1 Mo afta bae mi singsing long hem we mi lavem tumas wan ^asingsing blong hem we mi lavem tumas, long saed blong plantesen blong grep blong hem. Hem we mi lavem tumas i gat wan plantesen blong grep long wan gudfala hil.

2 Mo hem i bin raonem wetem wan fanis, mo i bin tekemaot ol ston blong hem, mo hem i bin planem ^arop blong grep we i gud tumas long hem, mo i bin bildim wan taoa long medel blong hem, mo tu, i bin mekem wan masin blong mekem waen long ples ia; mo hem i bin luk se bae i karem ol grep, mo i bin karem ol wael grep.

3 Mo nao, O ol man we oli stap long Jerusalem, mo ol man blong Juda, jajem, mi askem yufala, bitwin mi mo plantesen blong grep blong mi.

4 ?Wanem moa mi bin save mekem long plantesen blong grep blong mi, we mi no bin mekem long hem? Taswe, taem we mi bin luk se bae i karem ol grep, hem i bin karem ol wael grep.

5 Mo nao yu go stat; bae mi talem long yu wanem we bae mi mekem long plantesen blong grep blong mi—bae mi ^atekemaot fanis blong hem, mo bae ol animol oli kam kakae evriwan; mo bae mi brekem daon wol blong hem, mo bae oli purumbut long hem;

6 Mo bae mi spolem gud yad ia; bae oli nomo save katem blong klinim o digim yad ia; be ^arabis gras mo ol ropnil bae oli kam fulap long hem; mo tu, bae mi givim oda long ol klaod se oli no ^bren long hem.

7 From ^aplantesen blong grep blong Lod blong Ol Pipol, hem i laen blong Isrel, mo ol man blong Juda oli ol plant we oli naes; mo hem i bin lukaotem ^bjajmen, mo luk, hem i bin luk fasin blong mekem man i harem nogud; hem i bin lukaotem ol stret mo gud fasin, be luk, hem i bin harem wan krae.

8 !Sore tumas long olgeta we oli joen long ^awan haos i go long narafala haos, kasem taem we i nomo save gat ples, blong mekem se oli ^bsave stap olgeta nomo long medel blong wol!

9 “Long ol sora blong mi,” Lod blong Ol Pipol i bin talem, “i tru se fulap haos bae oli emti, mo ol bigfala mo gudfala bigtaon bae i no gat man i stap long hem.

10 Yes, long ten hekta blong plantesen blong grep bae yufala i kasem ^atwantetu lita, mo sapos yufala i planem tu handred mo twante lita blong sid blong wit bae yufala i kasem twantetu lita nomo.”

11 !Sore tumas long olgeta we oli girap eli long moning, blong oli save ^akasem strong drink, we i gohed kasem naet, mo ^bwaen i mekem se oli drong!

12 Mo hap, mo vaeyol, tamburin, mo miusikpaep, mo waen i stap long ol lafet blong olgeta; be oli no ^atingbaot wok blong Lod, mo oli no tingbaot ol samting we hem i mekem wetem ol han blong hem.

13 From hemia, ol pipol blong mi oli bin kam prisena, from oli no gat ^asave; mo ol haeman blong olgeta oli hanggri, mo grup blong pipol ia blong olgeta oli kam drae from oli tosta.

14 From hemia, hel i mekem hem kam bigwan moa, mo i openem maot blong hem i bitim mak; mo glori blong olgeta, mo grup blong pipol blong olgeta, mo flas blong olgeta, mo hem we i bin glad bae i go daon insaed long hem.

15 Mo man we i olbaot bae i foldaon, mo strongfala man bae i putum tingting blong hem i stap daon, mo ol ae blong man we tingting blong hem i hae, bae hem i putum tingting blong olgeta i kam daon.

16 Be Lod blong Ol Pipol bae i stap hae antap tru long ^ajajmen, mo God we i tabu bae i kam tabu tru long stret mo gud fasin.

17 Afta bae ol smol sipsip oli kakae olsem we oli stap kakae oltaem, mo ol emti ples blong ol fatfatwan, bae ol man we oli no save olgeta, oli kakae long olgeta.

18 Sore tumas long olgeta we oli pulum ol rabis fasin wetem ol rop blong ^afasin nating, mo sin ^bolsem se oli pulum rop blong kat;

19 we oli talem se: “Letem hem i ^amekem kwik, i mekem wok blong hem i hariap, blong yumi save ^bluk; mo letem kaonsel blong Tabu Wan blong Isrel i kam kolosap mo i kam, blong yumi save gat save long hem.”

20 !Sore tumas long olgeta we oli ^asingaotem ol nogud samting se oli gudfala, mo ol gudfala samting oli nogud, we oli tekem se ^btudak i laet, mo laet i tudak, we oli tekem konkon blong swit, mo swit blong konkon!

21 !Sore tumas long olgeta we oli ^awaes long ol ae blong olgetawan bakegen, mo olgeta we oli stap yusum gud tingting wetem tingting blong olgeta bakegen!

22 !Sore tumas long olgeta we oli strong blong dring waen, mo ol man we oli strong blong miksim strong drink,

23 we oli talemaot se ol man nogud oli stret blong oli save kasem wan praes, mo oli ^atekemaot stret mo gud fasin blong wan stret mo gud man!

24 From hemia, olsem we ^afaea i stap bonem ^bgras we i drae, mo flem i bonem ^ddoti blong skin blong wit, ol rus blong olgeta bae oli go roten, mo ol flaoa blong olgeta bae i go antap olsem das; from oli sakemaot loa blong Lod blong Ol Pipol, mo oli ^eno laekem nating toktok blong Tabu Wan blong Isrel.

25 From hemia, ^akros blong Lod i bin girap agensem ol pipol blong hem, mo hem i bin stretem han blong hem agensem olgeta, mo hem i bin kilim olgeta; mo ol hil oli bin seksek, mo ol ded bodi blong olgeta oli bin terem olgeta i go long pisis long medel blong ol rod. From evri samting ia Lod i no tanem kros blong hem, be hem i stretem han blong hem yet.

26 Mo bae hem i leftemap wan ^aflag long ol kantri we oli stap longwe, mo bae hem i stap long en blong wol mo ^bsingaot long olgeta wetem wan voes we i sap; mo luk, bae kwiktaem nomo oli spid i ^dkam; i no gat wan we bae i taed o i foldaon long medel blong olgeta.

27 I no gat wan we bae i hafhaf slip o i slip; mo tu, strap raon long wes blong olgeta bae i no kam slak, mo strap blong ol sandel blong olgeta bae i no brok;

28 Ol ara blong olgeta bae oli sap, mo ol bonara blong olgeta bae oli ben, mo but blong leg blong ol hos blong olgeta bae oli kaontem olsem ol smol hadston, mo wil blong olgeta olsem wan waelwin, mo noes blong olgeta i olsem noes blong wan laeon we i stap singaot.

29 Bae oli singaot olsem ol yang ^alaeon; yes, bae oli singaot, mo hang strong long animol we oli kakae, mo karem i gowe sef, mo i no gat wan man we bae i mekem hem i fri.

30 Mo long dei ia, bae oli singsingaot agensem olgeta mo mekem noes olsem ol noes blong solwota; mo sapos oli lukluk i go long graon, luk, tudak mo harem nogud i stap, mo long heven, tudak i stap.