1 Áádóó kʼad baa hoolzhiizh shí, Nephi, díidí tʼáadoo leʼé yíłtaʼígíí éiyá béésh łitsoii tʼą́hí bikʼi náháasdzoh, shikʼiské shaa yíkai dóó kódashidííniid: Díidí yíniłtaʼígíísh éiyá haʼátʼíí ááłdeiiłní? Áko shooh, daʼ iiʼ sizíinii kʼehjiísh tʼéiyá tʼáadoo leʼé bikʼidaʼdidiitį́į́ł, iiʼ sizíiniikʼehjíísh áhodoonííł dóó doo éí atsʼíísjí da?

2 Áádóó shí, Nephi, kóhodííniid: Áko shooh Iiʼ Sizíinii biinééʼ binahjįʼ Diyin yá yáłtiʼii yichʼįʼ ííshją́ą́ ádayiilaa; háálá Iiʼ Sizį́ Diyinii binahjįʼ Diyin yá yádaałtiʼii tʼáá ałtsoní bił nibéédahoozįįh, éí éiyá nihokááʼ dineʼé baʼáłchíní atsʼíískʼehgo bichʼįʼ kódoolnííł.

3 Ákohgo, tʼáá áłah atsʼíís dóó iiʼ sizíinii tʼáadoo leʼé bídadéétʼiʼígíí éiyá déiiłtaʼ; háálá Israel bighandóó bił áhodoonííł, hodíínaʼgo éí doodago náasdi, nahasdzáán tʼáá ałtso bikááʼgóó daʼníłtsʼą́ąjigo ałtsʼádinóolkał, dóó tʼáá ałtso dineʼé bitahgóó ałdóʼ.

4 Áádóó áko shooh, tʼáá íídą́ą́ʼ tʼóó ahayóí Jerusalemdi nidaakaaígíí baa dajiyooznah. Aooʼ, dineʼé tʼáá ałtso łą́ągo ádaheeshtʼéézh; dóó tónteel bikááʼ kéyah nínilgóó daʼníłtsʼą́ąjigo ałtsʼádahineeskaad; dóó nidaakaidí doo nihił bééhózin da, tʼáá hazhóʼó abiʼdiishtʼeezhígíí tʼéiyá nihił béédahózin.

5 Áádóó áko adábiʼdiishtʼeezh índa, díidí tʼáadoo leʼé ádahodoonííł baa dahóóneʼ, dóó ałdóʼ kódóó tʼáá ałtso daʼníłtsʼą́ąjigo ałtsʼádadinóolkałígíí dóó bighadahodiʼdootʼáłígíí, Israel biDiyin Ayóó Átʼéii biniinaa; háálá bijéí bikʼijįʼ deidoołtłʼis; ákohgo, tʼáá ałtso dineʼé bitahgóó daʼníłtsʼą́ąjigo ałtsʼádadinóolkał dóó diné tʼáá ałtso dabijoołáa doo.

6 Ákótʼée ndi, Gentile dineʼé bikáʼííjééʼ dóó bikʼijįʼ, dóó Diyin Bóhólníihii bílaʼ yee Gentile dineʼé yikʼi dah déesniiʼ dóó beʼalʼį́į dadooleeł, dóó haʼáłchíní bigaan yee dayójááh, dóó hatsiʼké biwos yee dayółjiid, Áko shooh díidí tʼáadoo leʼé baa yéiiłtiʼígíí atsʼíísjí ádaatʼé; háálá Diyin Bóhólníihii ákótʼáo danihizhéʼé yił ahaʼdeetʼą́; dóó éí náás nihił yoołkáałdi ííłní, dóó ałdóʼ Israel bighandóó tʼáá ałtso nihikʼisoo bił.

7 Áádóó náás hoolzhishdi Israel bighandóó tʼáá ałtso daʼníłtsʼą́ąjigo ałtsʼádadinóolkałígíí dóó bighadahodiʼdootʼáłígíí, Diyin Bóhólníihii Diyin God Gentile dineʼé bitahdóó łaʼ dah ooldah ayóó átʼáo yidínóosééł, aooʼ, díí kéyah bikááʼgóó ndi; binahjįʼ nihílástsiiʼ daʼníłtsʼą́ąjigo ałtsʼádadinóolkał.

8 Áádóó nihílástsiiʼ daʼníłtsʼą́ąjigo ałtsʼáneelkaad dóó bikʼijįʼ Bóhólníihii Diyin God Gentile dineʼé bitahgóó naanish ayóó ánoolningo íidoolííł, nihílástsiiʼ ayóó bił yáʼádaatʼéeh doo; ákohgo, Gentile dineʼé yinahjįʼ danéeséedłł dóó bigaan dóó biwos bee dabiʼdóojááh nahalin doo.

9 Áádóó ałdóʼ Gentile dineʼé bił yáʼádaatʼééh doo; dóó Gentile dineʼé bichʼįʼ tʼéiyá da doo ndi Israel bighan tʼáá ałtso ałdóʼ bichʼįʼ, ńléí yáʼąąshdi nihiTaaʼ nilíinii Abraham yee yił ahaʼdeetʼánée ííshją́ą́ ádadoolnííł, kóníigo: Nílástsiiʼ nahasdzáán bikáaʼgi tʼáá ałtso kʼé deiłnínígíí yikʼízhdoodlííł.

10 Áádóó íínísin, shikʼiské, nihił bééhodoozįįł nahasdzáán bikáaʼgi tʼáá ałtso kʼé deiłnínígíí doo bikʼihojidoodlíił da tʼáá hazhóʼó bigaan bitsxeʼii ałʼąą dineʼé deidoołtséełgo tʼéiyá.

11 Ákohgo, Bóhólníihii Diyin God bigaan bitsxeʼii ałtso ałʼąą dineʼé deidoołtséełgo áyoolííł, biʼahadaʼdeestʼą́ dóó binahatʼá bee yisdáʼiildéehii Israel bighan dooleełígíí yaa náyiidléh.

12 Ákohgo, biʼdisnááhdę́ę́ʼ chʼínáánéiidiyooʼish, dóó kéyah baa hídeestʼą́ąjįʼ ałhąʼándadoolnííł; dóó doo ééhózindę́ę́ʼ dóó chahałheełdę́ę́ʼ chʼééhidootʼish; dóó Bóhólníihii biYisdáʼiiníiłii dóó báNináʼnídláii, Israel biDiyin Ayóó Ábóodziilii bił béédahodoozįįł.

13 Áádóó sodizin ayóó átʼéii dóó aláahgo woolchʼį́dígíí bidił, éiyá nahasdzáán tʼáá ałtso biʼałjiłnii nilį́, bikʼijįʼ nináhádleehgo kóndadoolnííł; háálá tʼáá bí daʼahigą́, dóó tʼáá bí bibéésh hał bitsiitsʼiin bikáaʼjįʼ kóndadoolnííł, dóó tʼáá bí bidił bee bił dahodínóodoh.

14 Áádóó ałʼąą dineʼé tʼáá átʼé nikʼi deidoojah, O Israel bighandóó danohłíinii, háájééʼ ałkʼijįʼ dadooleeł, dóó Diyin Bóhólníihii bidineʼé yił ndahidoodiłgo hadahwiizgeedę́ę góyaa yiih dínóodah. Dóó Zion yikʼijįʼ ndaabaahígíí ádooldįįł, dóó ałjiłnii ayóó átʼéii, Diyin Bóhólníihii tʼáá ákogi átʼéii bidahónítʼiʼ łahgo áyiilaa, aooʼ, sodizin ayóó átʼéii dóó aláahgo woolchʼį́dígíí, niʼjįʼ ndoołdas dóó ayóó íidootsʼį́į́ł.

15 Háálá áko shooh, Diyin yá yáłtiʼii kódííniid, tʼáá hodíínaʼí baa hodoolzhish Chʼį́įdii nihokááʼ dineʼé baʼáłchíní doo bijéí yikʼi bidziil da dooleeł; háálá tʼáá hodíínaʼí beiníłką́ tʼáá ałtso ádaa dahaʼniihii dóó bąąhági átʼéii yaa naakaaígíí tséhégodgi ádaatʼée doo; dóó beiníłką́ągo tsʼídá ahidoolkʼą́ą́ł.

16 Háálá tʼáá hodíínaʼí baaʼadoolkił Diyin God bibee atéʼélʼį́ tʼáá átʼé nihokááʼ dineʼé baʼáłchíní bikʼi yéiidoodził; háálá bąąhági átʼéii yaa naakaiígíí doo tʼáá ákogi ádaatʼínígíí ádeidoołdįįł da.

17 Ákohgo, tʼáá ákogi ádaatʼéii bibee adziil yee dadoodzih, azhą́ tsʼídá tʼáá átʼé beʼatéʼélʼį́ bił hóniyáa ndi, dóó tʼáá ákogi ádaatʼéii dadoodzih, áko bedaʼanaʼí kǫʼ ádabidoołdįįł. Ákohgo, tʼáá ákogi ádaatʼéii tʼáadoo nídaałdzidí; háálá Diyin yá yáłtiʼii kóní, yisdádootʼish, azhą́ kǫʼ bee ndi.

18 Áko shooh, shikʼiské, kónihidishní, díí tsʼídá hodíínaʼgo ádahanééh; aooʼ, azhą́ dił, dóó kǫʼ, dóó tsʼídá łid bee halbá dooleeł; dóó tsʼídá díí nahasdzáán bikáaʼgi dooleeł; dóó dineʼé tsʼísee kʼehgo Israel biDiyin Ayóó Átʼéii bijéí yikʼijįʼ deineestłʼisdi díí bitah doołnih.

19 Háálá áko shooh, tʼáá ákogi ádaatʼéii doo ádin dadooleeł da; háálá tʼáá aaníí baa hoolzhiizhdi Zion yikʼijįʼ ndaabaahígíí éí bichʼą́ą́h dáʼdidoolkał.

20 Áádóó Diyin Bóhólníihii tʼáá aaníí bidineʼé bá ahóótʼiʼgo íidoolííł, Moses bizaad yeʼdoolíłígi átʼáo, éi yee haadzííʼ, kóníigo: Bóhólníihii nihiDiyin God yá yáłtiʼii nihá yiyaa hwiidoołʼaał, shí nahalingo; haʼátʼíí shį́į́ yee nihichʼįʼ haadzíʼígíí tʼáá ałtso dadidoohtsʼį́į́ł. Áádóó baa hodoolzhish tʼáá ałtso Diyin yá yáłtiʼii doo déiyíístsʼą́ʼígíí diné bitsʼą́ą́dóó dáʼdidoolkał.

21 Áádóó kʼad shí, Nephi, nihił chʼínishʼaah, áko Moses díí Diyin yá yáłtiʼii yaa yááłtiʼę́ę Israel biDiyin Ayóó Átʼéii átʼį́; ákohgo, tʼáá ákogi ádaatʼéii yee níhwiiʼááh dooleeł.

22 Áádóó Diyinkʼehgo deiyíkahígíí doo nídaaldzid da doo, háálá bí éiyá doo ábidiʼdooldįįł da. Ákondi biʼiiníziinii biʼóhólnííh bił hazʼą́, éí nihokááʼ dineʼé baʼáłchíní bitahgóó nidadooʼnił, éí óhólnííh bił hazʼą́ atsʼíís bee daholónígíí bitahgóó nidaasnil—

23 Áko tʼáá hodíínaʼí baaʼdoolkił sodizin bá dahooghan tʼáá ałtso aadaʼiideeł bíká ádaalyaaígíí, dóó tʼáá ałtso atsʼíís yikʼi bidziil ádaalyaaígíí, adahwiisʼáágóó ił daʼídlį́ danélʼį́ nihokááʼ bikááʼ ádaalyaaígíí, atsʼíísjí bee ádánoolníinii hadeintáhígíí dóó nihokááʼ bitʼáadoo leʼéígíí hadeintáhígíí, dóó ałtah áátʼeeł yee tsiʼ dah yikahígíí; aooʼ, áko, tʼááłáʼí nítínígo biʼiiníziinii bee bóhólníihgo bił hazʼą́ yidiikaiígíí nídadzildzid, dóó daditłid, dóó daditsxiz; bí éí tsʼídá łeeyiʼjįʼ abidiʼdootʼish; bí tsʼídá tséhégodgi átʼáo ahizhdidookʼą́ą́ł; díí Diyin yá yádaałtiʼii dabizaadyę́ę bikʼehgo.

24 Áádóó tʼáá hodíínaʼí baaʼdoolkił tʼáá ákogi ádaatʼéii tsʼídá béégashii yáázhgi átʼáo bighandóó chʼídooʼnił, Israel biDiyin Ayóó Átʼéii tsʼídá áłtse, dóó adziil, dóó ayóó bitsʼádiʼnilíidgo há hooʼááł doo.

25 Áádóó baʼáłchíní nahasdzáán dį́į́ʼ ahinínildę́ę́ʼ ałhąʼíidoolííł; dóó bidibé yídóołtah, dóó béédahósin; dóó tʼááłáʼígo shijééʼ dooleeł dóó dibé yaa áhályání tʼáálaʼí doo; dóó bidibé yaʼdoołtsoł, dóó yinahjįʼ yee dabidziilii yikʼidookah.

26 Áádóó bidineʼé Diyinkʼehgo yikahígíí biniinaa, Chʼį́įdii doo bidziil da; ákohgo, tʼáadoo biʼdichídí ląʼígo nídoohah; háálá dineʼé doo yíjéí yikʼi bidziil da, háálá Diyinkʼehgo yikahígíí yee dahiná, dóó Israel biDiyin Ayóó Átʼéii akʼidéézʼį́į́ʼ.

27 Áádóó kʼad áko shooh, shí, Nephi, kónihidishní díidí tʼáá ałtso tsʼídá tsʼísee kʼehgo áhodoonííł.

28 Ákondi, shooh, tʼáá ałtso dineʼé, kʼé deiłnínígíí, dóó dabizaad, dóó diné ádaa ńdaʼooskango tʼéiyá Israel biDiyin Ayóó Átʼéii baa áhályáago yił kéédahatʼį́į doo.

29 Áádóó kʼad shí, Nephi, ałchʼįʼ kóshlééh; háálá díidí bídadéétiʼígíí doo náás baa yáshtiʼ da.

30 Ákohgo, shikʼiské, tʼáadoo leʼé béésh łitsoii tʼą́hí bikááʼ bikʼeʼáshchį́ tʼáá aaníinii ádaatʼé hazhóʼó baa tsídadidoohkos nísin; dóó diné tsʼídá Diyin God bibee hazʼáanii yikʼeh hółʼį́į doo níigo yaa halneʼ.

31 Ákohgo, tʼáadoo shí dóó shizhéʼé tʼéiyá ákójíní, dóó bínazhneeztą́ą́ʼ danohsiní. Ákohgo, bee hazʼáanii bikʼeh dahonółʼį́įgo, dóó danihidziilgo iiná deiyínółtʼééhgo, níhoníyáadi yisdáádoohááł. Áádóó díí éí ákótʼée doo. Amen.