Wóltaʼii 7
Lehi biyeʼké Jerusalemgóó nákai dóó Ishmael dóó yił dabighnígíí nihił wohnééł doo deidííniid—Laman dóó łaʼ akʼijįʼ daazlį́į́ʼ—Nephi bikʼiské Diyin Bóhólníihii tʼáá íiyisíí yinohdlą yidííniid—Tłʼóół yee hweʼdaʼaztłʼǫ́ʼ dóó dahodiyoołhééłgo yindahazʼą́—Oodląʼ yee bee bídziilgo tłʼóół kʼííníłdláád—Bikʼiské nihaa ndiʼníʼaah hodííniid—Lehi dóó hoł yíkaaígíí nááhániihii dóó didlidgo nááhániihii yee náádaʼiisniiʼ. Jesus bidiʼdoochííłjįʼ 600–592 B.C. yihahgo ádahóótʼįįd.
1 Áádóó kʼad díí nihił bééhózin doo nísin, áko shizhéʼé, Lehi, Diyin bikʼeh áhodoonííł náásdi baʼáłchíní dahodooleełígíí yaa yááłtiʼgo, áádóó baa hoolzhiizh Diyin Bóhólníihii bichʼįʼ hanáánáádzííʼ, Lehi, bił dabighanígíí doo tʼáá sáhí diné doo kééhatʼíní góneʼ dah yididooʼish da; ndi biyeʼké łahdę́ęʼgo atsiʼké bichʼooní ádeidoolííł, ákondi kéyah bee ahaʼdeetʼą́ądi Diyin Bóhólníihii dayóodlą́ągo baʼáłchíní deidínóosééł.
2 Áádóó baa hoolzhiizh Diyin Bóhólníihii áháłní, éí shí, Nephi, dóó shikʼiské, ńléí Jerusalem kéyahgóó ńdoohkah, dóó Ishmael dóó yił dabighanígíí diné doo kééhatʼíní góneʼ yił ńdookah.
3 Áádóó baa hoolzhiizh shí, Nephi, dóó nááná, shikʼiskʼé bił, diné doo kééhatʼíní góneʼ ńléí Jerusalem gódei nikiniikai.
4 Áádóó baa hoolzhiizh ńléí Ishmael bighandi niikai, dóó Ishmael yáʼátʼéehgo nihaa tsídeezkéez, ákohgo índa Diyin Bóhólníihii bizaad bee bichʼįʼ hadasiidzííʼ.
5 Áádóó baa hoolzhiizh Diyin Bóhólníihii Ishmael dóó bichʼooní, dóó baʼáłchíní tʼáá ałtso, dóó doo nihikʼijįʼ nilį́į́góó áyiilaa, áko índa diné doo kééhatʼíní góyaa shizhéʼé biníbaal siʼą́ąjįʼ nihił nákai.
6 Áádóó baa hoolzhiizh diné doo kééhatʼíní biyiʼ yiikáhgo, áko shooh Laman dóó Lemuel, dóó Ishmael bitsiʼké naakigo, dóó Ishmael biyeʼké naakigo dóó bił dabighanígíí, yił nihikʼijįʼ daazlį́į́ʼ; aooʼ, shí, Nephi, dóó Sam, dóó bizhéʼé, Ishmael, dóó beʼesdzáán, dóó bitsiʼké łaʼígíí tááʼgo.
7 Áádóó baa hoolzhiizh nihikʼijįʼ daazlį́įgo, ńléí Jerusalem kéyahgóó nátʼą́ą́ʼ ńdiikai daaníí ńtʼę́ę́ʼ.
8 Áádóó kʼad shí, Nephi, bijéí deistłʼisígíí baa yínííł niizį́į́ʼ, éí bąą bichʼįʼ yéíłtiʼ, kódíshníigo, aooʼ, azhą Laman dóó Lemuel bichʼįʼ ndi: Áko shooh nihí shínaaí nohłį́, dóó haash yitʼáo éí nihijéí biyiʼdi yéego hosółtłʼis, dóó nihíniʼ doo bee oohʼį́į da, áko shí, nihitsilí nishłį́įgo nihichʼįʼ yáshtiʼ, aooʼ, dóó yáʼátʼéehgo nihá sézį́?
9 Haashąʼ yitʼáo Diyin Bóhólníihii bizaad doo bikʼeh honołʼį́į da?
10 Haashąʼ yitʼáo éí Diyin Bóhólníihii bá naalʼaʼí woołtsánée beisóonah?
11 Aooʼ, haashąʼ yitʼáo éí Diyin Bóhólníihii ayóóʼátʼáo nihíká eelwodę́ę beisóonah, Laban bílákʼeedóó yisdánihííʼeezh, dóó ałdóʼ ndaháasdzooígíí éí shódeisiiltʼeʼ.
12 Aooʼ, haashąʼ yitʼáo éí beisoonah Diyin Bóhólníihii éí nihokááʼ dineʼé baʼáłchíní, daboodlą́ągo, tʼáá bí bíhólníihgo tʼáá ałtsoní yá íídoolííł? Ákohgo, hazhóʼó bikʼeh dahoniilʼį́į dooleeł.
13 Áádóó tsʼídá bikʼeh dahoniilʼį́įgo éí, kéyah bee ahaʼdeetʼánígíí shódeidiiltʼeeł; dóó haaʼígishį́į́ hoolzhiizhgo éí Diyin Bóhólníihii ńléí Jerusalem doolchxǫǫł nínée bihodoolnííł; háálá Diyin Bóhólníihii tsʼídá Jerusalem doolchxǫǫł níigo yee haadzíʼę́ę éiyá ałtso bidahodoolnííł.
14 Háálá áko shooh, Diyin Bóhólníihii biʼIiʼ Sizį́ Diyinii tʼáadoo hodinaʼí doo bił dahólǫ́ǫ da yileeh; háálá áko shooh diyin yá yádaałtiʼii yóó adeideezʼą́, dóó Jeremiah éí awáalyaa góneʼ yah adeistʼeʼ. Dóó shizhéʼé éí deidiilyééł daaníigo yiká ádaatʼį́į́ ńtʼę́ę́, áko índa kéyahdóó chʼídeineeshchą́ą́ʼ.
15 Kʼad áko shooh, ánihidishní Jerusalemgóó nánoohkaigo áko shooh nihí ałdóʼ dadínóohnééł. Doo kʼad, tʼah ádeínóhsingo, kéyah gódei ńdohkááh, dóó saad bee nihichʼįʼ yáshtiʼígíí béédaołniih, ákǫ́ǫ́ nánoohkaigo nihí ałdóʼ atah dínóohnééł; háálá Diyin Bóhólníihii biʼIiʼ Sizį́ Diyinii éí áshíłníigo bee yáshtiʼ.
16 Áádóó baa hoolzhiizh shí, Nephi, díidí saad shikʼis bee bichʼįʼ yeiłtiʼgo, shichʼįʼ bá dahóóchįįd. Áádóó baa hoolzhiizh bilaʼ yee dashisił, háálá áko shooh, tʼáá íiyisíí báhóóchiid, dóó tłʼóół yee sheʼdaʼáztłʼǫ́, háálá hódiyiilyééł daniizį́į́ʼ, áko diné doo kééhatʼíní biyiʼdi ndadiiltéełgo naaldlooshii daʼałchiní dabidoolghał daniizį́į́ʼ.
17 Ákondi baa hoolzhiizh Diyin Bóhólníihii bichʼįʼ sodeeszin, kódíshníígo: O Diyin Bóhólníihii, niinishdlánígíí binahjįʼ, shínaaí bílákʼeedóó yisdáshílóós, aooʼ, shídziilgo áshílééh áko díí tłʼóół bee sheʼastłʼónígíí kʼídeeshdláł.
18 Áádóó baa hoolzhiizh díidí saad bee haasdzíiʼgo, áko shooh, tłʼółę́ę shílaʼ dóó shikeeʼ bąąhdóó naostʼah, dóó shínaaíké bidááhdóó yiizįʼ, dóó bichʼįʼ hanáánáásdzííʼ.
19 Áádóó baa hoolzhiizh shichʼįʼ bá nááhóóchįįd, dóó nááshiisił ńtʼę́ę́ʼ; ákondi shooh, łaʼ Ishmael bitsiʼ, aooʼ, dóó ałdóʼ bimá, dóó łaʼ Ishmael biyeʼ, shínaaí ńdayooskan, honáásiiʼ bijéí yilzhóólígo ándayiidlaa; dóó shizééʼ nideiʼáhą́ą niʼ kódayiilaa.
20 Áádóó baa hoolzhiizh doo yáʼáshóonii yaa naakaiígíí biniinaa, yínííł daniizį́į́ʼ, áko índa shichʼįʼ ntsídadeezgoʼ, dóó atídaniilyaaígíí tʼáá shǫǫdí bee nihaa ndiʼníʼaah, níigo náshooskan.
21 Áádóó baa hoolzhiizh tʼáá ałtso yee shikʼijįʼ ádáátʼįįdę́ę bee bá nídiʼníʼą́, dóó Bóhólníihii nihiDiyin God bichʼįʼ sodidoołzįįł nihaa ńdiníʼaah bididoohniił bidííniid. Áádóó baa hoolzhiizh éí yidaʼiilaa. Diyin Bóhólníihii yichʼįʼ sodoolzin áádóó bikʼijįʼ ńléí shizhéʼé biníbaal bichʼįʼ dah náádiikai.
22 Áádóó baa hoolzhiizh shizhéʼé biníbaaljįʼ nániikai. Dóó shí dóó shikʼiské dóó Ishmaeltʼááátʼé bighan hazʼáádóó shizhéʼé biníbaaljįʼ bił náníshkaigo áádóó bikʼijįʼ, Bóhólníihii bíDiyin God ahéheeʼ deidííniid; dóó nááhániihii dóó didlidgo nááhániihii yee shichʼįʼ náádaʼiisniiʼ.