၁ နီဖိုင်း ၁၇

အခန်းကြီး ၁၇

နီဖိုင်းသည် သင်္ဘောတည်ဆောက်စေရန် မိန့်တော်မူခြင်းကို ခံရ၏—သူ၏အစ်ကိုတို့သည် သူ့ကို ဆန့်ကျင်ကြ၏—သူသည် ဣသရေလအမျိုးတို့နှင့်ပြုတော်မူသည့် ဘုရားသခင့်အမှုတော်တို့၏သမိုင်းကြောင်းကို ပြန်လည်ပြောပြခြင်းအားဖြင့် သူတို့ကို တိုက်တွန်း၏—နီဖိုင်းသည် ဘုရားသခင်၏တန်ခိုးတော်နှင့် ပြည့်စုံ၏—သူ၏အစ်ကိုတို့သည် ကျူပင်ခြောက်ကဲ့သို့ ညှိုးနွမ်းပျက်စီးခြင်းသို့ မရောက်စေခြင်းငှာ၊ သူ့ကို မထိစေရန် တားမြစ်ခံကြရ၏။ ဘီစီ ၅၉၂–၅၉၁ ခန့်။

၁ ဤသို့အားဖြင့်အချိန်တန်လာသောအခါ၊ ငါတို့သည်လည်း တောရိုင်းထဲ၌ တစ်ဖန် ခရီးသွားကြ၏။ ထိုအချိန်မှစ၍ အရှေ့အရပ်နီးပါးသို့ဦးတည်၍ ခရီးသွားကြ၏။ တောရိုင်းထဲ၌ များစွာသောဆင်းရဲဒုက္ခကိုလည်း ဖြတ်ကျော်၍ ခရီးသွားကြ၏။ ငါတို့၏မိန်းမတို့သည်လည်း တောရိုင်းထဲ၌ ကလေးများမွေးဖွားကြ၏။

၂ ကိုယ်တော်ရှင်၏ထိုမျှလောက်ကြီးစွာသောကောင်းချီးမင်္ဂလာတို့သည် ငါတို့အပေါ်မှာ ရှိလေသဖြင့်၊ ငါတို့သည် တောရိုင်းထဲ၌ အသားစိမ်းများကိုစား၍ အသက်ရှင်စဉ်တွင် ငါတို့၏မိန်းမတို့မှာ မိမိတို့၏ကလေးများကို နို့ရည်များစွာတိုက်ကျွေးလျက်၊ အမျိုးသားတို့ကဲ့သို့ပင် အားကြီးကြ၏။ သူတို့သည် ခရီးသွားခြင်းကိုလည်း ညည်းညူအပြစ်တင်ခြင်းများမရှိဘဲ သည်းခံစပြုကြ၏။

၃ ထိုကဲ့သို့အားဖြင့်၊ ငါတို့သိမြင်ကြသည်မှာ ဘုရားသခင်၏ပညတ်တော်တို့ ပြီးပြည့်စုံစေရမည့်အကြောင်းပေတည်း။ လူသားတို့သည်လည်း ဘုရားသခင်၏ပညတ်တော်များကို စောင့်ထိန်းကြလျှင်၊ သူတို့ကို ကျွေးမွေးပြီး၊ ခွန်အားဖြည့်ပေး၍၊ မိန့်တော်မူလေသည့်အရာကို သူတို့ပြီးမြောက်နိုင်စေမည့်နည်းလမ်းများကိုလည်း ပေးသနားတော်မူ၏။ သို့ဖြစ်၍၊ တောရိုင်းထဲ၌ ငါတို့တည်းခိုနေစဉ်တွင်၊ ငါတို့အတွက်နည်းလမ်းများကို ပေးသနားတော်မူ၏။

၄ ငါတို့သည်လည်း နှစ်ပေါင်းများစွာ၊ အထူးသဖြင့် ရှစ်နှစ်မျှပင်ကြာအောင် တောရိုင်းထဲ၌ တည်းခိုကြ၏။

၅ ငါတို့သည် များစွာသောအသီးများနှင့် တောပျားရည်များကြောင့်လည်း အလျှံပယ်ဟု ငါတို့ခေါ်လေသည့်အရပ်သို့ ရောက်လာကြ၏။ ငါတို့မပျက်စီးနိုင်ကြစေခြင်းငှာ၊ ဤအရာခပ်သိမ်းတို့ကို ကိုယ်တော်ရှင်ပြင်ဆင်ထားတော်မူလေပြီ။ ငါတို့သည် များစွာသောရေတို့ဟု အနက်ရသည့် ဣရေရန်တုံဟု ငါတို့ခေါ်လေသည့် ပင်လယ်ကိုလည်း မြင်၏။

၆ ဤသို့အားဖြင့်အချိန်တန်လာသောအခါ၊ ငါတို့သည် ပင်လယ်ကမ်းနား၌ ငါတို့၏တဲများကို ဆောက်ကြ၏။ ငါတို့သည် များစွာသော၊ အထူးသဖြင့်၊ အလွန်များလှ၍ ၎င်းတို့အားလုံးကို ရေးပင်မရေးနိုင်သည့် များစွာသောဆင်းရဲဒုက္ခတို့နှင့် များစွာသောအခက်အခဲတို့ကို ခံစားရသော်ငြားလည်း ပင်လယ်ကမ်းနားသို့ရောက်သောအခါ လွန်စွာရွှင်လန်းဝမ်းမြောက်ကြ၏။ ငါတို့သည် များစွာသောအသီးများကြောင့် ထိုအရပ်ကို အလျှံပယ်ဟု ခေါ်ကြ၏။

၇ ဤသို့အားဖြင့်အချိန်တန်လာသောအခါ၊ ငါ၊ နီဖိုင်းသည် အလျှံပယ်ပြည်တွင် ရက်ပေါင်းများစွာကြာအောင် ရှိနေခဲ့လေပြီးနောက် ကိုယ်တော်ရှင်၏အသံသည် ငါ့ထံသို့ ရောက်လာ၍၊ ထလော့၊ သင် တောင်ပေါ်သို့ သွားလော့ဟု မိန့်တော်မူ၏။ ဤသို့အားဖြင့်အချိန်တန်လာသောအခါ၊ ငါသည်လည်း ထ၍ တောင်ပေါ်သို့တက်သွားပြီးလျှင်၊ ကိုယ်တော်ရှင်ထံ တောင်းလျှောက်၏။

၈ ဤသို့အားဖြင့်အချိန်တန်လာသောအခါ၊ ကိုယ်တော်ရှင်က ငါ့ကို မြွက်ဆို၍ မိန့်တော်မူလေသည်ကား၊ သင့်ကို ငါဖော်ပြတော်မူမည့်နည်းလမ်းအတိုင်း သင်္ဘောတစ်စီးကို သင်တည်ဆောက်ရမည်၊ သင်၏လူမျိုးတို့ကို ဤသမုဒ္ဒရာကို ဖြတ်၍ ငါဆောင်တော်မူခြင်းငှာပေတည်း။

၉ ငါကလည်း၊ ကိုယ်တော်ရှင်၊ အကျွန်ုပ်သည် ကိုယ်တော်ဖော်ပြတော်မူလေသည့်အတိုင်း သင်္ဘောကို တည်ဆောက်ခြင်းငှာ ကိရိယာများပြုလုပ်နိုင်ရန် ကျိုချက်ရမည့် သတ္တုရိုင်းကို ရှာဖွေတွေ့ရှိနိုင်ခြင်းငှာ အဘယ်အရပ်သို့ သွားရပါမည်နည်းဟု မေးလျှောက်၏။

၁၀ ဤသို့အားဖြင့်အချိန်တန်လာသောအခါ၊ ကိုယ်တော်ရှင်သည် ငါ့အား ကိရိယာများပြုလုပ်နိုင်ရန် သတ္တုရိုင်းများ ရှာဖွေတွေ့ရှိခြင်းငှာ အဘယ်အရပ်သို့သွားရမည့်အကြောင်း မိန့်တော်မူ၏။

၁၁ ဤသို့အားဖြင့်အချိန်တန်လာသောအခါ၊ ငါ၊ နီဖိုင်းသည် မီးမှုတ်ရန် ဖိုကို သားရဲ၏သားရေများဖြင့် ပြုလုပ်၏။ ငါသည် မီးမှုတ်နိုင်မည့်ဖိုကို ပြုလုပ်ပြီးနောက်၊ မီးမွှေးရန် ကျောက်ခဲနှစ်လုံးကို အချင်းချင်းပြင်းစွာရိုက်ခတ်၏။

၁၂ အကြောင်းမူကား၊ ကိုယ်တော်ရှင်သည် တောရိုင်းထဲ၌ ငါတို့ခရီးသွားစဉ်တွင် မီးများစွာပြုရန် ယခုတိုင်အောင် အခွင့်မပေး။ မိန့်တော်မူသည်ကား၊ ငါသည် သင်တို့၏စားစရာကို အရသာရှိလာစေမည်ဖြစ်၍၊ သင်တို့မချက်ရ။

၁၃ ငါသည် တောရိုင်းထဲ၌ သင်တို့၏ အလင်းလည်း ဖြစ်တော်မူမည်။ သင်တို့ငါ၏ပညတ်တော်တို့ကို စောင့်ထိန်းကြလျှင်၊ သင်တို့ရှေ့၌လမ်းကိုလည်းပြင်ဆင်တော်မူမည်။ သို့ဖြစ်၍၊ သင်တို့သည် ငါ၏ပညတ်တော်တို့ကို စောင့်ထိန်းကြသမျှ ကတိတော်မြေဆီသို့ ခေါ်ဆောင်ခံရမည်။ ငါ့အားဖြင့် ခေါ်ဆောင်ခံရသည်ကိုလည်း သိကြလိမ့်မည်။

၁၄ ထိုမှတစ်ပါး၊ ကိုယ်တော်ရှင် မိန့်တော်မူသည်ကား၊ သင်တို့သည် ကတိတော်မြေသို့ ရောက်ရှိကြလေပြီးနောက်၊ ငါ၊ ကိုယ်တော်ရှင်သည် ဘုရားသခင်ဖြစ်တော်မူသည်ကိုလည်းကောင်း၊ ငါ၊ ကိုယ်တော်ရှင်သည် သင်တို့ကို ပျက်စီးခြင်းမှ ကယ်လွှတ်တော်မူခဲ့သည်ကိုလည်းကောင်း၊ အထူးသဖြင့်၊ ငါ သင်တို့ကို ယေရုရှလင်နယ်မြေမှ ခေါ်ဆောင်တော်မူခဲ့သည်ကိုလည်းကောင်း သိကြလိမ့်မည်။

၁၅ သို့ဖြစ်၍၊ ငါ၊ နီဖိုင်းသည် ကိုယ်တော်ရှင်၏ပညတ်တော်တို့ကို စောင့်ထိန်းရန် အလွန်ကြိုးစား၏။ ငါ၏အစ်ကိုတို့ကိုလည်း သစ္စာရှိကြ၊ လုံ့လဝီရိယရှိကြစေရန် တိုက်တွန်း၏။

၁၆ ဤသို့အားဖြင့်အချိန်တန်လာသောအခါ၊ ငါသည် ကျောက်မှကျိုချက်၍ရရှိသော သတ္တုရိုင်းဖြင့် ကိရိယာများပြုလုပ်၏။

၁၇ ငါ၏အစ်ကိုတို့သည် ငါသင်္ဘောတည်ဆောက်တော့မည်ကို မြင်လျှင်၊ ငါ့ကိုဆန့်ကျင်၍ ညည်းညူအပြစ်တင်စပြု၍ ဆိုကြသည်ကား၊ ငါတို့ညီသည် လူမိုက်တစ်ဦးဖြစ်၏။ အကြောင်းမူကား၊ သူသည် သင်္ဘောတည်ဆောက်နိုင်မည်ဟု ထင်မှတ်၏။ ထိုမှတစ်ပါး၊ သူသည် ဤကြီးစွာသော ရေတို့ကို ဖြတ်ကူးနိုင်မည်ဟုလည်း ထင်မှတ်၏။

၁၈ ထိုကဲ့သို့အားဖြင့် ငါ၏အစ်ကိုတို့သည် ငါ့ကို ဆန့်ကျင်အပြစ်တင်ကြ၏၊ ငါသင်္ဘောတည်ဆောက်နိုင်ကြောင်းကိုလည်း မယုံကြည်၍ အလုပ်မလုပ်လိုကြ။ ငါ့ကို ကိုယ်တော်ရှင်သွန်သင်တော်မူလေကြောင်းကိုလည်း မယုံကြည်ကြ။

၁၉ ယခုမူကား၊ အချိန်တန်လာသောအခါ၊ ငါ၊ နီဖိုင်းသည် သူတို့စိတ်နှလုံး၏မာကျောခြင်းကြောင့်၊ အလွန်ဝမ်းနည်း၏။ ယခုမူကား၊ သူတို့သည် ငါဝမ်းနည်းစပြုသည်ကို မြင်ကြလျှင်၊ သူတို့စိတ်နှလုံး၌ ဝမ်းသာ၍၊ ငါ၏ဝမ်းနည်းခြင်းကြောင့် ရွှင်လန်းဝမ်းမြောက်၍ ဆိုကြလေသည်ကား၊ ငါတို့သည် သင်သင်္ဘောမတည်ဆောက်နိုင်ကြောင်း သိ၏။ အကြောင်းမူကား၊ ငါတို့သည် သင် ဝေဖန်ပိုင်းခြားနိုင်စွမ်းမရှိကြောင်း သိကြ၏။ သို့ဖြစ်၍၊ သင်သည် ဤမျှလောက်ကြီးစွာသောအမှုကို မပြီးမြောက်နိုင်။

၂၀ ထို့အတူ၊ သင်သည် စိတ်နှလုံး၏မိုက်မဲသောစိတ်ကူးအကြံအစည်တို့အားဖြင့် လှည့်ဖြားခေါ်ဆောင်သွားခံရသော ငါတို့၏အဘကဲ့သို့ပင်ဖြစ်၏။ ထိုမှတစ်ပါး၊ သူသည် ငါတို့ကို ယေရုရှလင်နယ်မြေမှ ဆောင်လေ၍၊ ငါတို့သည် ဤနှစ်ပေါင်းများစွာကြာအောင်၊ တောရိုင်းထဲ၌ အရပ်ရပ်သို့လည်ရလေပြီ။ ငါတို့၏မိန်းမတို့သည်လည်း ပင်ပန်းကြီးစွာ အလုပ်လုပ်၍ ပဋိသန္ဓေတည်ကြရ၏။ သူတို့သည် တောရိုင်းထဲ၌ ကလေးများ မွေးဖွားကြပြီးလျှင်၊ သေခြင်းမှတစ်ပါး အလုံးစုံသောအရာတို့ကို ခံစားကြရ၏။ သူတို့ယေရုရှလင်မြို့မှမထွက်ခင် သေခဲ့ရလေလျှင်၊ ဤဆင်းရဲဒုက္ခများကို ခံစားရခြင်းထက် သာ၍ကောင်းပေလိမ့်မည်။

၂၁ ရှုလော့၊ ဤနှစ်ပေါင်းများစွာ တောရိုင်းထဲ၌ ငါတို့ဒုက္ခခံစားရချိန်တွင်၊ ငါတို့သည် ငါတို့၏ဥစ္စာပစ္စည်းများနှင့် ငါတို့၏အမွေခံရာမြေ၌ပျော်မွေ့နိုင်ခဲ့ကြပေမည်။ ထိုမှတစ်ပါး၊ ငါတို့သည် ပျော်ရွှင်လျက်ရှိနိုင်ခဲ့ကြပေမည်။

၂၂ ငါတို့သည် ယေရုရှလင်နယ်မြေ၌ရှိသောလူတို့ဖြောင့်မတ်သောလူမျိုးများဖြစ်ကြောင်းကိုလည်း သိကြ၏။ အကြောင်းမူကား၊ သူတို့သည် ကိုယ်တော်ရှင်၏ထုံးဥပဒေသများ၊ စီရင်တော်မူချက်များနှင့် သူ၏ခပ်သိမ်းသောပညတ်တော်များကို မောရှေ၏ပညတ်တရားအတိုင်း စောင့်ထိန်းကြ၏။ သို့ဖြစ်၍၊ ငါတို့သည် သူတို့ဖြောင့်မတ်သောလူမျိုးများဖြစ်ကြောင်း သိကြ၏။ ငါတို့၏အဘသည် သူတို့ကို ပြစ်တင်ရှုတ်ချ၏။ ငါတို့သည် သူ့စကားတို့ကို စေ့စေ့နားထောင်လိုကြသောကြောင့်လည်း သူသည် ငါတို့ကို ဝေးရာသို့ ခေါ်ဆောင်၏။ ထိုမှတစ်ပါး၊ ငါတို့၏ညီသည်လည်း သူကဲ့သို့ပင်ဖြစ်၏။ ဤကဲ့သို့သောစကားဖြင့်၊ ငါ၏အစ်ကိုတို့သည် ငါတို့ကို ဆန့်ကျင်၍၊ ညည်းညူအပြစ်တင်ကြ၏။

၂၃ ဤသို့အားဖြင့်အချိန်တန်လာသောအခါ၊ ငါ၊ နီဖိုင်း သူတို့ကို ဆို၍ပြောလေသည်ကား၊ သင်တို့သည် ဣသရေလအမျိုးသားများဖြစ်သည့် ငါတို့၏ဘိုးဘေးတို့ကိုယ်တော်ရှင်၏နှုတ်ကပတ်တော်တို့ကို စေ့စေ့နားမထောင်ကြဘဲနှင့် အဲဂုတ္တုလူတို့၏လက်မှ ခေါ်ဆောင်သွားခံခဲ့ရသည်ဟု ယုံကြည်ကြသလော။

၂၄ ထိုမှတစ်ပါး၊ သင်တို့သည် ကိုယ်တော်ရှင် မောရှေအား သူတို့ကို ကျွန်ခံရာမှ ခေါ်ထုတ်ရမည့် အကြောင်း မိန့်တော်မမူခဲ့လေဘဲနှင့် သူတို့ကျွန်ခံရာမှ ခေါ်ထုတ်ခံခဲ့ရသည်ဟု ထင်မှတ်ကြသလော။

၂၅ ယခုမူကား၊ သင်တို့သည် ဣသရေလအမျိုးသားတို့ကျွန်ခံရာ၌ ရှိခဲ့ကြလေကြောင်း သိကြ၏။ သူတို့ထမ်းဖို့လေးလံသည့် အလုပ်များ ထမ်းရွက်ရသည်ကိုလည်း သိကြ၏။ သို့ဖြစ်၍၊ သင်တို့သည် သူတို့ကျွန်ခံရာမှ ခေါ်ဆောင်ခံရမည်မှာ သူတို့အတွက် ကောင်းမြတ်သောအရာဖြစ်ရမည်ကို သိကြ၏။

၂၆ ယခုမူကား၊ သင်တို့သည် မောရှေထိုကြီးစွာသောအမှုကို ဆောင်ရွက်စေရန် ကိုယ်တော်ရှင်၏မိန့်တော်မူခြင်းခံရကြောင်း သိကြ၏။ သူ၏စကားအားဖြင့် ဧဒုံပင်လယ်ရေတို့ တစ်ဖက်တစ်ချက်ကွဲ၍ ခြောက်သွေ့သောမြေပေါ်၌ သူတို့လျှောက်သွားကြလေကြောင်းကိုလည်း သိကြ၏။

၂၇ သို့ရာတွင်၊ သင်တို့သည် ဖာရောဘုရင်၏တပ်များဖြစ်သည့် အဲဂုတ္တုလူတို့ ဧဒုံပင်လယ်၌ နစ်မြုပ်လေကြောင်း သိကြ၏။

၂၈ တောရိုင်းထဲ၌ သူတို့ကို မန္နဖြင့် ကျွေးမွေးသည်ကိုလည်း သိကြ၏။

၂၉ ထိုမှတစ်ပါး၊ သင်တို့သည် မောရှေ သူ့၌ရှိသည့် ဘုရားသခင်၏တန်ခိုးတော်အတိုင်း စကားဆို၍၊ ဣသရေလအမျိုးသားတို့ ရေငတ်ပြေစေခြင်းငှာ၊ ကျောက်ကို ရိုက်သဖြင့်၊ ရေထွက်လာသည်ကိုလည်း သိကြ၏။

၃၀ သူတို့၏ဘုရားသခင်ကိုယ်တော်ရှင်၊ သူတို့၏ရွေးနုတ်ရှင်သည် သူတို့ရှေ့မှကြွတော်မူ၍ နေ့အချိန်၌ လမ်းပြခြင်း၊ ညဉ့်အချိန်၌ အလင်းပေးခြင်းနှင့် လူသားတို့ လက်ခံရရှိရန် သင့်လျော်သည့် ခပ်သိမ်းသောအရာတို့ကို ပြုတော်မူခြင်းတို့ဖြင့် ခေါ်ဆောင်သော်ငြားလည်း၊ သူတို့သည် ကိုယ့်စိတ်နှလုံးကိုမာကျောစေ၍၊ အသိစိတ်ကို ကွယ်စေလျက်၊ မောရှေကို ဆန့်ကျင်၍၊ မှန်ကန်သည့် အသက်ရှင်တော်မူသောဘုရားသခင်ကိုလည်း ဆန့်ကျင်၍ကဲ့ရဲ့ပြောဆိုကြ၏။

၃၁ ဤသို့အားဖြင့်အချိန်တန်လာသောအခါ၊ သူ၏ကတိတော်အတိုင်း၊ သူသည် ထိုသူတို့ကို ဖျက်ဆီး၏။ သူ၏ကတိတော်အတိုင်း၊ ထိုသူတို့ကို ခေါ်ဆောင်၏။ သူ၏ကတိတော်အတိုင်း၊ ခပ်သိမ်းသော အရာတို့ကို ထိုသူတို့အတွက် ပြုတော်မူ၏။ သူ၏ကတိတော်အားဖြင့်မှတစ်ပါး၊ ပြုထားတော်မူသောအရာ တစ်စုံတစ်ခုမျှမရှိ။

၃၂ သူတို့ယော်ဒန်မြစ်ကို ဖြတ်ကူးကြလေပြီးနောက် သူသည် ထိုပြည်သားတို့ကို မောင်းထုတ်နိုင်ကြစေသည့်တိုင်အောင်၊ အမှန်စင်စစ်၊ ကွဲပြားပြန့်ကျဲ၍ ပျက်စီးကြစေသည့်တိုင်အောင် သူတို့ကို အားကြီးစေတော်မူ၏။

၃၃ ယခုမူကား၊ သင်တို့သည် ငါတို့၏ဘိုးဘေးတို့အားဖြင့် နှင်ထုတ်ခံရလေသူ၊ ကတိတော်မြေ၌ရှိလေသူ ဤပြည်သားတို့ ဖြောင့်မတ်ကြသည်ဟု ထင်မှတ်ကြသလော။ ရှုလော့၊ မဟုတ်ပေဟု သင်တို့ကို ငါဆို၏။

၃၄ သင်တို့သည် အကယ်၍၊ ထိုသူတို့ဖြောင့်မတ်ကြလေလျှင်၊ ငါတို့၏ဘိုးဘေးတို့ သူတို့ထက်သာ၍ မြတ်ကြလိမ့်မည်ဟု ထင်မှတ်ကြသလော။ မဟုတ်ပေဟု သင်တို့ကို ငါဆို၏။

၃၅ ရှုလော့၊ ကိုယ်တော်ရှင်သည် ခပ်သိမ်းသော လူတို့ကို အညီအမျှ မှတ်တော်မူ၏။ ဖြောင့်မတ်သောသူသည် ဘုရားသခင်၏ နှစ်သက်တော်မူခြင်းကို ခံရ၏။ သို့ရာတွင်၊ ရှုလော့၊ ဤလူတို့သည် ဘုရားသခင်၏ နှုတ်ကပတ်တော်တိုင်းကို ငြင်းပယ်ခဲ့ကြလေပြီးလျှင်၊ ဒုစရိုက်၌ရင့်မှည့်ကြလေ၏။ ဘုရားသခင်၏အမျက်တော်အပြည့်အစုံသည်လည်း သူတို့အပေါ်၌ ကျရောက်လေ၏။ ကိုယ်တော်ရှင်သည် သူတို့တစ်ဖက်၌ မြေကို ကျိန်၍၊ ငါတို့ဘိုးဘေးတို့အဖို့ ကောင်းချီးပေးတော်မူ၏။ အထူးသဖြင့်၊ သူတို့ပျက်စီးစေခြင်းငှာ တစ်ဖက်၌ မြေကို ကျိန်တော်မူပြီးလျှင်၊ ငါတို့ဘိုးဘေးတို့ရယူနိုင်စွမ်းရှိစေခြင်းငှာ မြေကို ကောင်းချီးပေးတော်မူ၏။

၃၆ ရှုလော့၊ ကိုယ်တော်ရှင်သည် မြေကြီးကို နေထိုင်ကြစေခြင်းငှာ ဖန်ဆင်းတော်မူလေ၏။ ထိုမြေကြီးကို အမွေခံစေခြင်းငှာ သူ၏သားသမီးတို့ကိုလည်း ဖန်ဆင်းတော်မူလေ၏။

၃၇ ဖြောင့်မတ်သောလူမျိုးတို့ကိုလည်း ပေါ်ထွန်းလာစေ၏၊ ဆိုးညစ်သောလူမျိုးတို့ကို ဖျက်ဆီးတော်မူ၏။

၃၈ ထို့နောက်၊ သူသည် ဖြောင့်မတ်သောသူတို့ကို အဖိုးထိုက်သည့်ပြည်များသို့ ခေါ်ဆောင်တော်မူပြီးလျှင်၊ ဆိုးညစ်သောသူတို့ကို ဖျက်ဆီး၍၊ ထိုပြည်ကို သူတို့အတွက် ကျိန်တော်မူ၏။

၃၉ သူသည် ကောင်းကင်အမြင့်၌ အုပ်စိုးတော်မူ၏။ အကြောင်းမူကား၊ ထိုကောင်းကင်သည် သူ၏ပလ္လင်တော်ဖြစ်၏။ ဤမြေကြီးသည်ကား၊ သူ၏ခြေတင်ရာခုံဖြစ်သတည်း။

၄၀ သူတို့၏ကိုးကွယ်ရာဘုရားသခင်အရာ၌ သူ့ကို ထားရှိကြမည့်သူများကို ချစ်တော်မူ၏။ ရှုလော့၊ ငါတို့၏ဘိုးဘေးတို့ကို ချစ်တော်မူ၍၊ သူတို့နှင့် အထူးသဖြင့် အာဗြဟံ၊ ဣဇာက်၊ ယာကုပ်တို့နှင့်ပင် ပဋိညာဉ်ပြုတော်မူခဲ့၏။ သူသည် ပြုခဲ့လေသည့် ပဋိညာဉ်တို့ကိုလည်း အောက်မေ့တော်မူ၏။ သို့ဖြစ်၍၊ သူတို့ကို အဲဂုတ္တုပြည်မှ ဝေးရာသို့ခေါ်ဆောင်တော်မူလေသတည်း။

၄၁ တောရိုင်းထဲ၌လည်း သူတို့ကို အပြစ်ဒဏ်ဖြင့် ဆုံးမပဲ့ပြင်၏။ အကြောင်းမူကား၊ သူတို့သည် သင်တို့ကဲ့သို့ပင် စိတ်နှလုံးကို မာကျောစေကြ၏။ ကိုယ်တော်ရှင်သည် သူတို့၏ဒုစရိုက်ကြောင့် သူတို့ကို ဆုံးမပဲ့ပြင်၏။ ပျံတတ်သောမီးမြွေများကို သူတို့၌ လွှတ်တော်မူ၏။ အကိုက်ခံရပြီးနောက် သူတို့အနာပျောက်ကြစေခြင်းငှာ နည်းလမ်းကို ပြင်ဆင်ထားတော်မူ၏။ သူတို့ဆောင်ရွက်ရမည့်အလုပ်မှာ မျှော်ကြည့်ရန် ဖြစ်၏။ ထိုနည်းလမ်း၏ရိုးရှင်းခြင်းနှင့် လွယ်ကူခြင်းကြောင့် ပျက်စီးသူများစွာရှိလေ၏။

၄၂ သူတို့သည် စိတ်နှလုံးကို အချိန်နှင့်အမျှ မာကျောစေ၍၊ မောရှေကိုဆန့်ကျင်ပြီးလျှင်၊ ဘုရားသခင်ကိုလည်း ဆန့်ကျင်၍ ကဲ့ရဲ့ပြောဆိုကြ၏။ သို့သော်လည်း၊ သင်တို့သည် သူတို့ကတိတော်မြေထဲသို့ အတုမရှိသောတန်ခိုးတော်အားဖြင့် ခေါ်ဆောင်ခံရကြောင်း သိ၏။

၄၃ ယခုမူကား၊ ဤအရာခပ်သိမ်းတို့၏နောက်၌ သူတို့သည် အထူးသဖြင့်၊ ရင့်မှည့်လုနီးပါးအထိ ဆိုးညစ်လာသည့်အချိန် ကျရောက်လာ၏။ ဤကာလ၌၊ ငါသည် သူတို့ဖျက်ဆီးခံကြရတော့မည်ဟုလည်း ထင်မိ၏။ အကြောင်းမူကား၊ ငါသည် ဖမ်းဆီးချုပ်နှောင်ခြင်းသို့ ခေါ်ဆောင်သွားခံရမည့်သူ အနည်းငယ်မှတစ်ပါး၊ သူတို့ဖျက်ဆီးခံရမည့်အချိန် ဧကန်အမှန်ကျရောက်လာမည်ဖြစ်ကြောင်း သိ၏။

၄၄ သို့ဖြစ်၍၊ ကိုယ်တော်ရှင်သည် ငါ၏အဘကို တောရိုင်းထဲသို့ ထွက်ခွာသွားရမည့်အကြောင်း မိန့်တော်မူ၏။ ယုဒလူမျိုးတို့ကလည်း သူ့အသက်ကို နုတ်ယူရန် ကြိုးစားအားထုတ်ကြ၏။ ထိုမှတစ်ပါး၊ သင်တို့သည်လည်း သူ့အသက်ကို နုတ်ယူရန် ကြိုးစားအားထုတ်ကြလေပြီ။ သို့ဖြစ်၍၊ သင်တို့သည် သင်တို့စိတ်နှလုံး၌ လူ့အသက်ကိုသတ်သောသူများ ဖြစ်၍ သူတို့ကဲ့သို့ပင် ဖြစ်ကြ၏။

၄၅ သင်တို့သည် ဒုစရိုက်ကိုပြုရန် လျင်မြန်ကြသော်လည်း သင်တို့၏ဘုရားသခင်ကိုယ်တော်ရှင်ကို အောက်မေ့ရန် နှေးကွေးကြ၏။ သင်တို့သည် ကောင်းကင်တမန်ကို မြင်လေပြီ၊ သူသည်လည်း သင်တို့ကို မြွက်ဆို၏။ အမှန်စင်စစ်၊ သင်တို့သည် သူ့အသံကို အချိန်နှင့်အမျှ ကြားနာကြလေပြီ။ သူသည် သင်တို့ကို ဖြည်းညင်းသောအသံဖြင့်မြွက်ဆိုတော်မူ၏။ သို့ရာတွင်၊ သင်တို့သည် ခံစားတတ်စွမ်းမရှိတော့၍၊ သူ၏စကားများကို မခံစားနိုင်ကြ။ သို့ဖြစ်၍၊ သူသည် သင်တို့အား မြေကြီးကို အစိတ်စိတ်ကွဲသကဲ့သို့တုန်လှုပ်စေသည့် မိုးချုန်းသံကဲ့သို့ မြွက်ဆိုလေ၏။

၄၆ သင်တို့သည် သူ၏အနန္တတန်ခိုးရှိသော နှုတ်ကပတ်တော်၏တန်ခိုးတော်အားဖြင့် သူမြေကြီးကို ကွယ်ပျောက်သွားစေနိုင်ကြောင်းကိုလည်း သိကြ၏။ ထိုမှတစ်ပါး၊ သင်တို့သည် သူ့နှုတ်ကပတ်တော်အားဖြင့် သူကြမ်းတမ်းသောနေရာတို့ကို ချောမွေ့စေ၍၊ ချောမွေ့သောနေရာတို့ကို ကွဲပြတ်စေနိုင်တော်မူကြောင်း သိကြ၏။ အို၊ ထိုသို့ဆိုလျှင်၊ သင်တို့သည် စိတ်နှလုံး၌ အဘယ်ကြောင့်၊ အလွန်မာကျောနိုင်ကြလေသနည်း။

၄၇ ရှုလော့၊ ငါ၏စိတ်ဝိညာဉ်သည် သင်တို့ကြောင့် ပြင်းစွာသောဝေဒနာနှင့် ကွဲကြေ၍၊ ငါ၏စိတ်နှလုံးက နာကျင်၏။ ငါသည် သင်တို့ ကာလအစဉ်အဆက်စွန့်ပစ်ခံကြရမည်ကို စိုးရိမ်၏။ ရှုလော့၊ ငါသည် ငါ့ကိုယ်ခန္ဓာ၌ အင်အားမရှိနိုင်အောင်ပင် ဘုရားသခင်၏ ဝိညာဉ်တော်နှင့် ပြည့်လျက်ရှိ၏။

၄၈ ယခုမူကား၊ အချိန်တန်လာသောအခါ၊ ငါ ဤစကားတို့ကို ပြောလေပြီးနောက်၊ သူတို့သည် ငါ့ကို အမျက်ထွက်၍ ပင်လယ်ရေနက်ထဲသို့ ပစ်ချလိုကြ၏။ သူတို့ ငါ့ကို ဖမ်းဆီးရန် ရှေ့တိုးလာကြစဉ်တွင် သူတို့ကို ငါဆိုသည်ကား၊ အနန္တတန်ခိုးရှင်ဘုရားသခင်၏နာမတော်အားဖြင့် ငါသည် သင်တို့ကို အမိန့်ပေး၏။ သင်တို့ ငါ့ကို ထိခြင်းမရှိနှင့်။ အကြောင်းမူကား၊ ငါသည် ဘုရားသခင်၏တန်ခိုးတော်နှင့် ပြည့်စုံ၏၊ ငါ့ကိုယ်ခန္ဓာကို ဝါးမျိုခြင်းအထိပင်တည်း။ ငါ့ကို ဖမ်းဆီးမည့်သူမှန်သမျှသည်လည်း ကျူပင်ခြောက်ကဲ့သို့ပင် ညှိုးနွမ်းပျက်စီးခြင်းသို့ ရောက်လိမ့်မည်။ ထိုသူသည် ဘုရားသခင်၏တန်ခိုးတော်ရှေ့၌ ဘာမျှမဟုတ်သကဲ့သို့ ဖြစ်လိမ့်မည်။ အကြောင်းမူကား၊ ဘုရားသခင်သည် ထိုသူကို ဒဏ်ခတ်တော်မူလိမ့်မည်။

၄၉ ဤသို့အားဖြင့်အချိန်တန်လာသောအခါ၊ ငါ၊ နီဖိုင်း သူတို့ကို ဆိုသည်ကား၊ သူတို့သည် မိမိတို့အဘတစ်ဖက်၌ ညည်းညူအပြစ်တင်ခြင်း မရှိသင့်တော့ကြောင်း၊ ငါ့ကို သူတို့ကူ၍ အလုပ်လုပ်ခြင်းကိုလည်း မငြင်းသင့်ကြကြောင်းပေတည်း။ အကြောင်းမူကား၊ ဘုရားသခင်သည် ငါ့အား သင်္ဘောတည်ဆောက်ရမည့်အကြောင်း မိန့်ထားတော်မူလေပြီ။

၅၀ ငါသည်လည်း သူတို့ကို ဆိုလေသည်ကား၊ ဘုရားသခင်သည် ငါ့အား ခပ်သိမ်းသော အရာတို့ကို ဆောင်ရွက်ရန် မိန့်တော်မူလေလျှင်၊ ငါသည် ထိုအရာတို့ကို ဆောင်ရွက်နိုင်၏။ သူသည် ငါ့အား ဤရေကို သင်မြေကြီးဖြစ်လော့ဟု ဆိုရမည့်အကြောင်း မိန့်တော်မူလျှင်၊ မြေကြီးဖြစ်လိမ့်မည်။ ထိုသို့ ငါဆိုလျှင်၊ ဖြစ်လာလိမ့်မည်။

၅၁ ယခုမူကား၊ ကိုယ်တော်ရှင်သည် ထိုကဲ့သို့ကြီးစွာသော တန်ခိုးတော်ရှိ၍၊ အလွန်များစွာသော အလွန်တရာအံ့ဩဖွယ်အမှုတို့ကို လူသားတို့၌ ပြုပြင်စီရင်ထားတော်မူလေလျှင်၊ ငါသင်္ဘောတည်ဆောက်ရစေမည့်အကြောင်း၊ အဘယ်သို့အားဖြင့် မသွန်သင်နိုင်ဘဲရှိမည်နည်း။

၅၂ ဤသို့အားဖြင့်အချိန်တန်လာသောအခါ၊ ငါ၊ နီဖိုင်းသည် ငါ၏အစ်ကိုတို့အား၊ များစွာသောအရာတို့ကို ပြောဆိုသဖြင့်၊ သူတို့သည် အရှက်ရ၍၊ ငါ့ကို ရန်မတွေ့နိုင်ကြ။ ရက်ပေါင်းများစွာကြာအောင်ပင်၊ ငါ့ကို ဖမ်းလည်းမဖမ်းဆီးဝံ့ကြ၊ ငါ့ကို လက်ချောင်းတို့နှင့်လည်း မထိဝံ့ကြ။ ယခုမူကား၊ သူတို့သည် ငါ့ရှေ့၌ ညှိုးနွမ်းပျက်စီးရမည်ကို ကြောက်ရွံ့သဖြင့်၊ ဤအမှုကို မပြုဝံ့ကြ၊ ဤမျှအထိ၊ တန်ခိုးတော်နှင့်အလွန်ပြည့်စုံတော်မူသည်မှာ ဘုရားသခင်၏ ဝိညာဉ်တော်ဖြစ်၏။ ထိုကဲ့သို့အားဖြင့်၊ သူတို့အပေါ် အရှိန်ဩဇာသက်ရောက်တော်မူလေ၏။

၅၃ ဤသို့အားဖြင့်အချိန်တန်လာသောအခါ၊ ကိုယ်တော်ရှင်သည် ငါ့ကို မိန့်တော်မူသည်ကား၊ သင်၏လက်ကို သင့်အစ်ကိုတို့ဆီသို့ တစ်ဖန်ဆန့်လော့။ သူတို့သည် သင်၏ရှေ့၌ မညှိုးနွမ်းမပျက်စီးရ။ သို့ရာတွင်၊ ငါသည် သူတို့ကို တုန်လှုပ်စေမည်ဟု ကိုယ်တော်ရှင်မိန့်တော်မူ၏။ ဤအရာကို ငါပြုတော်မူသည်ကား၊ ငါသည် သူတို့၏ဘုရားသခင်ကိုယ်တော်ရှင်ဖြစ်တော်မူကြောင်း သူတို့သိနိုင်ကြစေမည့်အကြောင်းပေတည်း။

၅၄ ဤသို့အားဖြင့်အချိန်တန်လာသောအခါ၊ ငါသည် ငါ့အစ်ကိုတို့ဆီသို့ လက်ကို ဆန့်၍၊ သူတို့သည် ငါ့ရှေ့၌ မညှိုးနွမ်းမပျက်စီးကြ။ သို့ရာတွင်၊ ကိုယ်တော်ရှင်သည် မိန့်တော်မူခဲ့လေသည့် စကားအတိုင်းပင် သူတို့ကို တုန်လှုပ်စေ၏။

၅၅ ယခုမူကား၊ သူတို့ဆိုလေသည်မှာ ငါတို့သည် ကိုယ်တော်ရှင် သင်နှင့်အတူရှိတော်မူသည်ကို ဧကန်အမှန်သိ၏။ အကြောင်းမူကား၊ ငါတို့ကို တုန်လှုပ်စေသည်မှာ ကိုယ်တော်ရှင်၏တန်ခိုးတော်ဖြစ်ကြောင်း ငါတို့ သိကြ၏။ သူတို့သည် ငါ၏ရှေ့၌ ပျပ်ဝပ်၍၊ ငါ့ကို ကိုးကွယ်တော့မည်ပြုကြ၏။ သို့ရာတွင်၊ ငါသည် သူတို့ကို အခွင့်မပေးလို၍ ဆိုသည်ကား၊ ငါသည် သင်တို့၏ညီ၊ အမှန်စင်စစ်၊ သင်တို့၏ညီငယ်ဖြစ်၏။ သို့ဖြစ်၍၊ သင်တို့၏ ဘုရားသခင်ကိုယ်တော်ရှင်အား ကိုးကွယ်ကြလော့၊ သင်တို့၏ ကိုယ်တော်ရှင်ပေးတော်မူသောပြည်၌ သင်တို့အသက် တာရှည်မည့်အကြောင်း၊ သင်တို့၏အမိနှင့် အဘကို ရိုသေစွာပြုကြလော့။