1 Áádóó baa hoolzhiizh álástsiiʼ tʼáá ałtso ałtah átʼéego ałhąʼádeilyaa, tʼááʼ áłah tłʼoh naadą́ą́ʼ ałtah átʼéego, dóó ałdóʼ bineestʼąʼ bílástsiiʼ ałtah átʼéego.

2 Áádóó baa hoolzhiizh shizhéʼé tʼahdii diné doo kééhatʼínígi naagháago nihichʼįʼ yááłtiʼ, kóníigo: Áko shooh, niséyéyeel; éí doodago, kótʼéego aałdishní, Diyingo shił ííshją́ą́ éʼélʼyaa.

3 Áádóó áko shooh, tʼáadoo leʼé yiiłtsánée biniinaa, Diyin Bóhólníihii baa shił hózhǫ́, Nephi dóó ałdóʼ Sam biniinaa; háálá íínisin, éí yisdádooʼash, dóó tʼóóʼ ahayóí baʼáłchíní náásdi nidahidoochíłígíí ałdóʼ.

4 Ákondi shooh, Laman dóó Lemuel, nihí nihiniinaa tʼáá íiyisíí nísísdzííd; háálá áko shooh, éí lá neisééł biiʼ, diné doo kééhatínígi chahałheeł dóó doo hatsíídgóó hazʼą́ągo yiiłtsą́.

5 Áádóó baa hoolzhiizh hastįį léiʼ yiiłtsą́, dóó éénééz łigaigo yiiʼ sitį́; dóó shaa niyá dóó shidááhdóó yiizįʼ.

6 Áádóó baa hoolzhiizh shichʼįʼ haadzííʼ, dóó shikééʼ yínááł shidííniid.

7 Áádóó baa hoolzhiizh bikééʼ yisháałgo tʼáá shí ádaaʼákoneesdzį́į́ʼ chahałheeł dóó doo hatsíídgóó hazʼą́ biiʼ yishááł lá.

8 Áádóó ląʼí da áhééʼílkid chahałheeł biiʼ yishááłgo, Diyin Bóhólníihii bichʼįʼ sodiʼniiszin shaa jidoobaał biniyé, bibee aa aʼááh nínízinii tʼóó ahayóígíí bikʼehgo.

9 Áádóó baa hoolzhiizh Diyin Bóhólníihii bichʼįʼ sodeeszin dóó bikʼijįʼ dáʼákʼeh ntsaago biiʼ hazʼą́ą léíʼ yiiłtsą́.

10 Áádóó baa hoolzhiizh tsin léíʼ yiiłtsą́, éí bineestʼąʼ łaʼ yiniizįįhgo bił hwiidooshǫǫł.

11 Áádóó baa hoolzhiizh akǫ́ǫ́ níyá dóó bineestʼąʼ yíyą́ą́ʼ; dóó éí tsʼídá alááh átʼéego łikango baa ákoniizį́į́ʼ, éígaʼ tʼáá ałtso daséłnihígíí bilááh átʼéego łikan. Aooʼ, áádóó bineestʼąʼ łigaigo yiiłtsą́, tʼáá ałtsoní daalgai yiłtsánígíí bilááh átʼéego.

12 Áádóó tsin bineestʼąʼ yishą́ąʼgo shiiʼ sizíinii tʼááʼ íiyisíí bił hóózhǫǫd; ákohgo, shaʼ áłchíní ałdóʼ deidooyį́į́ł niizį́į́ʼ; háálá shił bééhózin díí nááná łaʼ tsin bineestʼąʼ biláahgo nidzinígíí átʼé.

13 Áádóó shaʼáłchíní daatsʼí ałdóʼ tʼáá yideestsééł nisingo, shinaagóó ahééníghal, tooh nilį́įgo yiiłtsą́; dóó éí tsin bąąhdóó neestʼąʼ yishánígíí, bitsį́į́góó nílį́.

14 Áádóó háádę́ę́ʼ lá háálį́ nisingo hádíníshį́į́ʼ; dóó tʼáá áhanídóó háálį́įgo yiiłtsą́; dóó dah diilíigi nimá Sariah, dóó Sam, dóó Nephi deiiłtsą́; áádóó háajigo dah didookahígíí doo bił béédahózin da nahalingo tʼóó naazį́.

15 Áádóó baa hoolzhiizh bichįʼ dah nidéshniiʼ; áádóó ałdóʼ bichʼįʼ dishwoshgo hágo shaa nohkááh, dóó tsin bineestʼąʼ dadoosį́į́ł bidííniid, háálá éí nááná łaʼ tsin bineestʼąʼ biláahgo nidzinígíí átʼé.

16 Áádóó baa hoolzhiizh éí shee yíkai dóó tsin bineestʼąʼ ałdóʼ dayííyą́ą́ʼ.

17 Áádóó baa hoolzhiizh Laman dóó Lemuel ałdóʼ shaa dooʼáshgo tsin bineestʼąʼ yidooyį́į́ł nisin; ákohgo, tooh dah diilį́į́góó, yideestsééł nisingo dééʼį́į́ʼ.

18 Áádóó baa hoolzhiizh tʼáá áłah yiiłtsą́, ndi tʼáadoo shaa niʼáazh da dóó tsin bineestʼąʼ tʼáadoo yiyiiyą́ą da.

19 Áádóó béésh bąąh níʼáago yiiłtsą́, dóó tooh nilínígíí bitsį́į́góó niʼá, dóó tsin bííghah sézíníjįʼ niníʼá.

20 Áádóó ałdóʼ áłtsʼóózígo yah ahóótʼiʼ dóó áłtsʼóózígo honítʼiʼ béésh bąąh níʼáago yiiłtsą́, tsin bíighah sézįįjįʼ ndi; dóó ałdóʼ tó háálį́įgi bilą́ąjįʼ dáʼákʼeh ntsaago biiʼ hazʼą́ nahasdzáan nahalingo.

21 Áádóó diné doo yíjídóółtah ánéélą́ą́ʼgóó yiiłtsą́, tʼóó ahayói yéigo náás deiyíldzííłgo, éí tsin bíighah sézínígíí baa honítʼiʼ yikídookahgo bá nisin.

22 Áádóó baa hoolzhiizh éí yaa heeskai, dóó tsin bichʼįʼ honítʼiʼígíí yikááʼ dahdiikai.

23 Áádóó baa hoolzhiizh tsʼídá hodiłhiłgo chahałheeł bił hooʼaʼ; aooʼ, índa tsʼídá hodiłhiłgo chahałheeł bił hooʼaʼ, honáásiiʼ honítʼiʼ yikááʼ dah diikai yę́ę yóóʼaheeskai, doo ééhozingóó dahdadiikai dóó áko yóóʼaheeskai.

24 Áádóó baa hoolzhiizh nááná łaʼ yéigo náás deiyíldzííłgo yiiłtsą́, dóó naheeskai dóó béésh níʼáhígíí deiyiłtsood; dóó chahałheełyę́ę yiyiʼ náás deiyikááh. Béésh níʼáhígíí yéego yąąh dah naazhjééʼgo dayótąʼ, naheeskai dóó tsin bineestʼąʼ dayííyą́ą́ʼ.

25 Áádóó tsin bineestʼąʼ dayííyą́ą́ʼ dóó bikʼijįʼ yádanizin náhalingo ahéédaazgal.

26 Áádóó shí ałdóʼ ahééníghal, áádóó tooh nílį́ bitseʼnaa, kin ayóó áníłtso dóó ntsaago biiʼ hazʼą́ągo yiiłtsą́; áádóó tsʼídá nahasdzáán bikááʼ, hódahgi níłchʼi biiʼ dah siʼą́ nahálin.

27 Áádóó diné ląʼí yiiʼ yílʼá, tʼáá áłah hadaastʼihígíí dóó nooséłí, tʼáá áłah hastóí dóó sáanii; áádóó biʼééʼ ayóó daʼílį́įgo yee hadadítʼé; áádóó łaʼ ndahaaskaiígíí tsin bineestʼąʼ deiyą́ągo yichʼįʼ dah dadilnihgo tʼóó yá ndahałtʼiʼ.

28 Áádóó tsin bineestʼąʼ deiyííyą́ą́ʼgo, łaʼ tʼóó baa daadlohígíí biniinaa yaa yádaniizį́į́ʼ; dóó dahonítʼiʼ baa dahóchįʼígíí yihidiikai dóó yóóʼaheeskai.

29 Áádóó kʼad shí, Nephi, shizhéʼé bizaad yee haadzííʼígíí doo tʼáá ałtso bee haasdzííʼ da.

30 Ákondi, akʼeʼeshchį́ áłtsʼísígo, áko shooh, nááná łaʼ ląʼí diné yéigo náás deiyíldzííłgo yiyiiłtsą́; dóó béésh niníʼáagi nahaskai dóó deiisíł; dóó yéigo náás deiyíldzííłgo yikah, béésh níʼáhígíí doo deidóchííd átʼéégóó dayótąʼ, áadi yíkai dóó bikʼidahooldogo naaʼaníídeeʼ dóó tsin bineestʼąʼ dayiiyą́ą́ʼ.

31 Áádóó ałdóʼ nááná łaʼ ląʼí diné dahwéézíídgo kin ayóó áníłtso dóó ntsaago biiʼ hazʼánígíí yichʼįʼ deiyíkááh.

32 Áádóó baa hoolzhiizh ląʼí da diné tooh łeeyiʼdę́ę́ʼ háálį́įgi dabiʼdooghą́ą́ʼ; dóó tʼóó ahayóí hanáʼohdóó yóóʼaheeskai, daʼnítiin léiʼ doo bił éédahózingóó deiyíkááh.

33 Áádóó ayóó ánéelą́ą́ʼgo diné kin léiʼ yiih heeskai. Dóó éí kin yííh héeskaigo shá nidaháłtiʼgo bílaʼ yee shichʼįʼ dah dadolnih áádóó tsin bineestʼąʼ deiyánée ałdóʼ; ákondi nihí doo deisíniiltsʼą́ą́ʼ da.

34 Díí saad shizhéʼé yee hahaasdzííʼ: Háálá ląʼí dabidiiztsʼą́ʼígíí, baa dahóchįʼę́ę yihidiikai.

35 Áádóó shizheʼé ání, Laman dóó Lemuel tsin bineestʼąʼ tʼáadoo yiyííyą́ą́ʼ da.

36 Áádóó baa hoolzhiizh shizhéʼé yaa náyiizyeelyę́ę doodago bił iishjání alyaayę́ę bizaadígíí tʼóó ahayóí ałtso yee yááłtiʼgo, kónihidííniid, háálá díidí ił ííshją́ą́ éʼélʼį́ biyiʼ yiyiiłtsánéé biniinaa, Laman dóó Lemuel tʼáá íiyisíí yá násdzííd; aooʼ, Diyin Bóhólníihii bidáahdoo náhjįʼ kóbidiʼdoolnííłgo yá náldzid.

37 Áádóó hashchíinii tʼáá ałtso ayóóʼóʼóní yee hachʼįʼ haadzííʼ, áko hazaad deiyóotsʼą́ą́ʼ doo, áko Diyin Bóhólníihii bibee ajoobaʼ da yee haahą́ą́h hasin doo, dóó doo nahjįʼ kóhodoolííł da; aooʼ, shizhéʼé kótʼáo nahoneeztą́ą́ʼ.

38 Áádóó nahoneeztą́ą́ʼdóó bikʼijįʼ, tʼóó ahayói náásdi ádahodooníłígíí yee hoł hoolneʼ, Diyin Bóhólníihii bibee hazʼáanii bikʼeh honółʼį́ hodííniid; dóó tʼáá ádíjįʼ hachʼįʼ haadzííʼ.