1 Áádóó kʼad shí, Nephi, ááshtʼįįdígíí béésh tʼą́hí bikááʼ náhásóohgo baa nídiisdzá, éí naatʼáanii nishłį́įgo dóó diyinkʼehgo baa naʼnishtinígíí ałdóʼ baa náʼiisóóh; ákohgo, ahoʼniishneʼ, shizhʼéʼé áátʼįįdígíí łáhdóó baa yádeeshtih, dóó shikʼiské ałdóʼ baa yádeeshtih.

2 Háálá áko shooh, áhoodzaa shizhéʼé yaa nayiizyeelígíí ałtso yaa yááłtiʼgo, dóó ałdóʼ ałtso yéego bídadoołkaal, Jew dineʼé bídéétʼiʼgi yichʼįʼ yaa yááłtiʼ—

3 Éí tsʼídá ábiʼdisdįįd dóó bikʼijįʼ, índa éí Jerusalem bikin ayóó átʼéii, dóó tʼóó ahayóí Babylongóó dabiʼdeesnááʼgóó ahidoogééł, Diyin Bóhólníihii kʼad niizį́į́ʼ bikʼehgo, tsʼídá nináhidookah, aooʼ, dabiʼdeesnáádę́ę́ʼ ndi nináhidootʼish; dóó tsʼídá dabiʼdeesnáádę́ę́ʼ nináheeshtʼeezh dóó bikʼijįʼ tsʼídá bikéyah baa dahideestʼą́ąjįʼ ninádahidooʼnééł.

4 Aooʼ, índa shizhéʼé hastą́ądi neeznádiin nááhaidą́ą́ʼ Jerusalemdóó dah diiyá, Bóhólníihii Diyin God łaʼ Jew dineʼé yitahdóó Diyin yá yáłtiʼí dooleełgo neidínóotįįł—índa Messiah, éí doodago, kótʼáo ááhdishní, nahasdzáá biYisdáʼiiníiłii.

5 Áádóó Diyin yá yádaałtiʼii ałdóʼ yaa yááłtiʼ, ląʼí yiltʼé díidí tʼáadoo leʼé tʼáá aaníí daaní, díí Messiah bídéétʼiʼgi, éí yee yááłtiʼ, éí doodago díí nahasdzáán biNináʼnídláii.

6 Ákohgo, ałʼąą dineʼé bąąhági átʼéii yaa naakai dóó yóóʼeekai, dóó tʼáá ákódaatʼé tʼáá hazhóʼó díí báNináʼnídláii yadaʼoozlíiʼgo tʼéiyá.

7 Áádóó Diyin yá yáłtiʼii ałdóʼ éí tsʼídá Messiah yilą́ąjįʼ doogáałgo yaa yááłtiʼ, Diyin Bóhólníihii bihonítʼiʼ yá hashtʼehodoolííł—

8 Aooʼ, azhą́ lá akǫ́ǫ́ doogááł dóó diné doo kééhatʼį́įgi hózhǫ́ yéego naʼdínóotįįł: Diyin Bóhólníihii bihonítʼiʼ hashtʼedaołééh; dóó beʼatiin kʼéházdongo ádaołééh; háálá łaʼ nihitah sizínígíí doo béédahonohsin da; dóó shilááh ábóodziil, éí bikétlʼóól kʼedeeshʼałgo doo bíneeshʼą́ą da. Dóó shizhéʼé díí bídéétʼiʼígíí łą́ągo yaa yááłti.

9 Áádóó shizhéʼé Bethabaragi tó bee yidoolzį́į́ł dííniid, Jordan biláahdi; dóó ałdóʼ tó yee adoosį́į́ł dííniid; índa Messiah éí tó yee yidoosį́į́ł.

10 Áádóó Messiah tó yee yiyíísį́į́ʼ dóó bikʼijįʼ, háálá yaa ákodínóozįįł dóó tʼáá aaníigo yaa hodoolnih éí Diyin God biDibé Yázhí tó yee yiyiisį́ʼígíí, éí nahasdzáán bibąąhági ádaatʼéii yá yooʼiidiyooʼááł.

11 Áádóó baa hoolzhiizh shizhéʼé díidí saad yee yááłtiʼ dóó bikʼijįʼ nahatʼá bee yisdáʼiildéehii shikʼiské yee yichʼįʼ haadzííʼ éí Jew dineʼé bitahgóó bee ndíʼnóotį́į́ł, dóó Jew dineʼé doo daʼoodláanii baa nááʼhidoodlah. Dóó Messiah dayiisxį́ dóó bikʼijįʼ, éí níyá, dóó seesxį́ bikʼijįʼ daaztsą́ą́dę́ę́ʼ náádidooʼnah, dóó tʼáá bí ííshjání ádinidiʼdoolnííł, Iiʼ Sizį́ Diyinii yee, Gentile dineʼé yichʼįʼ.

12 Aooʼ, azhą́ shizhéʼé łą́ągo Gentile dineʼé bídéétʼiʼígíí yaa yááłtiʼ, dóó Israel bighandóó háájéʼígíí ałdóʼ, éí olive bitsin bił áłhąąh sinil nahalin, éí tsin bitsʼádaazʼá bąąh dahidootih dóó nahasdzáán bikááʼgóó tʼáá ałtso daʼníłtsʼą́ąjigo ałtsʼádahidinóolkał.

13 Ákohgo, tsʼídá ákodooníłii kéyah bee ahaʼdeetʼánígíí tʼáá áníiltso baa nihidiʼdootʼish, Diyin Bóhólníihii bizaad beʼdoolnííłjįʼ, éí nahasdzáán bikááʼgóó daʼníłtsʼą́ąjigo ałtsʼádanihidinóolkał.

14 Áádóó Israel bighandóó háájéʼígíí ałtsʼáhineeskáád dóó bikʼijįʼ ałhąʼándadoolnííł; éí doodago, kónzahjįʼ, Gentile dineʼé nahatʼá bee yisdáʼiildéehii tʼáá ałtsoní baa heesyáago, olive bitsin íiyisí atsʼáozʼaʼ danilíinii, éí doodago Israel bighandóó háájééʼ daadzíʼígíí, biih nídáhidootsih, éí doodago Messiah tʼáá aaníigo bíniʼdii bił béédahodoozįįł, biDiyin Bóhólníihii dóó báNináʼnídláii.

15 Áádóó díí saadígíí bikʼehgo shizhéʼé Diyin bikʼeh áhodooníłígíí shikʼiské yee yichʼįʼ haadzííʼ, dóó ałdóʼ tʼáadoo leʼé tʼóó ahayooígo éiyá díí naaltsoos biyiʼ doo bikʼeʼdeeshchíił da; háálá nááná łaʼ shinaaltsoos biyiʼ áká adoolwółígíí tʼóó ahayóí bee akʼeʼshéłchį́.

16 Áádóó díidí tʼáadoo leʼé ałtso, yee yááłtiʼę́ę éiyá, shizhéʼé níbaal biyiʼ bighanyę́ędą́ą́ʼ ádaalyaa, Lemuel bichʼíhootsogi.

17 Áádóó baa hoolzhiizh shí, Nephi, tʼáá ałtso shizhéʼé bizaad sidétsʼą́ʼą́ą bikʼijįʼ, bił ííshją́ą́ ályaa yę́ę, dóó Iiʼ Sizį́ Diyinii bibee adziil éiyá yinahjįʼ tʼáadoo leʼé yee yááłtiʼę́ę ałdóʼ, Diyin God biYeʼ yoodlą́ągo éiyá beiyílyá—dóó Diyin God biYeʼ éí Messiah nilį́įgo doogááł—shí, Nephi, yideestsééł, dóó dideestsʼį́į́ł, dóó bikʼidiʼdeeshtį́į́ł nisin, Iiʼ Sizį́ Diyinii bibee adziil binahjįʼ, éí Diyin God biʼaʼiilyé tʼáá íiyisíí yíká ádaatʼínígíí yaa yilé, éí tʼáá áłkʼidą́ą́ʼ yę́ęgi átʼáo nihokááʼ dineʼé baʼáłchíní yichʼįʼ ííshjání ádiʼdoolnííłjįʼ.

18 Háálá adą́ą́dą́ą́ʼ, díí jį́ dóó ahoolʼáágóó doo łahgo ánááʼníił da; diné ałtso yee yíká adoolwółígíí hodeeyáádą́ą́ʼ hashtʼeelyaa, ádaa ńdaʼookąąhgo dóó yaa hikáahgo tʼéiyá.

19 Háálá íiyisíí hadéintáhígíí éí yikʼídookah; dóó Diyin God bitsʼą́ą́dóó tʼáá aaníinii tʼahdoo ííshją́ą́ ádaalnéehii shį́į́ bichʼįʼ neidiyoonił, Iiʼ Sizį́ Diyinii bibee adziil binahjįʼ, díí jį́įgi átʼáo índa áłkʼidą́ą́ʼígi átʼáo, dóó áłkʼidą́ą́ʼígi átʼáo índa náasjįʼgi átʼáo; ákohgo, Diyin Bóhólníihii beehonítʼiʼ bee áhééhoolʼá.

20 Éí bąą béédaałniih, O diné, ałtso ádaołaaígíí bíká ánihwiitʼaahjįʼ adanihidiʼdootʼish.

21 Ákohgo, nihíhonítaah biyiʼ nihiyoołkáałgo tʼóó tsiʼnaʼadá hanóhtáago, áko Diyin God biʼánihwiitʼaah-bikááʼdahʼasdáhí bitsʼą́ą́dę́ę́ʼ nihąąh chinígíí béédoolkah; dóó tʼáadoo leʼé bąąh chinígíí doo Diyin God yił kééhatʼíi da; Éí bąą, áhoolʼáágóó nahjįʼ kónihidiʼdoolnííł.

22 Áádóó Iiʼ Sizį́ Diyinii óhólnííh shéiiniláágo éí díidí tʼáadoo leʼé bee yáshtiʼ, dóó doo shił nilį́įgo bikʼijįʼ hadeesdzíh da.