1 !Sore tumas long olgeta we oli talemaot ol samting we i no stret mo i no gud, mo we oli raetem ol bigfala rabis loa we oli bin mekem;

2 we oli tanem baksaed long ol puaman blong oli no gat janis blong kasem stret ^ajajmen, mo blong tekemaot raet long ol pua blong ol pipol blong mi, mekem se oli save stil long ol ^bwido, mo blong mekem se oli save stilim olgeta we oli no gat papa!

3 ?Mo wanem nao bae yufala i mekem long dei blong ^ajajmen, mo long ples we i emti we bae i kam long farawe? ?Bae yufala i ronwe i go long huia blong askem help? ?Mo bae yufala i livim paoa blong yufala wea?

4 “Sapos i no gat mi, bae oli bodaon long ol prisena, mo bae oli foldaon andanit long olgeta we oli bin kilim olgeta i ded.” From evri samting ia Lod i no tanem kros blong hem i gowe, be hem i stretem han blong hem yet.

5 “O, man blong Asiria, yu stik blong kros blong mi, mo stik long han blong olgeta, i stret kros ^ablong olgeta.

6 Bae mi sendem hem ^aagensem wan kantri we i gat tufes, mo agensem ol pipol blong bigfala nogud kros blong mi bae mi givim oda long hem blong tekem ol samting blong ol narafala man, mo blong tekem ol samting we oli bin stilim, mo blong purumbut long olgeta daon olsem sofmad blong ol rod.”

7 Be hem i no minim olsem, mo tu, bae hat blong hem i no tingting olsem; be long hat blong hem, hem i blong prapa spolem gud mo katemaot ol kantri we namba blong olgeta i no smol.

8 From hem i talem se: “?Ol boe blong king blong mi oli no ol king evriwan?

9 ?Kalnoho i no olsem Kakemis? ?Hamat i no olsem Apad? ?Sameria i no olsem Damaskes?

10 Olsem we ^ahan blong mi i bin statem ol kingdom blong ol aedol, mo we ol pikja blong olgeta i bin bitim blong olgeta long Jerusalem mo blong Sameria,

11 ?Bae mi no mekem, olsem we mi bin mekem long Sameria mo ol aedol blong hem, mekem semmak olsem long Jerusalem mo ol aedol blong hem?”

12 Taswe, bae i blong hapen se taem we Lod i bin mekem evri wok blong hem long Hil Saeon mo long Jerusalem, bae mi panisim ^afrut blong hat we i strong tumas blong king blong ^bAsiria, mo glori blong ol hae lukluk blong hem.

13 From ^ahem i talem se: “Wetem paoa blong han blong mi mo wetem waes tingting blong mi, mi bin mekem ol samting ia; from mi mi waes; mo mi bin muvum ol boda blong ol pipol, mo mi bin stilim ol rij samting blong olgeta, mo olsem wan strong man, mi bin putum daon ol pipol we oli stap laef long ples ia;

14 Mo han blong mi i faenem ol rij samting blong ol pipol olsem i faenem wan bed blong pijin. Mo olsem wan i karem ol eg we i stap oli kam tugeta, mi bin karem ful wol i kam tugeta; mo i no bin gat wan we i bin muvum wing, o i openem maot, o i bin mekem noes olsem wan smol pijin.”

15 ?^aBae ^bakis i tokflas agensem hem we i yusum hem? ?Bae so i gat tingting se hem i moa hae long man we i stap yusum hem? !Olsem se stik bae i sekem hemwan agensem olgeta we oli stap leftemap hem, o olsem se stik bae i leftemap hemwan olsem se stik ia i no wan wud!

16 From hemia, bae Lod, Lod blong Ol Pipol, bae hem i sendem long medel blong ol fatfatwan blong hem, fasin blong bunbun; mo anda long ^aglori blong hem bae hem i statem wan faea olsem wan faea we i laet.

17 Mo laet blong Isrel bae i stap olsem wan faea, mo Tabu Wan blong hem bae i stap olsem wan flem blong faea, mo bae i bon mo bae i kakae flatem ol ropnil blong hem mo ol rabis gras blong hem long wan dei;

18 Mo bae i ^akakae flatem glori blong dakbus blong hem, mo blong garen blong hem we i karem plante frut, sol tugeta wetem bodi; mo bae oli stap olsem taem we wan man we i karem flag i foldaon from i taed.

19 Mo ^ahaf blong ol tri blong dakbus blong hem we oli stap bae oli no plante, mekem se wan pikinini i save kaontem olgeta.

20 Mo bae i kam blong hapen se long ^adei ia, we smol haf nomo blong Isrel, mo olgeta we oli bin ronwe long ^blaen blong Jekob, bae oli nomo ^ddipen long hem we i bin mekem olgeta oli harem nogud, be, wetem tras, bae oli dipen long Lod, Tabu Wan blong Isrel.

21 ^aSmol haf nomo bae i kambak, yes, smol haf nomo blong Jekob, bae i kambak long God we i strong.

22 Hem i nomata se ol pipol blong yu Isrel oli plante olsem sanbij blong solwota, be stil wan smol haf nomo bae i kambak; bae ^ataem blong prapa spolem gud evri samting, we hem i bin talemaot finis, bae i ^bfulap tumas wetem stret mo gud fasin afta.

23 From Lod God blong Ol Pipol bae i ^aprapa spolem gud evri samting, olsem we hem i bin talem long evri graon.

24 From hemia, olsem ia nao Lod God blong ol Pipol i talem: O ol pipol blong mi we i stap long Saeon, no fraet long man blong Asiria; bae hem i kilim yufala wetem wan stik, mo bae hem i leftemap stik blong hem agensem yufala, ^aolsem fasin blong Ijip.

25 From long sot taem nomo, mo stret kros ia bae i finis, mo kros blong mi long saed blong ded blong olgeta.

26 Mo Lod blong Ol Pipol bae i mekem wan wip blong hem folem taem we oli bin kilimded ol man blong ^aMidian long ston blong Oreb; Mo olsem we kros blong hem i bin stap long solwota, olsem ia bae hem i leftemap hem folem fasin blong Ijip.

27 Mo bae i kam blong hapen se long dei ia, se ol ^ahevi samting blong hem bae oli kamaot long solda blong yu, mo yok blong hem i aot long nek blong yu, mo bae oli smasem gud yok ia from ^boel ia.

28 ^aHem i kam long Eae, hem i pas tru long Migron; long Mikmas, hem i lego ol wilkat blong hem long ples ia.

29 Oli go pasem krosem wan rod; oli slip long tenet long Geba; Ramat i fraet; Gibea blong Saol i ronwe.

30 !Singaot i go antap, o gel blong Galim! !Mekem se singaot ia oli harem long Laes! !O lukaot long yu Anatot!

31 Madmena i stap ronwe; ol man we oli stap long Gebim oli kam long wan ples blong ronwe tugeta.

32 Be stil bae hem i stap long Nob long dei ia; bae hem i sekem han blong hem agensem hil blong gel blong Saeon, hil blong Jerusalem.

33 Luk, Lod, Lod blong Ol Pipol bae i katemaot ol branj wetem fraet; mo ol ^ahaewan we oli hae tumas bae oli katem daon olgeta; mo olgeta we oli tingting hae tumas long olgeta bakegen bae oli putum tingting blong olgeta i stap daon.

34 Mo bae hem i katem daon ol grup blong smol tri blong dakbus wetem aean, mo Lebanon bae i foldaon tru long wan we i strong.