso pele e, ia outou manatua fetalaiga a lo outou Atua; ia outou tatalo atu ia te ia e lē aunoa i le ao, ma avatu le faafetai i lona suafa paia i le po. Ia olioli o outou loto.

53 Ma faauta i le silisiliese na’uā o feagaiga a le Alii, ma le silisiliese na’uā o lona faamaualalo i le fanauga a tagata; ma ona o lona silisiliese, ma lona alofa tunoa ma lona alofa mutimutivale, ua ia folafola mai ai ia te i tatou o le a lē faaumatiaina lava a tatou fanau, e tusa ma la le tino, ae o le a ia faasaoina i latou; ma o le a avea i latou ma se lala amiotonu i le aiga o Isaraelu i tupulaga o le lumanai.

54 Ma o lenei, o’u uso e, ou te fia tautala atili atu ia te outou; ae o le aso a taeao o le a ou ta’u atu ai ia te outou le vaega o totoe o a’u upu. Amene.