Wóltaʼii 5
Sariah Lehi yikʼijįʼ haadzííʼ—Tʼááʼájíłah hweʼashiiké nákaigo baa hoł hóózhǫǫd—Nááʼdaʼíísniiʼ—Béésh łitsoii tʼą́hí Moses dóó Diyin God yá yádaałtiʼii ńdeiyíízo yę́ę dabiyiʼ—Béésh łitsoii tʼą́hí Lehi Joseph bizází nilį́įgo ííshją́ą́ áyiilaa—Lehi baʼáłchíní náásgóó daʼahilchíhígíí ádadooníłígíí dóó béésh łitsoii tʼą́hí hastʼendootʼáłígíí yaa hoolneʼ. Jesus bidiʼdoochííłjįʼ 600–592 B.C. yihahgo ádahóótʼįįd.
1 Áádóó baa hoolzhiizh diné doo kééhatʼíní góyaa nihizhéʼé baa nániikaigo, áko shooh, tʼáá íiyisíí bił hóózhǫǫd, dóó shimá, Sariah, ałdóʼ tʼáá íiyisíí bił hóózhǫǫd, háálá ayóó átʼáo nihaa yínííł nízin ńtʼééʼ.
2 Háálá diné doo kééhatʼínídidóʼ náádabiʼdiilyááísh niizį́į́ʼ; dóó shizhéʼé ałdóʼ yikʼijįʼ haadzííʼ, diné bił áhátʼíinii nílį́; yił níigo: Áko shooh kéyah nihaa deetʼą́ą́dóó dah nihidiniʼeezh, dóó shiyáázh éí ádaadin, dóó nihí ałdóʼ diné doo kééhatʼínígi náánihidiʼdoolyééł.
3 Áádóó díigi átʼáo éí shimá shizhéʼé yikʼijįʼ haadzííʼ.
4 Áádóó baa hoolzhiizh shizhéʼé shimá yichʼįʼ haadzíiʼ, kóníigo: Tʼáá aaníí diné bił áhátʼíinii nishłį́; háálá Diyin God biʼéʼélʼį́ tʼáadoo yiiłtsą́ą́góó Diyin God biyáʼatʼééhii doo baa ákonisin da dooleeł ńtʼę́ę́ʼ, ndi tʼahdii Jerusalemdi naasháago, shikʼiské bił shiʼdiisxį́į doo ńtʼę́ę́ʼ.
5 Ákondi shooh, shí éiyá kéyah bee ahaʼdeetʼánii shóíséłtʼeʼ, éí éiyá íiyisíí baa shił hózhǫ́; aooʼ, tʼáá aaníí shił bééhózingo éí Diyin Bóhólníihii shiyeʼké Laban yílákʼeedóó yisdáyidoonił, dóó doo kééhatʼíní góyaa nihaa néidooʼishgo shił bééhózin.
6 Áádóó díigi átʼáo shizhéʼé, Lehi, saad yee yáłtiʼgo shimá, Sariah, yił náhóóshǫǫd, nihí nihiniinaa, kéyah Jerusalemgóó diné doo kééhatʼínígi yiikahgo, béésh łitsoii bikááʼ Jew dineʼé baa haneʼ bíká néiikahgo.
7 Áádóó shizhéʼé biníbaaldi nániikaigo, áko shooh tʼáá áła ayóó átʼáo yáá bił hóózhǫǫd, dóó shimá biiʼ hááhwiisdoh.
8 Áádóó haadzííʼ, kóníigo: Kʼad éí tsʼídá tʼáá aaníí Diyin Bóhólníihii shahastiin doo diné kééhatʼínígi dah didíínééł yidííniidígíí shił bééhóozin; aooʼ, dóó tsʼídá tʼáá aaníí shił bééhózin Diyin Bóhólníihii shaʼáłchíní tʼáá ałtso yaa áhályą́ą́ ńtʼę́ę́ʼ, dóó Laban yílákʼeedóó yisdáyíínil, dóó Diyin Bóhólníihii bibee adziilii binahjįʼ tʼáá ałtso ábidííniidę́ę yidaʼiilaa. Áádóó díigiʼ átʼáo saad yee yááłtiʼ.
9 Áádóó baa hoolzhiizh tʼáá íiyisíí yaa bił hóózhǫǫd, dóó Diyin Bóhólníihii yichʼįʼ nááhániihii dóó didlidgo nááhániihii yee náádaʼiisniiʼ; dóó Israel biDiyin God ahéheeʼ deidííniid.
10 Áádóó Israel biDiyin God ahéheeʼ dadííniidgo, shizhéʼé, Lehi, béésh łitsoii tʼą́hí bikááʼ naháasdzo yę́ę néidiiʼą́, dóó hodeeyáádą́ą́ʼ dóó wóshdę́ę́ʼ néídiiłkááʼ.
11 Áádóó Moses binaaltsoos ashdlaʼgo áyiilaaígíí éí biyiʼgo yiyiiłtsą́, nahasdzáán ályaaígíí, áádóó ałdóʼAdam dóó Eve, éí áłtsé nihizhéʼé dóó nihimá yaa hoolneʼ;
12 Áádóó Jew dineʼé ałdóʼ hodeeyáádę́ę́ʼ baa náʼíísdzo, éí Zedekiah, Judah biʼaláahdi naatʼáanii, dah neezdáajįʼ baa haneʼ;
13 Áádóó Diyin yá yádaałtiʼii dadiyinii hodeeyáádą́ą́ʼ dóó, ńléí Zedekiah dah neezdáajįʼ náásgóó ádahodoonííł yee hadahasdzíʼę́ę ałdóʼ biyiʼ; dóó Jeremiah ląʼída náásgóó ádahodoonííł nínée ałdóʼ biyiʼ.
14 Áádóó baa hoolzhiizh shizhéʼé, Lehi, béésh łitsoii tʼą́hí bikáaʼgi dabizhéʼé yę́ę baa haneʼgo yiyiiłtsą́; ákohgo Joseph éí yitsʼąądóó hazlį́įʼgo bił bééhóozin; aooʼ, éí Joseph Jacob yiyeʼ nilínée, Egyptgóó nabiʼdiizniiʼę́ę, dóó Diyin Bóhólníihii baa áhalyą́ągo, bizhéʼé, Jacob dóó tʼáá ałtso yił yinéłígíí dichin biʼniighą́ąʼgo yisdáyíínil.
15 Áádóó ałdóʼ kéyah Egyptdi ąąh jizhjééʼdę́ę́ chʼíbiʼdeetʼeezh, tʼáá éí Diyin God hákáʼeelwod yę́ę, yisdánáhwííʼeezh.
16 Áádóó áko shizhéʼé Lehi, kótʼáo dabizhéʼé baa haneʼ naháasdzooígíí bił bééhoozin. Dóó Laban ałdóʼ Joseph yitsʼąądóó hazlį́į́ʼ lá, ákohgo bí dóó dabizhéʼé yę́ę díí naháasdzo yę́ę yaa ádahalyáá ńtʼę́ę́ʼ.
17 Áádóó kʼad shizhéʼé díí tʼáá ałtso yiyiiłtsą́ągo, Iiʼ Sizį́ Diyinii bił hooleʼ, dóó Diyin bikʼeh áhodooníiłgo náásgóó baʼáłchíní danilį́į dooleełígíí yaa yáʼniiłtiʼ—
18 Áko díí béésh łitsoii tʼą́hí bikáʼígíí éí náásgóó tʼáá ałtso ałʼąą dineʼé bił dah nahazʼą́ą́góó, dóó ałʼąą dóoneʼé, dóó bizaad ałʼąą ádaatʼéego, dóó nihokááʼ dineʼé bí bitsʼą́ą́dóó nooséłígíí bitahgóó dooleeł.
19 Ákohgo, díí béésh łitsoii tʼą́hí éí tsʼídá doo ndootʼih da; doo ndóʼ ahoolʼáágóó yidoobá da níigo yááłtiʼ. Dóó náásgdi baʼáłchíní bídadéétiʼ dooleełígíí yaa yááłtiʼ.
20 Áádóó baa hoolzhiizh shí dóó shizhéʼé kónízahjįʼ Diyin Bóhólníihii ánihidííniidę́ęʼ bikʼeh honiilʼį́įgo bibee hazʼáanii beʼiilyaa.
21 Áádóó Diyin Bóhólníihii naháasdzo ńdadidoohnił nihiłnínée ńdadiinil, dóó hazhoʼó deiyíníiltaʼ dóó tʼáá íiyisíí ílíinii átʼéii lágo baa ákodaniidzį́į́ʼ; aooʼ, éí éí tʼáá íiyisíí nihá yáʼátʼéehgo nihił béédahoozin, áko índa nihaʼáłchíní Diyin Bóhólníihii bibee hazʼáanii bá hashtʼeʼndeitáa doo daniidzį́į́ʼ.
22 Ákohgo, Diyin Bóhólníihii biniyé ńdadiinilígíí bił bééhózíngo deiyínííjááh, diné doo kééhatʼíní góneʼ kéyah bee ahaʼdeetʼánígíí bichʼįʼ yiikahgo.