1 Ol toktok blong Jekob, brata blong Nifae, we hem i bin talemaot long ol pipol blong Nifae:

2 “Luk, ol brata blong mi we mi lavem tumas, mi, Jekob, God i bin singaotem mi, mo i odenem mi folem fasin blong tabu oda blong hem, mo brata blong mi Nifae i bin konsekretem mi, hem we yufala i lukluk long hem olsem wan ^aking o olsem wan man blong lukaotem gud yufala, mo hem we yufala i dipen long hem blong stap sef, luk yufala i save se mi bin talem long yufala plante samting tumas.

3 Be, mi toktok long yufala bakegen; from mi wantem blong helpem gudlaef blong sol blong yufala. Yes, wari blong mi i bigwan from yufala; mo yufala i save se hem i bin stap olsem oltaem. From mi bin talem strong long yufala wetem evri strong tingting blong mi; mo mi bin tijim yufala ol toktok blong papa blong mi; mo mi bin toktok long yufala long saed blong evri samting we oli bin raetemdaon, stat long taem we wol ia i bin stat.

4 Mo nao, luk, bae mi toktok long yufala long saed blong ol samting we oli stap, mo we bambae oli kam; taswe, bae mi ridim long yufala ol toktok blong ^aAesea. Mo oli ol toktok we brata blong mi i bin wantem se bae mi talemaot long yufala. Mo mi toktok long yufala blong gud blong yufala, blong yufala i save lanem mo presem nem blong God blong yufala.

5 Mo nao, ol toktok we bae mi ridimaot oli olgeta toktok we Aesea i bin talemaot long saed blong ol laen blong Isrel; taswe, yufala i save yusum ol toktok ia long yufalawan bakegen, from yufala i pat blong laen blong Isrel. Mo i gat plante samting we Aesea i bin talemaot we yufala i save yusum long yufalawan bakegen, from yufala i pat blong laen blong Isrel.

6 Mo nao, hemia nao ol toktok: ‘^aOlsem ia nao Lod God i talem: “Luk, bae mi leftemap han blong mi long Ol Jentael, mo stanemap ^bflag blong mi long ol pipol; mo bae oli karem ol boe blong yufala long ol han blong olgeta, mo bae oli karem ol gel blong yufala long ol solda blong olgeta.

7 Mo ol king bae oli stap olsem ol papa we oli stap givim gudfala kaekae long yufala, mo ol kwin blong olgeta bae oli stap olsem ol mama we oli stap givim gudfala kaekae long yufala; bae oli bodaon long yufala wetem ol fes blong olgeta i fesem graon, mo bae oli likimap das long ol leg blong yufala; mo bae yufala i save se mi mi Lod; from olgeta we oli stap ^awet long mi bambae oli no save sem.”’

8 Mo nao mi, Jekob, bae mi toktok smol long saed blong ol toktok ia. From luk, Lod i bin soemaot long mi se olgeta we oli bin stap long ^aJerusalem, long ples we yumi bin kamaot long hem, oli bin kilimded olgeta mo oli bin tekem olgeta i ^bgo longwe olsem prisena.

9 Be, Lod i bin soem long mi se bae oli ^akambak bakegen. Mo hem i bin soemaot long mi tu se Lod God, Tabu Wan blong Isrel, bae i soemaot hemwan long olgeta long bodi blong mit mo bun; mo afta we bae hem i soemaot hemwan bae oli wipim hem mo ^bkrusifaem hem, folem ol toktok blong enjel ia we i bin talem samting ia long mi.

10 Mo afta oli bin mekem hat blong olgeta i kam strong mo oli bin kam stronghed agensem Tabu Wan blong Isrel, luk, ol ^ajajmen blong Tabu Wan blong Isrel bae oli kam long olgeta. Mo dei ia i stap kam we bae oli kasem panis, mo tu, bae oli kasem hadtaem.

11 Taswe, afta we oli ronemaot olgeta i go ia mo i kam ia, from olsem ia nao enjel i talem, plante bae oli kasem hadtaem long bodi blong mit mo bun, mo bae Lod i no letem olgeta blong ded, from ol prea blong ol man we i yusum fet; bambae oli seraot olbaot, mo bae oli kasem panis, mo ol man bae oli no laekem olgeta; be, Lod bae i gat sore long olgeta, mekem se ^ataem we oli kam blong ^bsave long saed blong Ridima blong olgeta, bae God i mekem se olgeta oli ^dkambak tugeta bakegen long ol graon blong olgeta we i kam long ol papa blong olgeta.

12 Mo God bae i blesem Ol ^aJentael, olgeta ia we profet i bin raetem long saed blong olgeta; from luk, sapos i olsem, se bae oli sakem sin mo no faet agensem Saeon, mo no joenem olgeta wetem bigfala mo ^brabis jos ia, bae Lod i sevem olgeta; from Lod God bae i mekem se ol ^dkavenan blong hem, we hem i bin mekem wetem ol pikinini blong hem, oli hapen; mo from stamba tingting ia nao profet i bin raetem ol samting ia.

13 Taswe, olgeta we oli faet agensem Saeon mo ol kavenan pipol blong Lod bae oli likim gud das long leg blong olgeta; mo ol pipol blong Lod bae oli no ^asem. From ol pipol blong Lod oli olgeta we oli stap ^bwet long hem; from oli stap wet yet long taem we Mesaea bae i kam.

14 Mo luk, folem ol toktok blong profet, Mesaea bae i stat bakegen long ^anambatu taem blong karembak olgeta; taswe, bae hem i ^bsoemaot hemwan bakegen long olgeta wetem paoa mo bigfala glori, go kasem taem we hem i ^dprapa spolem gud ol enemi blong olgeta, taem we dei ia i stap kam we olgeta bae oli biliv long hem; mo bae hem i no prapa spolem gud wan we i biliv long hem.

15 Mo olgeta we oli no biliv long hem bae hem i ^aprapa spolem gud olgeta, tugeta, wetem ^bfaea mo wetem bigfala win mo ren, mo wetem graon we i seksek, mo wetem blad i ron, mo wetem ^drabis sik, mo wetem hadtaem blong kasem kaekae. Mo bambae oli save se Lod i God, i Tabu Wan ia blong Isrel.

16 ^a?From yu yu ting se oli save tekem ol kaekae blong hem we i strong, o lego ^bolgeta we oli kam prisena folem loa oli kam fri?

17 Be olsem ia nao Lod i talem: ‘Ol ^aprisena tu blong olgeta we oli strong bae oli tekemaot olgeta, mo bae oli lego ol kaekae blong trabol meka; from ^bGod we i gat olgeta Paoa bae i ^dsevem ol kavenan pipol blong hem.’ From olsem ia nao Lod i talem: ‘Bae mi faet wetem olgeta we oli faet wetem yufala—

18 Mo bae mi fidim olgeta we i mekem rabis fasin long yufala, wetem ol mit blong olgeta bakegen; mo bae oli drong wetem blad blong olgeta bakegen olsem wetem waen we i swit; Mo evri bodi blong mit mo bun bambae oli save se mi Lod, mi mi Sevya blong yufala mo ^aRidima blong yufala, ^bStrong Wan ia blong Jekob.’”