1 Ao ngkai, I a taetae nakoim, Iotebwa, ae au bina. Ko a tia ni bungiaki i nanon te rereua n tain rawawatau; eng, e bungiiko tinam i nanon bongin rawawatau ae moan te korakora.

2 Ao e na katabua te aba aio nakoim te Uea, ae te aba ae moan te kakaawaki, bwa e na riki bwa abam ma abaia kanoam ma tarim, ibukin mwengaraoim n aki toki, ngkana ko teimatoa ni kaawakin ana tua Atuan Iteraera ae Tabu.

3 Ao ngkai, Iotebwa, ae au bina, are I a tia ni karikirakea i nanon te rereua n tain karawawatakiu, e na kakabwaiako te Uea n aki toki, bwa a na aki bane n tiringaki kanoam.

4 Bwa nooria, bon kanoau ngkoe; ao Ngai bon kanoan Iotebwa are e uotaki bwa te bure nako Aikubita. Ao a bon korakora ana berita aika tabu te Uea ake e karaoi nakon Iotebwa.

5 Mangaia ae e nori ni koaua ara bong Iotebwa. Ao e karekea ana berita te Uea, bwa mai buakoia kanoana ao te Uea ae te Atua e na kateirakea te mwanga ae raoiroi nakon te bata are Iteraera; tiaki te Mesia, ma te mwanga are e oteaki, e ngae n anne, a na uringaki n ana berita aika tabu te uea bwa te Mesia e na kaotaki nakoia ni bong aika kaitira, n te mwaaka n tamnei, are n tokina ao a na kitana te ro nakon te ota—eng, n otinako man te ro ae raba ma te tautoronaki nakon te inaomata.

6 Bwa e anga ana koaua Iotebwa ni kangai: E na kateirakeaki te tia mamata iroun te Uea ae Atuau, are e na riki bwa te tia mamata ae rine nakoia kanoau.

7 Eng, e koaua ae e taku Iotebwa: E taku te Uea nakoiu: N na kateirakea te tia mamata ae rine mai buakoia kanoam; ao e na karietataki i buakoia kanoam. Ao N na anganna te tua bwa e na karaoa te mwakuri ibukiia kanoam, aika tarina, ae moan te kakawaki nakoia, ao e na taekin naba nakoia taekan taian berita aika tabu ake I a tia ni karaoi nakoia ami bakatibu.

8 Ao N na anganna te tua bwa akea te mwakuri riki teuana ae e na karaoia, ma ti te mwakuri are N na anganna. Ao N na karikia bwa te aomata ae korakora imatau; bwa e na karaoa au mwakuri.

9 Ao e na korakora n aiaron Mote, are I a tia n taekinna bwa N na kateirakea nakoimi, bwa e na kainaomataia au botanaomata, O te bata are Iteraera.

10 Ao N na kateirakea Mote bwa e na kainaomataia am botanaomata mai aban Aikubita.

11 Bwa N na kateirakea te tia mamata mai buakoia kanoam; ao N anganna te mwaaka bwa e na kona n taekin au taeka nakoia kanoam—ao tiaki ti ibukin taekinan au taeka, e taku te Uea, ma ibukin naba karekean kakoauan au taeka irouia, are e a tia n tataekinaki i buakoia i mwaaina.

12 Mangaia ae a na korea aio kanoam; ao a na koroia naba kanoan Iuta; ao te bwai are e na koreaki irouia kanoam, ma te bwai naba are e na koreaki naba irouia kanoan Iuta, a na botaki n rikirake, are a na kuneaki kaairuan reirei aika a kewe ma itabaraara, ao ni karekea te rau imarenaia kanoam, ao ni karekea nakoia te atatai ibukiia tamaia ni boong aika kaitira, ao te atatai naba ibukin au berita aika tabu, e taku te Uea.

13 Ao man te mamaara e na kakorakoraki, n te bong are e na moanaki iai au mwakuri i buakoia au botanaomata, ao n tokina are ko na manga botaki iai, ngkoe ae te bata are Iteraera, e taku te Uea.

14 Ao e a taetae ni burabeti Iotebwa ni kangai: Taraia, e na kakabwaiaki te tia mamata arei iroun te Uea; naake a kataia ni kamauna a na bon katokaki; bwa e na kakoroaki bukin te tuea aio are I a tia ni karekea mai iroun te Uea, ibukiia kanoau. Nooria, I ataia ni koaua bwa e na kakoroaki bukin te tuea aio;

15 Ao e na titebo arana ma arau; ao e na ingoanaki n aran tamana. Ao e na katotongai; n aron te bwai are e na uotia te Uea rinanon baina, ni mwaakan te Uea e na kairiia au botanaomata nakon te kamaiuaki.

16 Eng, aio ana taetae ni burabeti Iotebwa: I koaua raoi n te bwai aio, n aiaron ataakin naba kanoan te tuea are e karaoaki nakoni Mote; bwa e a tia n taekina aio te Uea nakoiu, N na kakawakiniia kanoam n aki toki.

17 Ao e taekina aio te Uea: N na kateirakea Mote; ao N na anganna te mwaaka i nanon te oko; ao N na anganna te mwaaka ni kona ni koroboki. Ma n aki anganna te rabakau n taetae, are e na kona ni kabwarabwara iai, bwa I aki tangiria bwa e na rang n rabakau ni kabwarabwara. Ma N na koroi nakoina au tua, n oin tabonbaiu; ao N na kateirakea te tia kabwarabwara ibukina.

18 Ao e taku riki nakoiu te Uea: N na kateirakea mai buakoia kanoam; ao N na karikia bwa te tia kabwarabwara ibukina. Ao nooria, Ngai, N na anganna te konabwai ni koroi aia koroboki kanoam, nakoia kanoam; ao kanoam are te tia kabwarabwara e na tataekinna.

19 Ao taeka ake e na koroi, bon taeka aika a katauaki ni wanawanau bwa a na nakoia kanoam. Ao a na taekinaki n aiaron ae a takaruaea kanoam nakoia man te tano; bwa I ataa aia onimaki.

20 Ao a na takarua man te tano; eng, n tataekina te rairannano nakoia tariia, i nanon rooro aika a mwaiti. Ao e na koro bukina bwa e na waaki nako bwanaaia n aiaron beebeten te kai oota n aia taeka.

21 Ibukin aia onimaki, aia taeka a na waaki nako mai wiiu nakoia tariia ake kanoam; ao mamaaran aia taeka N na kakorakorai n aia onimaki, n te aro are a na uringa au berita ae tabu are I a tia ni karaoia nakoia aia bakatibu.

22 Ao ngkai, taraia natiu ae Iotebwa, aio aron ana taetae ni burabeti au bakatibu ni kawai.

23 Mangaia ae ibukin te berita ae tabu aio ko na kakabwaiaki; bwa a na aki tiringaki kanoam, bwa a na ongeaba nakon kanoan te boki.

24 Ao e na teirake temanna ae korakora i buakoia, are e na karaoa ae raoiroi, n aron ana taeka ma ana mwakuri, ao n riki bwa tabon bain te Atua, ma te onimaki ae korakora, ni karaoi bwaai aika a kamiimi, ao ni karaoa te bwai ae korakora imatan te Atua, ibukin kaokan te bata are Iteraera, ao nakoia kanoaia tarim.

25 Ao ngkai, ko na kakabwaiaki ngkoe, ae Iotebwa. Taraia bon te teei ngkoe; mangaia ae ko na ongo n ana taeka tarim ae Nibwaai, ao a na koro bukin bwaai ni kabane ake I a tia n taekin ni kaineti nakoim. Uring ana taeka tamam ae e a kaan matena. Amen.