1 Sí, asta Isaías no ta bisa: Ken a kere nos informe, i na ken e brasa di Señor a wòrdu revelá?

2 Pasobra E lo krese su dilanti manera un mata tierno, i manera un rais for di suela seku; e no tin forma ni bunitesa; i ora nos lo waké no tin bunitesa ku nos mester dese’é.

3 E ta wòrdu despresiá i rechasá pa hende; un hòmber di dolónan, i konosí ku tristesa; i nos a skonde manera si tabata nos kara p’e; el a wòrdu despresiá, i nos no a balorá.

4 Sigur el a hiba nos penanan, i a karga nos dolónan; sin embargo nos a konsider’é gòlpiá, heridá pa Dios i afligí.

5 Pero el a wòrdu heridá pa nos pikánan, el a wòrdu gòlpiá pa motibu di nos maldatnan; e kastigu di nos pas tabata riba dje; i ku su heridanan nos ta wòrdu saná.

6 Nos tur, manera karné, a desviá; nos a apartá kada unu na su mes kaminda; i Señor a pone riba dje e maldatnan di nos tur.

7 El a wòrdu oprimí, i el a wòrdu afligí, sin embargo e no a habri su boka; e ta wòrdu hibá manera un lamchi pa wòrdu matá, i manera un karné ta muda dilanti di su feitadónan, asina e no a habri su boka.

8 El a wòrdu kitá for di prizòn i for di huisio; i ken lo deklará su generashon? Pasobra el a wòrdu kòrtá for di e tera di e bibunan; pa motibu di e pikánan di mi pueblo el a wòrdu gòlpiá.

9 I el a traha su graf ku e malbadonan, i ku e rikunan den su morto; pasobra e no a hasi ningun maldat, tampoko tabatin engaño den su boka.

10 Tòg tabata agradá Señor pa herid’é; el a poné den tristesa; ora lo bo hasi su alma un ofrenda pa piká e lo wak su simia, e lo prolongá su dianan, i e plaser di Señor lo prosperá den su man.

11 E lo wak e difikultatnan di su alma i lo ta satisfecho; pa medio di su konosementu mi siervo rekto lo hustifiká hopi; pasobra e lo karga nan maldatnan.

12 P’esei lo mi partié un porshon ku e grandinan, i lo e parti e botin ku e fuertenan; pasobra el a drama su alma na morto; i el a wòrdu kontá ku e pekadónan; i el a karga e pikánan di hopi, i a hasi interseshon pa e pekadónan.