1 Háálá áko shooh, baa hoolzhiizh Diyin Bóhólníihii éí shizhéʼé yichʼįʼ haadzííʼ, aooʼ, naʼadzeeł biyiʼjįʼ, dóó kóbidííniid: Lehi, háálá ííndzaaígíí biniinaa nikʼihojisdliʼ; dóó háálá aʼíínílíhígíí dóó díí dineʼé bee bił hodíílnih nidííniidę́ę bee bił hwíínílneʼgo biniinaa, áko shooh, dandiyiilyééł danízin.

2 Áádóó baa hoolzhiizh Diyin Bóhólníihii shizhéʼé iidííniid, naʼadzeeł biyiʼ, naʼáłchíní diné doo kééhatʼínígóó bił dah didíínééł yidííniid.

3 Áádóó baa hoolzhiizh Diyin Bóhólníihii yee bichʼįʼ haadzíʼę́ę yikʼeh hóółʼįįd, ákohgo Diyin Bóhólníihii ábidííniidígíí yiʼiilaa.

4 Áádóó baa hoolzhiizh diné doo kééhatʼíní góneʼ dah diiná. Áádóó bighan, dóó kéyah baa deetʼánée yitsʼą́ąjįʼ dah diiyá, dóó bibéésh óola, dóó bibéésh łigaii, dóó binaalyéhé daʼílínii, dóó tʼáadoo dah yidiiláhí da, tʼáá hazhoʼó baʼáłchíní, dóó chodéidoołʼįįł, dóó biníbaal tʼéiyá, dóó diné doo kééhatʼíní góneʼ dah diiná.

5 Áádóó Tónteel Łichííʼ hoodzoh yibąąhjįʼ níyá; dóó Tónteel Łichííʼ hoodzoh áhanígóó diné doo kééhatʼíníjįʼ niyá; dóó baʼáłchíní diné doo kééhatʼínígóó yił níná, daʼátahígíí éiyá shimá, Sariah, dóó shínaaíké, éí Laman, Lemuel, dóó Sam.

6 Áádóó baa hoolzhiizh diné doo kééhatʼíní góneʼ yinéełgo tááʼ yiską́, chʼeldzis góyaa tooh nílíí léiʼ yibąąhgóó biníbaal niiníʼą́.

7 Áádóó baa hoolzhiizh bíkʼih nááʼiiniihí tsé yee yíztłʼin, dóó Diyin Bóhólníihii yichʼįʼ nááʼiisniiʼ, dóó Diyin Bóhólníihii nihiDiyin God ahéheeʼ yidííniid.

8 Áádóó baa hoolzhiizh tooh nílínígíí Laman, yee yiyíízhiʼ, dóó Tónteel Łichííʼ biih yílį́; dóó hoodzoh bíighahjįʼ chʼíhootsoh.

9 Áádóó shizhéʼé tooh nílinígíí nléi Tónteel Łichííʼ dah siyínígíí biih yílį́ yiyiiłtsą́ągo, Laman yichʼįʼ haadzííʼ, kóníigo: O díí tooh nílínígi ánítʼée dooleełę́ę, tʼáá áłahjįʼ Diyinkʼehgo oodááł biiʼ yínááł díí tó dah siyínígíí biih nílínígiʼ ánítʼée doo.

10 Áádóó ałdóʼ Lemuel yichʼįʼ haadzííʼ: O díí chʼíhootsohígíí ánítʼé diileełę́ę, doo łáhgo ánááʼníił da dóó níníłdzil, doo nahjįʼ kónínééhgóó sínízį́įgo Diyin Bóhólníihii bibee hazʼáanii bikʼeh honíłʼį́.

11 Kʼad Laman dóó Lemuel doo nabiʼdídzilígíí biniinaa díí yee yichʼįʼ haadzííʼ; háálá áko shooh ląʼída yee bizhéʼé yikʼijįʼ saad hółǫ́, hastįį bił ííshjání éʼélʼį́įgo biniinaa, dóó kéyah Jerusalemdę́ę́ʼ chʼíbiníʼeezh, kéyah baa dadeestʼánígíí yitsʼą́ąjįʼ, dóó dabibéésh óola, dóó dabibéésh łigaii, dóó binaalyéhé daʼílínígíí tʼáágééd, diné doo keehatʼínídi tʼóó dadíniiʼnééł. Dóó tʼáá ádzaagóó bijéí biyiʼdi yaa ntsékeesígíí biniinaa díí yiʼiilaa níigo.

12 Áádóó áko Laman dóó Lemuel, alą́ąjįʼ naaʼáashgo, bizhéʼé yichʼįʼ saad hółǫ́. Áádóó Diyin God ábiilaaígíí doo bił bééhózinígíí biniinaa saad hółǫ́.

13 Doondóʼ yóodlą́ą da, éí Jerusalem kintah, ayóóʼátʼéii, éí Diyin yá yádaałtiʼii yee hadahasdzíʼę́ęgi átʼáo doochxǫǫłígíí. Dóó tʼáá áłah éí Jew dineʼé Jerusalemdi kéédahatʼínígíí nahalin, éí shizhéʼé deidíyoołhééł yiká ádaatʼį́į́ ńtʼę́ę́ʼ.

14 Áádóó baa hoolzhiizh shizhéʼé dzígai Lemuel bee yééjiʼ yę́ęgi, adziilii bee, dóó Iiʼ sizíinii bił hólǫ́ǫgo, yichʼįʼ yááłtiʼ ńtʼę́ę́ʼ tʼáá áła bitah hodiʼniitsxiz. Dóó yidiiłheel, áko tʼáadoo bikʼijįʼ hanáánaadzíiʼ da; ákohgo, kótʼáo yichʼįʼ yáłtiʼgo bikʼeh hółʼįįd.

15 Áádóó shizhéʼé níbaal yiyiʼ bighan ńtʼę́ę́ʼ.

16 Áádóó baa hoolzhiizh shí, Nephi, tʼahdii tsíłkéí nishłį́, ákótʼée ndi shitah hotsxaazgo nísneez, dóó ałdóʼ Diyin God bitsʼą́ą́dóó tʼáá aaníinii tʼahdoo ííshją́ą́ ádaalnéehii tʼáá íiyisíí shił bééhodoozįįł nisin, ákohgo, Diyin Bóhólníihii tʼáá íiyisíí bichʼįʼ sodeeszin; áádóó áko shooh shaa níyá, dóó shijéí yilzhólígo áyiilaa éí shizhéʼé ałtso yee yááłtiʼę́ę yisisdląąd; ákohgo doo shínaaí nahálingo bikʼijįʼ yéiiłtiʼ da.

17 Áádóó Sam bichʼįʼ yéiiłtiʼ, Diyin Bóhólníihii biʼIiʼ Sizį́ Diyinii binahjįʼ shił ííshją́ą́ ádayiilaaígíí bił ííshją́ą́ ádéishłaa. Áádóó baa hoolzhiizh shizaad yóosdląąd.

18 Ákondi, shooh, Laman dóó Lemuel shizaad doo yiyíístsʼą́ą́ʼ da; dóó bijéí yistłʼisígíí biniinaa baa yínííł nísingo Diyin Bóhólníihii bichʼįʼ bá naʼiisískan.

19 Áádóó baa hoolzhiizh Diyin Bóhólníihii shichʼįʼ haadzííʼ, kóníigo: Nephi, neʼoodląʼígíí biniinaa, nikʼihojídlí, háálá yéigo nijéí hojoobaʼ íinízingo, hashínínítą́ą́ʼ.

20 Áádóó shibee hazʼáanii kwínízahgóó bikʼeh honíłʼį́įgo, bee ńdiʼdíílééł; dóó kéyah bee ahaʼdeetʼą́ąjįʼ ndiʼdoodlóós; aooʼ, kéyah nihá hashtʼeʼhooshłaadi ndi; aooʼ, tʼáá ałtso kédaayahígíí biláahdi ánoolninígíí átʼé.

21 Áádóó nikʼis kwínzahgóó nikʼijįʼ yááłtihgo, Diyin Bóhólníihii bitsʼą́ą́dóó nahjįʼ kódabidiʼdoolnííł.

22 Áádóó shibee hazʼáanii kwínzahgóó bikʼeh honíłʼį́įgo, níkʼis binaatʼáanii dóó binaʼnitiní dííleełgo ánidiʼdoolnííł.

23 Háálá áko shooh, náás yoołkáałdi tʼáá áłah shikʼijįʼ silį́įʼgo, shí tsʼídá bikʼeʼíyéʼígíí bikʼijįʼ kódéeshłííł, dóó naʼáłchíní doo yiláah ábóodziil da doo tʼáá hazhóʼó bí ałdóʼ shikʼijįʼ daazlį́įʼgo tʼéiyá.

24 Áádóó nléi shikʼijįʼ daazlį́įʼdi, naʼáłchíní danilíinii atídeiłʼį́į doo, éí yinahjįʼ shé ninádahalnííh dooleeł.