1 Áádóó kʼad baa hoolzhiizh shí, Nephi, díidí tʼáadoo leʼé yiłtaʼígíí éiyá béésh łitsoii tʼą́hí bikʼih náháasdzoh, shikʼiské shaa yíkai dóó kódashidííniid: Díidí yíniłtaʼígíísh éiyá haʼátíí ááłdeiiłní? Áko shooh, daʼ iiʼ sizíiniikʼehjíish tʼéiyá tʼáadoo leʼé bikʼidaʼdidiitį́į́ł, iiʼ sizíiniikʼehjíísh áhodoonį́į́ł dóó doo éí atsʼíísjí da?

2 Áádóó shí, Nephi, kóhodííniid: Áko shooh Iiʼsizíi biinééʼ binahjįʼ Diyin yá yáłtiʼii yichʼįʼ ííshją́ą́ ádayiilaa; háálá Iiʼ Sizį́ Diyinii binahjįʼ Diyin yá yádaałtiʼii tʼáá ałtsoní bił nibéédahoozįįh, éí éiyá nihokááʼ dineʼé baʼáłchíní atsʼíískʼehgo bichʼįʼ kódoolnííł.

3 Ákohgo, tʼáá áłah atsʼíís dóó iiʼsizíi tʼáadoo leʼé bidadéétiʼígíí éiyá déiiłtaʼ; háálá Israel bighandóó bił áhodoonííł, hodiinaʼgo doodágo náásdi, nahasdzáán tʼáá ałtso bikááʼgóó daʼníłtsʼą́ąjigo ałtsʼádinóolkał, dóó ałdóʼ ałtso dineʼé bitáhgóó.

4 Áádóó áko shooh, tʼáá íídą́ą́ʼ tʼóó ahayói Jerusalemdi nidaakaaígíí baa dajiyooznah. Aooʼ, dineʼé tʼáá ałtso łą́ągo ádaheeshtʼéézh; dóó tónteel bikááʼ kéyah nínilgóó daʼníłtsʼą́ąjigo ałtsʼádahineeskaad; dóó ndaakaidí doo nihił bééhózin da, tʼáá hazhóʼó abiʼdiishtʼeezhígíí tʼéiyá nihił béédahózin.

5 Áádóó áko adábiʼdiishtʼeezh índa, díidí tʼáadoo leʼé ádahodoonííł baa dahóóneʼ, dóó ałdóʼ kódóó tʼáá ałtso daʼníłtsʼą́ąjigo áłtsʼádadinóolkałígíí dóó bighadahodiʼdootʼáłígíí, Israel biDiyin Ayóó Átʼéii biniinaa; háálá bijéí bikʼijįʼ déiidoołtłʼis; ákohgo, tʼáá ałtso dineʼé bitáhgóó daʼníłtsʼą́ąjigo áłtsʼádadinóolkał dóó diné tʼáá ałtso dabijoołáa doo.

6 Ákótʼée ndi, Gentile dineʼé bikáʼííjééʼ dóó bikʼijįʼ, dóó Diyin Bóhólníihii bílaʼ yee Gentile dineʼé yíkʼih dah deesniiʼ dóó beʼalʼį́į dadooleeł, dóó haʼáłchíní bighaan yee dayójááh, dóó hatsiʼké biwos yee dayółjii, Áko shooh díidí tʼáadoo leʼé baa yéiiłtiʼígíí atsʼíísjí ádaatʼé; háálá Diyin Bóhólníihii ákótʼáo danhizhéʼé yił ahaʼdeetʼą́; dóó éí náás nihił yoołkáałdi ííłní, dóó ałdóʼ Israel bighandóó tʼáá ałtso nihikʼisoo bił.

7 Áádóó náás hoolzhízhdi Israel bighandóó tʼáá ałtso daʼníłtsʼą́ąjigo áłtsʼádadinóolkałígíí dóó bighadahodiʼdootʼáłígíí, Diyin Bóhólníihii Diyin God Gentile dineʼé bitáhdóó łaʼ dahooldah ayóóʼátʼáo yidínóosééł, aooʼ, díí kéyah bikááʼgóó ndi; binahjįʼ nihílástsiiʼ daʼníłtsʼą́ąjigo áłtsʼádadinóolkał.

8 Áádóó nihílástsiiʼ daʼníłtsʼą́ąjigo ałtsʼáneelkaad dóó bikʼijįʼ Bóhólníihii Diyin God Gentile dineʼé bitáhgóó naanish ayóó ánoolningo íídoołííł, nihílástsiiʼ ayóó bił yáʼádaatʼéeh doo; ákohgo, Gentile dineʼé yinahjįʼ ee daneesééł dóó bighaan dóó biwós yee dabójááh nahalin doo.

9 Áádóó ałdóʼ Gentile dineʼé bił yáʼádaatʼééh doo; dóó Gentile dineʼé bichʼįʼ tʼéiyá da doo ndi Israel bighan tʼáá ałtso ałdóʼ bichʼįʼ, ńléí yáʼąąshdi nihiTaaʼ nilíinii Abraham yee yił ahaʼdeetʼánée ííshją́ ádadoolnííł, kóníigo: Nílástsiiʼ nahasdzáán bikáaʼgi tʼáá ałtso kʼé deiłnínígíí yikʼízhdoodlííł.

10 Áádóó íínisin, shikʼiské, nihił bééhódoozįįł nahasdzáán bikáaʼgi tʼáá ałtso kʼé deiłnínígíí doo bikʼihójidoodlíił da tʼááh hazhóʼó bighaan bitsxeʼíí ałʼąą dineʼé deidóółtsééłgo tʼéiyá.

11 Ákohgo, Bóhólníihii Diyin God bigaan bitsxeʼíí ałtso ałʼąą dineʼé deidóółtséełgo áyoolííł, biʼahadaʼdeestʼą́ dóó binahatʼá bee yisdáʼiildéehii Israel bighan dooleełígíí yaa náyiidléh.

12 Ákohgo, biʼdisnáádééʼ chínáánéiidiyooʼish, dóó kéyah baa hídeestʼą́ąjįʼ ałhąʼándadoolnííł; dóó doo ééhózindę́ę́ʼ dóó chaháłheełdę́ę́ʼ chééhidootʼísh; dóó Bóhólníihii biYisdáʼiiníiłii dóó báNináʼnídláii, Israel biDiyin Ayóóʼábóodziilii bił béédahódoozįįł.

13 Áádóó sodizin ayóóʼátʼéii dóó aláahgo woolchʼį́dígíí bidíł, éiyá nahasdzáń tʼáá ałtso yijiłnii nilį́, bikʼigįʼ nináhádleehgo kóndadoolnííł; háálá tʼáá bí daʼahiigą́, dóó tʼáá bí bibéésh hał bitsiitsʼiin bikáaʼjįʼ kóndadoolnííł, dóó tʼáá bí bidíł bił dahodínóołdoh.

14 Áádóó ałʼąą dineʼé tʼááʼátʼé nikʼih deidoojah, O Israel bighandóó danohłíinii, háájééʼ ałkʼijįʼ dadoolééł, dóó Diyin Bóhólníihii bidineʼ yił ndahídoodíłgo hadahwiizgeedę́ę gooyaa yiihdínóodah. Dóó Zion yikʼijįʼ ndaabááhígíí ádooldįįł, dóó ałjiłnii ayóóʼátʼéii, Diyin Bóhólníihii tʼáá ákogiʼ átʼéii bidahónítʼiʼ łáhgo áyiilaa, aooʼ, sodizin ayóóʼátʼéii dóó aláahgo woolchʼį́dígíí, niʼjįʼ ndoołdas dóó ayóó íidootsʼį́į́ł.

15 Háálá áko shooh, Diyin yá yałtiʼii áníineʼ, tʼáá hodinaʼí baahodoolzhish Chʼį́įdii doo nihokááʼ dineʼé baʼáłchíní bijéí yikʼi bidzíil da dooleeł; háálá tʼáá hodinaʼí béiiniłką́ tʼáá ałtso ádaadáhaʼniihii dóó bąąhágiʼ átʼéii yaa naakaaígíí tséhágodgi ádaatʼée doo; dóó béiiniłką́ągo tsʼídá ahidoolkʼą́ą́ł.

16 Háálá tʼááhodinaʼí baaʼadoolkił Diyin God bibee ateʼélʼį́ tʼáá átʼé nihokááʼ dineʼé baʼáłchíní bikʼih yéiidoodził; háálá bąąhági átʼéii yaa naakáii doo tʼáá ákogi ádaatʼéii tʼóó ádeidoołdįįł da.

17 Ákohgo, tʼáá ákogi ádaatʼéi bibee ádziil yee dadoodzih, azhą́ tsʼídá tʼáá átʼé beʼateʼelʼį́ bił hóniyáa ndi, dóó tʼáá ákogi ádaatʼéi dadoodzíh, áko bedaʼánaʼí kǫʼ ádabidoołdįįł. Ákohgo, tʼáá ákogi ádaatʼéi tʼáadoo ńdaałdzidí; háálá Diyin yá yałtiʼii kóní, yisdádootʼish, azhą kǫʼ bee ndi.

18 Áko shooh, shikʼiské, kónihidishní, díí tsʼídá hodíínaʼgo ádahanééh; aooʼ, azhą dił, dóó kǫʼ, dóó tsʼídá łid beehalbá dooleeł; dóó tsʼídá díí nahasdzáán bikáaʼgi dooleeł; dóó dineʼé atsʼíseekʼehgo Israel biDiyin Ayóó Átʼéii bijéí yikʼijįʼ deinéestłʼisdí bitáhdoołníh.

19 Háálá áko shooh, tʼáá ákogi ádaatʼéi doo ádin dadooléeł da; háálá tʼáá aaníí baaʼhoolzhiizhdi Zion yikʼijįʼ ndaabááhígíí éí bichʼą́ą́h daʼdidoolkał.

20 Áádóó Diyin Bóhólníihii tʼáá aaníí bidineʼé bá ahóótʼiʼgo íidoolííł, Moses bizaad yeʼdoolíłígiʼ átʼáo, éi yee haadzííʼ, kóníigo: Bóhólníihii nihiDiyin God yá yałtiʼii nihá yiyaahwiidoołʼaał, shí nahalingo; haʼátʼíshį́į́ yee nihichʼįʼ haadzíʼígíí tʼáá ałtso dadidoohtsʼį́į́ł. Áádóó baa hodoolzhish tʼáá ałtso Diyin yá yáłtiʼii doo déiyíístsʼą́ʼígíí diné bitsʼą́ą́dóó dahdidoolkáł.

21 Áádóó kʼad shí, Nephi, nihił chʼínishʼaah, áko Moses díí Diyin yá yáłtiʼii yaa yááłtiʼę́ę Israel biDiyin Ayóó Átʼéii átʼį́; ákohgo, tʼáá ákogi ádaatʼéii yee níhwiiʼááh dooleeł.

22 Áádóó Diyinkʼehgo deiyiikahígíí doo ńdaałdzida doo, háálá bí éiyá doo ábiʼdidooldįįł da. Ákondi biʼiiníziinii biʼóhólnííh bił hazʼą́, éí nihokááʼ dineʼé baʼáłchíní bitáhgóó ndadoonił, éí óhólnííh bił hazʼą́ átsʼíís bee daholónígíí bitáhgóó nidáasnil—

23 Áko tʼáá hodinaʼí baaʼdoolkíł sodizin bá dahooghan tʼáá ałtso aadaʼiideeł biká ádaalyáaʼígíí, dóó tʼáá ałtso atsʼíís yikʼi bidzíil ádaalyaaígíí, adahwiisʼáago ił daʼídlį́ danélʼį́ nihokááʼ biká ádaalyaaígíí, atsʼíísjí bee ádánoolníinii hadeinitáhígíí dóó nihokááʼ bitʼáadoo leʼéígíí hadeinitáhígíí, dóó ałtah áátʼeeł yee tsiʼdahyikáhígíí; aooʼ, áko, tʼááłaʼí nitinígo biʼiiníziinii bee bóhólníihgo bił hazʼą́ yídiikaiígíí ńdadzildzid, dóó daditłid, dóó daditsiz; bí éí tsʼídá łeeyiʼjįʼ abiʼdidootʼish; bí tsʼídá tséhagodgiʼ átʼáo ahizhdidookʼą́ą́ł; díí Diyin yá yádaałtiʼii dabizaadę́ę́ʼ bikʼehgo.

24 Áádóó tʼáá hodinaʼí baaʼdoolkíł tʼáá ákogi ádaatʼéii tsʼídá béégashii yáázhgi átʼáo bighandóó chʼídooʼnił, Israel biDiyin Ayóó Átʼéii tsʼídá áłtse, dóó adziil, dóó ayóó bitsʼádiʼnilíidgo há hooʼááł doo.

25 Áádóó baʼáłchíní nahasdzáán dį́į́ʼ ahinínildę́ę́ʼ ałhąʼíidoolííł; dóó bidibé yídóołtah, dóó béédahósin; dóó tʼááłáʼígo shijééʼ dooleeł dóó dibé yaaʼáhályání tʼáálaʼí doo; dóó bidibé yaʼdoołtsoł, dóó yináhjį yee dabidziilii yikʼidookah.

26 Áádóó bidineʼé Diyinkʼehgo yikahígíí biniinaa, Chʼį́įdii doo bídziil da; ákohgo, tʼáadoo bidichídí láʼįgo nidooháh; háálá dineʼé doo yíjéí yikʼíh bidzíil da, háálá Diyinkʼehgo yikahígíí yee dahiná, dóó Israel biDiyin Ayóó Átʼéii akʼidéézʼį́į́ʼ.

27 Áádóó kʼad áko shooh, shí, Nephi, kónhidishní díidí tʼáá ałtso tsʼídá atsʼíseekʼehgo áhodoonííł.

28 Ákondi, shooh, tʼáá ałtso dineʼé, kʼé deiłnínígíí, dóó dabizaad, dóó diné ádaańdaʼooskango tʼéiyá Israel biDiyin Ayóó Átʼéii baa áhályáago yił kéédahatʼį́į doo.

29 Áádóó kʼad shí, Nephi, ałchʼįʼ kóshlééh; háálá díidí bidadeetiʼígíí doo náás baa yáshtiʼ da.

30 Ákohgo, shikʼiské, tʼáadoo leʼé béésh łitsoii tʼą́hí bikááʼ bikʼeʼáshchį́ tʼáá anínii ádaatʼe hazhóʼó baa tsídadidoohkos nísin; dóó diné tsʼídá Diyin God bibee hazʼáanii yikʼehółʼį́į doo níigo yaa halneʼ.

31 Ákohgo, tʼáadoo shí dóó shizhéʼé tʼéiyá ákójíní, dóó bínazhneestą́ą́ʼ danóhsiní. Ákohgo, bee hazʼáanii bikʼeh dahónołʼį́go, dóó danihidziilgo iiná deiyínółtʼééhgo, níhoníyáadi yisdáádoohááł. Áádóó díí éí ákótʼée doo. Amen.