Nephi Binaaltsoos Áłtséhígíí
Naatʼáanii dóó Naʼnitiní Nilínéedą́ą́ʼ
Lehi dóó beʼesdzą́ą́ Sariah baa haneʼ, dóó biyeʼké dį́į́ yiltʼéego, (alą́ąjįʼígíí bee hodeesʼá) Laman, Lemuel, Sam, dóó Nephi daolyé. Diyin Bóhólníihii Lehi kéyah Jerusalemdóó dah didíínááł yidííniid, háálá diné doo ákogi ádáátʼįįłígíí náásgóó ádadooníłígíí yił ííshją́ą́ áyiilaa dóó beʼiinaʼ yíká ádaatʼį́įgo biniinaa. Baʼáłchíní diné doo kééhatʼíní góneʼ yił yinéełgo tááʼ yiską́. Nephi dóó bikʼiské kéyah Jerusalemgóó Jew dineʼé baa haneʼgo naháásdzoígíí yíká nináskai. Tiʼdahoozniiʼígíí baa haneʼ. Ishmael bitsiʼ danilínígíí yił ahidahidiikai. Baʼáłchíní yił diné doo kééhatʼíní góneʼ yił dah diikai. Diné doo kééhatʼínígi bichʼįʼ ndahwiisnááʼ dóó tiʼdahoozniiʼígíí baa haneʼ. Háájígo yíkaiígíí baa haneʼ. Tónteel bąąhdę́ę́ʼ níná. Nephi bikʼiské bikʼijįʼ ńdiilteeʼ. Yighaʼdeetʼą́, dóó tsinaaʼeeł áyiilaa. Ákweʼé Bountiful yee dahóózhiʼ. Tónteel tséʼnaa bił nidaʼazéél ńléí kéyah aaʼdeetʼą́ąjįʼ, dóó ákódaatʼéii. Díí Nephi baa haneʼ bikʼehgo ályaa; éí doodago kótʼáo ááłdishní, shí, Nephi, díí naháasdzooígíí íishłaa.
Wóltaʼii 1
Nephi bidineʼé yaa halneʼgo háʼíizo—Lehi ił ííshją́ą́ eʼelʼį́ kǫʼ yadiitʼiʼgo yiiʼ yiyiiłtsą́ dóó naaltsoos Diyin bikʼehgo áhodoonííł bee haʼoodzíʼígíí yiyííłtaʼ—Diyin God yaa haznih, Messiah doogáłígíí yaa hoolneʼ, dóó Jerusalem doolchxǫǫłgo yaa hoolneʼ—Jew dineʼé atídabiłʼį́. Jesus bidiʼdoochííłjįʼ 600 B.C. yihahgo ádahóótʼįįd.
1 Shí, Nephi, amá dóó azhéʼé yáʼátʼéhígíí shishchį́, éí bąą shizhéʼé kʼasdą́ą́ʼ tʼáá ałtsoní bił bééhózinígíí yee nashineeztą́ą́ʼ; dóó tʼóó ahayóí bikʼee tiʼhooshníihgo shiiníłką́, ákótʼée ndi, Diyin Bóhólníihii tʼáá íiyisíí shikʼijídlíigo shiiníłką́; aooʼ, tʼóó ahayóí Diyin God biyáʼátʼéehii dóó bitsʼą́ą́dóó tʼáá aaníinii tʼahdoo ííshją́ą́ ádaalnéehii shił bééhózingo, éí bąą shiiníłką́ iishłaaígíí baa náʼiisóóh.
2 Aooʼ, shizhéʼé bizaadkʼehjí náʼiisóó, éiyá Jew dineʼé yidahoołʼą́ą́ʼ dóó Egypt dineʼé bizaad bee hadilyaa.
3 Áádóó shił bééhózingo haneʼ náházooígíí éí tʼáá aaníí átʼé; dóó tʼáá shí shílaʼ bee áshłééh; dóó shił béédahózinígíí bikʼehgo áshłééh.
4 Háálá baa hoolzhiizh Zedekiah, Judah binaatʼáanii, tʼóó áłtsé dah neezdáádóó, (shizhéʼé, Lehi, Jerusalemgi tʼéí kééhatʼį́įgo biiníłką́); dóó ákweʼé yihahgo tʼóó ahayóí Diyin yá yádaałtiʼii niheeskai, éí diné ádaańdaʼoohkąąh deiłní, doodago éí Jerusalemgi kintah ayóóʼátʼéii doolchxǫǫł éí Diyin bikʼeh áhodoonííłgo yee hadahaasdzííʼ.
5 Ákohgo baa hoolzhiizh shizhéʼé, Lehi, yigáałgo, Diyin Bóhólníihii yichʼįʼ bidineʼé bijéí tʼáá ńtʼę́ę́ʼ yee, yá sodoolzin.
6 Áádóó baa hoolzhiizh Diyin Bóhólníihii yichʼįʼ sodoolzįįłgo, ákweʼé kǫʼ yadiitʼiʼgo dóó bidáahgi tsé yikááʼ dah yildóh; dóó ląʼída yiyiiłtsą́ dóó yidiiztsʼą́ą́ʼ; dóó yiyiiłtsánígíí dóó yidiiztsʼą́ʼígíí biniinaa bitah hodiisnááʼ dóó tʼáá íiyisíí bitah hoditłíd silį́į́ʼ.
7 Áádóó baa hoolzhiizh Jerusalemgi tʼáá bí bighangi nádzá; dóó bitsáskʼeh yikáaʼjįʼ ádee ádzoolghaal, Iiʼ Sizį́ Diyinii dóó yiyiiłtsánée bideʼádzaa.
8 Dóó Iiʼ Sizį́ Diyinii kótʼéego bideʼádzaa, ił ííshją́ą́ eʼelʼį́ hoł ádzaa, áko yáʼąąsh ąą ádzaaígíí yiyiiłtsą́, dóó Diyin God bikááʼdahʼasdáhí yikááʼ dah sidá dziniizį́į́ʼ, Diyin yá ndaalʼaʼí tʼáadoo bee néelání biDiyin God yináztʼiʼgo yá dahataał dóó yaa dahaniihgo yiyiiłtsą́.
9 Áádóó baa hoolzhiizh Łaʼ yáʼąąsh biyiʼdę́ę́ʼ adah joogáałgo yiyiiłtsą́, dóó bitsʼádiʼnílídígíí ałnéʼéʼáago johonaaʼéí adiníłdíín bilááh átʼéego yaa áko niizį́į́ʼ.
10 Áádóó ałdóʼ naakitsʼáadah bikééʼ yikáhgo yiyiiłtsą́, dóó sǫʼ yádiłhiłdi dah naaznilígíí bilááh ádaatʼéego bitsʼádaʼdeezdíín.
11 Áádóó adaakai dóó nahasdzáán yikááʼgóó dah diikai; dóó áłtsé yigáłę́ę shizhéʼé yaa niyá dóó yidááhdoo yiizįʼ, dóó naaltsoos léiʼ béiniʼą́, dóó tsʼídá yídííłtah bidííniid.
12 Áádóó baa hoolzhiizh yoołtáhgo, Diyin Bóhólníihii biʼIiʼ Sizį́ Diyinii hwiiʼ hooleʼ.
13 Dóó yiyíiłtaʼ, kóníigo: Yíi, yíi, Jerusalem bichʼįʼ, háálá dajoodláhígíí nihił yííłtsą́! Aooʼ, dóó shizhéʼé ląʼí Jerusalem bídadéétʼiʼ yiyííłtaʼ—éí tsʼídá doolchxǫǫł, dóó yiiʼ kéédahatʼíinii ałdóʼ; tsʼídá ląʼída bééshhał bee nidooltsxił, dóó tsʼídá ląʼí dabiʼdisnánígíí Babylongóó áhidoogééł.
14 Áádóó baa hoolzhiizh shizhéʼé yaa ííłtaʼgo ląʼí ayóó ádaatʼéii dóó ayóó ádanoolninii yiyiiłtsą́, Diyin Bóhólníihii ląʼída yee bichʼįʼ yááłtiʼ; díigi átʼáo: ninaanish ayóó átʼé dóó nizhóní yeeʼ, O Bóhólníihii Diyin God Ayóóʼánóodziilii! Yáʼąąsh aghánahóóʼáadi dah sínídá, dóó neʼadziil, dóó niyáʼátʼéehii, dóó nihokááʼ dineʼé ałtso ajoobaʼ bee bikʼidiníʼį́į́ʼ; dóó, neʼajoobaʼ biniinaa, naaheeskai doo nitsʼą́ą́ʼ yóóʼ ahidookah da!
15 Dóó shizhéʼé díigi átʼáo biDiyin God saad yee yaa hasnih; háálá biiʼ sizíinii yaa bił hóózhǫǫd, dóó bijéí biiʼ haʼdéébįįd, yiyiiłtsánée biniinaa, aooʼ, éí Diyin Bóhólníihii bił ííshją́ą́ áyiilaa.
16 Dóó kʼad shí, Nephi, shizhéʼé náyíizoyę́ę éiyá doo ałtso náhideesoh da, háálá ił ííshją́ą́ eʼelʼį́ dóó nayiiyééł yiiʼ yiyiíłtsánée éiyá ląʼída yaa náyíizo; dóó ałdóʼ ląʼí ádahodoonííł dóó baʼáłchíní yee yichʼįʼ hahaasdzíʼę́ę éiyá yaa náʼíízoh, éi doo ałtso baa náʼiideesoh da.
17 Ákondi shiiníłką́ągo ííshłaaígíí baa náʼiideeso. Áko shooh, shizhéʼé náyiizohígíí áłtsʼíísígo ííshłaa, béésh tʼą́hítʼááshí shílaʼ bee ídeishłaaígíí bikáaʼjįʼ; ákohgo, shizhéʼé náyiizohígíí áłtsʼíísoo ííshłaaígíí bikéédóó índa shí sheʼiinaʼ baa hashneʼgo náhideeso.
18 Díí bąą, tsʼídá nihił bééhodoozįįł éí nísin, Diyin Bóhólníihii ląʼída tsʼídá danizhónígíí shizhéʼé, Lehi, yichʼįʼ ííshją́ą́ áyiilaa dóó bikʼéédóó, aooʼ, éí Jerusalem doolchxǫǫł bidéetiʼgi, áko shooh dineʼé yitahgóó nikidiiyá, dóó Diyin bikʼehgo áhodooníłígíí yaa ahoʼniilneʼ dóó yiyííłtsą́ dóó yidiiztsʼą́ʼę́ę yił chʼííníʼą́.
19 Áádóó baa hoolzhiizh Jew dineʼé yee yichʼįʼ yááłtiʼę́ę biniinaa tʼóó bá nidaháłtiʼ; háálá tʼáá aaníí bibąąhági ádaatʼéii dóó ayóó dajoodláii yaa naakaií yaa yááłtiʼ; dóó yiyiiłtsánée dóó yidiiztsʼą́ʼę́ę yaa yááłtiʼ, dóó ałdóʼ naaltsoos biyiʼ yaa iíłtaʼígíí, tʼáá bééhózínígo Messiah doogááł, dóó ałdóʼ nahasdzáán yá nináʼnídláhígíí.
20 Dóó Jew dineʼé díídí deidiiztsʼą́ąʼgo bichʼįʼ bá dahóóchįįd; aooʼ, ałkʼidą́ą́ʼ diyin yá yádaałtiʼii ádayiilaaígiʼ átʼáo, éí chʼídeineeskaad, dóó ndéineesneʼ, dóó ndéistseed; dóó ałdóʼ dashidiyoołhééłgo yíká ádáátʼįįd. Ákondi shooh, shí, Nephi, Diyin Bóhólníihii tʼáá ałtso yikʼi dadiilniiʼígíí yaa aʼááh niizį́įgo yaa dajoosbaʼígíí nihił ííshją́ą́ ádeeshłííł, daʼoosdląʼígíí biniinaa, áko yinahjįʼ dabidziilgo adziilii yee yisdéídooʼish.