1 Áádóó baa hoolzhiizh shínaaí bichʼįʼ haasdzííʼ, kódíshníigo: Tį́ʼ Jerusalem godéi nináádiikah, dóó daʼiiniidlą́ągo Diyin Bóhólníihii bibee hazʼáanii bikʼeh dahoniilʼį́į doo; háálá áko shooh nihokááʼ dineʼé tsʼídá yiláahdi bidziil, índa Laban dóó beʼashdladíín yiláahgo ábóodziil, aooʼ, éí doodago bineeznádiin dimííl yázhí ndi?

2 Éí bąą tįʼ ákǫ́ǫ́ náádiikah; Moses nahalingo danihidziil dooleeł; háálá tʼáá aaníí Tónteel Łichííʼ yichʼįʼ haadzííʼ dóó kodóó dóó ńléíijįʼ tó ʼą́ą́ʼ ádzaa, dóó danihizhéʼé yę́ę ąą shijééʼdę́ę́ʼ, łeezh yíłtseii, yikááʼdę́ę́ʼ chʼékai, dóó Pharaoh bá ndaabaahii bikééʼ yijahgo dóó Tónteel Łichííʼ ałchʼįʼ kónádzaago tó ndabistseed.

3 Kʼad áko shooh díí tʼááʼaaníí átʼéego nihił bééhózin; dóó Diyin yá naalʼaʼí nihichʼįʼ haadzíiʼgo ałdóʼ nihił bééhózin; ákohgo haash yitʼáo tʼahdii doo iinohdlą́ą da? Tį́ʼ ákodéi yíikah; Diyin Bóhólníihii éí yisdánihidooʼish, danihizhéʼé yę́ę yisdáyíʼeezhígi átʼáo, dóó Laban bidiʼyoolyééł, Egypt dineʼé ndabiʼdistseedígi átʼáo.

4 Kʼad díidí saad bee yááłtiʼgo, tʼahdii shichʼįʼ bá háchįʼ, dóó tʼahdii saad hółǫ́; ákótʼée ndi Jerusalem tsé binástłʼinjįʼ shikééʼ níʼáázh.

5 Áádóó tłʼééʼ hazlį́įʼgo; dóó tsé binástłʼinígíí tłʼóóʼdę́ęʼgo ńdadidoohtʼį́į́ł bidííniid. Dóó ńdadéestʼį́į́ʼ bikʼijįʼ, shí, Nephi, kin dashijaaʼ góneʼ yah aneeshtʼį́į́ʼ, dóó Laban bighan bichʼįʼgóó dah diiyá.

6 Áádóó Iiʼ Sizį́ Diyinii shinílóóz náásgóó ádeeshníłígíí doo shił bééhózingóó.

7 Ákótʼée ndi ákǫ́ǫ́ níyá, dóó Laban bighan áhánídę́ę́ʼ bichʼįʼ yisháałgo, diné léiʼ yiiłtsą́, dóó shidáahgi niʼjįʼ naaʼíítłizh, háálá tódiłhił yee naaʼoʼoodlą́ą́ʼ.

8 Áádóó baa níyáa ńtʼę́ę́ʼ Laban átʼį́įgo baa ákoniizííʼ.

9 Dóó bibééshhał yiiłtsą́, dóó bizis biyiʼdóó háátą́; dóó bitsiin néiltsoʼjįʼ béésh óola bee ályaa lá, dóó tsʼídá nizhónígo binaʼázhnish, dóó hááhaashchiiʼjígo aláahdi béésh ílį́įgo ntłʼizígíí átʼéego yiiłtsą́.

10 Áádóó baa hoolzhiizh Iiʼ Sizį́ Diyinii yeeʼ tʼáá íiyisíí Laban síłhé éí shóʼní; ákondi shijéí bee ádishní: Shí hádą́ąʼda doo diné łaʼ yishhée da. Áádóó tʼą́ą́ʼ kwíisdzaa dóó doo yidiyeeshxéeł da niizį́į́ʼ.

11 Áádóó Iiʼ Sizį́ Diyinii ánáá shidooʼnííd: Áko shooh Diyin Bóhólníihii nílákʼee yíílóóz. Aooʼ, dóó tʼáá shí ałdóʼ shidiyoołhéełgo shił bééhózin; aooʼ, dóó Diyin Bóhólníihii bibee hazʼáanii doo yiyíístsʼą́ą́ʼ da ńtʼę́ę́ʼ; dóó ałdóʼ nihinaályéhé nihighayíʼnil.

12 Áádóó baa hoolzhiizh Iiʼ Sizį́ Diyiinii ánááshidooʼnííd: Siyíłhé, háálá Diyin Bóhólníihii nilákʼee yíílóóz;

13 Áko shooh Diyin Bóhólníihii diné bąąhági átʼéii yaa naakaiígíí neiłtseed áko biyáʼátʼéehii hólǫ́ǫ doo biniiyé. Éí tʼáá áko diné tʼááłáʼí seesyį́įgo áko bílaʼashdlaʼii dah yíkahgo doo tʼáá ádzaagóó dah didookah da dóó doo daʼoodlą́ągo dadínóonéeł da.

14 Áádóó kʼad, shí, Nephi, díí saad disétsʼą́ąʼgo, Diyin Bóhólníihii ńléi diné doo kééhatʼínídi saad yee shichʼįʼ haadzíʼę́ę bénááshniiʼ, kóníigo: Naʼáłchíní shibee hazʼáanii tʼáá átʼé yikʼeh dahółʼį́įgo, kéyah bee ahaʼdeetʼánígíí biyiʼ yáʼátʼéehgo náásgóó dadínóosééł.

15 Aooʼ, áádóó Diyin Bóhólníihii bibee hazʼáanii éí doo yikʼeh dahółʼį́į da dooleeł, tʼáá hazhóʼó Moses bibee hazʼáaniiyę́ę bił béédahózingo tʼéiyá, ałdóʼ náániisdzį́į́ʼ.

16 Áádóó ałdóʼ baa ákonisin bee hazʼáanii béésh łitsoii tʼą́hí bikááʼ ndaháasdzo.

17 Áádóó nááná, Diyin Bóhólníihii éí díí biniyé Laban shílákʼe yíílóozgo shił bééhoozin—áshidííniid yę́ę bikʼehgo ndaʼasdzooígíí shóideeshtʼeeł biniiyé.

18 Éí bąą Iiʼ Sizį́ Diyinii biinééʼ éí bikʼeh hóółʼįįd, dóó Laban bitsiiʼ séjih dóó tʼáá bí bibééshhał bee bitsiitsʼiin kʼíníkal.

19 Áádóó tʼáá bí bibééshhał bee bitsiitsʼiin kʼíníkalgo índa, Laban biʼééʼ ńdiinil dóó bee hadíísdzaa; aooʼ, tʼáá átʼéejįʼ, dóó bibéésh sis shoozhnííʼ gónaa bee beʼsétłʼǫ́.

20 Áádóó díí bee hadíisdzaago, Laban binaalyéhé daʼílínii yisnilgóó níyá. Dóó Laban binaalyéhé daʼílínii yisnilgóó yisháałgo, áko shooh, Laban bá naalʼaʼí binaalyéhé daʼílį́ sinilgi bee ąą ńdítį́hí neijáahgo yiiłtsą́. Dóó Laban biinééʼ yáłtiʼ nahalingo yáshtiʼgo, naalyéhé daʼílínii sinilgóó shił dííʼash bidííniid.

21 Háálá ééʼ dóó bééshhał shinííʼ gónaa shąąh dah sitánígíí yiyiiłtsą́ągo, shinaatʼáanii, Laban átʼį́ niizį́į́ʼ.

22 Áádóó binaatʼáanii Laban, Jew hastóí danilínígíí díí tłʼééʼ yitahgóó naayáhígíí bił bééhózingo biniinaa, Jew dineʼé yínashídééłkid.

23 Áádóó Laban yáłtiʼ nahalingo bichʼįʼ hanáásdzííʼ.

24 Áádóó shí ałdóʼ ábidííniid, béésh łitsoii tʼą́hí bikááʼ naháasdzooígíí, shínaaí, tłʼóóʼdę́ę́ʼ naháaztánígíí, bichʼįʼ deeshʼááł.

25 Áádóó shí ałdóʼ shikééʼ yínááł dooleeł bidííniid.

26 Áádóó bí, hastóí sodizin daʼatahígíí yaa yáłtiʼ shóʼníigo, Laban séłhínée tʼáá aaníí éí átʼį́ nízingo, ákohgo shikééʼ dah diiyá.

27 Áádóó shínaaí, tłʼóóʼdę́ę́ʼ naháaztánígíí bichʼįʼ yiitʼaashgo, Jew dineʼé yilą́ąjįʼ naazínígíí łą́ągo yee shichʼįʼ yááłtiʼ.

28 Áádóó Laman shiiłtsą́ągo tʼáá íiyisíí shinásdzííd, dóó Lemuel dóó Sam ałdóʼ. Laban átʼį́, dóó Nephi yiyiisxį́įgo dóó nihídóʼ nanihidoołtsił daniizį́įʼgo, biniinaa shitsʼą́ąjįʼ dah diijééʼ.

29 Áádóó baa hoolzhiizh bichʼįʼ haasdzíiʼgo, dashidiiztsʼą́ą́ʼ; ákohgo tʼáadoo shitsʼą́ą́jí dah diijéeʼ da.

30 Áádóó baa hoolzhiizh Laban bá naalʼaʼí shikʼis yiyiiłtsą́ągo bitah hodiʼníitłid, dóó kintah Jerusalemgóó kʼasdą́ą́ʼ dah yiiteʼ.

31 Dóó kʼad shí, Nephi, nisnéezgo shitah hótsxaaz, dóó ałdóʼ Diyin Bóhólníihii tʼáá íiyisíí shitséʼgo áshiilaa, éí bąą Laban bá naalʼaʼí doo dah didoolwoł da biniiyé sésił, dóó yíníshtąʼ ńtʼę́ę́ʼ.

32 Áádóó baa hoolzhiizh bichʼįʼ haasdzííʼ, shííshíníłtsʼą́ąʼgo, índa Diyin Bóhólníihii hináago, dóó shí hinishnáago, áko nihizaad yísíníłtsʼą́ąʼgo, doo beʼiinaʼ ndadiiltʼih da.

33 Áádóó doo ńdooldził da biniyé, bichʼįʼ yáshtiʼgo, bił ałhadiʼnishtʼą́ ndi; doo diné doo kééhatʼíní góyaa nihił dííkah áko nihígi átʼáo tʼáá ni níhólníihgo nanináa dooleeł, bidííniid.

34 Áádóó shí ałdóʼ bichʼįʼ haasdzííʼ, kódíshníigo: Tʼáá aaníí Diyin Bóhólníihii ánihiłníigo díí bidaʼíilyaa; dóó ákoósh Diyin Bóhólníihii bibee hazʼáanii doo yéego bikʼeh dahoniilʼį́į da doo? Éí bąą, diné doo kééhatʼíní góyaa shizhéʼé bichʼįʼ díníyáago áadi nihił kééhónítʼį́į dooleeł.

35 Áádóó baa hoolzhiizh Zoram éiyá saad bee haasdzíʼę́ę yaʼoozlííʼ. Áko éí naalʼaʼí éí Zoram wolyé; áádóó doo kééhatʼínígóó shizhéʼé yichʼįʼ doogáałgo nihił ahaʼdeetʼą́. Aooʼ, dóó ałdóʼ náásgóó nihił naashkai dooleeł níigo nihił ahaʼdeetʼą́.

36 Kʼad díí biniyé éí nihił nanikai dooleeł dabidiiʼniid, Jew dineʼé dah éí diné doo kééhatʼíní góneʼ iikaiígíí doo bił béédahodoozį́įł da, tsʼídá nihikééʼ dookáh dóó ndánhidoołtsxíł.

37 Áádóó baa hoolzhiizh Zoram nihił ahaʼdeetʼą́ą́go, doo bąąh danihíniʼgóó bąąh tsídadeekééz.

38 Áádóó baa hoolzhiizh béésh łitsoii tʼą́hí dah dadiitʼą dóó Laban bá naalʼaʼí bił, diné doo kééhatʼínígóó dah diikai, dóó shizhéʼé biníbaal siʼą́ąjįʼ nániikai.