1 I awor, rei Benjamin a konsiderá prudente, despues di a kaba di papia ku e pueblo, ku e mester a tuma e nòmbernan di tur esnan ku a drenta den un kombenio ku Dios pa warda su mandamentunan.

2 I a sosodé ku no tabatin ni un alma, eksepto ku tabata muchanan chikitu, ku no a drenta den e kombenio i a tuma riba nan e nòmber di Kristu.

3 I atrobe, a sosodé ku ora rei Benjamin a kaba ku tur e kosnan aki, i a konsagrá su yu hòmber Mosias pa ta un gobernante i un rei riba su pueblo, i a dun’é tur e enkargonan konserniente e reino, i tambe a apuntá saserdotenan pa siña e pueblo, p’asina nan por skucha i konosé e mandamentunan di Dios, i pa spièrta nan den memoria di e huramentu kual nan a hasi, a laga e multitut bai, i nan a regresá, kada un, di akuerdo ku nan famia, na nan mes kasnan.

4 I Mosias a kuminsá goberná na lugá di su tata. I el a kuminsá goberná den e di trinta aña di su edat, hasiendo total, alrededor di kuatershent’i setenta i seis aña for di e tempu ku Lehi a bandoná Herusalèm.

5 I rei Benjamin a biba tres aña i el a muri.

6 I a sosodé ku rei Mosias a kana den e kamindanan di Señor, i a opservá su huisionan i su statutonan, i a warda su mandamentunan den tur lokual ku el a mand’é.

7 I rei Mosias a kousa su pueblo kultivá e tera. I e tambe, e mes, a kultivá e tera, pa di e manera aki e no bira karga pa su pueblo, pa e por a hasi di akuerdo ku loke su tata a hasi den tur kos. I no tabatin kontenshon entre henter su pueblo pa e espasio di tres aña.