1 Áádóó nááná: Daʼíísínółtsʼą́ą́ʼ, O Israel bighandóó danohłíinii, tʼáá ánółtso nahjįʼ kónihiʼdiilyaaígíí dóó chʼínihiʼdiʼneilkaadígíí naatʼáanii tsiʼ naakaigo biniinaa; tʼáá ánółtso nahjįʼ kónihiʼdiilyaaígíí, daʼníłtsʼą́ąjigo adanihidiʼneeskaadígíí, shidineʼé danohłį́, O Israel bighandóó danohłíinii dashidoohtsʼį́į́h, O tónteeldi kéédahohtʼíinii, dóó nizaadi kéédahohtʼínígíí dashidoohtsʼį́į́h; Diyin Bóhólníihii shiʼdizhchʼį́į́dę́ę́ʼ shíkáʼádííniid; shimá bitsą́ą́dééʼ shízhiʼ yee haadzííʼ.

2 Áádóó shizééʼ béésh hał deeníinii nahalingo áyiilaa; bílaʼ bichahaʼohgi náshideesʼį́į́ʼ, dóó kʼaaʼ bikʼinizdidlaadígi átʼéego áshiilaa; bikʼaayééł yiiʼ náshideesʼį́į́ʼ;

3 Áádóó áshidííniid: shá naalʼaʼí nílį́, O Israel, nihináhjįʼ ayóó átʼáo shaa haʼniih doo.

4 Áko ádííniid, chʼééh binshishnish, tʼáadoo biniyéhígo sheʼadziil bee chʼééh íítʼįįd; tʼáá aaníí Diyin Bóhólníihii shá ánihodooʼááł, shinaanish éí Diyin God bí binaanish.

5 Áádóó kʼad, Diyin Bóhólníihii kóní—áko yishchʼidi áshiiláago bá naashʼaʼdoo biniyé, Jacob baa nídeeslóós—Israel tʼah doo ałhąʼánálnéeh da ndi, Diyin Bóhólníihii shaa haniihgo shidínóołʼįįł, dóó shiDiyin God bee shidziil doo.

6 Áádóó ádííniid: shá naalʼaʼí nílį́įgo doo nanitłʼagóó Jacob bidineʼé ałghąʼándíídlííł, dóó Israel dineʼé dáádzíʼígíí háádidíídlííł. Gentile dineʼé ałdóʼ bá adinídíín ándeeshłííł, áko nahasdzáán ndaazʼáajįʼ nee yisdááhidookah.

7 Diyin Bóhólníihii kóní, Israel yá Nináʼnídláii, biDiyin Ayóó Átʼéii, diné déijoołáhígíí, dineʼé dabiʼínígíí, naatʼáanii yá naalʼaʼii: Aláahgo Naatʼáanii deidoołtsééł dóó deidoozįįł, tsíłkéí naatʼáanii ałdóʼ dahodósin doo, Diyin Bóhólníihii baʼahódlíhígíí biniinaa.

8 Diyin Bóhólníihii kóní: baa hoolzhiizhdi nidisétsʼą́ą́ʼ, O tónteeldi kéédahohtʼíinii, dóó yisdááʼdoodáałdi beiníłką́ąhgo nikáʼeeshwod; dóó naa áháshyą́ą doo, dóó dineʼé bił ahaʼdeetʼą́ bíká shá naalʼaʼí baa diníʼą́, nahasdzáán ádoolnííł, dahookʼeeyéejįʼ ninádiʼyoonéełgo baa dideeshʼááł;

9 Áko awáalyah góneʼ naazhjéʼígíí kóbididííniił: Dah dookááh; chahałheeł góneʼ naháaztánée: bichʼįʼ ííshjání ádahdołnééh. Dahonítʼiʼgóó áádóó aláahdi dahootsogóó tʼáá ałtso daʼayą́ą doo.

10 Dichin dóó índa dibááʼ doo danlíį da doo, hadoh índa jóhonaaʼéí doo yikʼee ka nidookah da; baa joobaʼígíí booʼísh doo, azhą́ tó hadaazlį́ bibąąhgóó ndiʼ yooʼísh doo.

11 Áádóó tʼáá ałtso shidził daníʼáhígíí bitahgo atiin yáʼátʼéehgo ádeeshłííł.

12 Áádóó, O Israel bighandóó danohłíinii, jó, díidí nizaadę́ę́ʼ nihidookah; dóó gaʼ, díidí náhookǫsdę́ę́ʼ dóó eʼeʼááhdę́ę́ʼ; dóó díidí Sinim bikéyahdę́ę́ʼ.

13 Hótaał, O yáʼąąsh; dóó nił hózhǫ́, O nahasdzáán; haʼaʼaahdę́ę́ʼ nidaakaiígíí bá áhodoolnííł; dóó hadaʼdoohʼaah, O dził; doo náádadoochxǫǫł da; Diyin Bóhólníihii bidineʼé yił hóóshǫǫd, dóó atídaalyaaígíí yaa ą́ą́h dínóozįįł.

14 Ákondi, shooh, Zion ádííniid: Diyin Bóhólníihii yóó ashidiiʼą́, dóó shiDiyin Bóhólníihii shaa yóoznah—ndi doo ákodzaaígíí ííshją́ą́ íidoolííł.

15 Háálá asdzáásh beʼ awééʼ áłtʼoʼíígíí doo yéiidiyoonáh da, ákóóísh biyáázh biishchį́į́dę́ę́ʼ doo yaa aʼááh dínóozįįł da? Aooʼ, éí shį́į́ yaa dah déiidiyoonáh, ndi shí éí doo niheiidiyeeshnah da, O Israel bighandóó danohłíinii.

16 Áko shooh, shílátłʼááh bikáaʼgi haniyékʼįįʼ; nihinaagóó ahéédaʼastłʼinii tʼáá áłahjįʼ yishʼį́.

17 Naʼáłchíní bidooghąłígíí tsxį́įłgo yichʼįʼ dahdidoonééł; dóó ánihidoołdįįłii nihitsʼáhidookah.

18 Deigo diniʼį́į́ʼ áádóó áko shooh haʼísííd; díidí tʼáá ałtso ałhídahidookah, dóó naa dahidookah. Dóó hinishnáago, ní Diyin Bóhólníihii, nihí tʼáá ałtso bił hadadidoohnííł, dóó iiyéhígíí yódí yee hadidoonííłhígi átʼáo.

19 Háálá dahóóchxǫʼígíí dóó doo kééhatʼínígi nidahazʼą́ągi, dóó nikéyah dááchxǫʼgi, kʼad tʼóó ahayóí kéédahatʼínígíí biniinaa doo hooʼaʼ da; dóó danihííghánée nízaadi dahólǫ́ǫ doo.

20 Áłchíní nitsʼą́ą́dóó hadooleełígíí, áłtséhígíí naanáádiilyá dóó bikʼijįʼ, nijeeyiʼjįʼ hanáádadoodzih: díí kweʼé doo shá hazʼą́ą da; shaa hodidiiʼááł áko ákweʼé hinishnáa doo.

21 Áádóó nijéí biyiʼdi ádidííniił: Háí lá díí áłchíní dabizhéʼé, háálá shaʼáłchíní shaa nááhidiilyá, dóó shąąh áhásdįįd, ąą sétį́, dóó ka naashá? Áádóó háiish díí deineesą́? Áko shooh, tʼáá sáhí sélį́į́ʼ; díísh, háadi nidaakai ńtʼę́ę́ʼ?

22 Bóhólníihii Diyin God kóníʼ: Áko shooh, shílaʼ Gentile bichʼįʼ dahdideeshnih, dóó shikʼehgo oodáłígíí dineʼé bá dah deestsos; dóó niyeʼké bigaan yee dayójááh, dóó nitsiʼké biwos yee dayółjííd dooleeł.

23 Áádóó aláahgo naatʼáanii daʼbizhéʼégo, dóó asdzání naatʼáanii daʼ bimágo baa ádahalyą́ą doo; niʼjįʼ nihichʼįʼ yaa ádadoonííł, dóó nihichʼįʼ hajoobá dadinóozįįł; dóó Diyin Bóhólníihii nishłínígíí bił béédahodoozįįł; háálá shibaʼ ádaatʼéii doo yádadinóozįįł da.

24 Áko diné hayóíʼígíí shódayoostʼeʼígíísh bigháádooʼnił, éí doodago Diyinkʼehgo dahiná daasnahą́ąísh béédidoochił?

25 Ákondi Diyin Bóhólníihii kóní, azhá yisnáanii éí diné hayóíʼígíí bitsʼą́ą́ʼ nídidooʼnił, dóó diné bááhádzidgo shódayoostʼeʼígíí bigha dooʼnił; háálá nił ałchʼįʼ adideestsihígíí bił ałchʼįʼ adideestsih, dóó naʼáłchíní yisdáádeeshʼish.

26 Áádóó nihichʼįʼ nidahwiiłnánígíí tʼáá bí bitsįʼígíí bee dabidiʼyeesį́į́ł; dóó tʼáá bí bidił bił dahodínóołdoh wáin łikan ádabiiłʼįįhígi átʼáo; dóó tʼáá ałtso bitsʼíís dahólonii Shí, nihiDiyin Bóhólníihii, nihiYisdáʼiiníiłii, dóó niháNináʼnídláii, Jacob biDiyin Ayóó Ábóodziilii nishłį́įgo bił béédahodoozįįł.