၁ နီဖိုင်း ၂၂

အခန်းကြီး ၂၂

ဣသရေလအမျိုးတို့သည် မြေကြီးမျက်နှာပြင်တစ်ခုလုံးပေါ်၌ ကွဲပြားပြန့်ကျဲကြရလိမ့်မည်—တစ်ပါးအမျိုးသားတို့က ဣသရေလအမျိုးတို့ကို နောက်ဆုံးသောကာလ၌ ဧဝံဂေလိတရားတော်ဖြင့် ကျွေးမွေး၍၊ ခွန်အားဖြည့်ကြလိမ့်မည်—ဣသရေလအမျိုးတို့သည် စုဝေး၍၊ ကယ်တင်ခြင်းသို့ရောက်ကြလိမ့်မည်၊ ဆိုးညစ်သောသူတို့သည် ရိုးပြတ်ကဲ့သို့ လောင်မြိုက်ကြလိမ့်မည်—နတ်ဆိုး၏နိုင်ငံသည် ဖျက်ဆီးခံရလိမ့်မည်၊ စာတန်သည်လည်း ချည်နှောင်ခံရလိမ့်မည်။ ဘီစီ ၅၈၈–၅၇၀ ခန့်။

၁ ယခုတွင်၊ အချိန်တန်လာသောအခါ၊ ငါ၊ နီဖိုင်းသည် ကြေးပုရပိုက်ပြားတို့ပေါ်၌ ရေးထွင်းထားသည့် ဤအရာတို့ကို ဖတ်ပြီးနောက်၊ ငါ၏ညီအစ်ကိုတို့သည် ငါ့ထံလာ၍၊ ဆိုကြသည်မှာ၊ သင်ဖတ်လေသည့်အရာတို့ကား အဘယ်သို့ဆိုလိုသနည်း။ ရှုလော့၊ လူ့ဇာတိအတိုင်းမဟုတ်၊ ဝိညာဉ်အတိုင်း ဖြစ်လာလိမ့်မည့် ဝိညာဉ်ပကတိအရာတို့အတိုင်း ထိုအရာတို့ကို နားလည်နိုင်လိမ့်မည်လောဟု မေးကြ၏။

၂ ငါ၊ နီဖိုင်းကလည်း သူတို့ကို ပြောလေသည်ကား၊ ရှုလော့၊ ဝိညာဉ်တော်၏အသံအားဖြင့် ပရောဖက်အား ထိုအရာတို့ကို ထင်ရှားစွာပြလေပြီ။ အကြောင်းမူကား၊ လူသားတို့အပေါ် လူ့ဇာတိအတိုင်းကျရောက်လာမည့်အရာခပ်သိမ်းတို့ကို ဝိညာဉ်တော်အားဖြင့် ပရောဖက်တို့အား ဖော်ပြထား၏။

၃ သို့ဖြစ်၍၊ ငါဖတ်လေသည့်အရာတို့မှာ ဇာတိပကတိ၊ ဝိညာဉ်ပကတိနှစ်ခုစလုံးတို့နှင့် စပ်ဆိုင်သည့်အရာများ ဖြစ်ကြ၏။ အကြောင်းမူကား၊ ဣသရေလအမျိုးသားတို့သည် အဘယ်ကာလဟုမသိရသောအချိန်၌ မြေကြီးမျက်နှာပြင်တစ်ခုလုံးပေါ်နှင့် ခပ်သိမ်းသောလူမျိုးတို့၌လည်း ကွဲပြားပြန့်ကျဲကြရမည့် လက္ခဏာရှိကြ၏။

၄ ရှုဦးလော့၊ ယေရုရှလင်မြို့ ၌ ရှိကြသောသူတို့၏ အသိပညာမှ ကွယ်ပျောက်နှင့်ကြလေပြီးသော သူများစွာရှိ၏။ ထိုမှတစ်ပါး၊ ခပ်သိမ်းသောမျိုးနွယ်စုတို့မှ အများစုသည် ခေါ်ဆောင်သွားခံရလေ၍၊ ပင်လယ်တစ်ဖက် တစ်ကျွန်းတစ်နိုင်ငံအရပ်တို့၌ အရပ်ရပ်သို့ ကွဲပြားပြန့်ကျဲကြရ၏။ သူတို့ခေါ်ဆောင်သွားခံရသည်ကို ငါတို့သိရသည်မှတစ်ပါး၊ အဘယ်အရပ်သို့ဟူသည်ကိုကား၊ အဘယ်သူမျှမသိ။

၅ သူတို့ခေါ်ဆောင်သွားခံရသောကြောင့်၊ သူတို့နှင့်စပ်လျဉ်း၍၊ ထို့အတူ ဣသရေလအမျိုး၏သန့်ရှင်းတော်မူသောဘုရားကြောင့် နောင်ကာလ၌၊ ကွဲပြားပြန့်ကျဲရ၍၊ ရောထွေးလတ္တံ့သော သူခပ်သိမ်းတို့နှင့်စပ်လျဉ်း၍လည်း၊ ဤအရာတို့ကို ပရောဖက်ပြု၍ဟောထားလေ၏။ အကြောင်းမူကား၊ သူ့ကိုဆန့်ကျင်၍၊ သူတို့၏စိတ်နှလုံးကို မာကျောစေကြလိမ့်မည်။ သို့ဖြစ်၍၊ သူတို့သည် လူမျိုးခပ်သိမ်းတို့၌ ကွဲပြားပြန့်ကျဲရ၍၊ ခပ်သိမ်းသောလူတို့၏မုန်းခြင်းကို ခံကြရလိမ့်မည်။

၆ အဘယ်သို့ပင်ဖြစ်စေ၊ သူတို့သည် တစ်ပါးအမျိုးသားတို့အားဖြင့် မွေးစားခံရပြီးနောက်၊ ကိုယ်တော်ရှင်သည် တစ်ပါးအမျိုးသားတို့အား သူ၏လက်ကိုချီ၍ အလံကိုထူပေမည်။ သူတို့၏သားသမီးတို့ကို လက်နှင့်ပွေ့၍၊ သမီးတို့ကို ပခုံးပေါ်မှာထမ်း၍၊ ဆောင်လာကြလိမ့်မည်။ ရှုလော့၊ ပြောလေပြီးသောဤအရာတို့သည်ကား၊ ဇာတိပကတိအရာများပေတည်း။ အကြောင်းမူကား၊ ထိုအရာတို့သည် ငါတို့ဘိုးဘေးတို့နှင့်ပြုခဲ့လေသော ကိုယ်တော်ရှင်၏ပဋိညာဉ်များဖြစ်ကြ၏။ ထိုအမှုသည် နောင်လာမည့်ကာလ၌၊ ငါတို့နှင့်အတူ ဣသရေလအမျိုးသားများဖြစ်သည့် ခပ်သိမ်းသော ငါတို့၏ ညီအစ်ကိုတို့နှင့်လည်း စပ်ဆိုင်၏။

၇ ဆိုလိုသည်ကား၊ ခပ်သိမ်းသောဣသရေလအမျိုးသားတို့ ကွဲပြားပြန့်ကျဲရ၍၊ ရောထွေးကြလေပြီးနောက်၌၊ ကိုယ်တော်ရှင်ဘုရားသခင် တစ်ပါးအမျိုးသားတို့၌ အထူးသဖြင့်၊ ဤပြည်၏မျက်နှာပြင်ပေါ်၌ပင် အားကြီးသည့် လူမျိုးကို ပေါ်ထွန်းစေမည့်အချိန်၌ ထိုကာလကျရောက်လာ၏။ ထိုသူတို့အားဖြင့်လည်း၊ ငါတို့၏အမျိုးအနွယ်တို့ ကွဲပြားပြန့်ကျဲကြရလိမ့်မည်။

၈ ငါတို့၏အမျိုးအနွယ်တို့ ကွဲပြားပြန့်ကျဲကြရပြီးနောက်၊ ကိုယ်တော်ရှင်ဘုရားသခင်သည် တစ်ပါးအမျိုးသားတို့၌ ငါတို့၏အမျိုးအနွယ်တို့အတွက် ကြီးစွာအဖိုးထိုက်မည့် အံ့ဩဖွယ်ကောင်းသောအမှုကို ဆက်၍ပြုတော်မူလိမ့်ဦးမည်။ သို့ဖြစ်၍၊ သူတို့ကို တပါးအမျိုးသားတို့အားဖြင့်ကျွေးမွေးခံရခြင်းနှင့်လည်းကောင်း၊ လက်နှင့်ပွေ့၍ ပခုံးပေါ်မှာထမ်း၍၊ ဆောင်လာခံရခြင်းနှင့်လည်းကောင်း ပမာပြုခြင်းဖြစ်၏။

၉ ထိုအမှုသည် တစ်ပါးအမျိုးသားတို့အတွက်လည်း အဖိုးထိုက်လိမ့်မည်။ တစ်ပါးအမျိုးသားတို့အတွက်သာမဟုတ် ခပ်သိမ်းသောဣသရေလအမျိုးသားတို့ အတွက်လည်းဖြစ်၍၊ သင်၏အမျိုးအနွယ်အားဖြင့်၊ မြေကြီးပေါ်ရှိ အမျိုးစုခပ်သိမ်းတို့ ကောင်းချီးခံစားကြရလိမ့်မည်ဟု အာဗြဟံသို့ ပြုတော်မူခဲ့သည့် ကောင်းကင်ဘုံရှင်အဘ၏ ပဋိညာဉ်တို့ကို ဖော်ပြတော်မူသည့်တိုင်အောင်ပင်တည်း။

၁၀ သူ၏လက်တော်ကို ပြည်သားတို့၏မျက်လုံးတို့၌ ဖွင့်ပြတော်မူခြင်းမရှိလျှင်၊ မြေကြီးပေါ်ရှိ အမျိုးစုခပ်သိမ်းတို့၊ ကောင်းချီးမခံစားရနိုင်ကြောင်း၊ ငါသည် ငါ၏ညီအစ်ကိုများတည်းဟူသော သင်တို့သိစေခြင်းငှာ အလိုရှိ၏။

၁၁ သို့ဖြစ်၍၊ ကိုယ်တော်ရှင်ဘုရားသခင်သည် သူ၏ပဋိညာဉ်များနှင့် သူ၏ဧဝံဂေလိတရားတော်ကို ဣသရေလအမျိုးသားတို့ထံ ရောက်စေရာ၌ လူမျိုးခပ်သိမ်းတို့၏မျက်လုံးတို့၌ သူ၏လက်တော်ကို ဖွင့်ပြတော်မူလိမ့်မည်။

၁၂ သို့ဖြစ်၍၊ သူသည် သူတို့ကို ဖမ်းဆီးချုပ်နှောင်ခြင်းမှ တစ်ဖန်ထုတ်ဆောင်တော်မူလိမ့်မည်။ သူတို့သည်လည်း သူတို့၏အမွေခံရာမြေသို့ အတူတကွစုဝေးခံကြရလိမ့်မည်။ မြှေးယှက်ခြင်းနှင့် မှောင်မိုက်ခြင်းမှ ထုတ်ဆောင်ခြင်းကိုလည်း ခံကြရလိမ့်မည်။ သူတို့သည်လည်း ကိုယ်တော်ရှင်သည် သူတို့၏ကယ်တင်ရှင်၊ သူတို့၏ရွေးနုတ်ရှင်နှင့် ဣသရေလအမျိုး၏ တန်ခိုးကြီးသောဘုရားဖြစ်ကြောင်း သိကြလိမ့်မည်။

၁၃ မြေကြီးတစ်ခုလုံး၏ပြည့်တန်ဆာဖြစ်သော စက်ဆုပ်ရွံရှာဖွယ်ကောင်းသည့် အသင်းတော်ကြီး၏အသွေးသည် သူတို့ဦးခေါင်းပေါ် ပြန်ကျလိမ့်မည်။ အကြောင်းမူကား၊ သူတို့သည် ကိုယ့်အချင်းချင်း စစ်တိုက်၍၊ သူတို့လက်မှဓားသည် သူတို့ဦးခေါင်းပေါ်ကျ၍၊ သူတို့ကိုယ်တိုင်၏အသွေးဖြင့် ယစ်မူးကြရလိမ့်မည်။

၁၄ အို ဣသရေလအမျိုးသားတို့၊ သင်တို့ကိုဆန့်ကျင်၍၊ စစ်တိုက်သောလူမျိုးမှန်သမျှသည် တစ်ဦးနှင့်တစ်ဦး တိုက်ခိုက်လိမ့်မည်။ သူတို့သည် ကိုယ်တော်ရှင်၏လူတို့ကို ထောင်ချောက်ဆင်၍ဖမ်းခြင်းငှာ တူးလေသောတွင်းသို့ ကျလိမ့်မည်။ ဇိအုန်မြို့ကို ဆန့်ကျင်၍တိုက်ခိုက်သူခပ်သိမ်းတို့သည် ဖျက်ဆီးခံရလိမ့်မည်။ ကိုယ်တော်ရှင်၏ မှန်သောလမ်းစဉ်တို့ကို မှောက်လှန်သော ထိုပြည့်တန်ဆာကြီး၊ အထူးသဖြင့်၊ ထိုစက်ဆုပ်ရွံရှာဖွယ်ကောင်းသည့် အသင်းတော်ကြီးသည် မြေမှုန့်သို့ ပြိုကျလိမ့်မည်၊ ကြီးမားလှသည်ကား၊ ထိုအသင်း၏ကျဆုံးခြင်းပေတည်း။

၁၅ အကြောင်းမူကား၊ ရှုလော့၊ ပရောဖက်ကဟောလေသည်မှာ၊ လူသားတို့၏စိတ်နှလုံးကို စာတန်အစိုးရခြင်း မရှိတော့မည့် အချိန်သည် အလျင်အမြန် ကျရောက်လာမည်။ အကြောင်းမူကား၊ မာနကြီးသူခပ်သိမ်းတို့နှင့် ဆိုးညစ်စွာပြုသောသူတို့ရိုးပြတ်ကဲ့သို့ဖြစ်မည့်နေ့ မကြာမြင့်မီကျရောက်လာမည်။ သူတို့လောင်မြိုက်ခံရမည့်နေ့သည်လည်း ကျရောက်လာလိမ့်မည်။

၁၆ ခပ်သိမ်းသော လူသားတို့အပေါ် ဘုရားသခင်၏အမျက်တော်အပြည့်အစုံကို သွန်းလောင်းတော်မူမည့်အချိန်သည် မကြာမြင့်မီကျရောက်လာလိမ့်မည်။ အကြောင်းမူကား၊ သူသည် ဆိုးညစ်သောသူတို့အား ဖြောင့်မတ်သောသူတို့ကို ဖျက်ဆီးမည်ကို အခွင့်ပေးတော်မူမည်မဟုတ်။

၁၇ သို့ဖြစ်၍၊ သူ၏အမျက်တော်အပြည့်အစုံကျရောက်လာမည်ဆိုလျှင်ပင်၊ ဖြောင့်မတ်သောသူတို့ကို သူ၏တန်ခိုးတော်အားဖြင့်၊ ကာကွယ်စောင့်မတော်မူလိမ့်မည်။ ဖြောင့်မတ်သောသူတို့သည် သူတို့၏ရန်သူတို့မီးလျှံဖြင့်ပျက်စီးသည့်တိုင်အောင်ပင် ကာကွယ်စောင့်မခံကြရလိမ့်မည်။ သို့ဖြစ်၍၊ ဖြောင့်မတ်သော သူတို့သည် ကြောက်ရန်လိုအပ်ခြင်းမရှိ။ အကြောင်းမူကား၊ ပရောဖက်က ဟောသည်မှာ သူတို့သည် မီးလျှံဖြင့်ပင်ဖြစ်သော်လည်း ကယ်တင်ခြင်းသို့ရောက်ကြလိမ့်မည်။

၁၈ ရှုလော့၊ ငါ၏ညီအစ်ကိုတို့၊ သင်တို့ကို ငါဆိုသည်ကား၊ ဤအရာတို့သည် မကြာမြင့်မီဖြစ်လာရမည်။ အထူးသဖြင့်၊ သွေး၊ မီးလျှံနှင့် မီးခိုးထုတို့ပေါ်လာလိမ့်မည်။ ဤမြေကြီးမျက်နှာပြင်ပေါ်၌ ဖြစ်ရလိမ့်မည်။ သူတို့သည် ဣသရေလအမျိုး၏ သန့်ရှင်းတော်မူသောဘုရားတစ်ဖက်၌ စိတ်နှလုံးကို မာကျောစေကြလျှင်၊ ထိုအမှုသည် လူသားတို့အပေါ် လူ့ဇာတိအတိုင်း ကျရောက်လာမည်။

၁၉ အကြောင်းမူကား၊ ရှုလော့၊ ဖြောင့်မတ်သောသူတို့သည် မပျက်စီးရ။ ဇိအုန်ကို ဆန့်ကျင်၍တိုက်ခိုက်သူခပ်သိမ်းတို့ ပယ်ရှင်းခံကြရမည့်အချိန်သည် ဧကန်အမှန်ကျရောက်လာမည်။

၂၀ ငါနှင့်တူသောပရောဖက်တစ်ပါးကို သင်တို့၏ဘုရားသခင်ကိုယ်တော်ရှင်က သင်တို့အဖို့ ပေါ်ထွန်းစေတော်မူလိမ့်မည်။ သင်တို့အား သူဟောသမျှခပ်သိမ်းသောအရာတို့ကို သင်တို့ကြားနာရမည်။ ဤသို့အားဖြင့်အချိန်တန်လာလတ္တံ့သောအခါ၊ ထိုပရောဖက်ကို မကြားနာသောသူခပ်သိမ်းတို့သည် လူမျိုးတို့မှ ပယ်ရှင်းခံကြရလိမ့်မည်ဟုဆိုသော မောရှေ၏စကားများကို ပြီးပြည့်စုံစေခြင်းငှာ၊ ကိုယ်တော်ရှင်သည် သူ၏လူမျိုးတို့အတွက် နည်းလမ်းကို ဧကန်အမှန် ပြင်ဆင်တော်မူလိမ့်မည်။

၂၁ ယခုမူကား၊ ငါ၊ နီဖိုင်း သင်တို့ကို ဟောပြောသည်မှာ၊ မောရှေဆိုလေသော ထိုပရောဖက်သည် ဣသရေလအမျိုး၏ သန့်ရှင်းတော်မူသောဘုရားဖြစ်လေ၏။ သို့ဖြစ်၍၊ သူသည် ဖြောင့်မတ်ခြင်းဖြင့် တရားစီရင်လိမ့်မည်။

၂၂ ဖြောင့်မတ်သောသူတို့သည် ကြောက်ရန်လိုအပ်ခြင်းမရှိ၊ အကြောင်းမူကား၊ သူတို့သည် မရှုံးနိမ့်ရသောသူများဖြစ်ကြ၏။ သို့သော်လည်း၊ ဇာတိကိုယ်ခန္ဓာ၌ ရှိကြလေသောသူတို့၌ တည်ထောင်လေသည့် နိုင်ငံဖြစ်သော၊ လူသားတို့၌ တည်ဆောက်မည့် နတ်ဆိုး၏နိုင်ငံရှိ၏—

၂၃ အကြောင်းမူကား၊ အကျိုးအမြတ်ရခြင်းငှာ၊ တည်ထောင်သောအသင်းတော်များ၊ လူတို့အပေါ် အစိုးရခြင်းငှာ၊ တည်ထောင်သောသူများ၊ လောက၏မျက်လုံးတို့၌ ကျော်ကြားလာ၍၊ ဇာတိပကတိ တပ်မက်ခြင်းနှင့် လောကအရာတို့ကို ရှာ၍၊ အမျိုးမျိုးသောဒုစရိုက်များကို ပြုခြင်းငှာ၊ တည်ထောင်သောသူတို့၏အချိန်သည် အလျင်အမြန် ကျရောက်လာလိမ့်မည်။ အမှန်စင်စစ်၊ အချုပ်အားဖြင့် နတ်ဆိုး၏နိုင်ငံနှင့် ဆိုင်သူတို့သည်ကား ကြောက်ရွံ့ကြ၊ တုန်၍ တုန်လှုပ်ရမည့်သူတို့ပေတည်း။ သူတို့သည် မြေမှုန့်သို့ နှိမ့်ချခံရမည့်သူများဖြစ်၏။ သူတို့သည် ရိုးပြတ်ကဲ့သို့ လောင်မြိုက်ခံရမည့်သူများဖြစ်၏။ ဤအရာသည်ကား၊ ပရောဖက်၏စကားတို့အတိုင်းပေတည်း။

၂၄ ဖြောင့်မတ်သောသူတို့ တင်းကုပ်မှ နွားသငယ်တို့ကဲ့သို့၊ ဆောင်ယူခံရမည့်အချိန်အလျင်အမြန်ကျရောက်လာပြီးလျှင်၊ ဣသရေလအမျိုး၏ သန့်ရှင်းတော်မူသောဘုရားသည် အစိုးရခြင်း၊ အာနုဘော်၊ တန်ခိုးတော်အရှိန်နှင့် ကြီးစွာသောဘုန်းတော်တို့ဖြင့် အုပ်စိုးတော်မူမည်။

၂၅ သူသည် မိမိ၏သားသမီးတို့ကို မြေကြီးလေးမျက်နှာမှ စုဝေး၍ သူ၏သိုးတို့ကို ရေတွက်တော်မူ၏။ ထိုသူတို့သည် သူ့ကိုသိကြ၏။ သိုးခြံတစ်ခုနှင့် သိုးထိန်းတစ်ပါးတည်း ရှိလိမ့်မည်။ သူသည် သူ၏သိုးတို့ကို ကျွေးမွေးလိမ့်မည်၊ သူ့၌ ကျက်စားရာကို သူတို့တွေ့ကြရလိမ့်မည်။

၂၆ သူ့လူမျိုးတို့၏ ဖြောင့်မတ်ခြင်းကြောင့် စာတန်၌ တန်ခိုးမရှိ။ သို့ဖြစ်၍၊ သူသည် နှစ်ပေါင်းများစွာကြာအောင် အလွှတ်မခံရနိုင်။ လူတို့၏စိတ်နှလုံးအပေါ်အစိုးရခြင်းမရှိသောကြောင့်ပင်တည်း၊ အကြောင်းမူကား၊ သူတို့သည် ဖြောင့်မတ်ခြင်း၌ နေကြ၏၊ ဣသရေလအမျိုး၏သန့်ရှင်းတော်မူသောဘုရားအုပ်စိုး၏။

၂၇ ယခုမူကား၊ ရှုလော့၊ ငါ၊ နီဖိုင်း၊ သင်တို့ကို ဆိုသည်မှာ ဤအရာခပ်သိမ်းတို့သည် လူ့ဇာတိအတိုင်း ဖြစ်လာရမည်၏။

၂၈ သို့ရာတွင်၊ ရှုလော့ ခပ်သိမ်းသောပြည်သား၊ အမျိုးစု၊ အသီးသီးဘာသာစကားကိုပြောသူနှင့် လူမျိုးတို့သည် နောင်တရမည်ဆိုလျှင်၊ ဣသရေလအမျိုး၏ သန့်ရှင်းတော်မူသောဘုရားအားဖြင့် လုံခြုံစွာနေထိုင်ရလိမ့်မည်။

၂၉ ယခုမူကား၊ ငါ၊ နီဖိုင်းသည် လက်စသတ်၏။ အကြောင်းမူကား၊ ငါသည် ထိုအရာတို့နှင့်စပ်လျဉ်း၍ နောက်ထပ်မပြောဝံ့။

၃၀ သို့ဖြစ်၍၊ ငါ၏ညီအစ်ကိုတို့၊ ငါသည် သင်တို့အား ကြေးပုရပိုက်ပြားတို့ပေါ်၌ ရေးထားသောအရာတို့ အမှန်ဖြစ်သည်ကို ဆင်ခြင်ကြစေရန် အလိုရှိ၏။ ၎င်းတို့သည် ဘုရားသခင်၏ပညတ်တော်တို့ကို လူသားနာခံရမည့်အကြောင်း သက်သေခံ၏။

၃၁ သို့ဖြစ်၍၊ သင်တို့သည် ငါနှင့် ငါ၏အဘတို့သာလျှင် ထိုအရာတို့ကို သက်သေခံ၍၊ သွန်သင်ပေးလေသောသူများ ဖြစ်ကြသည်ဟု ထင်မှတ်ရန်လိုအပ်ခြင်းမရှိနှင့်။ သို့ဖြစ်၍၊ သင်တို့သည် ပညတ်တော်တို့ကို နာခံ၍၊ အဆုံးတိုင်အောင် တည်ကြည်ကြမည်ဆိုလျှင်၊ နောက်ဆုံးသောနေ့၌ ကယ်တင်ခြင်းသို့ ရောက်ကြလိမ့်မည်။ ဤမျှအထိပေတည်း။ အာမင်။