Wóltaʼii 7
Lehi biyeʼké Jerusalemgóó nákai dóó Ishmael dóó yił dabighanígíí nihił wohnééł doo deidííniid—Laman dóó łaʼ akʼijįʼ daazlį́į́ʼ—Nephi bikʼiské Diyin Bóhólníihii tʼáá íiyisíí yinohdlą́ yidííniid—Tłʼóół yee hweʼdaʼaztłʼǫ́ʼ dóó dahodiyoołhéełgo yindahazʼą́—Oodląʼ yee bee bidziilgo tłʼóół kʼíiníłdláád—Bikʼiské nihaa ndiʼníʼaah hodííniid—Lehi dóó hoł yíkaaígíí nááhániihii dóó didlidgo nááhániihii yee náádaʼiisniiʼ. Jesus bidiʼdoochííłjįʼ 600–592 B.C. yihahgo ádahóótʼįįd.
1 Áádóó kʼad díí nihił bééhózin doo nísin, áko shizhéʼé, Lehi, Diyin bikʼeh áhodoonííł náasdi baʼáłchíní dahodooleełígíí yaa yááłtiʼgo, áádóó baa hoolzhiizh Diyin Bóhólníihii bichʼįʼ hanáánáádzííʼ, Lehi, bił dabighanígíí doo tʼáá sáhí diné doo kééhatʼíní góneʼ dah yididooʼish da; ndi biyeʼké łahdę́ęʼgo atsiʼké bichʼooní ádeidoolííł, ákondi kéyah bee ahaʼdeetʼą́ądi Diyin Bóhólníihii dayóodlą́ągo baʼáłchíní deidínóosééł.
2 Áádóó baa hoolzhiizh Diyin Bóhólníihii áháłní, éí shí, Nephi, dóó shikʼiské, ńléí Jerusalem kéyahgóó ńdoohkah, dóó Ishmael dóó yił dabighanígíí diné doo kééhatʼíní góneʼ yił ńdookah.
3 Áádóó baa hoolzhiizh shí, Nephi, dóó nááná, shikʼiskʼé bił, diné doo kééhatʼíní góneʼ ńléí Jerusalem gódei nikiniikai.
4 Áádóó baa hoolzhiizh ńléí Ishmael bighandi niikai, dóó Ishmael yáʼátʼéehgo nihaa tsídeezkéez, ákohgo índa Diyin Bóhólníihii bizaad bee bichʼįʼ hadasiidzííʼ.
5 Áádóó baa hoolzhiizh Diyin Bóhólníihii Ishmael dóó bichʼooní, dóó baʼáłchíní tʼáá ałtso, doo nihikʼijįʼ nilį́į́góó áyiilaa dabijéí nayiishǫǫł, áko índa diné doo kééhatʼíní góyaa shizhéʼé biníbaal siʼą́ąjįʼ nihił nákai.
6 Áádóó baa hoolzhiizh diné doo kééhatʼíní biyiʼ yiikahgo, áko shooh Laman dóó Lemuel, dóó Ishmael bitsiʼké naakigo, dóó Ishmael biyeʼké naakigo dóó bił dabighanígíí, yił nihikʼijįʼ daazlį́į́ʼ; aooʼ, shí, Nephi, dóó Sam, dóó bizhéʼé, Ishmael, dóó beʼasdzą́ą́, dóó bitsiʼké łaʼígíí táaʼgo.
7 Áádóó baa hoolzhiizh nihikʼijįʼ daazlį́įʼgo, ńléí Jerusalem kéyahgóó nátʼą́ą́ʼ nídiikai daaníí ńtʼę́ę́ʼ.
8 Áádóó kʼad shí, Nephi, bijéí deistłʼisígíí baa yínííł niizį́į́ʼ, éí bąą bichʼįʼ yéíłtiʼ, kódíshníigo, aooʼ, azhą́ Laman dóó Lemuel bichʼįʼ ndi: Áko shooh nihí shínaaí nohłį́, dóó haash yitʼáo éí nihijéí biyiʼdi yéego hosółtłʼis, dóó nihíniʼ doo bee oohʼį́į da, áko shí, nihitsilí nishłį́įgo nihichʼįʼ yáshtiʼ, aooʼ, dóó yáʼátʼéehgo nihá sézį́?
9 Haashąʼ yitʼáo Diyin Bóhólníihii bizaad doo bikʼeh honołʼį́į da?
10 Haashąʼ yitʼáo éí Diyin Bóhólníihii bá naalʼaʼí woołtsánée beisóonah?
11 Aooʼ, haashąʼ yitʼáo éí Diyin Bóhólníihii ayóóʼátʼáo nihíká eelwodę́ę beisoonah, Laban bílákʼeedóó yisdánihííʼeezh, dóó ałdóʼ ndaháasdzooígíí éí shódeisiiltʼeʼ.
12 Aooʼ, haashąʼ yitʼáo éí beisoonah Diyin Bóhólníihii éí nihokááʼ dineʼé baʼáłchíní, daboodlą́ągo, tʼáá bí bíhólníihgo tʼáá ałtsoní yá íidoolííł? Ákohgo, hazhóʼó bikʼeh dahoniilʼį́į dooleeł.
13 Áádóó tsʼídá bikʼeh dahoniilʼį́įgo éí, kéyah bee ahaʼdeetʼánígíí shódeidiiltʼeeł; dóó haaʼígishį́į́ hoolzhiizhgo éí Diyin Bóhólníihii ńléí Jerusalem doolchxǫǫł nínée bihodoolnííł; háálá Diyin Bóhólníihii tsʼídá Jerusalem doolchxǫǫł níigo yee haadzíʼę́ę éiyá ałtso bidahodoolnííł.
14 Háálá áko shooh, Diyin Bóhólníihii biʼIiʼ Sizį́ Diyinii tʼáadoo hodíínaʼí doo bił dahólǫ́ǫ da yileeh; háálá áko shooh diyin yá yádaałtiʼii yóó adeideezʼą́, dóó Jeremiah éí awáalyah góneʼ yah adeistʼeʼ. Dóó shizhéʼé éí deidiilyééł daaníigo yíká ádaatʼį́į́ ńtʼę́ę́, áko índa kéyahdóó chʼídeineeshchą́ą́ʼ.
15 Kʼad áko shooh, ánihidishní Jerusalemgóó nánoohkaigo áko shooh nihí ałdóʼ dadínóohnééł. Doo kʼad, tʼah ádeiinohsingo, kéyah gódei ńdóhkááh, dóó saad bee nihichʼįʼ yáshtiʼígíí béédaołniih, ákǫ́ǫ́ nánoohkaigo nihí ałdóʼ atah dínóohnééł; háálá Diyin Bóhólníihii biʼIiʼ Sizį́ Diyinii éí áshíłníigo bee yáshtiʼ.
16 Áádóó baa hoolzhiizh shí, Nephi, díidí saad shikʼis bee bichʼįʼ yéíłtiʼgo, shichʼįʼ bádahóóchįįd. Áádóó baa hoolzhiizh bílaʼ yee dashisił, háálá áko shooh, tʼáá íiyisíí báhóóchįįd, dóó tłʼóół yee shedaʼaztłʼǫ́, háálá hódiyiilyééł daniizį́į́ʼ, áko diné doo kééhatʼíní biyiʼdi ndadiiltéełgo naaldlooshii daʼałchiní dabidoolghał daniizį́į́ʼ.
17 Ákondi baa hoolzhiizh Diyin Bóhólníihii bichʼįʼ sodeeszin, kódíshníígo: O Diyin Bóhólníihii, niinishdlánígíí binahjįʼ, shínaaí bílákʼeedóó yisdáshílóós, aooʼ, shídziilgo áshílééh áko díí tłʼóół bee sheʼastłʼónígíí kʼídeeshdláł.
18 Áádóó baa hoolzhiizh díidí saad bee haasdzíiʼgo, áko shooh, tłʼółę́ę shílaʼ dóó shikeeʼ bąąhdóó naostʼah, dóó shínaaíké bidááhdóó yiizįʼ, dóó bichʼįʼ hanáánáásdzííʼ.
19 Áádóó baa hoolzhiizh shichʼįʼ bá nááhóóchįįd, dóó nááshiisił ńtʼę́ę́ʼ; ákondi shooh, łaʼ Ishmael bitsiʼ, aooʼ, dóó ałdóʼ bimá, dóó łaʼ Ishmael biyeʼ, shínaaí ńdayooskan, honáásiiʼ bijéí yilzhóólígo ándayiidlaa; dóó shizééʼ nideiʼáhą́ą niʼ kódayiilaa.
20 Áádóó baa hoolzhiizh doo yáʼáshóonii yaa naakaiígíí biniinaa, yínííł daniizį́į́ʼ, áko índa shichʼįʼ ntsídadeezgoʼ, dóó atídaniilyaaígíí tʼáá shǫǫdí bee nihaa ndiʼníʼaah, níigo náshooskan.
21 Áádóó baa hoolzhiizh tʼáá ałtso yee shikʼijįʼ ádáátʼįįdę́ę bee bá nídiʼníʼą́, dóó Bóhólníihii nihiDiyin God bichʼįʼ sodidoołzįįł nihaa ńdiníʼaah bididoohniił bidííniid. Áádóó baa hoolzhiizh éí yidaʼiilaa. Diyin Bóhólníihii yichʼįʼ sodoolzin áádóó bikʼijįʼ ńléí shizhéʼé biníbaal bichʼįʼ dah náádiikai.
22 Áádóó baa hoolzhiizh shizhéʼé biníbaaljįʼ nániikai. Dóó shí dóó shikʼiské dóó Ishmaeltʼááátʼé bighan hazʼáádóó shizhéʼé biníbaaljįʼ bił náníshkaigo áádóó bikʼijįʼ, Bóhólníihii bíDiyin God ahéheeʼ deidííniid; dóó nááhániihii dóó didlidgo nááhániihii yee shichʼįʼ náádaʼiisniiʼ.