၁ နီဖိုင်း ၁၅

အခန်းကြီး ၁၅

လေဟိ၏အမျိုးအနွယ်တို့သည် နောက်ပိုင်းကာလများ၌ ဧဝံဂေလိတရားတော်ကို တစ်ပါးအမျိုးသားတို့ထံမှရရှိကြ၏—ဣသရေလအမျိုးတို့ စုဝေးခြင်းကို အပင်၏ပကတိအခက်များ တစ်ဖန်အကိုင်းဆက်၍အစိုက်ခံရမည့် သံလွင်ပင်နှင့် ပမာပြုထား၏—နီဖိုင်းသည် အသက်ပင်အကြောင်းရူပါရုံကို အနက်ဖွင့်ပြ၏၊ ဆိုးညစ်သောသူနှင့် ဖြောင့်မတ်သောသူကို ခွဲခြားရာ၌ ဘုရားသခင်၏ တရားတော်မူခြင်းအကြောင်းကို ပြော၏။ ဘီစီ ၆၀၀–၅၉၂ ခန့်။

၁ ဤသို့အားဖြင့်အချိန်တန်လာသောအခါ၊ ငါ၊ နီဖိုင်းသည်လည်း ဝိညာဉ်တော်အားဖြင့် သယ်ဆောင်သွားခံရ၍ ဤအရာခပ်သိမ်းတို့ကို မြင်ရလေပြီးမှ၊ ငါ့အဘ၏တဲသို့ ပြန်လာခဲ့၏။

၂ ဤသို့အားဖြင့်အချိန်တန်လာသောအခါ၊ ငါသည် ငါ၏အစ်ကိုတို့ကို မြင်၏။ သူတို့သည် ငါ့အဘသူတို့ကို ပြောခဲ့လေသည့်အရာတို့အကြောင်းကို အချင်းချင်းငြင်းခုံနေကြ၏။

၃ အကြောင်းမူကား၊ သူသည် လူသားအနေဖြင့် ကိုယ်တော်ရှင်ထံ မေးလျှောက်သည်မှတစ်ပါး၊ နားလည်ရရန် ခက်ခဲသည့် ကြီးစွာသောအမှုများစွာတို့ကို သူတို့အား အမှန်ဆို၏။ သူတို့သည်လည်း စိတ်နှလုံးမာကျောလျက်ရှိလေရကား၊ ထို့ကြောင့် ကိုယ်တော်ရှင်ကို မှီခိုအားကိုးသင့်လျက်နှင့် မမှီခိုအားမကိုးကြ။

၄ ယခုမူကား၊ ငါ၊ နီဖိုင်းသည် သူတို့စိတ်နှလုံး၏မာကျောခြင်းကြောင့်၊ ထို့အတူ ငါမြင်ခဲ့ရလေသောအရာတို့ကြောင့်၊ ဝမ်းနည်းပူဆွေး၏၊ လူသားတို့၏ကြီးစွာသော ဆိုးညစ်ခြင်းကြောင့် ထိုအရာတို့ရှောင်လွှဲမရဘဲဖြစ်လာရမည်ကိုလည်း သိ၏။

၅ ဤသို့အားဖြင့်အချိန်တန်လာသောအခါ၊ ငါသည် ငါ၏ဆင်းရဲဒုက္ခတို့ကြောင့် စိတ်ညှိုးငယ်၏။ အကြောင်းမူကား၊ ငါ့လူမျိုးတို့၏ပျက်စီးခြင်းကြောင့် ငါ၏ဆင်းရဲဒုက္ခတို့မှာ အားလုံးထက်ကြီးမားလှ၏ဟု ထင်၏။ အကြောင်းမူကား၊ ငါသည် သူတို့၏လဲကျခြင်းကို မြင်ခဲ့ရလေပြီ။

၆ ဤသို့အားဖြင့်အချိန်တန်လာသောအခါ၊ ငါသည်လည်း ခွန်အားရရှိလာခဲ့လေပြီးနောက်၊ ငါ့အစ်ကိုတို့၏ငြင်းခုံခြင်းအကြောင်းရင်းကို သိလို၍ သူတို့ကို ဆို၏။

၇ သူတို့ကလည်း ရှုလော့၊ ငါတို့သည် သံလွင်ပင်၏ပကတိအခက်များနှင့်စပ်လျဉ်း၍၊ ထို့အတူ၊ တစ်ပါးအမျိုးသားတို့နှင့်စပ်လျဉ်း၍ ငါတို့အဘပြောလေသည့် စကားတို့ကို နားမလည်နိုင်ဟု ဆိုကြ၏။

၈ ငါကလည်း သူတို့ကို သင်တို့သည် ကိုယ်တော်ရှင်ထံ မေးလျှောက်ကြသလောဟု မေးလျှင်၊

၉ သူတို့ကလည်း ငါတို့ မမေးလျှောက်ကြ။ အကြောင်းမူကား၊ ကိုယ်တော်ရှင်သည် ထိုကဲ့သို့သောအရာကို ငါတို့အား ဖော်ပြမည်မဟုတ်ဟု ငါ့ကို ဖြေ၏။

၁၀ ရှုလော့၊ ငါ သူတို့ကို ဆိုသည်ကား၊ သင်တို့သည် ကိုယ်တော်ရှင်၏ပညတ်တော်တို့ကို မစောင့်ထိန်းကြသည်မှာ၊ အဘယ်သို့နည်း။ သင်တို့စိတ်နှလုံး၏မာကျောခြင်းကြောင့် သင်တို့ပျက်စီးကြမည်မှာ၊ အဘယ်သို့နည်း။

၁၁ သင်တို့သည် ကိုယ်တော်ရှင်မိန့်တော်မူလေသည့်အရာတို့ကို သတိမရကြသလော—သင်တို့သည် စိတ်နှလုံးကို မမာကျောစေဘဲ၊ ငါ၏ပညတ်တော်တို့ကို စောင့်ထိန်းရာ၌ လုံ့လဝီရိယရှိ၍၊ ရရှိမည်ဟုယုံကြည်၍၊ ငါ့ထံသို့ ယုံကြည်ခြင်းနှင့်တောင်းလျှင်၊ ဤအရာတို့ကို သင်တို့အား ဧကန်အမှန်ဖော်ပြလိမ့်မည်။

၁၂ ရှုလော့၊ သင့်တို့ကို ငါဆိုသည်ကား၊ ဣသရေလအမျိုးသားတို့သည် ငါတို့အဘ၌ရှိသည့် ကိုယ်တော်ရှင်၏ဝိညာဉ်တော်အားဖြင့် သံလွင်ပင်နှင့်ပမာပြုခံကြရလေ၏။ ရှုဦးလော့၊ ငါတို့သည် ဣသရေလအမျိုးသားတို့ထံမှ ကွဲထွက်လာကြလေသည်မဟုတ်သလော။ ငါတို့သည် ဣသရေလအမျိုးသားတို့၏အနွယ် မဟုတ်ကြသလော။

၁၃ ယခုမူကား၊ တစ်ပါးအမျိုးသားအပြည့်အစုံတို့အားဖြင့်၊ ပကတိအခက်များကို အကိုင်းဆက်ပြီးစိုက်ခြင်းနှင့်စပ်လျဉ်း၍၊ ငါတို့အဘ တွေးမြင်သည့်အရာမှာ ငါတို့၏အမျိုးအနွယ်တို့ ယုံကြည်မှုလျော့ပါးဆုတ်ယုတ်လာမည့်အချိန် နောက်ပိုင်းကာလများတွင်၊ အထူးသဖြင့်၊ နှစ်ပေါင်းများစွာကြာသောအခါ၊ လူသားတို့ထံ မေရှိယကိုယ်ထင်ရှားစွာပြတော်မူ၍၊ မျိုးဆက်များစွာကြာပြီးနောက်၊ မေရှိယ၏ဧဝံဂေလိတရားတော်အပြည့်အစုံသည် တစ်ပါးအမျိုးသားတို့ဆီသို့ရောက်ရှိလာ၍ တစ်ပါးအမျိုးသားတို့ထံမှ ငါတို့အမျိုးအနွယ်တို့၏ကျန်ကြွင်းသောသူတို့ဆီသို့ရောက်ရှိလာ၏—

၁၄ ထိုကာလတွင်၊ ငါတို့အမျိုးအနွယ်တို့၏ကျန်ကြွင်းသောသူတို့သည်လည်း ဣသရေလအမျိုးသားတို့၏အနွယ်ဖြစ်ကြောင်းနှင့် ကိုယ်တော်ရှင်၏ပဋိညာဉ်ခံလူမျိုးများဖြစ်ကြောင်းကို သိကြလိမ့်မည်။ ထို့နောက်တွင်၊ သူတို့သိလိမ့်မည်ဖြစ်၍၊ သူတို့၏ဘိုးဘေးတို့အကြောင်း အသိပညာသို့၊ ထို့အတူ၊ သူတို့၏ ရွေးနုတ်ရှင်အားဖြင့် သူတို့၏အဘတို့ကို အမှုတော်ဆောင်ခဲ့သည့် ဧဝံဂေလိတရားတော်အကြောင်း အသိပညာသို့လည်း ရောက်ကြလိမ့်မည်။ သို့ဖြစ်၍၊ သူတို့သည် မိမိတို့၏ ရွေးနုတ်ရှင်နှင့် သူ၏ဩဝါဒအချက်များအကြောင်း အသိပညာသို့ ရောက်ကြမည်ဖြစ်၍၊ သူ့ထံသို့လာတတ်၍၊ ကယ်တင်ခြင်းသို့ရောက်ကြရလိမ့်မည်။

၁၅ ထိုကာလ၌၊ သူတို့သည် မိမိတို့၏ကျောက်နှင့် မိမိတို့၏ကယ်တင်ခြင်းဖြစ်သည့် ထာဝရတည်မြဲသောဘုရားသခင်အား ချီးမွမ်း၍၊ ရွှင်လန်းဝမ်းမြောက်ခြင်းမရှိဘဲနေကြလိမ့်မည်လော။ ထိုမှတစ်ပါး၊ ၎င်းကာလ၌ မှန်သောစပျစ်နွယ်ပင်မှ ခွန်အားနှင့် အားဖြည့်ခြင်းကို မရရှိဘဲနေကြလိမ့်မည်လော။ ထိုမှတစ်ပါး၊ ဘုရားသခင်၏မှန်သောသိုးစုသို့ မလာရောက်ဘဲနေကြလိမ့်မည်လော။

၁၆ ရှုလော့၊ ငါ သင်တို့ကို ဆိုသည်ကား၊ ဟုတ်ပေ၏။ သူတို့သည် ဣသရေလအမျိုးသားတို့၌ တစ်ဖန် အောက်မေ့ခံရလိမ့်မည်။ သူတို့သည် သံလွင်ပင်၏ပကတိအခက်များဖြစ်၍၊ မှန်သောသံလွင်ပင်သို့ အကိုင်းဆက်၍အစိုက်ခံကြရလိမ့်မည်။

၁၇ ဤအရာသည်ကား ငါ့အဘတွေးမြင်သောအရာပေတည်း။ သူသည် တစ်ပါးအမျိုးသားတို့အားဖြင့် သူတို့ကွဲပြားပြန့်ကျဲရသည့်အချိန်မတိုင်ခင်အထိ ထိုအချင်းအရာဖြစ်လာမည်မဟုတ်ကြောင်းကိုလည်း တွေးမြင်၏။ ကိုယ်တော်ရှင်သူ့တန်ခိုးတော်ကို တစ်ပါးအမျိုးသားတို့ထံ ပြတော်မူခြင်းငှာ ထိုအချင်းအရာကို တစ်ပါးအမျိုးသားတို့အားဖြင့် ပြုတော်မူလိမ့်မည်ကိုလည်း တွေးမြင်၏။ အကြောင်းမူကား၊ ယုဒလူမျိုးတို့ သို့မဟုတ် ဣသရေလအမျိုးသားတို့၏ငြင်းပယ်ခြင်းကို ခံရလိမ့်မည်ဟူသည့် အကြောင်းရင်းမှန်ကြောင့်ပေတည်း။

၁၈ သို့ဖြစ်၍၊ ငါတို့အဘသည် ငါတို့အမျိုးအနွယ်အကြောင်းတစ်ခုတည်းကိုသာလျှင် ပြောဆိုလေသည်မဟုတ်၊ နောက်ပိုင်းကာလများ၌ပြီးပြည့်စုံလိမ့်မည်ဖြစ်သည့် ပဋိညာဉ်ကို ညွှန်းဆိုလျက်၊ ခပ်သိမ်းသော ဣသရေလအမျိုးသားတို့အကြောင်းကိုလည်း ပြောဆို၏။ ကိုယ်တော်ရှင် ငါတို့၏အဘအာဗြဟံနှင့် ပြုတော်မူသည့် ထိုပဋိညာဉ်သည်ကား၊ သင်၏အမျိုးအနွယ်အားဖြင့် မြေကြီးပေါ်ရှိ အမျိုးစုခပ်သိမ်းတို့ ကောင်းချီးခံစားကြရလိမ့်မည်ဟု ဖြစ်သတည်း။

၁၉ ဤသို့အားဖြင့်အချိန်တန်လာသောအခါ၊ ငါ၊ နီဖိုင်းသည် သူတို့အား ဤအရာတို့အကြောင်းကို များစွာပြောဆို၏။ အထူးသဖြင့်၊ ငါသည် နောက်ပိုင်းကာလများ၌ ယုဒလူမျိုးတို့ထံ ပြန်လည်အပ်နှင်းခြင်းအကြောင်းကို သူတို့အား ပြောဆို၏။

၂၀ ယုဒလူမျိုးတို့ သို့မဟုတ် ဣသရေလအမျိုးသားတို့ထံ ပြန်လည်အပ်နှင်းခြင်းအကြောင်းကို ပြောလေသူဟေရှာယ၏စကားများကိုလည်း သူတို့ကို ပြန်လည်၍ပြောပြ၏။ သူတို့သည်လည်း ပြန်လည်အပ်နှင်းခံရပြီးနောက်၊ ရောထွေးမခံကြရတော့လတ္တံ့၊ တစ်ဖန်ကွဲပြားပြန့်ကျဲရခြင်းလည်း မရှိကြလတ္တံ့။ ဤသို့အားဖြင့်အချိန်တန်လာသောအခါ၊ ငါသည် ငါ့အစ်ကိုတို့အား များစွာသောစကားတို့ကို ပြောသဖြင့်၊ သူတို့သည် စိတ်ပြေ၍ ကိုယ်တော်ရှင်ရှေ့၌ သူတို့ကိုယ်သူတို့နှိမ့်ချကြ၏။

၂၁ ဤသို့အားဖြင့်အချိန်တန်လာသောအခါ၊ သူတို့ကလည်း ငါတို့အဘ အိပ်မက်၌မြင်ခဲ့သည့် ဤအရာကား၊ အဘယ်သို့ဆိုလိုသနည်း။ သူမြင်ခဲ့သည့်အပင်ကား၊ အဘယ်သို့ဆိုလိုသနည်းဟု ငါ့ကို တစ်ဖန်ဆို၍ မေးကြ၏။

၂၂ ထိုအရာသည်ကား၊ အသက်ပင်၏အမှတ်လက္ခဏာဖြစ်သည်ဟု ငါသည် သူတို့ကို ဖြေ၏။

၂၃ သူတို့ကလည်း ငါ့ကို အပင်ဆီသို့ သွယ်တန်းသည့်အရာတည်းဟူသော ငါတို့အဘမြင်သည့်သံတန်းကား၊ အဘယ်သို့နည်းဟု မေးလျှင်၊

၂၄ ထိုအရာသည် ဘုရားသခင်၏နှုတ်ကပတ်တော်ဖြစ်၏။ ဘုရားသခင်၏နှုတ်ကပတ်တော်ကို စေ့စေ့နားထောင်၍၊ ခိုင်မြဲစွာကိုင်ဆောင်ထားသူမှန်သမျှသည် အဘယ်တော့မျှ ပျက်စီးမည်မဟုတ်။ သွေးဆောင်ဖြားယောင်းခြင်းတို့နှင့် မာရ်နတ်၏မီးစက်လက်နက်တို့ကလည်း သူတို့ကို ပျက်စီးခြင်းသို့ လှည့်ဖြားခေါ်ဆောင်သွားရန်၊ အသိစိတ်ကွယ်ခြင်းသို့ ရောက်စေသည့်တိုင်အောင် အနိုင်ရနိုင်ကြလိမ့်မည်မဟုတ်ဟု ငါသည် သူတို့ကို ဖြေ၏။

၂၅ သို့ဖြစ်၍၊ ငါ၊ နီဖိုင်းသည် သူတို့အား ကိုယ်တော်ရှင်၏နှုတ်ကပတ်တော်ကို ပမာဏပြုရန် တိုက်တွန်း၏။ အမှန်စင်စစ်၊ ဘုရားသခင်၏နှုတ်ကပတ်တော်ကို သူတို့ပမာဏပြုစေလိုကြောင်းနှင့် သူ၏ပညတ်တော်များကို အရာရာ၌ အစဉ်မပြတ်စောင့်ထိန်းရန် သတိရကြစေကြောင်း ငါ့စိတ်ဝိညာဉ်၏စွမ်းအားရှိသမျှ၊ ငါ့၌ရှိသည့်စွမ်းရည်ရှိသမျှနှင့် သူတို့ကို တိုက်တွန်း၏။

၂၆ ငါတို့အဘ မြင်သည့် ရေစီးရာမြစ်သည်ကား အဘယ်သို့နည်းဟု သူတို့ ငါ့ကို မေးလျှင်၊

၂၇ ငါ့အဘ မြင်လေသည့် ရေသည်ကား၊ အညစ်အကြေးပေတည်း။ သူ၏စိတ်သည် အခြားအရာတို့နှင့် လွန်စွာပြည့်နေ၍၊ ရေ၏အညစ်အကြေးကို သူမမြင်ဟု ငါဖြေ၏။

၂၈ ဆိုးညစ်သောသူတို့ကို အသက်ပင်နှင့် ထို့အတူ ဘုရားသခင်၏သန့်ရှင်းသူတို့နှင့်ခွဲခြားထားသည်မှာ ကြောက်ရွံ့ဖွယ်ကောင်းသောချောက်ကြီးတစ်ခု ဖြစ်ကြောင်းကိုလည်း ငါသည် သူတို့ကို ဆို၏။

၂၉ ထိုအရာကားသည်ကား၊ ကြောက်ရွံ့ဖွယ်ကောင်းသောငရဲ၏ အမှတ်လက္ခဏာဖြစ်ကြောင်း၊ ကောင်းကင်တမန်က ငါ့ကို မြွက်ဆိုသည့်အရာ၊ ဆိုးညစ်သောသူတို့အတွက် ပြင်ဆင်ထားလေသောအရာဖြစ်ကြောင်း ငါသည် သူတို့ကို ဆို၏။

၃၀ ငါတို့အဘသည် ဘုရားသခင်၏တရားတော်မူခြင်းက ဆိုးညစ်သောသူနှင့် ဖြောင့်မတ်သောသူကို ခွဲခြားထားသည်ကိုလည်း မြင်၏။ ထိုတရားတော်မူခြင်း၏ အရောင်ထွန်းလင်းတောက်ပမှုမှာ၊ ဘုရားသခင်ထံသို့ အဆုံးမရှိဘဲ၊ ကာလအစဉ်အဆက်အမြဲ တက်သည့် မီးလျှံနှင့်တူကြောင်း ငါသည် သူတို့ကို ဆို၏။

၃၁ သူတို့ကလည်း ဤအရာသည် အစမ်းသပ်ခံကာလများ၌ ကိုယ်ခန္ဓာ၏စိတ်ဆင်းရဲကိုယ်ဆင်းရဲဖြစ်ခြင်းကို ပုံဆောင်သလော။ သို့မဟုတ်၊ ဇာတိပကတိကိုယ်ခန္ဓာသေပြီးမှ၊ စိတ်ဝိညာဉ်၏နောက်ဆုံးဖြစ်ဟန်ကို ပုံဆောင်သလော။ သို့မဟုတ်၊ ဇာတိပကတိနှင့်ဆိုင်သော အရာများအကြောင်းကို ဖော်ပြသလောဟု ငါ့ကို မေးကြ၏။

၃၂ ဤသို့အားဖြင့်အချိန်တန်လာသောအခါ၊ သူတို့ကို ငါဆိုသည်ကား၊ ထိုအရာသည် ဇာတိပကတိနှင့် ဝိညာဉ်ပကတိ နှစ်ခုစလုံးနှင့်ဆိုင်သောအရာတို့၏အမှတ်လက္ခဏာဖြစ်လေ၏။ အကြောင်းမူကား၊ သူတို့၏အကျင့်အတိုင်း၊ အထူးသဖြင့်၊ သူတို့၏အစမ်းသပ်ခံကာလများ၌၊ ဇာတိပကတိကိုယ်ခန္ဓာအားဖြင့်၊ ကျင့်လေသော အကျင့်များအတိုင်း တရားစီရင်ခံရမည့် ကာလသည် ကျရောက်လာလိမ့်မည်။

၃၃ သို့ဖြစ်၍၊ ဖြောင့်မတ်ခြင်းနှင့်စပ်ဆိုင်သည့် ဝိညာဉ်ပကတိအရာတို့နှင့်စပ်လျဉ်း၍၊ သူတို့သည် သူတို့၏ဆိုးညစ်ခြင်း၌သေလျှင်၊ စွန့်ပစ်ခြင်းကိုလည်း ခံကြရမည်။ သို့ဖြစ်၍၊ သူတို့သည် သူတို့၏အကျင့်များအတိုင်း တရားစီရင်ခံရစေရန်၊ ဘုရားသခင်ရှေ့ ၌ရပ်ရန် ဆောင်ယူခံကြရမည်။ သူတို့၏အကျင့်များသည် အညစ်အကြေးဖြစ်လေလျှင်၊ သူတို့သည် ညစ်ညမ်းကြမည်။ သူတို့သည် ညစ်ညမ်းကြလျှင်၊ ဘုရားသခင်၏နိုင်ငံတော်၌ မနေထိုင်နိုင်ကြ။ အကယ်၍ နေထိုင်ခွင့်ပြုလျှင် ဘုရားသခင်၏နိုင်ငံတော်သည်လည်း ညစ်ညမ်းရပေမည်ဟု ဖြစ်လေသတည်း။

၃၄ သို့ရာတွင်၊ ရှုလော့၊ သင်တို့ကို ငါဆိုသည်ကား၊ ဘုရားသခင်၏နိုင်ငံတော်သည် မညစ်ညမ်း၍ အဘယ်မစင်ကြယ်သောအရာမျှ၊ ဘုရားသခင်၏နိုင်ငံတော်သို့ မဝင်ရောက်နိုင်။ သို့ဖြစ်၍၊ ညစ်ညမ်းသောအရာအတွက် အညစ်အကြေး၏နေရာကို ပြင်ဆင်ထားရပေမည်။

၃၅ ပြင်ဆင်ထားသောနေရာတစ်ခု၊ အမှန်စင်စစ်၊ ငါပြောလေသည့် ထိုကြောက်ရွံ့ဖွယ်ကောင်းသောငရဲပင်ရှိ၏။ နတ်ဆိုးသည် ထိုငရဲကို ပြင်ဆင်သူဖြစ်၏။ သို့ဖြစ်၍၊ လူသားတို့၏ စိတ်ဝိညာဉ်များ၏နောက်ဆုံးဖြစ်ဟန်မှာ၊ ဘုရားသခင်၏နိုင်ငံတော်၌ နေထိုင်ရန်၊ သို့မဟုတ် ငါပြောလေသောထိုတရားတော်မူခြင်းကြောင့် နှင်ထုတ်ခံရရန်ရှိ၏။

၃၆ သို့ဖြစ်၍၊ ဆိုးညစ်သောသူတို့သည် ဖြောင့်မတ်သောသူတို့ထံမှလည်းကောင်း၊ အသီးကား၊ အဖိုးအထိုက်ဆုံးနှင့် အခြားအသီးခပ်သိမ်းတို့ထက် နှစ်လိုဖွယ်အကောင်းဆုံးဖြစ်သည့်ထို အသက်ပင်ထံမှလည်းကောင်း ငြင်းပယ်ခံကြရ၏။ ထိုမှတစ်ပါး၊ အသီးသည် ဘုရားသခင်၏ခပ်သိမ်းသောဆုကျေးဇူးတို့အထဲ၌ အကြီးမြတ်ဆုံးဖြစ်၏။ ထိုကဲ့သို့အားဖြင့်၊ ငါသည် ငါ၏အစ်ကိုတို့ကို ပြော၏။ အာမင်။