Wóltaʼii 9
Nephi naaki haneʼ naháasdzogo áyiilaa—Éí tʼáá áłah Nephi bibéésh tʼą́hí wolyé—Béésh tʼą́hí ntsaaígíí éí diné binákééʼ náháneʼ biyiʼ; béésh tʼą́hí áłtsʼíísígíí éí baa dahastiʼii biyiʼ. Jesus bidiʼdoochííłjįʼ 600–592 B.C. yihahgo ádahóótʼįįd.
1 Áádóó shizhéʼé díidí tʼáá ałtso yiyiiłtsą́, dóó yidiiztsʼą́ą́ʼ, dóó yee haadzííʼ, níbaal yiiʼ bighango, chʼíhootso Lemuel wolyéhígi, áádóó tʼáá ląʼí ayóó ádaatʼéii ałdóʼ, éí díí béésh tʼą́hí bikááʼ ádoolníiłgo doo bíighah da.
2 Áádóó kʼad, díí béésh tʼą́hí baa haasdzíʼígíí, áko shooh díí béésh tʼą́hí shidineʼé doo binákééʼ naháneʼ ałtso bikááʼ náhásóóh da; háálá béésh tʼą́hí shidineʼé tʼáá átʼé bikááʼ baa hashneʼígíí éí Nephi bee yíízhiʼ; ákohgo, Nephi bibéésh tʼą́hí bee wójí, tʼáá shí shízhiʼ bikʼehgo; dóó díí béésh tʼą́hí ałdóʼ Nephi bibéésh tʼą́hí wolyé.
3 Ákótʼée ndi, Diyin Bóhólníihii bibee hazʼáanii átʼéego éí díí béésh tʼą́hí ádííłííł shidííniid, háálá tsʼídá biniyéhígíí éí shidineʼé diyingo ndaʼnitinígíí baa náʼíídéésoh.
4 Nááná łaʼ béésh tʼą́hí bikáaʼjįʼ éí aláahdi naatʼáanii ałkééʼ dahwééʼaahígíí, dóó shidineʼé anaaʼ dóó saad ahídeitʼáhígíí ałdóʼ baa nidáhídóódzoh; ákohgo díí béésh tʼą́hí éí diyingo naʼnitin tʼáá ląʼígo biyiʼ ndoodzoh; áádóó łaʼ béésh tʼą́hígíí éí aláahdi naatʼáanii ałkééʼ dahwéeʼaahgo dóó shidineʼé anaaʼ dóó saad ahídeitʼáhígíí baa nidáhídóódzoh.
5 Ákohgo, Diyin Bóhólníihii áshidííniid díidí béésh tʼą́hí biniyéhígíí bił bééhózingo ádeeshłííł, éí biniyéhígíí éí shí doo shił bééhózin da.
6 Ákondi Diyin Bóhólníihii hodeeyáádą́ą́ʼ tʼáá ałtsoní bił bééhózin; ákohgo, nihokááʼ dineʼé baʼáłchíní yitahgóó tʼáá ałtso binaanish íidoolíłígíí hashtʼeyiilaa; háálá áko shooh, tʼáá ałtsoní biʼóhólníihii bee bizaad tʼáá ałtso yee hadoodzihígíí yeʼdoolííł. Áádóó díí éí ákótʼée doo. Amen.